တႃႇတေလႆႈႁၼ် ၶႅပ်းႁၢင်ႈ ဢမ်ႇၼၼ် ဝီႊတီႊယူဝ်ႊ ၵူၼ်းၵေႃႉၼိုင်ႈတဵင်ႇဝႆႉ ပွတ်းတွၼ်ႈၶိူင်ႈမိၼ် သေပွတ်းသေတွၼ်ႈၼၼ်ႉ ဢမ်ႇငၢႆႈ၊ ပဵၼ်လွင်ႈဢၼ်ၼၢၼ်းလႆႈႁၼ်ဝႆႉ။ သင်ဝႃႈႁၼ်မႅၼ်းၺႃးၼႆၵေႃႈ ပွင်ႇဝႃႈ ၶိူင်ႈမိၼ်ၼၼ်ႉ ၺႃးယိုဝ်းတူၵ်း ဢမ်ႇၼၼ် ယၢတ်ႇတူၵ်းႁင်းၵူၺ်း ၵူၺ်း။ၼႂ်းပီၵၢႆမႃးပီၼႆႉ ၵႆႉလႆႈယိၼ်းၶၢဝ်ႇ ႁိူဝ်းမိၼ်တိုၵ်း ၶွင်သိုၵ်းမၢၼ်ႈၵႆႉၵႆႉၺႃးယိုဝ်းတူၵ်း။ ယွၼ်ႉသင်လႄႈ သိုၵ်းလုၵ်ႉၽိုၼ်ႉယိုဝ်းႁိူဝ်းမိၼ်သိုၵ်းမၢၼ်ႈတူၵ်းငၢႆႈပေႃးပဵၼ်ထၢၼ်ႇၼႆႉ။ ဢၼ်ၺႃးယိုဝ်းတူၵ်းၸိူဝ်းၼၼ်ႉပဵၼ်ႁိူဝ်းမိၼ်ၸိူင်ႉႁိုဝ်လၢႆလၢႆ ။

မိူဝ်ႈဝၼ်းတီႈ 3 လိူၼ်ၵျူႊလၢႆႊၼၼ်ႉ လႆႈႁၼ်မႅၼ်ႈၶႅပ်းႁၢင်ႈ လႄႈ ဝီႊတီႊယူဝ်ႊ ဢၼ်ၸုမ်းသိုၵ်း ယၢင်းလႅင်(KNDF) ၶဝ် တဵင်ႇဝႆႉပွတ်းတွၼ်ႈ ၶိူင်ႈမိၼ်ဢၼ်ၵွႆ သႅၼ်းFTC – 2000Gသိုၵ်းမၢၼ်ႈ တီႈၼႂ်းဝဵင်း ၽႃသွင်ႇ(ဖားဆောင်း) ၊ မိူင်းယၢင်းလႅင်။

မိူဝ်ႈၼႂ်းလိူၼ်ၵျုၼ်ႊၼၼ်ႉၵေႃႈ ၸုမ်းလုၵ်ႉၽိုၼ်ႉၶဝ် ယိုဝ်းၶိူင်ႈမိၼ်သိုၵ်းမၢၼ်ႈ သႅၼ်း F-7 (ၶိူင်ႈ မိၼ် ဢၼ်မိူင်းၶႄႇႁဵတ်းဢွၵ်ႇ) တူၵ်းတီႈၼႂ်းၸႄႈဝဵင်းပလႄး၊ တိူင်းၸႄႈၵႅင်း။ ၶႅပ်းႁၢင်ႈ လႄႈ ၶလိပ်ႉဝီႊတီႊ ယူဝ်ႊ ၸွတ်ႇၽႄႈၵႂႃႇ တီႈၼိူဝ်သူဝ်ႊသျႄႊမီႊတီႊယိူဝ်ႊ မိူၼ်ၵၼ်။

