မိူဝ်ႈဝၼ်းတီႈ 22/07/2025 ယၢမ်းတဵင်ႈၶိုၼ်း သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇ ၼႂ်းၸႄႈဝဵင်းသီႇပေႃႉ တူၵ်းသႂ်ႇႁိမ်းတပ်ႉ သိုၵ်းမၢၼ်ႈ  ၶလယ 23 (ခလရ-၂၃) ထႅင်ႈပွၵ်ႈၵမ်းသွင် ယၢၼ်ၵႆၵၼ်တင်းဝဵင်းသီႇပေႃႉ မွၵ်ႈ 2 လၵ်း ၼႂ်းၸိုင်ႈတႆးပွတ်းႁွင်ႇ။

ႁိူဝ်းမိၼ်တိုၵ်းသိုၵ်းမၢၼ်ႈယိုတ်းမိူင်း မႃးပွႆႇမၢၵ်ႇၵႂႃႇၼႆႉ တူၵ်းသႂ်ႇၺႃးၼႂ်းဝၢင်း တပ်ႉၵဝ်ႇသိုၵ်းမၢၼ်ႈ။ ၵူၼ်းမိူင်းၸိူဝ်းယူႇၼႂ်း တူင်ႇတၢင်ႇၼၼ်ႉတႄႉ ပၢႆႈၽေးသိုၵ်းဝႆႉမူတ်းယဝ်ႉလႄႈဢမ်ႇမီးလွင်ႈမၢတ်ႇၸဵပ်းလူႉတၢႆၼႆ ၼၢင်းယိင်းၼုမ်ႇ ဢႃႇယု 30 ပၢႆ ၵေႃႉယူႇဝႆႉ ၼႂ်းၸႄႈဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶမ်ႈဝႃး ၶဝ်မႃးပွႆႇတီႈ တပ်ႉ 23 ၼႆႉၵူၺ်း။ ၸွမ်းၸိူဝ်းၼၼ်ႉ မၼ်းမီးသိုၵ်းလွႆ (တဢၢင်း) ၶဝ်ယူႇဝႆႉ ၵမ်ႈၽွင်ႈ။ မိူဝ်ႈလဵဝ်ၼႆႉ ၵူၼ်း ၼႂ်းပွၵ်ႉ၊ ၼႂ်းဝဵင်း၊ ၵူၼ်းမိူင်းၸိူဝ်းမီးႁိူၼ်းယူႇဝႆႉႁိမ်း ႁူင်းပလိၵ်ႈ၊ တပ်ႉၵဝ်ႇသိုၵ်းမၢၼ်ႈၸိူဝ်းၼႆႉ တႄႉ ဢမ်ႇမီးယဝ်ႉ။   ၶဝ်မႃးပွႆႇ ၵၢင်ၶိုၼ်း လႄႈဢမ်ႇတိူဝ်ႉၺႃးၽႂ်။ ၵူၼ်းယူႇႁိမ်းၸိူဝ်းၼၼ်ႉၵေႃႈ ပိူၼ်ႈပၢႆႈ ၸဵမ်မိူဝ်ႈပၢင်တိုၵ်းဢွၼ်တၢင်းၼၼ်ႉယဝ်ႉ။ ”

ၵူၺ်းၵႃႈႁိမ်းၼၼ်ႉမီးႁိူၼ်းယေးၵူၼ်းမိူင်းလႄႈ ၸၢၵ်ႇမၢၵ်ႇတိူဝ်ႉသႂ်ႇပႃးႁိူၼ်းယေးၶူဝ်းၶွင်ၵူၼ်းမိူင်းလူႉၵွႆ ။

ၵဵဝ်ႇလူၺ်ႈလွင်ႈၼႆႉသေ ၾၢႆႇႁွင်ႈၵၢၼ်ၶၢဝ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်းတႄႉ ပိုၼ်ၽၢဝ်ႇဢွၵ်ႇဝႆႉ ပဵၼ် တၢင်းၵၢၼ်ဝႃႈ “မၢၵ်ႇႁိူဝ်းမိၼ် ဢၼ်သိုၵ်းမၢၼ်ႈမႃးပွႆႇၵႂႃႇ မိူဝ်ႈၶမ်ႈဝႃး (ဝၼ်းတီႈ 22 ယၢမ်းၵၢင်ၶိုၼ်း 12 မူင်းပၢႆ) ၼၼ်ႉ ပဵၼ်သႅၼ်း 500 ပွင်ႊ  ” ဝႃႈၼႆ။

လႆႈႁူႉဝႃႈ ၵူၼ်းမိူင်းၸိူဝ်းယူႇသဝ်း ႁိမ်းႁွမ်း တပ်ႉၵဝ်ႇသိုၵ်းမၢၼ်ႈ ၶလယ 23 ၼႆႉ ႁိူၼ်းယေးလူႉၵွႆၵႂႃႇ ၸဵမ်မိူဝ်ႈပၢင်တိုၵ်း ၽႅၼ်ၵၢၼ် ယၼ်ႇသိုၵ်း 1027 ႁွပ်ႈသွင် ၽွင်းၸုမ်းသိုၵ်းဢူၺ်းလီသၢမ်ၸုမ်း ၶဝ်ႈမႃးတိုၵ်းသိုၵ်းမၢၼ်ႈ ယိုတ်းၵုမ်းဢဝ် ဝဵင်းၼၼ်ႉသေ တင်ႈတႄႇမိူဝ်ႈၼၼ်ႉမႃး ၵူၼ်းမိူင်းၵေႃႈ ငိူင်ႉဝႄႈဝႆႉ ယင်းပႆႇလႆႈပွၵ်ႈယူႇၶိုၼ်းတီႈႁိူၼ်းၶိုၼ်း  ။

ၼႂ်းလိူၼ်ၵျူႊလၢႆႊၼႆႉၵူၺ်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၸႄႈဝဵင်းသီႇပေႃႉ မီး  5 ပွၵ်ႈယဝ်ႉသေ ၵူၼ်းမိူင်းလူႉတၢႆၵႂႃႇၸွမ်း 2 ၵေႃႉ၊ မၢတ်ႇၸဵပ်းၵႂႃႇ 5 ၵေႃႉ၊ ႁိူၼ်းၵူၼ်းမိူင်းလူႉၵွႆၵႂႃႇ 13 လင်၊ ႁူင်းႁဵၼ်းၸိူဝ်းၼႆႉၵေႃႈ လူႉၵွႆၵႂႃႇပႃးၸွမ်း လၢႆလၢႆတီႈၼႆ သိုၵ်းတဢၢင်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

တႅမ်ႈ-ၽူၺ်းၼုမ်ႇ