ၸဝ်ႈၼႃႈတီႈၽူႈမီးပုၼ်ႈၽွၼ်း ၼႂ်းႁွင်ႈၵၢၼ်လူင်ပွင်ၸိုင်ႈထႆး ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ် သႅၼ်းၵၢၼ်ငၢၼ်း ဢၼ်ႁႅင်းၵၢၼ် ၸိူဝ်းယူႇသဝ်းၼႂ်းမိူင်းထႆး ႁဵတ်းလႆႈ လႄႈ ဢမ်ႇ ႁဵတ်းလႆႈ ၼင်ႇႁိုဝ် ၼၢႆးၸၢင်ႈ တင်း ႁႅင်းၵၢၼ် ပေႃးတေလႆႈၾၢင်ႉဝႄႈဝႆႉ ဝႃႈၼႆ။

ႁူင်းၵၢၼ်သိုဝ်ႇၶၢဝ်ႇထႆး The Nation ႁၢႆးငၢၼ်းဢွၵ်ႇဝႆႉဝႃႈ – ႁႅင်းၵၢၼ်ၸိူဝ်းမီး ဝႂ်ႁဵတ်းၵၢၼ် (Work Permit) တဵမ်ထူၼ်ႈၵေႃႈ ၵၢၼ်ဢၼ်ဢမ်ႇမီးသုၼ်ႇႁဵတ်းလႆႈၼႆႉ မီးယူႇ 10 သႅၼ်းလႄႈ မၢင်ၵေႃႉထၢင်ႇဝႃႈ ပေႃးမီးဝႂ်ႁဵတ်းၵၢၼ်တဵမ်ထူၼ်ႈယူႇၵေႃႈ ႁဵတ်းလႆႈၵူႈလွင်ႈၼႆ ႁၼ်ၽိတ်းဝႆႉၸိူင်ႉၼႆလႄႈ ၾၢႆႇၸဝ်ႈၼႃႈတီႈၶဝ် ၸင်ႇလႆႈပိုၼ်ၽၢဝ်ႇဢွၵ်ႇ ပၼ်ၾၢင်ႉဝႆႉ ႁႂ်ႈပဵၼ်တၢင်းၵၢၼ်ထႅင်ႈ – ၼႆယဝ်ႉ။

ၸွမ်းၼင်ႇပၵ်းပိူင်ၾိင်ႈမိူင်း မိူင်းထႆးမီးဝႆႉၼၼ်ႉ ၾၢႆႇလူင်ပွင်ၸိုင်ႈထႆးၶဝ် မၵ်းမၼ်ႈၸႅၵ်ႇဝႆႉ ပေႃးပဵၼ်ၵူၼ်းထႆးၸိုင် ႁဵတ်းလႆႈၵၢၼ်သႅၼ်းလႂ် ပေႃးပဵၼ်ၵူၼ်းမိူင်းၼွၵ်ႈၶဝ်ႈမႃးႁဵတ်း ၵၢၼ်ၼႂ်းမိူင်းထႆးၸိုင် ႁဵတ်းလႆႈၵၢၼ်သႅၼ်းလႂ်ၸဵမ်ၸိူဝ်းၼႆႉ ။

ၵၢၼ်ငၢၼ်း 10 သႅၼ်း ဢၼ်ႁႅင်းၵၢၼ်ၸိူဝ်းယူႇသဝ်းဝႆႉ ၼႂ်းမိူင်းထႆး ဢမ်ႇႁဵတ်းလႆႈၼၼ်ႉ ၶၢႆတၢင်းၶၢႆ ၸွမ်း ၼိူဝ်သဵၼ်ႈတၢင်း ႁိမ်းၶၢင်ႈတၢင်း၊ ႁဵတ်းၼၢႆးၼႃႈ (ပွႆးၸႃး) ႁၢင်ႈၶိူင်ႈၵၢပ်ႇ ၼဵပ်ႉတိၼ်ၼဵပ်ႉမိုဝ်း၊ ယူႇၼႂ်းလၢၼ်ႉ ႁၢင်ႈၶိူင်ႈသေ ႁဵတ်းႁၢင်ႈပၼ်ၶႅၵ်ႇ၊ ၵၢၼ်မိပ်ႇၼူတ်ႈ၊ ၵၢၼ်ႁေႃႈရူတ်ႉၵႃး၊ ႁွင်ႉၶႅၵ်ႇဢႅဝ်ႇယဵမ်ႈတွင်ႈထဵဝ်း၊ ၵၢၼ်တေႃးၽႃႈတေႃးႁူၵ်ႇ ၊ ၵၢၼ်ပႂ်ႉယၢမ်း ၸဵမ်ၸိူဝ်းၼႆႉ ဝႃႈၼႆ။

