မိူင်းၸိုင်ႈထႆး ၼႆႉ ပဵၼ်တီႈပိုင်ႈႁူမ်ႈပိုင်ႈၽူၺ်း တႃႇႁႅင်းၵၢၼ်ယၢၼ်မိူင်းၼႆ ၽႂ်ဢမ်ႇထဵင်လႆႈသေတႃႉ ဢၼ်ႁႅင်းၵၢၼ်ယၢၼ်မိူင်းလႆႈထူပ်းလွင်ႈယၢပ်ႇလွင်ႈတုၵ်ႉသေပိူၼ်ႈၵေႃႈ ပဵၼ်မိူင်းၸိုင်ႈထႆး ။ ယွၼ်ႉဝႃႈ ၶၢၼ်ၸႂ်ၸွမ်းလွင်ႈယူႇလွင်ႈၵိၼ်လွင်ႈၵႂႃႇလွင်ႈပႆ ။ တႃၵူၼ်းပွင်ပဵၼ်လႆႈတႄႉ ဢမ်ႇမီးလွင်ႈယၢပ်ႇသေတႃႉ တႃႇၵူၼ်းၸိူဝ်းႁႃၸဝ်ႉၵိၼ်ၶမ်ႈတႄႉတုၵ်ႉၸႂ်ႁႅင်း ။

ၼႂ်းၵႄႈၼႆႉ သမ်ႉမီးမႃး ၵူၼ်းမိူင်းထႆးၸုမ်းၼိုင်ႈ တၢင်ႇယိုၼ်ႈယွၼ်းၼႂ်းသၽႃး ႁႂ်ႈထႆးဢွၵ်ႇပိူင် ႁၢမ်ႈႁႅင်းၵၢၼ်ယၢၼ်မိူင်း ၵိူတ်ႇလုၵ်ႈၼႂ်းမိူင်းထႆးၼႆလႄႈ ဢွၼ်ၵၼ်တူၵ်းၸႂ်ၵူဝ်ႁႄလွင်ႈၼႆႉထႅင်ႈ။

ၼႂ်းၵုၼ်ၶဵဝ်ဢေႊသျႃႊၼႆႉ မိူင်းထႆး ပဵၼ်မိူင်းဢၼ် ႁႅင်းၵၢၼ်ယၢၼ်မိူင်းလၢႆတီႈ လႆႈၸႂ်ယႂ်ႇ ပႃးၸဵမ်ၵူၼ်းမိူင်းလၢဝ်း မိူင်းဝႅတ်ႉၼၢမ်း ၵမ်ႊပူႊၶျႃႊ လႄႈထႅင်ႈလၢႆမိူင်း ပႃးၸဵမ်ၵူၼ်းၼႂ်းမိူင်းတႆးမိူင်းမၢၼ်ႈ ။ ႁႅင်းၵၢၼ်ၸိူဝ်းလႆၶဝ်ႈမိူင်းထႆးၼမ်လႄႈ ၸိူဝ်းတူင်ႉၼိုင်ႈႁဵတ်းသၢင်ႈ တႃႇသုၼ်ႇလႆႈသုၼ်ႇပဵၼ်ႁႅင်းၵၢၼ်ၵေႃႈမီးမႃး ။

ၼႂ်းၼၼ်ႉ ၸိူဝ်းႁၼ်ဝႃႈ ႁႅင်းၵၢၼ် ပဵၼ်ၵူၼ်းဢၼ်မႃးၼၵ်းၼမ်ႉၼၵ်းလိၼ်ၼႂ်းမိူင်းထႆးၼႆၵေႃႈမီး ။  ၼႂ်းလိူၼ်ၼႆႉ ဢၼ်လိုဝ်းၵၼ်ယူႇၼႂ်းမိူင်းထႆးၵေႃႈ ပဵၼ်လွင်ႈ ၸုမ်းထႆးဢမ်ႇယိူၼ်ႉ กลุ่มไทยไม่ทน ၵႂႃႇယိုၼ်ႈတၢင်ႇ လွင်ႈႁႅင်းၵၢၼ် ၼႂ်းသၽႃးမိူဝ်ႈဝၼ်းတီႈ 16/06/2026 ၼၼ်ႉ ။

