မိူဝ်ႈၼႆႉ ဝၼ်းတီႈ 31/07/2025 တႄႇယၢမ်းၵၢင်ၼႂ်ၸဝ်ႉ 6 မူင်း သိုၵ်းတဢၢင်း TNLA ၵိုင်ႉၵၢင်ႉဢိုတ်းသဵၼ်ႈတၢင်းလူင်ၵႂႃႇမႃး ၵႄႈၵၢင်ဝဵင်းၼမ်ႉၶမ်း တင်း မူႇၸေႊ လူၺ်ႈဢမ်ႇမွၵ်ႇလၢတ်ႈၼႄလွင်ႈတၢင်းသင်လႄႈ ႁဵတ်းႁႂ်ႈၵူၼ်းမိူင်းဢမ်ႇၸၢင်ႈလတ်းၶၢမ်ႈ သဵၼ်ႈတၢင်း ၵႂႃႇၵၢတ်ႇႁဵတ်းၵၢၼ်ၵႃႉၶၢႆ၊ ၵႂႃႇသူင်ႇ လုၵ်ႈဢွၼ်ႇႁဵၼ်းသွၼ်လိၵ်ႈလၢႆး ၸဵမ်ၸိူဝ်းၼႆႉ ဝႃႈၼႆ။
သဵၼ်ႈတၢင်းလူင် တႃႇလုၵ်ႉဝဵင်းၼမ်ႉၶမ်းၵႂႃႇမႃး တၢင်းဝဵင်းမူႇၸေႊ ဢၼ်သိုၵ်းတဢၢင်းၵိုင်ႉၵၢင်ႉ ဢိုတ်းပႅတ်ႈၼၼ်ႉ ပဵၼ်သဵၼ်ႈ တၢင်း လုၵ်ႉမူႇၸေႊဢွၵ်ႇမႃး တၢင်းဝၢၼ်ႈသၢႆးၶၢဝ်ႇၼၼ်ႉတီႈၼိုင်ႈ၊ လုၵ်ႉၼမ်ႉၶမ်းဢွၵ်ႇမႃးတၢင်း ၵိၵ်ႉပွၵ်ႉမၢၼ်ႈၶမ်းၼၼ်ႉတီႈၼိုင်ႈ ၊ သဵၼ်ႈတၢင်းဢၼ်ၵႂႃႇတၢင်းတႃႈႁိူဝ်း ၵႂႃႇတၢင်းၾၢႆႇႁၢတ်ႇႁိၼ်-ၶေးၶုၼ်ႇၼၼ်ႉၵေႃႈ ၺႃးသိုၵ်းတဢၢင်းဢိုတ်းပႅတ်ႈၸွမ်းၵၼ်တင်း သဵင်ႈလႄႈ ၵူၼ်းမိူင်းဢမ်ႇၸၢင်ႈဢဝ်ရူတ်ႉၵႃး ၶၢမ်ႈၵႂႃႇမႃးၼႆ ၸၢႆးတႆးၵူၼ်းမိူင်း ၵေႃႉယူႇဝႆႉၼႂ်းဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“တေဢိုတ်းသဵၼ်ႈတၢင်းၼႆ မိူဝ်ႈဝႃးၵၢင်ၶမ်ႈပေႃးလိုၵ်းယဝ်ႉႁဝ်းၸင်ႇလႆႈႁူႉ။ ယွၼ်ႉသင်လႄႈဢိုတ်းၼႆၵေႃႈ ဢမ်ႇလၢတ်ႈၼႄႁႂ်ႈၸႅင်ႈလႅင်း။ ၶဝ်တႄႉဝႃႈ ၸူဝ်ႈၶၢဝ်းၵွႆးၼင်ႇၵဝ်ႇၼႆယူႇ။ ယၢမ်းလဵဝ် ၼႂ်းၵၢတ်ႇၵေႃႈ ဢမ်ႇပေႃးမီးၵူၼ်း၊ ၵၢၼ်သိုဝ်ႉၵၢၼ်ၶၢႆၵေႃႈ ၵိုင်ႉၵၢင်ႉယွမ်းၵႂႃႇတေႉတေႉ။ ၵွပ်ႈဝႃႈ ၵူၼ်းတၢင်းၼွၵ်ႈ ဢမ်ႇၸၢင်ႈၶၢမ်ႈလတ်းသဵၼ်ႈတၢင်းမႃးၼၼ်ႉၼႃႇ။ ပုင်ႇမၢၼ်ႇၼႆႉ ၵူၼ်းဝၢၼ်ႈၸိူဝ်းယူႇၸွမ်းသၢပ်ႇဝဵင်း တေဢွၼ်ၵၼ်မႃးၶၢႆၵၢတ်ႇ။ မိူဝ်ႈလဵဝ် ၶဝ်ဢမ်ႇၸၢင်ႈၶဝ်ႈမႃးၼႂ်းဝဵင်းလႆႈ။”
