တႄႇႁၢင်လိူၼ်ၵျူႊလၢႆႊ ထိုင် ႁူဝ်လိူၼ်ဢေႃးၵၢတ်ႉသ်  ထိုင်ဝၼ်းမိူဝ်ႈၼႆႉ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈလိၼ် ၸုမ်းသိုၵ်းတဢၢင်းၵုမ်းၵမ်ဝႆႉၸူဝ်ႈၶၢဝ်း ႁၢဝ်ႈႁႅင်းထပ်းၵၼ်လၢႆဝၼ်း ၶၢဝ်းတၢင်းသွင်ဝူင်ႈၵွႆး ႁဵတ်းႁႂ်ႈၵူၼ်း မိူင်း လူႉတၢႆမၢတ်ႇၸဵပ်းၸွမ်း 75 ၵေႃႉ  ။

မိူဝ်ႈၼႆႉ ဝၼ်းတီႈ 4 ယၢမ်းၵၢင်ၼႂ်မွၵ်ႈ 10 မူင်းၶိုင်ႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇ ၼႂ်းပွၵ်ႉ 6 တူၵ်းသႂ်ႇႁိမ်းၵၢတ်ႇ တႃႈရူတ်ႉၾႆး ၾၢႆႇၼႃႈႁွင်ႈယႃ “ၸေႇယႃႇၽဵဝ်း” ႁၢၼ်ႉၶၢႆၵုၼ်ႇယွႆႈ လႄႈ တူၵ်းသႂ်ႇၾၢႆႇၼႃႈ ႁူင်းႁဵၼ်းသုၼ်ႇလဵဝ် “တေႃႇၶျေႃး”  ဝဵင်းၵျွၵ်ႉမႄး ၼႃႈတီႈသိုၵ်းတဢၢင်းၵုမ်းၵမ်ၸူဝ်ႈၶၢဝ်း။

ၵူၼ်းမိူင်းၵေႃႉယူႇ ၼႂ်းၸႄႈဝဵင်းၵျွၵ်ႉမႄး လၢတ်ႈၼႄတီႈၽူႈတွႆႇႁွၵ်ႈဝႃႈ “ ငိၼ်းဝႃႈ ၼၢင်းယိင်း မၢတ်ႇၸဵပ်းၵႂႃႇၸွမ်း 3 ၵေႃႉ။ ၸၢၵ်ႇ မၢၵ်ႇသဵၼ်တိူဝ်ႉၺႃးသႂ်ႇဢိတ်းၼိုင်ႈလႄႈ ဢမ်ႇပေႃးလႆႈမႆႈၸႂ်ႁႅင်းၵႃႈႁိုဝ် ” ၼႆယဝ်ႉ။

ၸွမ်းၼင်ႇၸုမ်းၶၢဝ်ႇ ၽူႈတွႆႇႁွၵ်ႈ တိုတ်ႉတၢမ်းၵဵပ်းႁွမ်ဝႆႉ သဵၼ်ႈမၢႆၵူၼ်းမိူင်းၸိူဝ်းလူႉတၢႆမၢတ်ႇၸဵပ်းၵႂႃႇၸွမ်း ယွၼ်ႉမၢၵ်ႇလူင် ႁိူဝ်းမိၼ်တိုၵ်းသိုၵ်းမၢၼ်ႈ မိူဝ်းပွႆႇၼႂ်းၼႃႈတီႈသိုၵ်းတဢၢင်း ၵုမ်းၵမ် ဝႆႉၸူဝ်ႈၶၢဝ်း မိူင်းတႆးပွတ်းႁွင်ႇၼႆႉ ၶၢဝ်းတၢင်းသွင်ဝူင်ႈၵွႆး ၵူၼ်းမိူင်းလူႉတၢႆ 25 ၵေႃႉ မၢတ်ႇၸဵပ်းၵႂႃႇ 50 ၵေႃႉ ႁူမ်ႈသဵၼ်ႈမီး 75 ၵေႃႉ။

ဝဵင်းၵျွၵ်ႉမႄးၼႆႉပႃးၼႂ်း 63 ဝဵင်းဢၼ်သိုၵ်းမၢၼ်ႈပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉ မိူဝ်ႈဝၼ်းတီႈ 31/07/2025 ၼၼ်ႉဝဵင်းၼိုင်ႈသေ ၶဝ်ႈ ပႃးၼႂ်းသဵၼ်ႈၸိုဝ်ႈဝဵင်းဢၼ်သိုၵ်းမၢၼ်ႈပိုၼ်ၽၢဝ်ႇ တေၸတ်းၽႅၼ်တိုၵ်းတေႃႇ ၼႆၼၼ်ႉ။ ၵူၼ်းပၵ်းတႃၵၢၼ်မိူင်းၶဝ်လၢတ်ႈဝႃႈ ဝဵင်းၸိူဝ်းပႃးၼႂ်းသဵၼ်ႈမၢႆ သိုၵ်းမၢၼ်ႈပိုၼ်ၽၢဝ်ႇၼၼ်ႉ ၸၢင်ႈၺႃးႁိူဝ်းမိၼ်သိုၵ်းမၢၼ်ႈ မႃးပွႆႇမၢၵ်ႇလႄႈ ႁႂ်ႈၵူၼ်းမိူင်းၾၢင်ႉယူႇၾၢင်ႉ ၵိၼ်ပႃးဝႃႈၼႆဝႆႉ။