တၢင်ႇယိုၼ်ႈယွၼ်းဝႃႈ ႁႂ်ႈလူင်ပွင်ၸိုင်ႈထႆး ႁၢမ်ႈၵူၼ်းၸိူဝ်းၸပ်းတွင်ႉ မႄႈပုမ်လူင်(မႄႈမၢၼ်း)ၸိူဝ်းၼႆႉ ယႃႇႁႂ်ႈၵိူတ်ႇလုၵ်ႈၼႂ်းမိူင်းထႆး ႁႂ်ႈသူင်ႇတူဝ်မိူဝ်းၵိူတ်ႇၶိုၼ်းဝၢၼ်ႈၵဝ်ႇမိူင်းလင်ၽႂ်မၼ်း ဝႃႈၼႆ ။
ၸုမ်းထႆးမႆႉထူၼ်ႊ ၼႆႉ ​​ၵေႃႇတင်ႈမႃးၼႂ်းပီ 2021 တေႉဢႃႊၶျီႊဝႃႉ ပဵၼ်ၽူႈၼမ်းဝႆႉ ၊ ဢၼ် ၵႆႉဢွၵ်ႇသဵင် လၢတ်ႈလွင်ႈပိူင်ႁႄႉႁၢမ်ႈႁႅင်းၵၢၼ်ယၢၼ်မိူင်းလၢႆၸိူဝ်ႉလၢႆလွင်ႈ ။

လိၵ်ႈဢၼ်ၶဝ်ယိုၼ်ႈၼႂ်းသၽႃးၼၼ်ႉပႃးဝႆႉဝႃႈ မိူင်းဢၼ်ႁၢမ်ႈႁႅင်းၵၢၼ် ဢမ်ႇႁႂ်ႈၵိူတ်ႇလုၵ်ႈၼၼ်ႉ မီးလၢႆမိူင်းယူႇ ၊ မိူင်းထႆးၵေႃႈ ၵိုင်ႇလီႁၢမ်ႈႁႅင်းၵၢၼ်ယၢၼ်မိူင်း  ယႃႇႁႂ်ႈၵိူတ်ႇလုၵ်ႈၼႂ်းမိူင်းထႆး ။

သိုပ်ႇလၢတ်ႈဝႃႈ ၵူၼ်းထႆးၵေႃႈ မီးလုၵ်ႈမီးလၢင်းၼမ်ယူႇ ဢၼ်လူဝ်ႇတၢင်းၸွႆႈထႅမ် မီးတင်းၼမ်။ ၶွၼ်ႇဢၼ်မိူင်းထႆးလႆႈပၼ်လူင်ပွင်ၸိုင်ႈၸိူဝ်းၼၼ်ႉ ၵိုင်ႇလီၸွႆႈၵူၼ်းထႆးၶိုၼ်းၵူၺ်း  သမ်ႉၵႂႃႇၸွႆႈပႃးႁႅင်းၵၢၼ်ၸိူဝ်းၵိူတ်ႇလုၵ်ႈၸိူဝ်းၼၼ်ႉ ဢမ်ႇၵိုင်ႇလီပဵၼ်ဝႃႈၼႆထႅင်ႈ။

လိူဝ်ၼၼ်ႉ ၼၢႆးၼႃႈ (ပွႆးၸႃး) ၸိူဝ်းႁဵတ်းဝတ်းႁဵတ်းဝႂ်ပၼ်ၵေႃႈ ပဵၼ်ၵူၼ်းတၢင်ႇမိူင်း ဢမ်ႇၸႂ်ႈၵူၼ်းထႆးလႄႈ ၶႂ်ႈႁႂ်ႈၸုမ်းၵဵဝ်ႇၶွင်ႈ ၵူတ်ႇထတ်းပၼ် ၼႆယူႇ။
လွင်ႈတၢင်းၸိူဝ်းၼႆႉ ႁဵတ်းႁႂ်ႈၵူၼ်းမိူင်းထႆးသုမ်းသုၼ်ႇလၢႆလွင်ႈၼႆ​​သေ ၸုမ်းထႆးဢမ်ႇယိူၼ်ႉၼႆႉ ၸင်ႇၵႂႃႇတၢင်ႇယိုၼ်ယွၼ်းၼႂ်းသၽႃး ဝႃႈၼႆ ။

