ဝၼ်းတီႈ 09/08/2025 ၼႆႉ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ႁွင်ႉဢဝ်ႁွင်ႈၵၢၼ် ၾၢႆႇၵူတ်ႇထတ်း ၵူၼ်းၶဝ်ႈမိူင်း မႃးၵဵပ်းသဵၼ်ႈသၢႆမၢႆ ၵူၼ်းၼႂ်းဝၢၼ်ႈႁူဝ်ပိုၵ်ႉ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႃႇႁၢင်ႈႁႅၼ်းႁဵတ်းမၢႆၾၢင်ပၼ်ၵူၼ်းပိုၼ်ႉတီႈ။

ၵူၼ်းပိုၼ်ႉတီႈ ၸႄႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ဢၼ်မႃးၸႂ်ႉႁဵတ်းမၢႆၾၢင်ၼႆႉ ပဵၼ်ၵဝ်ႈၵၢင်ႉၶဝ်။ ပေႃးၶႂ်ႈႁဵတ်းမၢႆၾၢင်မၢၼ်ႈၼႆ ႁႂ်ႈၵႂႃႇႁဵတ်းတီႈလုမ်း မိူဝ်ႈလဵဝ် ၶဝ်ယွၼ်းတၢင်းၸွႆႈထႅမ်ဝႆႉႁႂ်ႈ ႁဵတ်းပၼ်ၵူၼ်းမိူင်းၼႆၶႃႈဢေႃႈ။ ၵူၺ်းၵႃႈ လုမ်းၶဝ်သမ်ႉ တေဢမ်ႇလူင်းမႃးတီႈဝၢၼ်ႈသေႁဵတ်း တေလႆႈၵႂႃႇႁဵတ်းတီႈလုမ်းၶဝ်ၼၼ်ႉၼႃႇ။ မိူဝ်ႈလဵဝ်ၼႆႉ သဵၼ်ႈမၢႆမၼ်းတႄႉ ၶဝ်ႁႂ်ႈၵႂႃႇပၼ်တီႈ ဢေးသျႃးဝေႃး ဢၼ်ပဵၼ်တီႈလိၼ်ၸၢပ်ႈၵၼ် တီႈၵဵတ်ႉၵဝ်ႇမိူဝ်ႈၵူႈပွၵ်ႈၼၼ်ႉၼေႈ။ ႁႂ်ႈၵူၼ်းဝၢၼ်ႈၼႆႉ ၵႂႃႇပၼ်သဵၼ်ႈမၢႆတီႈၼၼ်ႈဢွၼ်တၢင်းၼႆဢိူဝ်ႈ။ မီးၵူၼ်းၵႃႈႁိုဝ်ၼႆ ၶဝ်တေႁဵတ်းပၼ်ယဝ်ႉ ၸိူင်ႉၼၼ်ၵႂႃႈ”- ဝႃႈၼႆ။

တီႈဝၢၼ်ႈႁူဝ်ပိုၵ်ႉၼႆႉ သိုၵ်းၵဝ်ႈၵၢင်ႉၶဝ် မွၵ်ႇႁွင်ႉဢဝ်လဝၵမၢၼ်ႈသေ မႃးႁဵတ်းပၼ်ဝႂ်မုင်ႉႁေႃႁိူၼ်းလႄႈ မၢႆၾၢင်။ ၶဝ်လူင်းမႃးႁဵတ်းပၼ် ၵူၼ်းဢၼ်ဢမ်ႇမီးသင်သေမဵဝ်းလႄႈ ၵူၼ်းဢၼ်မီးဝႂ်မုင်ႉႁေႃ ႁိူၼ်းယူႇ ၵူၺ်းၵႃႈ ပႆႇမီးမၢႆၾၢင် ၸိူဝ်းၼႆႉ။ ယဝ်ႉၵေႃႈ ၵူၼ်းၸိူဝ်းမီး လုၵ်ႈလၢင်းထိုင်ပၢၼ်ယဝ်ႉ လူဝ်ႇႁဵတ်းမၢႆၾၢင်ၸိူဝ်းၼႆႉ မိူဝ်ႈလဵဝ်တႄႉ ၶဝ်မႃးဢဝ်သဵၼ်ႈသၢႆမၢႆမၼ်းဝႆႉ – ၵူၼ်းပိုၼ်ႉတီႈလၢတ်ႈ။

ဢၼ်မႃးႁဵတ်းပၼ်မၢႆၾၢင်တႃႇၵူၼ်းမိူင်းၼႆႉ ပဵၼ်ၽွၼ်းလီတွၼ်ႈတႃႇၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈၼႆသေတႃႉ သမ်ႉပဵၼ်တိုဝ်ႉတၢင်း တႃႇၵူၼ်းမိူင်းၶႄႇၶဝ် မႃးႁဵတ်းမၢႆၾၢင်ပႃး ၼႆယဝ်ႉ။

