ႁူဝ်လိူၼ်ဢေႃႊၵတ်ႊသ်ၼႆႉ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် တႂ်ႈၵုမ်းၵမ်သိုၵ်းမၢၼ်ႈယိုတ်းမိူင်း ပႂ်ႉၸွမ်းသဵၼ်ႈတၢင်းလႄႈ ၶဝ်ႈသွၵ်ႈထိုင် ၼႂ်းႁိူၼ်းယေး ၵူၼ်းၸိူဝ်းမီးလွင်ႈထၢင်ႇထိူမ်ႇ ၼႂ်းၸႄႈဝဵင်းလႃႈသဵဝ်ႈ၊ ၸႄႈဝဵင်းၵဵင်းတုင်လႄႈ ၸႄႈဝဵင်းတူၼ်ႈတီး ၸိူဝ်းၼႆႉသေ တီႉၺွပ်းလႆႈယႃႈမဝ်းၵမ်ၸမ် 4 မိုၼ်ႇမဵတ်ႉ ၼႆယဝ်ႉ။
ယႃႈမဝ်းၵမ်ၸိူဝ်းတီႉၺွပ်းလႆႈ ၼႂ်းၶၢဝ်းတၢင်းသွင်ဝၼ်း တႃႇသၢမ်ၸႄႈဝဵင်းၼႆႉ မီးယူႇ 36,800 မဵတ်ႉသေ ၵိုင်ႇငိုၼ်းတႃႇ 204 သႅၼ်ပျႃး။ ၵူၼ်းၸိူဝ်းၺႃးတီႉၺွပ်း ပဵၼ်ၵူၼ်းၸၢႆး ၸၢဝ်းၶိူဝ်းၶႄႇ၊ ၸၢဝ်းၶိူဝ်းပဢူဝ်းလႄႈ ၸၢဝ်းၶိူဝ်းမၢၼ်ႈ ဢႃယု သႅၼ်း 23 ပီ တေႃႇ 55 ပီ ၼႆယဝ်ႉ။
မိူဝ်ႈဝၼ်းတီႈ 2 ယၢမ်းႁူဝ်ၶမ်ႈမွၵ်ႈ 6 မူင်း ၸုမ်းပလိၵ်ႈၶဝ် ၵူတ်ႇထတ်း ရူတ်ႉၶိူင်ႈလမ်းၼိုင်ႈ တီႈသဵၼ်ႈတၢင်းပၼ်ႇလဵပ်ႈၼွင်တုင် (နောင်တုံကန်ပတ်လမ်း) ပွၵ်ႉ 5 ဝဵင်းၵဵင်းတုင် ၼၼ်ႉသေ ထူပ်းႁၼ်ယႃႈမဝ်းၵမ် တီႉၺွပ်းဝႆႉၵူၼ်းၸၢႆးၸၢဝ်းၶႄႇ သွင်ၵေႃႉလႄႈ ရူတ်ႉၶိူင်ႈလမ်းၼိုင်ႈ၊ ၼႂ်းဝၼ်းတီႈ 5 ယၢမ်းၵၢင်ၶမ်ႈ ၸဝ်ႈၼႃႈတီႈၶဝ် ၶဝ်ႈသွၵ်ႈၵူတ်ႇထတ်း ၼႂ်းႁိူၼ်းၵူၼ်းၵေႃႉထုၵ်ႇထၢင်ႇထိူမ်ဝႃႈ ၵႃႉၶၢႆယႃႈမဝ်းၵမ် ယူႇၼႂ်းပွၵ်ႉ 9 သဵၼ်ႈတၢင်းဢိၼ်ႇၵျိၼ်း (အင်ကြင်းလမ်း) ဝဵင်းလႃႈသဵဝ်ႈလႄႈ ၼႂ်းပွၵ်ႉၽြႃးၽိူၵ်ႇ (ဘုရားဖြူ ရက်ကွက်) ၸႄႈဝဵင်းတူၼ်ႈတီးၼၼ်ႉသေ တီႉၺွပ်းလႆႈယႃႈမဝ်းၵမ် ၶူဝ်းၶွင်ၵၢင်လႄႈ ၵူၼ်းၸၢႆးၵႃႉၶၢႆၼၼ်ႉ သွင်ၵေႃႉ ၼႆယဝ်ႉ။
လႆႈႁူႉဝႃႈ ယၢမ်းလဵဝ် ၸုမ်းပလိၵ်ႈၾၢႆႇၵူတ်ႇထတ်းၽဵဝ်ႈမူၺ်ႉယႃႈမဝ်းၵမ်မိူင်းမၢၼ်ႈၶဝ် တီႉၺွပ်းဢဝ်ၶူဝ်း ၶွင်ၵၢင်လႄႈ ၵူၼ်းၸိူဝ်းမီးတၢင်းၽိတ်း ၶမ်ၶွၵ်ႈၶင်ဝႆႉတီႈႁူင်းပလိၵ်ႈ ဝဵင်းၽႂ်မၼ်းသေ ပိုတ်ႇလိူင်ႈဢဝ်တၢင်းၽိတ်းဝႆႉ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်း (ၾိင်ႈမိူင်း) မီးဝႆႉၼၼ်ႉသေ ႁဵတ်းႁႂ်ႈၸႂ်ၵူၼ်းလႅၵ်ႈလၢႆႈ ယွၼ်ႉယႃႈမဝ်းၵမ် ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