သိုၵ်းမၢၼ်ႈၼႆႉ သိုဝ်ႉၶိူင်ႈမိၼ်ၸိူဝ်းမူတ်းဢႃယု မိူၼ်ၼင်ႇ သႅၼ်း F-7 သေ ၶိုၼ်းဢဝ်မႃးၸႂ်ႉတိုဝ်း တီႈ ၼႂ်းပၢင်တိုၵ်း ၼႂ်းမိူင်းဝႃႈၼႆသေတႃႉၵေႃႈ ၶိူင်ႈမိၼ်သႅၼ်းFTC – 2000G ဢၼ်ၺႃးယိုဝ်းတူၵ်းၼႆႉတႄႉ ပဵၼ် ၶိူင်ႈမိၼ်တိုၵ်း ဢၼ်တိုၵ်ႉတႄႇႁဵတ်းဢွၵ်ႇဝႆႉ မိူဝ်ႈပီ 2018 ၼၼ်ႉၵူၺ်း။

လွင်ႈၶိူင်ႈမိၼ်သိုၵ်းမၢၼ်ႈသႅၼ်းFTC – 2000G ၺႃးယိုဝ်းတူၵ်း တီႈၼႂ်းမိူင်းယၢင်းလႅင်ၼႆႉ ဢမ်ႇၸႂ်ႈပွၵ်ႈ ၵမ်းႁႅၵ်ႈယဝ်ႉ၊ယွၼ်ႉဝႃႈ မိူဝ်ႈၼႂ်းလိူၼ် January ပီ 2024 ၼၼ်ႉ သိုၵ်းၶၢင် KIA ၶဝ်ယၢမ်ႈယိုဝ်းတူၵ်း တီႈ ၼမ်ႉၽၵ်းၵႃ၊ မိူင်းတႆးပွတ်းႁွင်ႇ မႃးယဝ်ႉၵမ်းၼိုင်ႈ။

ၶိူင်ႈမိၼ် သႅၼ်းFTC – 2000G ဢၼ်မိူင်းၶႄႇ ႁဵတ်းဢွၵ်ႇ

ၶိူင်ႈမိၼ်သႅၼ်းFTC – 2000G ပဵၼ်ၶိူင်ႈမိၼ်တိုၵ်းသႅၼ်းမဝ် ဢၼ်ၸႂ်ႉတိုဝ်းလႆႈၵူႈၾၢႆႇ မိူၼ်ၼင်ႇၸႂ်ႉတိုဝ်း ၼႂ်းၽႅၼ်ၵၢၼ်တိုၵ်း ၼိူဝ်ၵၢင်ႁၢဝ် လႄႈ ၸႂ်ႉတိုဝ်းၼႂ်းၽႅၼ်ၵၢၼ်တိုၵ်း ၼိူဝ်လိၼ်။

လိူဝ်ၼၼ်ႉ ဢဝ်ၸႂ်ႉတိုဝ်းပဵၼ် ၶိူင်ႈမိၼ်သွပ်ႇၶၢဝ်ႇ လႄႈ မိူဝ်ႈၽွင်းလူဝ်ႇၶဝ်ႈၸမ်သေ ပိုတ်းယိုဝ်းၸွႆႈ ၸိူဝ်းၼႆႉ။

ၾၢင်ႁၢင်ႈ ဝႅပ်ႇယၢင်ႇ(design) မၼ်းၵေႃႈ ၶူင်သၢင်ႈႁဵတ်းဢွၵ်ႇဝႆႉပၼ် တႃႇတေဢဝ်ၾိုၵ်းၽွၼ်ႉ ၵၢၼ်သိုၵ်း ၸၼ်ႉသုင် (Advanced Jet Trainer) ပႃး။

