တႄႇဝၼ်းတီႈ 04/08/2025 ၼႆႉမႃး ပၢင်ၵုမ်ၶိုၵ်ႉတွၼ်း တႃႇဢုပ်ႇဢူဝ်းၵႄႈလိတ်ႈပၼ်ႁႃ ၵၢၼ်သိုၵ်း၊ ၵၢၼ်မိူင်း ၼႂ်းမိူင်းႁူမ်ႈတုမ်မၢၼ်ႈၼႆသေ ႁူဝ်ပဝ်ႈ ၸုမ်းဢႃႊသီႊယၼ်ႊ ဢွၼ်ႁူဝ်ၼမ်းၼႃႈ ႁွင်ႉဢဝ်ၵူႈမူႇၵူႈၸုမ်း ၸိူဝ်းၵဵဝ်ႇၶွင်ႈ ၶဝ်ႈႁူမ်ႈပၢင်ၵုမ်ၸွမ်း တီႈႁူင်းႁႅမ်း Putrajaya Marriott ဝဵင်းၵူဝ်ႊလူဝ်ႊလမ်ႊပူဝ်ႊ မိူင်းမလေးသျႃး။

ၼႂ်းပၢင်ၵုမ်ၶိုၵ်ႉတွၼ်း တႃႇဢုပ်ႇဢူဝ်းၵႄႈလိတ်ႈပၼ်ႁႃ ၵၢၼ်သိုၵ်း၊ ၵၢၼ်မိူင်း မိူင်းမၢၼ်ႈၼၼ်ႉ မီးၶွင်ႇသီႇၵိူဝ်းၵုမ်လွင်ႈၽွမ်ႉႁူမ်ႈ ၵၢၼ်ၸိူဝ်ႉၸၢတ်ႈ (NUCC) ၊ ၶွမ်ႊမတီႊတႅၼ်းတၢင်သၽႃးမိူင်းႁူမ်ႈတုမ် (CRPH) ၊ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) လႄႈ တူဝ်တႅၼ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵမ်ႈၽွင်ႈ ၵႂႃႇၶဝ်ႈႁူမ်ႈၸွမ်း ၼႆယဝ်ႉ။

ပၢင်ၵုမ်ၶိုၵ်ႉတွၼ်းပွၵ်ႈၼႆႉ ပဵၼ်ဢၼ်တေႃႇမႃးတီႈပၢင်ၵုမ်ဢၼ်ၵႂႃႇၸတ်းႁဵတ်း တီႈဝဵင်းၵူဝ်ႊလူဝ်ႊလမ်ႊပူဝ်ႊ မိူင်းမလေးသျႃး မိူဝ်ႈဝၼ်းတီႈ 23-26/06/2025 ၼၼ်ႉသေ ဢၼ်လမ်ႇလွင်ႈသုတ်း ဢုပ်ႇဢူဝ်းၵၼ် လွင်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေဢွၼ်ၼမ်းၸတ်းႁဵတ်း ၼႂ်းႁၢင်ပီ 2025 ၼႆႉသေ ငဝ်းလၢႆးၵၢၼ်သိုၵ်း ၸဵမ်ၸိူဝ်းၼႆႉ။

ၵဵဝ်ႇလူၺ်ႈပၢင်ၵုမ်ၶိုၵ်ႉတွၼ်းၼႆႉသေ ၽူႈထတ်းသၢင်ၵၢၼ်မိူင်း၊ ၵၢၼ်သိုၵ်း ၵေႃႉႁူႉႁၼ်ၸွမ်းလွင်ႈၼႆႉ လၢတ်ႈၼႄဝႃႈ -“တင်းသဵင်ႈၼႆႉ မၼ်းတိုၼ်းမီးလွင်ႈၵွင်ႉၵၢႆႇၵၼ်ယူႇ။ တႄႇၸဵမ်မိူဝ်ႈမိူင်းမလေးသျႃး လႆႈႁပ်ႉပုၼ်ႈၽွၼ်း ပဵၼ်ႁူဝ်ပဝ်ႈ ၸိုင်ႈမိူင်းဢႃႊသီႊယၼ်ႊ ဢွၼ်တၢင်းသုတ်းၼၼ်ႉမႃး ၶတ်းၸႂ်ႁွင်ႉဢဝ် ၵူႈၸုမ်းၸုမ်းႁူပ်ႉဢုပ်ႇၵၼ်။ တင်ႈတႄႇၼၼ်ႉမႃး လႆႈဢုပ်ႇၵၼ် လွင်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေဢွၼ်ၼမ်းၸတ်းၼႆႉ”- ဝႃႈၼႆ။

