ၸဝ်ႈၼႃႈတီႈ မိူင်းမလေႊသျႃႊ ၸတ်းၽႅၼ်ၵၢၼ်ၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်း ၸိူဝ်းဢမ်ႇၶဝ်ႈတၢင်းၵၢၼ် ထပ်းၵၼ်မႃးလၢႆလၢႆတီႈ၊ ၶၢဝ်းတၢင်း 20 ဝၼ်း ၼႂ်းလိူၼ်ၵျုၼ်ႊ ၼႆႉ တီႉၺွပ်းလႆႈႁႅင်းၵၢၼ် ၵူၼ်းမိူင်းမၢၼ်ႈ 100 ပၢႆ – ႁွင်ႈၵၢၼ်ၾၢႆႇလူင်းပိုၼ်ႉတီႈၵူတ်ႇထတ်း ၵူၼ်းၶဝ်ႈဢွၵ်ႇမိူင်းမလေးသျႃး (JIM) ပိုၼ်ၽၢဝ်ႇဝႆႉၼင်ႇၼႆ။
ၼႂ်းဝၼ်းတီႈ 14 လိူၼ်ၵျုၼ်ႊၼႆႉ ၸဝ်ႈၼႃႈတီႈလၢႆလၢႆႁွင်ႈၵၢၼ် ၶဝ်ႈၵူတ်ႇထတ်းဢွင်ႈတီႈ ၸိူဝ်းမီးႁႅင်းၵၢၼ်ယၢၼ်မိူင်း ယူႇသဝ်းၼမ် ၸွမ်းႁိမ်းႁွမ်း ၵၢတ်ႇပူႇတူး ဝဵင်းၵႂႃႇလႃႊလမ်ႊပူႇ မိူင်းမလေႊသျႃႊ၊ တီႉၺွပ်းလႆႈႁႅင်းၵၢၼ်ယၢၼ်မိူင်း 186 ၵေႃႉ၊ ၼႂ်းၼၼ်ႉပႃး ႁႅင်းၵၢၼ်ၵူၼ်းမိူင်းမၢၼ်ႈ ၸၢႆး 13 ၵေႃႉလႄႈ ယိင်း 13 ၵေႃႉ။
လိူဝ်ၼၼ်ႉ ပဵၼ်ၵူၼ်းမိူင်း ဝႅတ်ႊၼၢမ်ႊ၊ ၼီႊပေႃႊ၊ ဢိၼ်ႊတီႊယိူဝ်ႊ၊ ပႃႊၵိတ်ႉသတၼ်ႊ၊ ၵူၼ်းမိူင်းၶႄႇ လႄႈ ၵူၼ်းမိူင်း ပင်ႊၵလႃႊတဵတ်ႉသျ်။ မၢင်ၸိူဝ်း ဢႃယုဝီႊသႃႊမူတ်း၊ ယူႇလိူဝ် ၶၢဝ်းယၢမ်း လႄႈ မၢင်ၸိူဝ်းသမ်ႉ ဢမ်ႇမီးပပ်ႉၶၢမ်ႈမိူင်းသေ ယူႇသဝ်းဝႆႉၼႂ်းမိူင်းမလေႊသျႃႊ။
မိူၼ်ၼႆ ၼႂ်းႁူဝ်လိူၼ်ၵျုၼ်ႊၼႆႉၵူၺ်း ၸုမ်းပလိၵ်ႈ မိူင်းမလေႊသျႃႊတီႉၺွပ်းလႆႈၵူၼ်းမိူင်းမၢၼ်ႈ 2 ၵေႃႉ ဢၼ်ယိပ်းဝႆႉ ဝႂ် ၵူၼ်းပၢႆႈၽေး (UNHCR) ဢၼ်ပွမ်၊ ဢိၵ်ႇတင်း ၸဝ်ႈၵႃး ၵူၼ်းမိူင်းမၢၼ်ႈ ၵေႃႉၼိုင်ႈထႅင်ႈ။
ႁႅင်းၵၢၼ်ၵူၼ်းၼွၵ်ႈမိူင်း ၸိူဝ်းၺႃးသူင်ႇတူဝ်ပွၵ်ႈမိူင်းၶိုၼ်းၼၼ်ႉ တေဢဝ်သႂ်ႇဝႆႉ ၼႂ်းသဵၼ်ႈမၢႆလမ် blacklist၊ သင်ပႆႇပူၼ်ႉၶၢဝ်းယၢမ်းဢၼ်မၵ်းမၼ်ႈဝႆႉၸိုင် တေဢမ်ႇပၼ်ၶႂၢင်ႉၶဝ်ႈ ၼႂ်းမိူင်းမလေႊသျႃႊၶိုၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