ၼႂ်းၶၢဝ်းတၢင်း 11 ဝၼ်းၼႆႉ သိုၵ်းမၢၼ်ႈ ယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇၼႂ်းၼႃႈတီႈတပ်ႉသိုၵ်း ပူတ်းပွႆႇၸိူဝ်ႉၸၢတ်ႈတဢၢင်း TNLA ၵုမ်းၵမ် ၼႂ်းၸိုင်ႈတႆးပွတ်းႁွင်ႇၼႆႉ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်း လူႉတၢႆ 13 ၵေႃႉ မၢတ်ႇၸဵပ်း 31 ၵေႃႉၼႆ – ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇၽိုၼ်တၢမ်း ငဝ်းလၢႆးဝႆႉ မိူဝ်ႈဝၼ်းတီႈ 17 ၼႆႉ ၼင်ႇၼႆ။  

တႄႇဢဝ် ဝၼ်းတီႈ 04-14/07/2025 မႃးၼႆႉ သိုၵ်းမၢၼ်ႈ ဢဝ်ႁိူဝ်းမိၼ်တိုၵ်း (Jet Fighter) ပွႆႇမၢၵ်ႇသႂ်ႇၼႂ်း ၸႄႈဝဵင်းသီႇပေႃႉ၊ မိူင်းၵုတ်ႈ၊ ၵျွၵ်ႉမႄးလႄႈ ၼွင်ၶဵဝ် ၼႂ်းၸိုင်ႈတႆးပွတ်း ႁွင်ႇ ဢၼ်ယူႇတီႈ တပ်ႉသိုၵ်းတဢၢင်း TNLA ၵုမ်းၵမ်ဝႆႉ တင်ႈတႄႇမိူဝ်ႈပီ 2024 ၼၼ်ႉမႃး။ သိုၵ်းမၢၼ်ႈ ဢဝ်မၢၵ်ႇႁိူဝ်းမိၼ် ဢၼ်မီးၼမ်ႉၼၵ်း 250 ပွၼ်ႊတင်း 500 ပွၼ်ႊ ၸိူဝ်းၼႆႉ ပွႆႇသႂ်ႇတိူဝ်ႉၺႃးႁိူၼ်းယေးၵူၼ်းမိူင်းလူႉၵွႆ 60 လင်ပၢႆ ၊ ႁူင်းယႃ ၼိုင်ႈလင်၊ ႁူင်းႁဵၼ်း သွင်လင်၊ ႁၢၼ်ႉၶၢႆၶူဝ်းၶွင် 5 လင်၊ ႁူင်းလိုဝ်ႈသဝ်း 1 လင် ၼႆယဝ်ႉ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉသိုၵ်းမၢၼ်ႈ သိုပ်ႇပူၼ်ႉပႅၼ်သုၼ်ႇလႆႈၵူၼ်းႁၢဝ်ႈႁႅင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇတိူဝ်ႉၺႃးၵူၼ်းမိူင်းလူႉတၢႆ မၢတ်ႇၸဵပ်း ၶူဝ်းႁိူၼ်းယေးလူႉၵွႆၼမ်”- ဝႃႈၼႆ။

သိုပ်ႇလၢတ်ႈဝႃႈ – “သိုၵ်းမၢၼ်ႈ တိုၼ်းတင်ႈၸႂ် ႁဵတ်းပိူဝ်ႈတႃႇႁၢင်ႈႁႅၼ်းပၢင်လိူၵ်ႈတင်ႈ လႅၼ်ၽၢမ်းတႃၼွၵ်ႈမိူင်း တႃႇမၼ်းတေသိုပ်ႇယိပ်း ဢႃႇၼႃႇၵႂႃႇၶၢဝ်းယၢဝ်းၵူၺ်း ဢမ်ႇတူၺ်း ႁၼ်ၵူၼ်းမိူင်း ၸိူဝ်းပဵၼ် ၼမ်ႉႁူၼမ်ႉတႃ တုၵ်ႉၵိၼ်းယၢပ်ႇၸွမ်းၼႂ်းၵႄႈမၼ်းၼၼ်ႉ။ ႁဝ်းၶႃႈ တုၵ်းယွၼ်း ႁႂ်ႈသိုၵ်းမၢၼ်ႈ ႁပ်ႉဢဝ်ပုၼ်ႈၽွၼ်း ၸိူဝ်းလူႉသုမ်းၵွႆ ၸိူဝ်းၼၼ်ႉတင်းမူတ်းဢေႃႈ”- ဝႃႈၼႆ။

