မိူဝ်ႈၼႆႉ ဝၼ်းတီႈ 29/07/2025 ယၢမ်းၵၢင်ၼႂ် 9 မူင်းၶိုင်ႈ သိုၵ်းၵဝ်ႈၵၢင်ႉ MNDAA ယိုဝ်းၵွင်ႈ ပွႆႇမူၵ်ႇတႅၵ်ႇ ၼႂ်းၵၢင်ဝဵင်းသႅၼ်ဝီ ၸိုင်ႈတႆးပွတ်းႁွင်ႇ၊ သဵင်တႅၵ်ႇမေႃးလင်ယႂ်းလႄႈ ၵူၼ်းမိူင်းၼႂ်းပိုၼ်ႉတီႈ တူၵ်းၸႂ်တိုၼ်ႇသၢၼ်ႈ ဝႃႈပဵၼ်ပၢင်တိုၵ်းထႅင်ႈႁိုဝ်ၼႆယူႇ။

ၵူၼ်းမိူင်းၵေႃႉယူႇဝႆႉ ၼႂ်းပိုၼ်ႉတီႈ ဝဵင်းသႅၼ်ဝီ လၢတ်ႈၽူႈတွႆႇႁွၵ်ႈဝႃႈ “ၶဝ်ႁဵတ်းပွႆးပိုတ်ႇတီႈလိၼ် တႃႇၵေႃႇသၢင်ႈႁူင်းယႃမႂ်ႇ တႅၼ်းတၢင်တီႈ ၵၢတ်ႇၵဝ်ႇၵၢင်ဝဵင်းၼၼ်ႉၼႆဝႃႇ။ ၶဝ်ႁမ်ႉဢမ်ႇပၼ်ၾၢင်ႉ ဢမ်ႇလၢတ်ႈဝႆႉလူင်ႈၼႃႈသေ ၵိုင်ႉၵၢင်ႉယိုဝ်းၵွင်ႈ။ ၵူၼ်းမိူင်း လႆႈငိၼ်းၼႃႇၼေႃႈ။ ႁဝ်းၵေႃႈတူၵ်းၸႂ် ယူဝ်ဝႃႈၶဝ်သုၵ်ႉသၵ်ႉၵၼ်ထႅင်ႈယဝ်ႉႁိုဝ်ၼႆ။ ႁဝ်းတိုၵ်ႉၵႂႃႇၶၢႆၶူဝ်းၼႂ်းၵၢတ်ႇယူႇ။ ဢွၼ်ၵၼ်ၼႅတ်ႈသိမ်းၶူဝ်းႁႄ မႃးႁိူၼ်းၶိုၼ်းၼၼ်ႉၼႃႇ” ဝႃႈၼႆ။

လႆႈႁူႉဝႃႈ ႁူင်းယႃလူင် ဢၼ်ၸုမ်းသိုၵ်းၵဝ်ႈၵၢင်ႉ တေသၢင်ႈမႂ်ႇမႂ်ႇၼႆႉ ၾၢႆႇသိုၵ်းၵဝ်ႈၵၢင်ႉၶဝ် ၸတ်းၽႅၼ်မႃးၶၢဝ်းတၢင်းလၢႆလိူၼ်ယဝ်ႉ သေ တိုၵ်ႉတေ တႄႇၵေႃႇသၢင်ႈၵႂႃႇ ဝၼ်းမိူဝ်ႈၼႆႉ။ မီးၽႅၼ်ၵၢၼ်တေၵေႃႇသၢင်ႈၵႂႃႇႁႂ်ႈယဝ်ႉတူဝ်ႈ ၼႂ်းၶၢဝ်းတၢင်းသၢမ်ပီ ဝႃႈၼႆ။

လိူဝ်ၼၼ်ႉ တူင်ႈၼႃးႁိမ်းၼွင်မူဝ် ၾၢႆႇတူၵ်းတၢင်းၶဝ်ႈဝဵင်းသႅၼ်ဝီၼၼ်ႉၵေႃႈ ၸဝ်ႈၵၢၼ်ပၢႆးမၢၵ်ႈမီးၶႄႇၶဝ် မႃးၵႂၢတ်ႇသိုဝ်ႉဢဝ်ယဝ်ႉ လီငၢမ်းသေ ႁၢင်ႈႁႅၼ်းတေႃႉဢဝ်လိၼ်မႃးထူမ် တႄႇႁဵတ်းၵၢၼ်ၵေႃႇသၢင်ႈဝႆႉ ပိူဝ်ႈတႃႇႁဵတ်းႁူင်းသဝ်း လႄႈ ႁၢၼ်ႉတၢင်းၵိၼ် ဝႃႈၼႆ။

ၽွင်းႁူဝ်ပီ 2025 ၼႆႉ သိုၵ်းၶႄႇၵဝ်ႈၵၢင်ႉ ဢွၵ်ႇလိၵ်ႈၸူးၵူၼ်းမိူင်းသႅၼ်ဝီဝႆႉၵူႈၵေႃႉ -ယႃႇႁႂ်ႈလႆႈၶၢႆတီႈလိၼ်ၸဝ်ႈၵဝ်ႇပၼ်ၽႂ် ဝႃႈၼႆသေတႃႉဢမ်ႇႁိုင်သင် ၸူဝ်းပေႃႈလဵင်ႉၶႄႇ မႃးတဵၵ်းၵဵပ်းသိုဝ်ႉတီႈလိၼ်ၼႂ်းဝဵင်းသႅၼ်ဝီ။ ပေႃးၵူၼ်းမိူင်းဢမ်ႇၽွမ်ႉၶၢႆ သမ်ႉၶိၼ်ၶႂ်ႈႁဵတ်းၶဵၼ်တေႃႇၵူၼ်းမိူင်းၶိုၼ်း။

တႅမ်ႈ-ၽူၺ်းၼုမ်ႇ