ယၢမ်းလဵဝ် တီႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈ ပိုၼ်ၽၢဝ်ႇ ၵုမ်းၵမ်လႆႈၶိုၼ်းယဝ်ႉသေတႃႉ ၵူၼ်းပၢႆႈၽေးသိုၵ်းၶဝ် ပႆႇႁတ်းပွၵ်ႈႁိူၼ်းယေးၵၼ် ယွၼ်ႉပႆႇမီးလွင်ႈႁူမ်ႇလူမ်ႈ။

ဝၼ်းတီႈ 18/07/2025 ၼႆႉ သိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇ ၵုမ်းၵမ်လႆႈၶိုၼ်း ဝဵင်းၼွင်ၶဵဝ်ယဝ်ႉ ၵူၼ်းမိူင်းပိုၼ်ႉတီႈတႄႉ တိုၵ်ႉမႆႈၸႂ်လွင်ႈႁူမ်ႇလူမ်ႈယူႇလႄႈ ယွၼ်ႉၼၼ် တေႃႇထိုင်ယၢမ်းလဵဝ် ပႆႇႁတ်းပွၵ်ႈၶိုၼ်းႁိူၼ်းယေးၵၼ် တိုၵ်ႉၵိုတ်းထႅင်ႈတင်းၼမ် ၼႆယဝ်ႉ။

ၵူၼ်းပၢႆႈၽေးသိုၵ်း ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶဝ်လႆႈၶိုၼ်းယဝ်ႉၼႆ ၸႂ်ႈဢိူဝ်ႈ။ ၵူၺ်းၵႃႈ ပိူၼ်ႈပႆႇႁတ်းပွၵ်ႈမိူဝ်းၵၼ်။ ႁဵတ်းသင်ၼႆ မိူဝ်ႈပၢင်တိုၵ်းၼၼ်ႉ ၶဝ်ၸႂ်ႉမၢၵ်ႇလူင်ၼမ်ၼႃႇလႄႈ ၵူဝ်မၢၵ်ႇတႅၵ်ႇ မၢၵ်ႇဢၼ်ၵိုတ်းဝႆႉ ၸိူဝ်းၼၼ်ႉၶႃႈၼႃႇ။ လိူဝ်ၼၼ်ႉ လွင်ႈႁူမ်ႇလူမ်ႈၵေႃႈ ဢမ်ႇမီး။ ပေႃးမႃးတူၺ်းၼႆ ၽႂ်တေပၼ်လွင်ႈဢုၼ်ႇၸႂ်ၵူၼ်းမိူင်းၼႆ ယင်းဢမ်ႇႁူႉလူးၵွၼ်ႇ။ ၵွပ်ႈၼႆလႄႈ ၽႂ်တေႁတ်းပွၵ်ႈမိူဝ်းၵၼ်”- ဝႃႈၼႆ။

သိုပ်ႇလၢတ်ႈဝႃႈ -“ၵူၼ်းဝၢၼ်ႈၶူၵ်ႉၼမ်ႉ ဢၼ်ပၢႆႈယူႇဝႆႉၼႂ်းၼႃး ၸမ်ႁိမ်းၵျွင်းၼၼ်ႉၵေႃႈ လႆႈသိုပ်ႇပၢႆႈထႅင်ႈဢေႃႈ။ ယူႇတီႈလႂ်ၵေႃႈ ဢမ်ႇမိူၼ်ၸႂ်ႁဝ်း ယၢပ်ႇၶႃႈဢေႃႈ။ မိူဝ်ႈလဵဝ်ၼႆႉ တေမီးမွၵ်ႈ1 လိူၼ်ပၢႆ 2 လိူၼ်ယဝ်ႉ ဢမ်ႇလႆႈမိူဝ်းၸႂ်းႁိူၼ်းယေးၵၼ် သိုၵ်းမၢၼ်ႈၵူၺ်းဢိူဝ်ႈ ဢၼ်မီးယူႇၼႂ်းမူႇဝၢၼ်ႈ”- ဝႃႈၼႆ။

