ပေႃးႁွတ်ႈထိုင်မႃးၶၢဝ်းၾူၼ်ၸိုင် ယွၼ်ႉလႆႈၸႂ်ႉတိုဝ်းၼမ်ႉ လိူင်ႇၼမ်လီလႄႈ ၵူၼ်းႁဝ်းတေဢွၼ်ၵၼ် ၸူမ်းသိူဝ်းၸႂ်ဝႆႉ ႁင်းၽႂ်မၼ်းယူႇ ။ ပိူင်လူင်ၵေႃႈ ပဵၼ်ၵူၼ်းၸိူဝ်းယူႇသဝ်းတီႈႁိူၼ်းတူဝ်ၸဝ်ႈၵဝ်ႇ ဢၼ် ဢမ်ႇၸႂ်ႈႁွင်ႈၶၢတ်ႈ။ ၵမ်ႈၼမ် တေဢွၼ်ၵၼ်တုင်းဢဝ်ၼမ်ႉၾူၼ် ဢၼ်လႆလူင်းမႃးၸွမ်း ဢၢင်ႇႁၢင်းလိၼ်း/ၸွမ်းႁေႃႇၸၢႆးၶႃး ႁိူၼ်းသေ ဢဝ်မႃးႁဵတ်းပဵၼ် ၼမ်ႉၵိၼ် ၊ ၼမ်ႉၸႂ်ႉ။ မၢင်ၸိူဝ်းယင်းယုမ်ႇယမ်ဝႃႈ ၼမ်ႉၾူၼ်ၼႆႉ သႅၼ်ႈသႂ် လီၼႆသေ ၵဵပ်းသိမ်းဝႆႉၸႂ်ႉတိုဝ်းတႃႇတၢင်းပီၵေႃႈမီး မိူၼ်ၼင်ႇ တင်ႈၸႂ်ၵဵပ်းဝႆႉတႃႇၸႂ်ႉတိုဝ်းပဵၼ် ၼမ်ႉၵိၼ်လႂ် လူးၵွၼ်ႇ။  ၼမ်ႉၾူၼ်ၸွင်ႇသႅၼ်ႈသႂ်။ ၸွင်ႇထုၵ်ႇလီဢဝ်ႁဵတ်းၼမ်ႉၵိၼ်ႁိုဝ်။

ပေႃးတေဢဝ်ၼမ်ႉၾူၼ် မႃးႁဵတ်းပဵၼ် ၼမ်ႉၵိၼ်ၼႆ ထုၵ်ႇလီႁူႉလွင်ႈဢၼ်တေလႆႈၾၢင်ႉ လႄႈ ၼင်ႇႁိုဝ်တေမီးလွင်ႈလွတ်ႈၽေးယူႇ။ ၸဵမ်မိူဝ်ႈပၢၼ်ပူႇမွၼ်ႇၼၢႆးယႃႈႁဝ်းမႃး ယၢမ်ႈဢဝ်ၼမ်ႉၾူၼ် ႁဵတ်း ပဵၼ်ၼမ်ႉၵိၼ်၊ ၼမ်ႉၸႂ်ႉယူႇၼႆသေတႃႉ သင်တိူဝ်းမႃးသႂ်ႇၸႂ်လဵပ်ႈႁဵၼ်း လွင်ႈဢၼ်ၵိုင်ႇလီလႆႈၾၢင်ႉ ထႅင်ႈ ၵေႃႈ တေလီတွၼ်ႈတႃႇပၢႆးယူႇလီယူႇ ။မိူၼ်ၼင်ႇ လွင်ႈဢၼ်ယၢမ်ႈႁူႉၽိတ်း ၊ ႁဵတ်းၽိတ်းၸိူဝ်းၼၼ်ႉၵေႃႈ တေ ၸၢင်ႈမူၼ်ႉမႄးလႆႈၶိုၼ်း။

