ဝၼ်းတီႈ 6/8/2025 ၾူၼ်တူၵ်းႁၢဝ်ႈႁႅင်း ၼမ်ႉႁူၺ်ႈၼမ်ႉလွႆ ၼွင်းလေႃႇၶဝ်ႈယွင်ၵဵပ်းၼမ်ႉဝၢၼ်ႈလုၵ်းပႃ ၊ ၼမ်ႉလူၼ်ႉယွင် ၼွင်းထူမ်ႈၸွမ်းသဵၼ်ႈတၢင်းၵႂႃႇ ၼွင်ပိင်-ပုင်ႇဝူဝ်း လႄႈ ထူမ်ႈပႃးႁိူၼ်းယေးၵူၼ်းမိူင်း ၸိူဝ်းမီးၼႂ်းပွၵ်ႉ 5 ထုင်ႉၼွင်ပိင် ၸႄႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇ။

ၼမ်ႉၵိုင်ႉၵၢင်ႉလူၼ်ႉလုပ်ႇၼွင်းမႃးႁႅင်းလႄႈ ၽဵဝ်ႈဢဝ်ၵႂႃႇပႃး ရူတ်ႉၵႃးၸိူဝ်းတိုၵ်ႉလႅၼ်ႈယူႇၸွမ်းသဵၼ်ႈတၢင်း ၵႃးလမ်းၼိုင်ႈ လွင်ႈလႆၵႂႃႇၸွမ်းၼမ်ႉ၊ ၼႂ်းၼၼ်ႉ ပႃးၵူၼ်းၵႂႃႇၸွမ်း သွင်ၵေႃႉ ႁၢၼ်ႉတေႃႇထိုင်ယၢမ်းလဵဝ် (ဝၼ်းတီႈ 7 ယၢမ်းၵၢင်ၼႂ်) ယင်းပႆႇႁၼ်ၶိုၼ်းၼႆ ၼၢင်းယိင်း ဢႃႇယု 30 ပၢႆ ၵေႃႉယူႇၼႂ်း ထုင်ႉၼွင်ပိင် လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈဝႃးၼႆႉ ၾူၼ်တူၵ်းတင်းဝၼ်းၼႃႇ။ ထိုင်တၢမ်းၶမ်ႈၵေႃႈ ၼမ်ႉပေႃးထူမ်ႈထိုင်ၸွမ်းတူင်ႈၼႃး ဢၼ်မီးႁိမ်းႁၢၼ်ႉၶၢႆၼမ်ႉမၼ်း သူၺ်ႇလႃႉမိၼ်းၸိူဝ်းၼၼ်ႉယဝ်ႉ။ ၵႃးလမ်းၼၼ်ႉသမ်ႉ မၼ်းထၢင်ႇဝႃႈ တေပူၼ်ႉၼႆႁႄ လတ်းၶၢမ်ႈသဵၼ်ႈတၢင်း၊ ၼႂ်းၼၼ်ႉပႃးၵူၼ်း ၶီႇၵႂႃႇၸွမ်းသွင်ၵေႃႉ။ ၼႂ်ၼႆႉ ပိူၼ်ႈႁၼ်တူဝ်တၢႆၶိုၼ်းၵေႃႉၼိုင်ႈယဝ်ႉ ၵိုတ်းၵေႃႉၼိုင်ႈပႆႇႁၼ်။ၼမ်ႉ တီႈဢၢင်ႇၵဵပ်းၼမ်ႉ ဝၢၼ်ႈလုၵ်းပႃ ဢမ်ႇလူၼ်ႉ ၼွင်းႁႅင်းၸိူင်ႉၼႆ ႁိုင်မႃးၶၢဝ်းတၢင်း 15 ပီယဝ်ႉ။ ”