ယၢမ်းလဵဝ် တီႈဝဵင်းၼွင်ၶဵဝ်ၼႆႉ သိုၵ်းမၢၼ်ႈ ႁွၼ်ႈထဝ်ႇၶဝ်ႈယူႇၸွမ်းလုမ်း ဢၼ်မီးၼႂ်းပွၵ်ႉၼႂ်းယွမ်ႇ ၸိူဝ်းၼၼ်ႉသေ ၶဝ်ႈၵုမ်းၵမ်ဝႆႉပႃးထႅင်ႈ ၼႆယဝ်ႉ။

“မိူဝ်ႈလဵဝ်ၼႆႉ သဵၼ်ႈတၢင်းၵေႃႈၶၢတ်ႇ ၶူဝ်ၵေႃႈၶၢတ်ႇယဝ်ႉ ဢမ်ႇၸၢင်ႈၵႂႃႇယဝ်ႉ တီႈၶူဝ်ႁူၺ်ႈၵိုတ်ႈၼၼ်ႉၵေႃႈၵွႆယဝ်ႉ တေၶိုၼ်ႈၵေႃႈဢမ်ႇၸၢင်ႈ တေလူင်းၵေႃႈဢမ်ႇၸၢင်ႈၶႃႈယဝ်ႉ။ မၼ်းဢမ်ႇမီး တၢင်းထႅင်ႈယဝ်ႉ မၼ်းမီးတၢင်းလူင်ၼၼ်ႉၵူၺ်း။ မိူဝ်ႈလဵဝ်ၼႆႉ သိုၵ်းလွႆၵေႃႈဢမ်ႇပေႃးမီး ၶဝ်ထွႆၵႂႃႇ တၢင်းၵျွၵ်ႉမႄးၼၼ်ႉယဝ်ႉ။ သိုၵ်းမၢၼ်ႈတႄႉ ႁွတ်ႈၼႂ်းဝဵင်းယဝ်ႉ။ ဢၼ်ပဵၼ်မိူဝ်ႈဝႃး တင်းမိူဝ်ႈၼႆႉတႄႉ တေပဵၼ်လွင်ႈၶဝ်မူၵ်းယိုဝ်းၵၼ် ဢိတ်းဢွတ်းၼၼ်ႉၵူၺ်း”- ၵူၼ်းပၢႆႈၽေးသိုၵ်း ဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

တီႈဝဵင်းၼွင်ၶဵဝ်ၼႆႉ ပေႃးမႃးၼပ်ႉတူၺ်းၸိုင် တႄႇလိူၼ်မေႊထိုင် လိူၼ်ၵျူႊလၢႆႊ ဝၼ်းတီႈ15 ၼႆႉ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်မႃး ဢမ်ႇယွမ်း 319 ပွၵ်ႈၼႆ ၾၢႆႇပိုၼ်ၽၢဝ်ႇ သိုၵ်းတဢၢင်းၶဝ် ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 16 ပူၼ်ႉမႃးၼႆႉ ၼင်ႇၼႆ။

တပ်ႉသိုၵ်းတဢၢင်း TNLA ၶဝ် ၵုမ်းၵမ်ဝဵင်းၼွင်ၶဵဝ်ၼႆႉ တင်ႈတႄႇလိူၼ်သႅပ်ႊထႅမ်ႊပိူဝ်ႊ ပီ 2024 ၼၼ်ႉမႃး။ ဝၢႆးၼၼ်ႉ တပ်ႉသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း၊ ၸႂ်ႉၵွင်ႈလူင် ပိုတ်းယိုဝ်းၵူၺ်းဢမ်ႇၵႃး ထႅမ်ႁႅင်းသိုၵ်း လေႃႇတိုၵ်းတင်းၼမ်လႄႈ ယွၼ်ႉၼၼ် သိုၵ်းတဢၢင်းၶဝ် ၸင်ႇလႆႈထွႆဢွၵ်ႇၵႂႃႇၶိုၼ်းၼႆ – ၽူႈလဵပ်ႈႁဵၼ်းၵၢၼ်သိုၵ်းၶဝ် လၢတ်ႈၼႄၼင်ႇၼႆ။