ဢိင်ၼိူဝ် လွင်ႈတၢင်းၸိူဝ်းၼႆႉသေ ၼႂ်းသၽႃးမိူင်းထႆးတႄႉ ပႆႇဢွၵ်ႇၶေႃႈတႅပ်းတတ်းသင်သေတႃႉ တေတူၺ်းၵႂႃႇၵမ်းၶၵ်ႉၵမ်းတွၼ်ႈ ၼႆယူႇ။

ႁႅင်းၵၢၼ်ယၢၼ်မိူင်း ဢၼ်လုၵ်ႉတၢင်ႇမိူင်းသေ ၸိူဝ်းႁွတ်ႈထိုင်မိူင်းထႆး လႆႈႁပ်ႉႁူႉလွင်ႈၼႆႉယဝ်ႉ ဢွၼ်ၵၼ် မႆႈၸႂ် ပဵၼ်ၸႂ်ဢမ်ႇလီတင်းၼမ် ။ မိူၼ်ၼင်ႇ ၵူၼ်းမိူင်းႁူမ်ႈတုမ်မၢၼ်ႈ ပႃးၸဵမ်ၵူၼ်းမိူင်းတႆး ငဝ်းလၢႆးဝၢၼ်ႈမိူင်းပႆႇၵတ်းယဵၼ် တိုၵ်ႉလႆႈၵူဝ်ၽေးသိုၵ်း ၊ တေပွၵ်ႈၶိုၼ်းၵေႃႈ ၵူဝ်ဢမ်ႇတင်ႈတူဝ်လႆႈ ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ ၼႆၸိူဝ်းၼႆႉ ။

ႁႅင်းၵၢၼ်ယၢၼ်မိူင်းၵေႃႉၼိုင်ႈတႄႉ လၢတ်ႈဝႃႈ  ၵမ်ႈၼမ်ၸိူဝ်း ႁွတ်ႈထိုင်မိူင်းထႆးသေ ႁဵတ်းၵၢၼ်ဝႆႉၵေႃႈ ဢမ်ႇၸႂ်ႈပဵၼ်ၵူၼ်းႁၼ်ပုၼ်ႈသုၼ်ႇတူဝ်ၵူၺ်း ပိုင်ႈၵႃႈမႃႇၵႃႈႁႅင်းၸဝ်ႈၵဝ်ႇသေယူႇၵိၼ်ၵႂႃႇယူႇ ။ ဢမ်ႇတွၼ်ႉလႆႈ သုၼ်ႇမႃးလၢႆလၢႆတီႈၽႂ် ဝႃႈၼႆ။

ၸၢႆးလႅင်း ႁႅင်းၵၢၼ်ယၢၼ်မိူင်း ၸူဝ်ႈၶၢဝ်းၵဵင်းမႂ်ႇ လၢတ်ႈၼႄၼင်ႇၼႆ –

ႁႅင်းၵၢၼ်ယၢၼ်မိူင်း မႃးယူႇမိူင်းထႆးၼႆႉၼႆၵေႃႈ ႁဝ်းၵေႃႈဢမ်ႇၸႂ်ႈဝႃႈ မႃးယူႇလၢႆလၢႆ ။ၼိုင်ႈပီၼႆႉ ထႆးၶဝ် လႆႈပၼ်ၶွၼ်ႇလူင်ပွင်ၸိုင်ႈၶဝ်ၵႃႈႁိုဝ်တႄႉဢမ်ႇႁူႉၼင်ႇၵဝ်ႇ ။ ဝူၼ်ႉဝႃႈတႄႉ ႁႅင်းၵၢၼ်ယၢၼ်မိူင်း ႁဝ်းလႆႈပၼ်ၶွၼ်ႇၼမ်လိူဝ်ၼၼ်ႉထႅင်ႈၵွၼ်ႇ ။ မိူၼ်ဝႃႈ ႁဝ်းမႃးၵိူတ်ႇလုၵ်ႈ ဢၢပ်ႈတွင်ႉၸိူဝ်းၼႆႉၵေႃႈ လႆႈသဵင်ႈငိုၼ်း။ ဢမ်ႇမီးငိုၼ်းၵေႃႈ ၵိူတ်ႇလုၵ်ႈဢမ်ႇလႆႈၼင်ႇၵဝ်ႇ။ ႁဝ်းၵေႃႈ လႆႈပၼ်ၶွၼ်ႇၵူႈၸိူဝ်ႉၵူႈမဵဝ်း