မိူဝ်ႈၽွင်းၶိူင်ႈမိၼ် သႅၼ်းၼႆႉဢွၵ်ႇမႃးၼၼ်ႉ မိူင်းမၢၼ်ႈပဵၼ်မိူင်းဢၼ်တၢင်ႇသဵၼ်ႈမၢႆသင်ႇသိုဝ်ႉဝႆႉ ၸဝ်ႉ လိူဝ်ပိူၼ်ႈမိူင်းၼိုင်ႈ။ မိူဝ်ႈဝၼ်းၶွပ်ႈၶူပ်ႇ ပီၵွၼ်းသႅင် တပ်ႉလူမ်းသိုၵ်းမၢၼ်ႈ ၼႂ်းပီ 2022 ၼၼ်ႉၵေႃႈ လႆႈႁၼ်မီးပႃး ၶိူင်ႈမိၼ်သႅၼ်းၼႆႉ။

ယၢမ်းလဵဝ် တပ်ႉလူမ်းသိုၵ်းမၢၼ်ႈမီးဝႆႉ ၶိူင်ႈမိၼ်သႅၼ်း FTC – 2000G ၼႆႉ 12 လမ်းယဝ်ႉ။

ၵဵဝ်ႇလူၺ်ႈၶိူင်ႈမိၼ်သႅၼ်း FTC – 2000G ယၢတ်ႇတူၵ်းၼႂ်းဝၼ်းတီႈ 3 လိူၼ်ၵျုၼ်ႊလၢႆႊၼၼ်ႉသေ သိုၵ်းယၢင်းလႅင် (KNDF) တႄႉ ပိုၼ်ၽၢဝ်ႇဝႆႉဝႃႈ ပဵၼ်ၶဝ်ယိုဝ်းတူၵ်း ဝႃႈၼႆ။

ၽူႈမီးပုၼ်ႈၽွၼ်း တီႈႁွင်ႈၵၢၼ်ၾၢႆႇပွင်ႇၶၢဝ်ႇ ၵပ်းသိုပ်ႇငဝ်ႈငုၼ်း သိုၵ်းယၢင်းလႅင်(KNDF) လၢတ်ႈဝႃႈ ၼႂ်းဝၼ်းတီႈ 2 လိူၼ်ၵျုၼ်ႊလၢႆႊ ယၢမ်းၵၢင်ၸဝ်ႉ မိူဝ်ႈၽွင်းၶိူင်ႈမိၼ်တိုၵ်း 4 လမ်းၵႂႃႇပွႆႇမၢၵ်ႇ ၼႂ်းပၢင်တိုၵ်း ဝဵင်းၽႃသွင်ႇၼၼ်ႉ လႆႈယိုဝ်းတူၵ်းၶိူင်ႈမိၼ်လမ်းၼိုင်ႈ၊ ထူပ်းႁၼ်ၶၢပ်ႈတူဝ်တၢႆၵူၼ်း 2 ၵေႃႉ ဢၼ်လႅပ်ႈ တေပဵၼ် ၵူၼ်းၶပ်းၶိူင်ႈမိၼ် ဝႃႈၼႆ။

ၵူၺ်းၵႃႈ တီႈၼႂ်းလိၵ်ႈပိုၼ်ၽၢဝ်ႇသိုၵ်းမၢၼ်ႈ ဢၼ်ပိုၼ်ၽၢဝ်ႇဢွၵ်ႇ ၼႂ်းဝၼ်းတီႈ 3 လိူၼ်ၵျူၼ်ႊၼၼ်ႉ တႄႉ လၢတ်ႈဝႆႉဝႃႈ – ၼႂ်းဝၼ်းတီႈ 1 လိူၼ်ၵျူၼ်ႊလၢႆႊၼၼ်ႉ ၶိူင်ႈမိၼ်တိုၵ်းသိုၵ်းမၢၼ်ႈ လမ်းၼိုင်ႈ ၽွင်း တိုၵ်ႉၾိုၵ်းၽွၼ်ႉမိၼ် ၵႂႃႇၶၢဝ်းတၢင်းၵႆယူႇၼၼ်ႉ ၵိုင်ႉၵၢင်ႉၶၢတ်ႇလွင်ႈၵပ်းသိုပ်ႇသေ ႁၢႆလၢႆၵႂႃႇ ဝႃႈၼႆ။

