ဝၼ်းတီႈ 24 /07/2025 ဝၼ်းၽတ်း ယၢမ်းၵၢင်ၼႂ် သဵင်ၵွင်ႈလူင်တႅၵ်ႇတီႈလႅၼ်လိၼ်ထႆး-ၵမ်ႊပေႃႊတီႊယိူဝ်ႊ၊ ၾၢႆႇၵမ်ႊပေႃႊတီႊယိူဝ်ႊ ယိုဝ်းၵွင်ႈလူင် မႃးတူၵ်းတႅၵ်ႇၼႂ်းပႃႇထိူၼ်ႇ ႁိမ်းႁေႃၵဝ်ႇ တႃႈမိူၼ်းထူမ်ႊ သိုဝ်ႇၶၢဝ်ႇထႆး ႁၢႆးငၢၼ်းဝႆႉၼင်ႇၼႆ။

ဢိင်ၼိူဝ်သွင်ၸိုင်ႈမိူင်း ဢုပ်ႇဢူဝ်းၵႄႈလိတ်ႈလွင်ႈပၼ်ႁႃလႅၼ်လိၼ်ၵၼ်ဢမ်ႇလႆႈလႄႈ သွင်ၾၢႆႇထႅမ်ႁႅင်းသိုၵ်း ၶဵင်ႈၶႅင်တေႃႇၵၼ်ႁၢဝ်ႈႁႅင်းမႃးၼႂ်းဝူင်ႈၼႆႉတင်းဝူင်ႈယဝ်ႉ။

တပ်ႉပႂ်ႉလႅၼ်လိၼ်မိူင်းထႆးလၢတ်ႈဝႃႈ မိူဝ်ႈၼႆႉယၢမ်းၵၢင်ၼႂ်ၸဝ်ႉ ၵမ်ႊပေႃႊတီႊယိူဝ်ႊပွႆႇၶိူင်ႈၻရူၼ်ႊၶၢမ်ႈလႅၼ်လိၼ်မႃးတၢင်းမိူင်းထႆး။ ၵူၺ်းၵႃႈၻရူၼ်ႊၼၼ်ႉမီးသဵင်ၵူၺ်း ဢမ်ႇႁၼ်တူဝ်လႄႈဢမ်ႇၸၢင်ႈၽဵဝ်ႈ။

ထိုင်မႃးၶၢဝ်းယၢမ်း 8 မူင်း 20 မိၼိတ်ႉ ၵမ်ႊပေႃႊတီးယႃႊ ႁၢင်ႈႁႅၼ်းၶိူင်ႈၵွင်ႈလူင် RPG လႄႈ ၸတ်းတႃႁၢၼ် 6 ၵေႃႉယိပ်းၶိူင်ႈၵွင်ႈၵၢင်ႇၸေးမိုဝ်း မႃးတမ်းတေႃႇၼႃႈတပ်ႉပၢင်သဝ်းထႆး တီႈလႅၼ်လိၼ်။

ထိုင်မႃးၶၢဝ်းယၢမ်း 9 မူင်းၶိုင်ႈ ၵမ်ႊပေႃႊတီႊယိူဝ်ႊ ယိုဝ်းၵွင်ႈလူင် မႃးတူၵ်းသႂ်ႇတီႈ ၸႄႈဝဵင်းၵၢပ်ႇၶျိူင်ႊ ၸႄႈတွၼ်ႈ သူႊရိၼ်ႊ ၼႂ်းလိၼ်ထႆး 2 လုၵ်ႈ။ ၵူၼ်းမိူင်းထႆး မၢတ်ႇၸဵပ်း 3 ၵေႃႉ။ ၵူၼ်းမိူင်းၼႂ်းၸႄႈဝဵင်းၵၢပ်ႇၶျိူင်ႊ လႆႈၶၢႆႉပၢႆႈၵႂႃႇယူႇဝႆႉတီႈလွတ်ႈၽေး ႁူင်းႁဵၼ်းလႄႈ ႁွင်ႈၵၢၼ်လူင်ပွင်ၸိုင်ႈ လႆႈၵိုတ်းဝႆႉမူတ်း။ ၶၢဝ်းယၢမ်း 11 မူင်းၶိုင်ႈ(ၶၢဝ်းမိူင်းထႆး) ၾၢႆႇထႆးပိုၼ်ၽၢဝ်ႇဝႃႈ ၵူၼ်းမိူင်းဢၼ်မၢတ်ႇၸဵပ်း 3 ၵေႃႉၼၼ်ႉ တၢႆၵႂႃႇၵေႃႉၼိုင်ႈယဝ်ႉဝႃႈၼႆ။

ဝၢႆးၼၼ်ႉ သိုၵ်းထႆးတပ်ႉၵၢင်ႁၢဝ် သူင်ႇႁိူဝ်းမိၼ်တိုၵ်း F-16 ၵႂႃႇၸူးတၢင်းလႅၼ်လိၼ် 6 လမ်း။ ၶၢဝ်းယၢမ်း 11 မူင်းၵၢင်ဝၼ်းၼႆႉ ၾၢႆႇထႆးတႄႇဢဝ်ႁိူဝ်းမိၼ်သိုၵ်း ယိုဝ်းသႂ်ႇထၢၼ်တပ်ႉပၢင်သဝ်းၵမ်ႊပေႃႊတီႊယိူဝ်ႊၵွႆ 2 တီႈ ထႆးပိုၼ်ၽၢဝ်ႇဝႆႉၼင်ႇၼႆ။

ယၢမ်းလဵဝ်တႄႈ ယူႇတီႈၽူႈမီးပုၼ်ႈၽွၼ်းၸွမ်းလႅၼ်လိၼ် တင်း 2 ၸိုင်ႈမိူင်း သင်ႇပိၵ်ႉဢိုတ်းဝႆႉပႃး ၵိတ်ႉလၢၼ်ႇလႅၼ်လိၼ်လႄႈ လွင်ႈဢႅဝ်ႇလႄႇတွင်ႈတဵဝ်းဝႆႉ ။

ၵဵဝ်ႇၵပ်းလွင်ႈၼႆႉသေ တပ်ႉသိုၵ်းမိူင်းထႆး ပိုၼ်ၽၢဝ်ႇပၼ်ၾၢင်ႉဝႆႉပဵၼ်တၢင်းၵၢၼ်ဝႃႈ ႁၢမ်ႈထၢႆႇ ၶႅပ်းႁၢင်ႈ ငဝ်းတူင်ႉၵဵဝ်ႇၵပ်းၵၢၼ်သိုၵ်းၼႆႉသေ တၢင်ႇၼိူဝ် Social Media ၊ တႃႇပဵၼ်လွင်ႈႁူမ်ႇလူမ်ႈၸိုင်ႈမိူင်း – ဝႃႈၼႆဝႆႉ။