ၵိၼ်ၼမ်ႉၾူၼ် ၸွင်ႇတေလွတ်ႈၽေး ႁိုဝ် ဢမ်ႇလွတ်ႈၽေးၼႆၼၼ်ႉ မၼ်းဢိင်ၼိူဝ် –

1. ပိုၼ်ႉတီႈဢၼ်ႁဝ်းယူႇသဝ်းၼၼ်ႉ ၸွင်ႇမီးသၽႃႇဝသိင်ႇဝႅတ်ႉလွမ်ႉလီ
2. ႁိမ်းႁွမ်း ႁိူၼ်းႁဝ်း/ဢွင်ႈတီႈႁဝ်းယူႇသဝ်းၼၼ်ႉ ပဵၼ်ၸိူင်ႉႁိုဝ်ဝႆႉ
3. ႁဝ်းႁဵတ်းႁိုဝ်သေ တုင်းဢဝ်ၼမ်ႉၾူၼ်
4. ႁဵတ်းႁိုဝ်သေ ၵဵပ်းၼမ်ႉၾူၼ်ဝႆႉ
5. ၵဵပ်းၼမ်ႉၾူၼ် သႂ်ႇဝႆႉၼႂ်းလႂ်   ၸဵမ်ၸိူဝ်းၼႆႉ ။

လွင်ႈတၢင်း ဢၼ်ႁဵတ်းႁႂ်ႈဢမ်ႇထုၵ်ႇလီၵိၼ်ၼမ်ႉၾူၼ်

 ၵမ်ႈၽွင်ႈတေလၢတ်ႈဝႃႈ ၼမ်ႉၾူၼ်ၼႆႉ ယွၼ်ႉလုၵ်ႉတီႈၼိူဝ်တွင်ႉၾႃႉၵၢင်ႁၢဝ်သေ တူၵ်းလူင်းမႃး လႄႈ တေသႅၼ်ႈသႂ်လိူဝ် ၼမ်ႉတၢင်ႇဢၼ် လႄႈ တေလွတ်ႈၽေးလီ ၼႆယူႇ။ ၵူၺ်းၵႃႈ ၶေႃႈၼႄႉၼမ်း ၼင်ႇ လၢတ်ႈၼႄမႃးၾၢႆႇၼိူဝ်ၼၼ်ႉၵေႃႈ ဢမ်ႇထုၵ်ႇလီလူင်လိုမ်းပႅတ်ႈမိူၼ်ၵၼ် ။

1-  မဵတ်ႉၾူၼ်ၼႆႉ လႆႈလတ်းၽၢၼ်ႇ ၼႂ်းလူမ်းသေ ၸင်ႇပဵၼ်ၾူၼ်တူၵ်းမႃး တီႈၼိူဝ်ၼင်လိၼ် လႄႈ တေ ၸၢင်ႈမီးပႃးၾုၼ်ႇလူမ်းဝူၺ်ႇႁင်ႈယူႇ။ ၵွပ်ႈၼၼ် သင်ဝႃႈႁိူၼ်း ဢမ်ႇၼၼ် ဢွင်ႈတီႈၸဝ်ႈၵဝ်ႇ ယူႇသဝ်းၼၼ်ႉ မီးၸမ်ႁူင်းၸၢၵ်ႈ (စက်ရုံ) ၼႆၸိုင် လူမ်းဝူၺ်ႇႁင်ႈတေၼမ်လႄႈ ဢမ်ႇထုၵ်ႇလီလႆႈ ၵိၼ်ၼမ်ႉၾူၼ်၊ ယွၼ်ႉမၼ်းတေၸၢင်ႈမီးပႃး ငူၼ်ႉၵွင်ႉသၢၼ်ၶႅမ်ႊမီႊၶိူဝ်ႊ ၸိူဝ်းၼႆႉ ။

2- ထႅင်ႈလွင်ႈၼိုင်ႈသမ်ႉ ပဵၼ်လွၵ်းလၢႆးတုင်းဢဝ်ၼမ်ႉၾူၼ်။ သင်ဝႃႈ ဢဝ်ၵွၵ်း ၊ ပုင်းၼမ်ႉ ၊ ဢၢင်ႇၼမ်ႉ ဢၼ်မူတ်းသႂ်သေ တုင်းဢဝ်ၼမ်ႉၾူၼ် ဢၼ်တူင်းလူင်းမႃးတီႈၼိူဝ်ၵၢင်ႁၢဝ်ၼၼ်ႉ ၵမ်းသိုဝ်ႈၸိုင် တေ တိူဝ်း မီလွင်ႈမူတ်းသႂ်လိူဝ်သေ တုင်းဢဝ်ၸွမ်းတူၼ်ႈမႆႉ ၊ ၸွမ်းဢၢင်ႇႁၢင်းလိၼ်း ႁေႃႇၸႆးၶႃးႁိူၼ်း ။