ၸုမ်းၾၢႆႇလဵပ်ႈႁဵၼ်းလွင်ႈႁူမ်ႇလူမ်ႈ လႄႈ ၵၢၼ်သိုၵ်း ၼႂ်းမိူင်းမၢၼ်ႈ(MDSI) တႄႉလၢတ်ႈဝႃႈ – လွင်ႈဝႃႈ သိုၵ်းယၢင်းလႅင် (KNDF) ၶဝ်ယိုဝ်းတူၵ်းဢၼ်ဝႃႈၼၼ်ႉ လႅပ်ႈတေဢမ်ႇပဵၼ်လႆႈ၊ ယွၼ်ႉဝႃႈ ဝၼ်းဢၼ် ၶိူင်ႈမိၼ်တိုၵ်းသိုၵ်းမၢၼ်ႈ ၶၢတ်ႇလွင်ႈၵပ်းသိုပ်ႇၵႂႃႇလႄႈ ဝၼ်းဢၼ်သိုၵ်းယၢင်းလႅင်ၶဝ် ထူပ်းႁၼ်ဢွင်ႈ တီႈ ၶိူင်ႈမိၼ်တူၵ်းၼၼ်ႉ ၶၢဝ်းယၢမ်းပိူင်ႈၵၼ်ဝႆႉဝၼ်းၼိုင်ႈ၊ ၺႃးယိုဝ်းတူၵ်းတႄႉလႅပ်ႈဢမ်ႇပဵၼ်လႆႈ၊  လႅပ်ႈတေယၢတ်ႇတူၵ်းၵႂႃႇ ႁင်းၵူၺ်းၵူၺ်း ဝႃႈၼႆ။

ၵူၺ်းၵႃႈ ၽူႈထတ်းသၢင်ၵၢၼ်သိုၵ်း ၵေႃႉၼိုင်ႈတႄႉလၢတ်ႈဝႃႈ – လွၵ်းၶႅင်ၶိူင်ႈမိၼ် FTC – 2000G ၼၼ်ႉ လႅပ်ႈတေၶိုၼ်းယဵၼ်းပဵၼ် လွၵ်းဢူၼ်ႈၵႂႃႇ၊ ၶိူင်ႈမိၼ်လႅပ်ႈတေၺႃးယိုဝ်းတူၵ်း မိူဝ်ႈၽွင်းမိၼ်ၶဝ်ႈ ၵႂႃႇၸမ် သေ ၵႂႃႇပွႆႇမၢၵ်ႇၼႂ်းပၢင်တိုၵ်း ဝႃႈၼႆ။

ၶိူင်မိၼ်မိူင်းၶႄႇႁဵတ်းဢွၵ်ႇ ၺႃးလွင်ႈလူႉသုမ်းထပ်းၵၼ်ဝႆႉ

မိူဝ်ႈဝၼ်းတီႈ 10 လိူၼ်ၵျူၼ်ႊၼၼ်ႉ ၸုမ်းလုၵ်ႉၽိုၼ်ႉၶဝ် ယိုဝ်းတူၵ်းၶိူင်ႈမိၼ်တိုၵ်းသိုၵ်းမၢၼ်ႈ သႅၼ်း F-7 တီႈၼႂ်း ၸႄႈဝဵင်းပလႄး၊ တိူင်းၸႄႈၵႅင်း။