လႆႈႁူႉဝႃႈ ၵႃးဢၼ်လွင်ႈလႆၵႂႃႇၸွမ်း ၼမ်ႉလုပ်ႇၼွင်းၼိူဝ်သဵၼ်ႈတၢင်းၼႆႉ ပဵၼ်ၵႃးၵူၼ်းပၢႆႈၽေး သႅၼ်းမၢၵ်ႇ 12 လိမ်းလမ်းၼိုင်ႈ၊ ၵႃးဢွၼ်ႇသွင်လမ်း၊ ရူတ်ႉၶိုင်ႈလမ်းၼိုင်ႈ။ ၵႃးဢွၼ်ႇလမ်းၼိုင်ႈဢၼ်လွင်ႈလႆၵႂႃႇၼၼ်ႉ ၶိုၼ်းၵႂႃႇထူပ်းႁၼ်တီႈၼႂ်းပွၵ်ႉ 6 ထုင်ႉၼွင် ပိင်။ ယၢမ်းလဵဝ် ၾၢႆႇၸုမ်းၸွႆႈထႅမ်ၵၢၼ်တူင်ႇဝူင်းၵူၼ်း ၼႂ်းထုင်ႉၼွင်ပိင်ၶဝ် ၶတ်းၸႂ်ၸွမ်းႁႃ ရူတ်ႉၵႃးၸိူဝ်းလွင်ႈလႆၸွမ်းၼမ်ႉၵႂႃႇ ၼၼ်ႉယူႇ။

ယွၼ်ႉၼမ်ႉၼႂ်းဢၢင်ႇၵဵပ်းၼမ်ႉ ဝၢၼ်ႈလုၵ်းပႃ လူၼ်ႉၼွင်းလႄႈ လုပ်ႇထူမ်ႈသႂ်ႇ ႁိူၼ်းယေးၵူၼ်းမိူင်း ၼႂ်းပွၵ်ႉၼႂ်းယွမ်ႇ ၸိူဝ်းမီးယူႇ ၼႂ်းထုင်ႉၼွင်ပိင်ၵူၺ်းဢမ်ႇၵႃး လုပ်ႇၼွင်းထူမ်ႈသႂ်ႇပႃး သူၼ်ၶဝ်ႈၵၢပ်ႇ၊ သူၼ်ဢွႆႈ လႄႈ တူင်ႈၼႃးတင်းၼမ်။ ႁဵတ်းႁႂ်ႈၵူၼ်းမိူင်း လူႉယႂ်ႇ သုမ်းၼမ်ၸွမ်း ၼႆယဝ်ႉ။

လိူဝ်ၼၼ်ႉ ၵူၼ်းပၢႆႈၽေးပၢင်တိုၵ်း ၸိူဝ်းလုၵ်ႉတၢင်း ဝဵင်းၼွင်ၶဵဝ်၊ ဝဵင်းၵျွၵ်ႉမႄး၊ ဝဵင်းသီႇပေႃႉ ၵႂႃႇသွၼ်ႈယူႇဝႆႉၼႂ်းထုင်ႉၼွင်ပိင် ၸႄႈဝဵင်းၵျွၵ်ႉမႄးၼၼ်ႉၵေႃႈ ယွၼ်ႉၼမ်ႉၼွင်းသေ လႆႈၶၢႆႉၵႂႃႇသွၼ်ႈယူႇဝႆႉထႅင်ႈဢွင်ႈတီႈလွတ်ႈၽေး။ ၼႂ်းထုင်ႉၼွင်ပိင်ၼႆႉ မီးပၢင်သဝ်းပၢႆႈၽေးပၢင်တိုၵ်း တႃႇ 7 ဢွင်ႈတီႈသေ မိူဝ်ႈဢွၼ်တၢင်း ႁူဝ်ၼပ်ႉၵူၼ်းပၢႆႈၽေးသိုၵ်း မီးယူႇမွၵ်ႈ ၼိုင်ႈမိုၼ်ႇၵေႃႉ၊ ယၢမ်းလဵဝ် ၵိုတ်းယူႇမွၵ်ႈ 2000 ၵေႃႉပၢႆ ၼႆယဝ်ႉ။