ၵူၺ်းၵႃႈ ၵမ်ႈၼမ်သမ်ႉ တေဢွၼ်ၵၼ် တုင်းဢဝ်ၼမ်ႉၾူၼ် ၸွမ်းဢၢင်ႇႁၢင်းလိၼ်း ႁေႃႇၸႆးၶႃးႁိူၼ်း ၵူၺ်း ။ ပေႃးပဵၼ်ၼၼ်ႉၸိုင် ၸွင်ႇထုၵ်ႇလီၵိၼ်ၼမ်ႉၾူၼ်ၼႆၼၼ်ႉတႄႉ ထုၵ်ႇလီဝူၼ်ႉတူၺ်းၶိုၼ်းဝႃႈ လင်ၶႃးႁိူၼ်း ၊ လွတ်ႇၼမ်ႉ ၊ ဢၢင်ႇႁၢင်းလိၼ်း လႄႈ ၶူဝ်းၶွင်ဢၼ်ႁဝ်းဢဝ်တုင်းၼမ်ႉဝႆႉၼၼ်ႉ ၸွင်ႇမီး လွင်ႈမူတ်းသႂ်ႁိုဝ် ၼႆယူႇ။

ယွၼ်ႉဝႃႈ ႁိူၼ်းမၢင်လင်ၼႆႉ လွတ်ႇၼမ်ႉ ၊ လဵၵ်းမုင်းႁိူၼ်း ႁေႃ ဢမ်ႇၼၼ် မီးယုၵ်းယၢၵ်းၶမ် လႄႈ မီးၾုၼ်ႇမုၵ်ႉ ၸိူဝ်းၼႆႉ ။ သင်ပဵၼ်ၼၼ်  တေမိူၼ်ၵၼ်တၢင်း လႆႈၵိၼ်ၼမ်ႉယုၵ်းယၢၵ်းၵူၺ်း။ ၵွပ်ႈၼၼ် ထုၵ်ႇလီၵႆႉႁဵတ်းပၼ် လွင်ႈမူတ်းသႂ်လႄႈ ၵူတ်ႇထတ်းတူၺ်းယူႇ။

3- တုင်းဢဝ် ၼမ်ႉၾူၼ်ဝႆႉလီလီယူႇသေတႃႉ သင်တီႈၵဵပ်းဝႆႉၼမ်ႉ/ဢၢင်ႇၼမ်ႉ/ယွင်ၼမ်ႉ ဢမ်ႇမီး လွင်ႈမူတ်းသႂ် ၼႆၵေႃႈ တေႁဵတ်းႁႂ်ႈမီးမူင်ႈမႅင်းတၢင်းပဵၼ်မႃးၸွမ်း တီႈၼႂ်းၼမ်ႉ ။

4- ၾူၼ်ဢႅတ်ႊသိတ်ႊ (acid) – ၼမ်ႉၾူၼ်ၵမ်ႈၼမ်ၼႆႉ တိုၼ်းမီးပႃး ထၢတ်ႈဢႅတ်ႊသိတ်ႊသၽႃႇဝ pH ၼႂ်း ၵႄႈ 5.0 ထိုင် 5.5 ယူႇ။ ၵူၺ်းၵႃႈ သင်ဝႃႈယူႇၸမ် လွႆၾႆး ဢၼ်တူင်ႉ(မီးတောင်ရှင်) သေ ၾူၼ်ဢႅတ်ႊသိတ်ႊတူၵ်းတႄႉ တေၸၢင်ႈပဵၼ်ၽေး။

ၵွပ်ႈၼၼ် ၼင်ႇႁိုဝ်တေၵၢင်းယၢၼ်ၽေးသေ ၸႂ်ႉတိုဝ်းၼမ်ႉၾူၼ် ဢၼ်လႆႈမႃးလူၺ်ႈသၽႃႇဝၼၼ်ႉ ထုၵ်ႇလီမေႃလိူၵ်ႈလွၵ်းလၢႆး ႁႂ်ႈထုၵ်ႇမႅၼ်ႈယူႇ။

ပွင်ႈၵႂၢမ်းႁူဝ်ၼႆႉ ၶေႃႈမုလ်း ဢဝ်မႃးတီႈ ဝႅပ်ႉသၢႆႉပၢႆးယူႇလီ hello sayarwon ၶႃႈဢေႃႈ။