ထႆးၶဝ်ဝႃႈ ႁႅင်းၵၢၼ်ယၢၼ်မိူင်းမႃးႁိမ်သုၼ်ႇလႆႈ မႃးႁိမ်ၼႃႈၵၢၼ်ၶဝ်ၼႆၼၼ်ႉ ဢမ်ႇၸႂ်ႈယွၼ်ႉႁႅင်းၵၢၼ်ႁိမ် ပဵၼ်ယွၼ်ႉတူဝ်ၵူၼ်းထႆး ဢမ်ႇဢဝ်သုၼ်ႇၸိူဝ်းၼၼ်ႉႁဵတ်းႁင်းၵူၺ်း ။ ၵၢၼ်ၼၵ်းၵၢၼ်ၼႃၸိူဝ်းၼၼ်ႉ ၵမ်ႈၼမ် ပဵၼ်ႁႅင်းၵၢၼ်ယၢၼ်မိူင်းၵူၺ်းလူး ။ ၵၢၼ်ယႂ်ႇလူင် ၵၢၼ်ၶွမ်ႊပၼီႊ ၸိူဝ်းဢၼ်တၢင်ႇမိူင်းမႃးပိုတ်ႇမႃးႁဵတ်းသမ်ႉ ၶဝ်ဢမ်ႇႁၼ်ၽိတ်း ၊ သမ်ႉႁၼ်ထႅင်ႈလၢႆးၼိုင်ႈ။ မိူၼ်တင်ႈၸႂ်ႈ ၶႂ်ႈလူလၢႆႁႅင်းၵၢၼ်ယၢၼ်မိူင်းၸိူဝ်းႁႃၸဝ်ႉၵိၼ်ၶမ်ႈၵူၺ်း ၼႆ ႁႅင်းၵၢၼ်ၵေႃႉၼိုင်ႈ သိုပ်ႇလၢတ်ႈၼင်ႇၼႆ။

ၸၢဝ်းတႆး ဢၼ်ၵိူတ်ႇၼႂ်းထႆး လႆႈမၢႆၾၢင်ၸိူဝ်ႉၸၢတ်ႈထႆး ၵေႃႉၼိုင်ႈ လၢတ်ႈဝႃႈ – “ ၶဝ်တင်ႈၸႂ် တႃႇလဵၼ်ႈၵၢၼ်မိူင်းၵူၺ်း ။ ၶဝ်တင်ႈၸႂ်ႁူၺ်းသူၼ်း ၵူၼ်းမိူင်း ႁႂ်ႈဝူၼ်ႉမိူၼ်ၶ ဝ် ၶႅၼ်သုၼ်ႇလႆႈသုၼ်ႇပဵၼ်တေႃႇႁႅင်းၵၢၼ်ယၢၼ်မိူင်း ၸိူဝ်းပိုင်ႈယူႇၼႂ်းမိူင်းထႆး ” – ဝႃႈၼႆ။မိူဝ်ႈလဵဝ် တႃႇၵူၼ်းထႆး ၵူႈတီႈ ပေႃးတေယွမ်းႁပ်ႉ ပိူင်ႁၢမ်ႈႁႅင်းၵၢၼ်ယၢၼ်မိူင်းၵိူတ်ႇလုၵ်ႈၼႂ်းမိူင်းထႆးၼၼ်ႉ တေဢၢၼ်း ၵဵပ်းသဵၼ်ႈၸိုဝ်ႈ ၵူၼ်းၸိူဝ်းၽွမ်ႉၸွမ်း 86000 ၵေႃႉ ၼႆယူႇ ။

ပိူင်ႁၢမ်ႈၵိူတ်ႇလုၵ်ႈၼႆႉ တိုၵ်ႉပဵၼ်ငဝ်းလၢႆးဢၼ် ယိုၼ်ႈယွၼ်းဝႆႉၵူၺ်း ပႆႇထိုင်တီႈတူၵ်းလူင်းၵၼ် ။ ႁႅင်းၵၢၼ်ယၢၼ်မိူင်း ပႆႇလူဝ်ႇတူၵ်းၸႂ်သင် ယွၼ်ႉဝႃႈ ပၵ်းပိူင်သုၼ်ႇလႆႈသုၼ်ႇပဵၼ်လုၵ်ႈဢွၼ်ႇ ၵူၼ်းလူင် မီးဝႆႉလၢႆပိူင် ၼႆ ယိင်းမူဝ်ၶၢဝ်ၼူၼ်း ၽူႈၸတ်းလၢႆးၵၢၼ်ၽႃႇသႃႇတႆး ၼႂ်းႁူင်းပွႆႇသဵင် သေႃဝေႃႊထႃႊ ၵဵင်းမႂ်ႇ လၢတ်ႈၼႄဝႆႉၼင်ႇၼႆ –