သိုၵ်းတဢၢင်းဢိုတ်းသဵၼ်ႈတၢင်းၼႆႉ ႁၢမ်ႈရူတ်ႉၵူႈသႅၼ်းသႅၼ်းၵႂႃႇမႃး ဢမ်ႇမၵ်းတတ်းၶၢဝ်းယၢမ်းဝႆႉဝႃႈ တေဢိုတ်းႁိုင်ၵႃႈႁိုဝ်ၼႆလႄႈ ႁဵတ်းႁႂ်ႈၵူၼ်းၵႃႉ ႁူပ်ႉတၢင်းယၢပ်ႇ ဢမ်ႇၸၢင်ႈဢဝ်ၶူဝ်းၵုၼ်ႇၵႃႉၶၢႆ သူင်ႇၶဝ်ႈသူင်ႇဢွၵ်ႇ ၼႂ်းဝဵင်းၼမ်ႉၶမ်းသေ မီးလွင်ႈမႆႈၸႂ်ၵူဝ်ၵႃႈၶၼ်ၶူဝ်းၵုၼ်ႇပုင်ႈၶိုၼ်ႈၼမ်ႁႅင်းလိူဝ် ၵဝ်ႇ ဝႃႈၼႆ။
ၸဝ်ႈၵုၼ်ႇၵေႃႉယူႇၼႂ်းၵၢတ်ႇဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် တႃႇတေႃႉၵုၼ်ႇၼႆႉ ႁဝ်းလႆႈၵႂႃႇႁပ်ႉဢဝ်တီႈႁူဝ် ဝဵင်းၼၼ်ႉ။ ႁဝ်းလႆႈၸၢင်ႈၵႃး တႃႇၵႄႉ(လၢႆႈ)ၶူဝ်းၵုၼ်ႇၶဝ်ႈဢွၵ်ႇၼႂ်းဝဵင်းယဝ်ႉမိူဝ်ႈလဵဝ်။ ၵူၼ်းတႄႉပေႃးၶႂ်ႈၶဝ်ႈတႄႉလႆႈယူႇ။ ၵူၺ်းလူဝ်ႇလႆႈပႆမႃးၵွႆး။ ရူတ်ႉၶိူင်ႈ လႄႈ ၵႃးၸိူဝ်းၼႆႉတႄႉ ၶဝ်တိုၼ်းဢမ်ႇပၼ်လတ်းႁႄဢိတ်း။ ဢမ်ႇၶဝ်ႈလႆႈၼႂ်းဝဵင်း” ၼႆယဝ်ႉ။
ဢိင်ၼိူဝ်လွင်ႈၼႆႉသေ ၵူၼ်းမိူင်းၼႂ်းဝဵင်းၼမ်ႉၶမ်း ဢွၼ်ၵၼ်ႁူင်လိုဝ်းၶၢဝ်ႇၵၼ်ဝႃႈ ပဵၼ်ယွၼ်ႉ ၽူႈယႂ်ႇၵူၼ်းလူင် ၼႂ်းသိုၵ်းတဢၢင်း ႁွတ်ႈၽႅဝ်ဝႆႉတီႈၼႂ်းဝဵင်းၼမ်ႉၶမ်း ပိူဝ်ႈတႃႇဢွၵ်ႇၶၢဝ်းတၢင်းၵႂႃႇမိူင်းၶႄႇ တႃႇႁူပ်ႉဢုပ်ႇၵၼ်တင်း သိုၵ်းမၢၼ်ႈလႄႈ လူင်ပွင်ၸိုင်ႈမိူင်းၶႄႇ ၊ ထႅင်ႈလွင်ႈၼိုင်ႈၵေႃႈ ပဵၼ်ယွၼ်ႉ ၵူၼ်းလူင်ၼႂ်းသိုၵ်းတဢၢင်းၶဝ် တိူဝ်ႉမၢတ်ႇၺႃးၸၢၵ်ႇမၢၵ်ႇႁိူဝ်းမိၼ် တီႈဝဵင်းၵူတ်ႉၶၢႆ ၼၼ်ႉသေ လႆႈဢဝ်ၵႂႃႇယူတ်းယႃတူဝ်ဝႆႉ ၼႂ်းဝဵင်းၼမ်ႉၶမ်း ဝႃႈၼႆ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