တီႈပၢင်ၵုမ်ၶိုၵ်ႉတွၼ်း ဢၼ်မီးၵူႈမူႇၵူႈၸုမ်းဢုပ်ႇဢူဝ်းၵၼ်ၼႆႉ မိူဝ်ႈလိူၼ်ၵျုၼ်ႊပူၼ်ႉမႃး ၾၢႆႇသိုၵ်းမၢၼ်ႈ ႁၢင်ႈႁႅၼ်းတူဝ်တႅၼ်းၵႂႃႇၶဝ်ႈႁူမ်ႈဢုပ်ႇဢူဝ်းၸွမ်းသေတႃႉ ပွၵ်ႈၼႆႉတႄႉ တူဝ်တႅၼ်းၾၢႆႇသိုၵ်း မၢၼ်ႈဢမ်ႇလႆႈၵႂႃႇၶဝ်ႈႁူမ်ႈၸွမ်း။ ၽွင်းတိုၵ်ႉၸတ်းႁဵတ်းပၢင်ၵုမ် ၶိုၵ်ႉတွၼ်းယူႇၼႆႉ ၾၢႆႇသိုၵ်းမၢၼ်ႈ ယိုတ်းမိူင်း ၸႂ်ႉတိုဝ်းႁိူဝ်းမိၼ်တိုၵ်း၊ ၶိူင်ႈၵွင်ႈလူင်လႄႈ ႁႅၼ်းဢဝ်သၢႆသိုၵ်း တပ်ႉပႆလိၼ်၊ ၶိူင်ႈတရူၼ်ႊ ၸိူဝ်းၼႆႉ ပွႆႇမၢၵ်ႇယိုဝ်းသႂ်ႇ ၼႂ်းၼႃႈတီႈ ၸုမ်းသိုၵ်းၸၢဝ်းၶိူဝ်းၵုမ်းၵမ်ဝႆႉၸူဝ်ႈၶၢဝ်းၼၼ်ႉသေ ၵူၼ်းမိူင်း ၸိူဝ်းဢမ်ႇမီးတၢင်းၽိတ်း လႆႈမၢတ်ႇၸဵပ်းလူႉတၢႆၵႂႃႇၸွမ်း တင်းၼမ် ၼႂ်းမိူင်းႁူမ်ႈတုမ်မၢၼ်ႈ။

ပႃႇတီႇၼူၵ်ႉယုင်း (NLD) ဢၼ်လႆႈႁပ်ႉလိၵ်ႈယိုၼ်ႈထိုင် တႃႇၵႂႃႇၶဝ်ႈႁူမ်ႈၸွမ်း ပၢင်ၵုမ်ၶိုၵ်ႉတွၼ်းၼၼ်ႉၵေႃႈ မိူဝ်ႈဝၼ်းတီႈ 03/08/2025 ၼႆႉ ဢဝ်ၶေႃႈဢၢင်ႈဝႃႈ မီးလွင်ႈယၢပ်ႇၽိုတ်ႇ တႃႇဢွၵ်ႇၶၢဝ်းတၢင်းၵႂႃႇမိူင်း ၼွၵ်ႈၼႆသေ ဢမ်ႇၵႂႃႇၶဝ်ႈႁူမ်ႈၸွမ်း ပၢင်ၵုမ်ၶိုၵ်ႉတွၼ်းသေတႃႉ ပိုၼ်ၽၢဝ်ႇဢွၵ်ႇလိၵ်ႈတုမ်ႉတွပ်ႇ ဢၼ်လႆႈတႅမ်ႈသူင်ႇတီႈတူဝ်တႅၼ်းၶိုၵ်ႉတွၼ်း မိူင်းမလေးသျႃး ဢၼ်ၵွင်ႉၵၢႆႇတင်း မိူင်းမၢၼ်ႈ Othman Hashim ၼၼ်ႉ မီးၶေႃႈတုၵ်းယွၼ်းထိုင်တႃႇ 8 ၶေႃႈ ပဵၼ်တၢင်းၵၢၼ်ဝႆႉ။