“ဢၼ်ၼႆႉ ၶဝ်ဢဝ်တိုဝ်ႉတၢင်းတႃႇၶဝ်ၵူၺ်းဢိူဝ်ႈ။ ၶႄႇၶဝ်ၼႆႉ ၶႅၼ်ႇႁႅင်းၼႃႇ လဵၵ်ႉလဵၵ်ႉတေႃႇယႂ်ႇ ပိူၼ်ႈတိုၼ်းမေႃဢဝ်တိုဝ်ႉတၢင်းပိူၼ်ႈ ႁႂ်ႈပေႃးတဵမ်ထူၼ်ႈၼၼ်ႉၼႃႇ။ ပေႃးမႃးတူၺ်းၶႄႇၶဝ်ၼႆႉ တိုၼ်းမီးဝႂ်ၵိူတ်ႇ ဝႂ်သႂ်ႇသၢႆမၢႆ တႃႇမီးမၢႆၾၢင်ၵၼ်ၵေႃႈ ၶဝ်တိုၼ်းႁဵတ်းႁႂ်ႈမၼ်းလႆႈၼၼ်ႉၼႃႇ။ သိုၵ်းၵဝ်ႈၵၢင်ႉၵေႃႈ ၶဝ်တေၸွႆႈၸၢဝ်းၶိူဝ်းၶဝ်သေၵႂႃႇၵူၺ်း။ ၶဝ်လႆႈ ၸႂ်မၢႆၾၢင်မၢၼ်ႈႁႅင်းၼႃႇလူး။ ၵွပ်ႈပိူဝ်ႈၼၼ်လႄႈ ဢၼ်ၼႆႉလႆႈဝႃႈ ၶဝ်ႁႃၼမ်ႉတွၼ်းတႃႇၶဝ်ၵူၺ်း။ ပေႃးဝႃႈတႄႉတႄႉမၼ်း ၶဝ်ဝႆႉပုၼ်ႈၶႄႇၶဝ်သေ မီးၶႄႇၵမ်ႈၼမ်ဢိူဝ်ႈ ဢၼ်ၵႂႃႇသႂ်ႇသဵၼ်ႈမၢႆမၼ်းတင်းၼမ်ၼႃ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

တပ်ႉသိုၵ်းၵဝ်ႈၵၢင်ႉ MNDAA တိုၵ်ႉသိုပ်ႇၵုမ်းၵမ်ဝႆႉ တီႈဝၢၼ်ႈႁူဝ်ပိုၵ်ႉ ၸႄႈဝဵင်းလႃႈသဵဝ်ႈၼႆႉသေ တႃႇမႄးၶိုၼ်းႁိူၼ်းယေးၵူၼ်းဝၢၼ်ႈ ဢၼ်လူႉၵွႆၽွင်းပၢင်တိုၵ်းၸိူဝ်းၼၼ်ႉ မိူဝ်ႈဝၼ်းတီႈ 08/07/2025 ၼၼ်ႉ ၶဝ်သၢႆႈတႅၼ်းပၼ် ၼိုင်ႈႁိူၼ်းလႂ်ၼိုင်ႈႁဵင်ထိုင် သၢမ်ႁဵင်ယႂၼ်ႊငိုၼ်းၶႄႇ (ဢၼ်ၵိုင်ႇငိုၼ်းမၢၼ်ႈ 6 သႅၼ်ထိုင် 20 သႅၼ်ပျႃး)။

ယွၼ်ႉႁႅင်းမိပ်ႇဢီးမိူင်းၶႄႇသေ မိူဝ်ႈဝၼ်းတီႈ 22/04/2025 ၼၼ်ႉ တပ်ႉသိုၵ်းၵဝ်ႈၵၢင်ႉ MNDAA လႆႈ ထွႆဢွၵ်ႇပၼ်ၼႂ်းဝဵင်းလႃႈသဵဝ်ႈသေ ၵႂႃႇပၵ်းတပ်ႉဝႆႉ တီႈယၢၼ်ဝဵင်းမွၵ်ႈ 4 လၵ်းၼၼ်ႉ။ ၼႂ်းဝဵင်းတႄႉ သိုၵ်းမၢၼ်ႈ တိုၵ်ႉသိုပ်ႇၽွင်းငမ်းဝႆႉတေႃႇထိုင်ယၢမ်းလဵဝ် ၼႆယဝ်ႉ။