ႁိူဝ်းသိုၵ်းမၢၼ်ႈ ဢၼ်လုၵ်ႉတီႈတႃႈၼမ်ႉ ၵေႃးဝဵၼ်ႇ (ဂေါဝိန်ဆိပ်ကမ်း) ဝဵင်းလိူဝ်ႇ ဢၢၼ်းတေ ၶိုၼ်ႈၵႂႃႇတၢင်းမိူင်းၶၢင်ၼၼ်ႉ ၺႃးယိုဝ်းပွတ်းတၢင်း၊ ႁိူဝ်းသိုၵ်း လမ်းၼိုင်ႈလႄႈ ႁိူဝ်းဢွၼ်ႇ 2 လမ်း ၺႃးၾႆးမႆႈလူႉၵွႆၵႂႃႇၼႆ – တပ်ႉၸုမ်းၵႅတ်ႇၶႄၵူၼ်းမိူင်း PDF ဝဵင်းလိူဝ်ႇ ပိုၼ်ၽၢဝ်ႇဢွၵ်ႇ ၼႂ်းဝၼ်းတီႈ 20/07/2025 ၼႆႉၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 17 ၼႆႉ သၢႆသိုၵ်းတပ်ႉၼမ်ႉသိုၵ်းမၢၼ်ႈ ႁိူဝ်း 14 လမ်း လုၵ်ႉတီႈဝဵင်းလိူဝ်ႇ လတ်းဝဵင်းမတ်တရႃႇ၊ ၸၢင်ႉၵိုဝ် (စဉ့်ကူး)၊ ဝဵင်းၽိတ်ႉၶျၢင်း (သပိတ်ကျင်း) ၸိူဝ်းၼႆႉသေ ၶိုၼ်ႈၸွမ်းၼမ်ႉၵဵဝ်၊ ႁိူဝ်းမိၼ်သိုၵ်းမၢၼ်ႈ Y-12 ၵေႃႈ ဢဝ်ႁူမ်ႇလူမ်ႈ ပွႆႇမၢၵ်ႇသႂ်ႇသွင်ၾင်ႇၼမ်ႉၵဵဝ်သေ ယိုဝ်းတိုၵ်း၊ ၵူၼ်းမိူင်းလူႉတၢႆ 20 ပၢႆ မၢတ်ႇၸဵပ်းထႅင်ႈ 20 ပၢႆ။
ယူႇတီႈ တပ်ႉၸုမ်းၵႅတ်ႇၶႄၵူၼ်းမိူင်း PDF ဝဵင်းလိူဝ်ႇ လႆႈငွႆးယိုဝ်းႁၢဝ်ႈႁႅင်းလႄႈ ႁဵတ်းႁႂ်ႈႁိူဝ်းသိုၵ်း ၾႆးမႆႈလူႉၵွႆၵႂႃႇ 3 လမ်း ဝႃႈၼႆ။
ၽူႈလဵပ်ႈႁဵၼ်းၵၢၼ်သိုၵ်းၶဝ်တႄႉ ထတ်းသၢင်ဝႆႉဝႃႈ – ၼင်ႇႁိုဝ် တေဢမ်ႇသုမ်း ဝဵင်းမၢၼ်ႈမေႃႇ ဢၼ်ပဵၼ်ပၢင်တိုၵ်းႁၢဝ်ႈႁႅင်းၵၼ်တင်း တပ်ႉသိုၵ်းၶၢင်ၼၼ်ႉ သိုၵ်းမၢၼ်ႈ ဢၢၼ်းထႅမ်ႁႅင်းသိုၵ်း ႁႅင်းၵွင်ႈၵၢင်ႇ ၶိုၼ်ႈၵႂႃႇၸွမ်းသၢႆၼမ်ႉၵဵဝ် – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