လိူဝ်ၼၼ်ႉ မိူဝ်ႈဝၼ်းတီႈ 11 လိူၼ် November ပီ 2023 ၼၼ်ႉၵေႃႈ ၶိူင်ႈမိၼ်တိုၵ်းသိုၵ်းမၢၼ်ႈ သႅၼ်း K-8W ၺႃးယိုဝ်းတူၵ်းလမ်းၼိုင်ႈ တီႈဝဵင်းလွႆၶေႃ၊ မိူင်းယၢင်းလႅင်။ မိူဝ်ႈၼၼ်ႉ တီႉၺွပ်းလႆႈပႃးတူဝ်လိပ်း ၽူႈၶပ်းၶိူင်ႈမိၼ် ပဵၼ်ၸဝ်ႈႁၢၼ် ၶၢႆႇတၢၼ်ႉမူဝ်း။

ၶိူင်ႈမိၼ်သႅၼ်း K-8  ၼႆႉ ယူႇတီႈမိူင်းၶႄႇ တင်း မိူင်းပႃႊၵိတ်ႊသတၼ်ႊ ႁူမ်ႈၵၼ်သေ ႁဵတ်းဢွၵ်ႇဝႆႉ။ ပဵၼ်သႅၼ်းၶိူင်ႈမိၼ်ၵျႅတ်ႉ ၶီႇလႆႈၸွမ်းၵၼ်သွင်ၵေႃႉသေ ၸႂ်ႉတိုဝ်းၼႂ်းၵၢၼ်ၾိုၵ်းၽွၼ်ႉမိၼ်ဝႃႈၼႆသေ တႃႉ ဢဝ်ၸႂ်ႉတိုဝ်းပဵၼ်ၶိူင်ႈမိၼ်တိုၵ်းသႅၼ်းမဝ် ၵေႃႈလႆႈ။

ယၢမ်းလဵဝ် တီႈၼႂ်းတပ်ႉသိုၵ်းမၢၼ်ႈမီးဝႆႉ ၶိူင်ႈမိၼ်တိုၵ်းသႅၼ်း K-8  26 လမ်း၊ ဢၼ်သင်ႇသိုဝ်ႉဝႆႉၵေႃႈ တိုၵ်ႉမီးထႅင်ႈယူႇ ၼႆယဝ်ႉ။

မိူဝ်ႈဢွၵ်ႇၶၢဝ်းတၢင်းၵႂႃႇမိူင်း ရၢတ်ႉသျႃး ႁူဝ်ၼႃႈသိုၵ်းမၢၼ်ႈ ၵႂႃႇထိုင် ႁူင်းၸၢၵ်ႈႁဵတ်းဢွၵ်ႇႁိူဝ်းမိၼ်မႅင်းမီႈ

မိူဝ်ႈႁၢင်လိူၼ်ၵျုၼ်ႊပူၼ်ႉမႃးၼႆႉ ႁူဝ်ၼႃႈသိုၵ်းမၢၼ်ႈယိုတ်းမိူင်း ၸွမ်ၸိၵ်းသိုၵ်း မိၼ်းဢွင်ႇလၢႆႇ ဢွၵ်ႇ ၶၢဝ်းတၢင်းၵႂႃႇတီႈ မိူင်းရၢတ်ႉသျႃး၊ မိူဝ်ႈၼၼ်ႉ ၵႂႃႇထိုင်တီႈ ႁူင်းၸၢၵ်ႈႁဵတ်းဢွၵ်ႇ ႁိူဝ်းမိၼ်မႅင်းမီႈ တီႈထုင်ႉ ဢူႇလၼ်ဢူႇတေး။

ထုင်ႉလိၼ် သၢႆႊပေႊရီႊယႃႊ လႄႈ ဢူႇလၼ်ဢူႇတေး ၼႆႉ ပဵၼ်ပိုၼ်ႉတီႈၵႆဝဵင်း ၵႂႃႇမႃးယၢပ်ႇၽိုတ်ႇသေ ၵမ်ႈၼမ် ၸႂ်ႉႁိူဝ်းမိၼ်မႅင်းမီႈ ၵႂႃႇမႃးၵူၺ်း။