ၼႂ်းလိၵ်ႈတုမ်ႉတွပ်ႇယိုၼ်ႈထိုင်တီႈ တူဝ်တႅၼ်းၶိုၵ်ႉတွၼ်း မိူင်းမၢၼ်ႈ ၼႂ်းမိူင်းမလေးသျႃးၼၼ်ႉ တုၵ်းယွၼ်းဝႆႉ ႁႂ်ႈသိုၵ်းမၢၼ်ႈ ပွႆႇပၼ်ၶိုၼ်း ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸူႉၵျီႇ၊ ၸွမ်ၸိုင်ႈမိူင်း ႁူမ်ႈတုမ် ဢူးဝိၼ်းမိၼ်ႉလႄႈ ၵူၼ်းၸိူဝ်းတူၵ်းၶွၵ်ႈ ယွၼ်ႉၵၢၼ်မိူင်းတင်းသဵင်ႈ ၵူၺ်းဢမ်ႇၵႃး တုၵ်းယွၼ်းႁႂ်ႈသိုၵ်းမၢၼ်ႈ ၵိုတ်းၵၢၼ်ၸႂ်ႉတိုဝ်းႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဢွင်ႈတီႈမီးၵူၼ်းမိူင်းယူႇသဝ်းလႄႈ ယွၼ်းယႃႇႁႂ်ႈၸိုင်ႈမိူင်းဢႃႊသီႊယၼ်ႊ မၵ်းမၼ်ႈပၼ်ပၢင်လိူၵ်ႈတင်ႈ ဢၼ်တေၸတ်းႁဵတ်းၼႂ်း ႁၢင်ပီ 2025 ၼႆႉ ပဵၼ်တၢင်းၵၢၼ် ၸဵမ်ၸိူဝ်းၼႆႉ။

ၽူႈၼမ်းၼႂ်းလူင်ၵဝ်ႇ ၽွင်းလူင် ႁွင်ႈၵၢၼ် ၾၢႆႇၵပ်းသိုပ်ႇမိူင်းၼွၵ်ႈ မိူင်းမလေးသျႃး Othman Hashim ၼႆႉ လႆႈႁပ်ႉပုၼ်ႈၽွၼ်း တူဝ်တႅၼ်းၾၢႆႇၵပ်းသိုပ်ႇၵပ်းသၢၼ်ၶိုၵ်ႉတွၼ်း တႃႇမိူင်းမၢၼ်ႈ မိူဝ်ႈပၢင်ၵုမ်လူင် ဢႃႊသီႊယၼ်ႊ ဢၼ်ၸတ်းႁဵတ်းၵႂႃႇ ၼႂ်းဝၼ်းတီႈ 09/01/2025 ပူၼ်ႉမႃးၼၼ်ႉ။

ၸိုင်ႈမိူင်းဢၼ်လႆႈႁပ်ႉပုၼ်ႈၽွၼ်းပဵၼ်ႁူဝ်ပဝ်ႈ ၸိုင်ႈမိူင်းဢႃႊသီႊယၼ်ႊၼႆႉ ပဵၼ်မိူင်းပရူႊၼၢႆႊ၊ မိူင်းၵမ်ႇပူးၶျႃး၊ မိူင်းဢိၼ်ႊတူဝ်ႊၼီးသျႃးလႄႈ မိူင်းလၢဝ်း ႁပ်ႉပုၼ်ႈၽွၼ်းၵၼ်မႃး ၼိုင်ႈၸိုင်ႈမိူင်းလႂ် ၼိုင်ႈပီယဝ်ႉသေ ၶတ်းၸႂ်ႁဵတ်းသၢင်ႈ ၽေႃႇၼမ်ႉၼႄတူဝ် ၶေႃႈတူၵ်းလူင်း 5 ၶေႃႈ တႃႇၵိုတ်းယိုတ်း ၵၢၼ်ႁုၵ်းႁၢႆႉ ပတ်းပိုၼ်ႉၸိုင်ႈမိူင်း၊ ၸတ်းႁဵတ်းပၢင်ဢုပ်ႇ ဢူဝ်း တႃႇၵႄႈလိတ်ႈပၼ်ႁႃ၊ မၵ်းမၼ်ႈ ၽွင်းတၢင်ၶိုၵ်ႉတွၼ်း မိူင်းဢႃႊသီႊယၼ်ႊ၊ ပၼ်သုၼ်ႇလႆႈတိုဝ်ႉတၢင်း တႃႇၵမ်ႉၸွႆႈလႆႈ ၵူၼ်းတေႃႇၵူၼ်းၼင်ႇၵၼ်လႄႈ ပႃးၸဵမ် ၶေႃႈတႃႇ ႁႂ်ႈတူဝ်တႅၼ်းၶိုၵ်ႉတွၼ်း ဢႃႊသီႊယၼ်ႊ ၵႂႃႇဢႅဝ်ႇထိုင်လႆႈ မိူင်းႁူမ်ႈတုမ်မၢၼ်ႈ ၼႆၸိူဝ်းၼႆႉ။

တႅမ်ႈ – ၽူၺ်းၼုမ်ႇ