လွင်ႈတၢင်းၸိူဝ်းၼႆႉၼႆ မၢင်လွင်ႈမၢင်ဢၼ် မၼ်းမီးပိူင်မၼ်းဝႆႉယူႇ။ႁဝ်းၵေႃႈ လူဝ်ႇထွမ်ႇပၵ်းပိူင် ဢၼ်ပိူၼ်ႈမီးၶေႃႈတူၵ်းလူင်းဝႆႉႁေ ပၼ်လွင်ႈသုၼ်ႇလႆႈသုၼ်ႇပဵၼ်ၵူၼ်း ဢမ်ႇဝႃႈ လုၵ်ႈဢွၼ်ႇလႄႈ ၼၢင်းယိင်း  ဢမ်ႇဝႃႈ ႁႅင်းၵၢၼ်ယၢၼ်မိူင်းၸိူဝ်းၼႆႉ မၼ်းမီး ယူႇ။ ႁဝ်းၵေႃႈလႆႈႁဵတ်းၸွမ်းၼင်ႇ ဢၼ်သုၼ်ႇႁဝ်းၶႃႈမီးၼၼ်ႉ ဢမ်ႇပူၼ်ႉသုၼ်ႇလႆႈသုၼ်ႇပဵၼ်ဢၼ်ႁဝ်းမီးၼၼ်ႉၼႆၸိုင် တၢင်ႇၵေႃႉတၢင်ႇၾၢႆႇၵေႃႈ တေယူႇငၢႆႈလူမ်ၸႂ် ။ၸိူဝ်းႁဵတ်းလီၵေႃႈ ႁႂ်ႈႁဵတ်းလီၵႂႃႇထႅင်ႈ။
ၸိူဝ်းဢၼ်ႁဵတ်းၽိတ်းပူၼ်ႉပိူင်ၼႆၵေႃႈ ႁႂ်ႈလူတ်းယွမ်း ၼင်ႇႁိုဝ် တေယူႇၸွမ်းၵၼ်ၵႂႃႇလႆႈငၢႆႈလူမ်ၸႂ်

ပိူင်ဢၼ်ႁၢမ်ႈႁႅင်းၵၢၼ်ယၢၼ်မိူင်းၵိူတ်ႇလုၵ်ႈၼႂ်းမိူင်းၼႆႉ မိူင်းသိင်ႊၵႃႊပူဝ်ႊ လႄႈ မိူင်းမလေႊသျႃႊ ၵေႃႈမီး ။ သင်ဢမ်ႇလႆႈဝႂ်ၶႂၢင်ႉသေၵိူတ်ႇလုၵ်ႈၼႆ ၸၢင်ႈၺႃးသူင်ႇၶိုၼ်းမိူင်းၽႂ်မၼ်းယူႇ ဝႃႈၼႆ။

ၸုမ်းထႆးႁၵ်ႉၸၢတ်ႈၸုမ်းၼႆႉ ယၢမ်ႈဢွၵ်ႇသဵင် ဢမ်ႇႁၼ်လီၸွမ်း ဢၼ်ၸုမ်းလူလွမ်ႁႅင်းၵၢၼ် ယွၼ်းၶိုၼ်ႈၵႃႈႁႅင်း လၢႆးဝၼ်းလၢႆးလိူၼ် ၸိူဝ်းၼႆႉပႃး လူးၵွၼ်ႇ ပီပူၼ်ႉမႃးၼႆႉ​​ၵေႃႈၵႆႉလႆႈႁၼ် ဢၼ်ၶဝ်ၵဵဝ်ႇၶွင်ႉၵၼ်တင်းႁႅင်းၵၢၼ်ယၢၼ်မိူင်း ဢၼ်ဢွၵ်ႇမႃးၼႂ်းၶၢဝ်ႇၸိူဝ်းၼၼ်ႉယူႇ ။