သင်ၾၢႆႇၸဝ်ႈၼႃႈတီႈ လူင်ပွင်ၸိုင်ႈထႆး ၵူတ်ႇထတ်းႁၼ် ႁႅင်းၵၢၼ်ႁဵတ်းၽိတ်းပၵ်းပိူင် ႁဵတ်းၵၢၼ်ၸိူဝ်းဢၼ်ႁၢမ်ႈဝႆႉၼၼ်ႉၸိုင် ႁဵတ်းၸူဝ်ႈၵႅပ်ႉၵူၺ်းၵေႃႈယဝ်ႉ တိုၼ်းတေလႆႈၺႃးတူတ်ႈတၢမ်ႇ မႂ်ငိုၼ်း ငိုၼ်းထႆး 5000 ၿၢတ်ႇ ထိုင် 50000 ၿၢတ်ႇၵူၺ်းဢမ်ႇၵႃး ၸၢင်ႈၺႃးသူင်ႇပွၵ်ႈမိူဝ်းၶိုၼ်း ၸိုင်ႈမိူင်းၽႂ်မၼ်း ဝႃႈၼႆဝႆႉ။

လိူဝ်ၼၼ်ႉ တင်ႈတႄႇဝၼ်းၺႃးတူတ်ႈတၢမ်ႇၼၼ်ႉသေ ၼႂ်းၶၢဝ်းတၢင်းသွင်ပီ တေဢမ်ႇမီးသုၼ်ႇလႆႈၶဝ်ႈမႃး ယွၼ်းႁဵတ်းၵၢၼ် ၼႂ်းမိူင်းထႆးၶိုၼ်း။ ၼၢႆးၸၢင်ႈ ၸိူဝ်းႁပ်ႉႁဵတ်းၵၢၼ်ဝႆႉၼၼ်ႉၵေႃႈ တေၺႃးတၢမ်ႇငိုၼ်း လူၺ်ႈတၢင်းၽိတ်းႁပ်ႉၵူၼ်းမိူင်းၼွၵ်ႈႁဵတ်းၵၢၼ် ၽိတ်းပၵ်းပိူင် ။ တႃႇႁႅင်းၵၢၼ်ၼိုင်ႈၵေႃႉ တူတ်ႈတၢမ်ႇငိုၼ်း 1 မိုၼ်ႇၿၢတ်ႇထိုင် 1 သႅၼ်ၿၢတ်ႇ။ သင်ပူၼ်ႉပႅၼ်တၢင်းၽိတ်းထႅင်ႈ ပွၵ်ႈ 2 ၸိုင် တေၺႃးတၢမ်ႇၶွၵ်ႈ 1 ပီ လႄႈ တၢမ်ႇငိုၼ်း 5 မိုၼ်ႇၿၢတ်ႇ ထိုင် 2 သႅၼ်ၿၢတ်ႇ ဢမ်ႇၼၼ် တၢမ်ႇငိုၼ်း လႄႈ တၢမ်ႇၶွၵ်ႈ တင်းသွင်လွင်ႈ ၼႆယဝ်ႉ။

ယၢမ်းလဵဝ် ၾၢႆႇၸဝ်ႈၼႃႈတီႈပလိၵ်ႈထႆးၶဝ် ၸွမ်းၶဝ်ႈသွၵ်ႈ ဢွင်ႈတီႈလၢမ်းၶၢတ်ႈလႆႈဝႃႈ မီးၵူၼ်းမိူင်းၼွၵ်ႈ ႁဵတ်းၵၢၼ်လူၺ်ႈဢမ်ႇမႅၼ်ႈၸွမ်းပိူင်ၵူႈတီႈ ၸွမ်းႁၢၼ်ႉၶၢႆတၢင်းၵိၼ်၊ ဢွင်ႈတီႈသူၼ်ႁဵတ်းၵၢၼ် လႄႈ ႁွင်ႈၶၢတ်ႈ ႁိူၼ်းၶၢတ်ႈ ၸိူဝ်းၼႆႉ ၵူႈတီႈ ႁၢဝ်ႈႁႅင်းယူႇ။

မိူဝ်ႈလိူၼ်ၵျုၼ်ႊ ဝၼ်းတီႈ 11 ပူၼ်ႉမႃးၼႆႉၵေႃႈ ႁွင်ႈၵၢၼ်ၾၢႆႇၵူတ်ႇထတ်းၶဝ်ႈဢွၵ်ႇမိူင်းထႆး ၶဝ်ႈၵႂႃႇၵူတ်ႇထတ်း ႁွင်ႈၵၢၼ်ပၢႆးပၺ်ႇၺႃႇတီႈၼိုင်ႈ ၼႂ်းဝဵင်းမိူင်းၵွၵ်ႇ တီႉၺွပ်းလႆႈ ၵူၼ်းမိူင်းမၢၼ်ႈ 7 ၵေႃႉ ဢၼ်ယိပ်းဝီႊသႃႊလုၵ်ႈႁဵၼ်းသေ ႁဵတ်းၵၢၼ်။