မိူဝ်ႈၽွင်းၼင်ႇၼၼ် သိုၵ်းမၢၼ်ႈၼႆႉ ထူဝ်းသိုၵ်းၶဝ်ႈမႃးၼႂ်းၵႄႈပၢင်ႇဢူႈလူင်လႄႈ ၼွင်ၶဵဝ်ၸိူဝ်းၼၼ်ႉ ၶဝ်လၵ်ႉသွၵ်ႈ တဝ်ဢဝ်လၢႆၶူဝ်းၶွင်ၵူၼ်းဝၢၼ်ႈ ၸိူဝ်းငိူင်ႉပၢႆႈၽေးသိုၵ်းသိူဝ်။

မိူဝ်ႈၼႂ်းဝူင်ႈလိုၼ်းသုတ်း လိူၼ်မေႊၼၼ်ႉၵေႃႈ သိုၵ်းမၢၼ်ႈ ၶလယ 12 ႁႅင်းၵူၼ်း 300 ပၢႆ ၶဝ်ႈယႃႉသွၵ်ႈ တဝ်ဢဝ်ၶူဝ်းၶွင်ၵူၼ်းဝၢၼ်ႈ မွၵ်ႈ 60 လင် တီႈမၢၼ်ႈၽုၺ်း (ပၢၼ်ႉပူၺ်း) လႄႈ ၼႂ်းဝၢၼ်ႈၵမ်ႉၵေႃႇထႅင်ႈ 40 လင်။ ဝၢၼ်ႈဢၼ်ယူႇၸဵင်ႇၸၢၼ်းဝၼ်းတူၵ်း ဝဵင်းၼွင်ၶဵဝ် ယၢၼ်ၵႆ 20 ၵီႊလူဝ်ႊမႄႊတိူဝ်ႊ။

သိုၵ်းမၢၼ်ႈ ယႃႉၽၵ်းတူလူင်လႄႈ ၽၵ်းတူပွင်ႇၵွႆသေၶဝ်ႈသွၵ်ႈတဝ် ဢဝ်ၶူဝ်းၶွင်ၵူၼ်းဝၢၼ်ႈ ၸိူဝ်းပဵၼ်ၶဝ်ႈ၊ ၼမ်ႉမၼ်းၵိၼ်လႄႈၽႃႈဝႆ ၶူဝ်းၼွၼ်း ဢိၵ်ႇတင်း TV လႄႈၶိူင်ႈၸၢၵ်ႈ ၸိူဝ်းၼႆႉ။ ၶူဝ်းၶွင်ၵူၼ်းဝၢၼ်ႈ ဢၼ်သိုၵ်းမၢၼ်ႈသွၵ်ႈတဝ်ဢဝ်ၼၼ်ႉ ၶဝ်တေႃႉမိူဝ်းၵႂႃႇတၢင်းပၢင်ႇဢူႈလူင်ၼႆ – ၼႂ်းၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇဝႆႉ ၼင်ႇၼႆ။

မိူဝ်ႈဝၼ်းတီႈ 19-20/07/2025 ပူၼ်ႉမႃးၼႆႉၵေႃႈ ႁိူဝ်းမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈဝဵင်းသီႇပေႃႉ တၢင်းဝၢၼ်ႈတူင်ႈၸၢင်ႉလႄႈ ႁိမ်းႁူင်းႁဵၼ်းၸၼ်ႉဢွၼ်ႇ မၢႆ (1) တင်း ႁွင်ႈလိုဝ်ႈသဝ်း ၶႃႈႁၢပ်ႇၵၢၼ်ၶုၼ် ၸိူဝ်းၼၼ်ႉ ဝႃႈၼႆ။