ႁိူဝ်းမိၼ်မႅင်းမီႈ ဢၼ်တပ်ႉသိုၵ်းမၢၼ်ႈ ၸႂ်ႉယူႇၵမ်ႈၼမ်ၵေႃႈ ပဵၼ်ၶွင်မိူင်းရၢတ်ႉသျႃးႁဵတ်းဢွၵ်ႇသေ တၢင်တူဝ်ႁူဝ်ၼႃႈသိုၵ်းမၢၼ်ႈ ၵႂႃႇထိုင် တီႈဢွင်ႈႁဵတ်းဢွၵ်ႇႁိူဝ်းမိၼ်မႅင်းမီႈၼၼ်ႉ ဝႃႈၼႆ။

ၸွမ်ၸိၵ်းသိုၵ်း မိၼ်းဢွင်ႇလၢႆႇ လႄႈ မေးၼၢင်းမၼ်း တေႃႇၵျူႇၵျူႇလႃႉ ၼႆႉ ၶီႇတင်းႁိူဝ်းမိၼ်မႅင်းမီႈ Ulan-Ude Aviation Plant ႁဵတ်းဢွၵ်ႇၼၼ်ႉသေ ၶီႇၵႂႃႇထိုင် တီႈဢွင်ႈႁဵတ်းဢွၵ်ႇႁိူဝ်းမိၼ်မႅင်းမီႈ၊ ၽွင်းမီး ယူႇၼိူဝ်ႁိူဝ်းမိၼ်ၼၼ်ႉ လိူၵ်ႈၾၢင်ႁၢင်ႈ Design ႁိူဝ်းမိၼ်မႅင်းမီႈထႅင်ႈ ဝႃႈၼႆ။

တီႈဢွင်ႈ Ulan-Ude Aviation Plant ၼၼ်ႉ ႁူဝ်ၼႃႈသိုၵ်းမၢၼ်ႈ သင်ႇသိုဝ်ႉဝႆႉ ႁိူဝ်းမိၼ်မႅင်းမီႈထႅင်ႈ၊ ပဵၼ်သႅၼ်းၸိူင်ႉႁိုဝ်၊ သိုၵ်းမၢၼ်ႈသင်ႇသိုဝ်ႉဝႆႉလၢႆလမ်း လွင်ႈႁူဝ်ယွႆႈၸိူဝ်းၼႆႉတႄႉ ပႆႇလႆႈႁူႉတႅတ်ႈတေႃး။

ႁိူဝ်းမိၼ်တိုၵ်း ၸၼ်ႉသုင်သုတ်း ဢၼ်တပ်ႉသိုၵ်းမၢၼ်ႈမီးဝႆႉၼႆႉ ပဵၼ်သႅၼ်း SU-30 သေ မိူင်းရၢတ်ႉ သျႃးႁဵတ်းဢွၵ်ႇဝႆႉ။ ႁိူဝ်းမိၼ်တိုၵ်း သႅၼ်းၼႆႉ တပ်ႉသိုၵ်းမၢၼ်ႈ မီးဝႆႉ 4 လမ်း။

ၸိုင်ႈမိူင်းၼိူဝ်လုမ်ႈၾႃႉပွတ်းတူၵ်း ၵမ်ႈၼမ် ပိၵ်ႉဢိုတ်းႁႄႉႁၢမ်ႈတပ်ႉသိုၵ်းမၢၼ်ႈဝႆႉလႄႈ ဝၢႆးလင်ၼႆႉ တပ်ႉသိုၵ်းမၢၼ်ႈ လႆႈၸႂ်ယႂ်ႇပိုင်ႈဢိင် ႁိူဝ်းမိၼ် ဢၼ်မိူင်းၶႄႇ လႄႈ မိူင်းရၢတ်ႉသျႃးႁဵတ်းဢွၵ်ႇၼၼ်ႉၵူၺ်း ဝႃႈၼႆ။