မိူဝ်ႈပူၼ်ႉမႃး ဝၼ်းတီႈ 3 လိူၼ်ဢေႃးၵၢတ်ႉ ယၢမ်းတၢမ်းၶမ်ႈမွၵ်ႈ 2 မူင်းၶိုင်ႈၼၼ်ႉၵေႃႈ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝဵင်းသီႇပေႃႉ ဢွင်ႈတီႈတပ်ႉၵဝ်ႇသိုၵ်းမၢၼ်ႈ ၶလရ 23 ၼၼ်ႉ မၢၵ်ႇလူင်ႁႅင်း 500 ပွင်ႊ တႃႇ 4 လုၵ်ႈသေတႃႉ ယွၼ်ႉပဵၼ်ၼႂ်းဝၢင်း တပ်ႉသိုၵ်းၵဝ်ႇမၢၼ်ႈလႄႈ ဢမ်ႇမီးၵူၼ်းမိူင်းလူႉတၢႆမၢတ်ႇၸဵပ်းၸွမ်း ၼႆယဝ်ႉ။

လိူဝ်ၼၼ်ႉ မိူဝ်ႈဝၼ်းတီႈ 2 ယၢမ်းၵၢင်ဝၼ်းၼၼ်ႉၵေႃႈ ၸဝ်ႈၸၢင်း ၼႂ်းဝတ်ႉ(ၵျွင်း) ၼမ်ႉၸဵတ်းလိၼ်း တီႈပွၵ်ႉ 2 ဝဵင်းၵျွၵ်ႉမႄး ႁဵတ်းလွင်ႈမူတ်းသႂ်ႇ တီႇၽဵဝ်ႈၼႂ်းဝၢင်းၵျွင်းသေ ယဵပ်ႇၺႃးမၢၵ်ႇၾင်လိၼ်လႄႈ တိူဝ်ႉၺႃးတိၼ်ၾၢႆႇၶႂႃႇမၼ်းၸဝ်ႈၵႂႃႇႁၢဝ်ႈႁႅင်း ထိုင်တီႈလႆႈႁွင်ႉၵႂႃႇယူတ်းယႃတူဝ်ဝႆႉတီႈ ႁူင်းယႃလူင် ဝဵင်းလႃႈသဵဝ်ႈ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၾၢႆႇသိုၵ်းတဢၢင်း TNLA ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – ၼႂ်းလိူၼ်ၵျူႊလၢႆႊ လိူၼ်လဵဝ်ၵွႆး သိုၵ်း မၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇ ၼႂ်းဝဵင်းၵျွၵ်ႉမႄး၊ မိူင်းၵုတ်ႈ၊ ၼွင်ၶဵဝ်၊ မိူင်းငေႃႉ၊ မိူင်းလူင်၊ သီႇပေႃႉ လႄႈ ၵူတ်ႉၶၢႆ ၸိူဝ်းၼႆႉသေ ၵူၼ်းမိူင်း လႄႈ လုၵ်ႈဢွၼ်ႇ လူႉတၢႆၵႂႃႇၸွမ်း 27 ၵေႃႉ မၢတ်ႇၸဵပ်းၵႂႃႇၸွမ်း 82 ၵေႃႉ၊ ႁိူၼ်းၵူၼ်းမိူင်းလူႉၵွႆၵႂႃႇၸွမ်း 116 လင်၊ ႁူင်းႁဵၼ်း လူႉၵွႆ 2 လင် လႄႈ ဝတ်ႉဝႃးၽႃသိူဝ်ႇ လူႉၵွႆ 2 လင် ဝႃႈၼႆ။

ၸႄႈဝဵင်းၼႂ်းမိူင်းတႆး 15 ဝဵင်း ၸိူဝ်းၺႃးသိုၵ်းမၢၼ်ႈပိုၼ်ၽၢဝ်ႇ ၸတ်းၽႅၼ်ၵၢၼ်သိုၵ်းတေႃႇဝႆႉၼႆႉပဵၼ်ဝဵင်း ၼမ်ႉတူႈ၊ မၢၼ်ႈပဵင်း (မဘိမ်းမြို့နယ်) ၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ လၢဝ်ႇၵၢႆး(ၵၢတ်ႇၵဝ်ႇ)၊ ၵွင်းၸၢင်ႉ (ၵူင်းၵျၢၼ်း)၊ မိူင်းမိတ်ႈ၊ ၵျွၵ်ႉမႄး၊ သီႇပေႃႉ၊ မိူင်းလႃး ၸဵမ်ၸိူဝ်းၼႆႉ။

တႅမ်ႈ-ၽူၺ်းၼုမ်ႇ