တႄႇဝၼ်းတီႈ 14 လိူၼ်ၵျူႊလၢႆႊမႃး သိုၵ်းမၢၼ်ႈ တင်း သိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၽႃၵၢၼ်ႉ တင်း ထုင်ႉၼွင် မႄႈမၢႆႈ (အင်းတော်ကြီးဒေသ)  သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇႁၢဝ်ႈႁႅင်း ၼႂ်းဝဵင်းၽႃၵၢၼ်ႉ ၼႃႈတီႈသိုၵ်း ၶၢင် KIA ၵုမ်းၵမ် ၼႂ်းမိူင်းၶၢင်။

ပၢင်တိုၵ်းၼႆႉ ပဵၼ်ၾၢႆႇတူၵ်းဝဵင်းၽႃၵၢၼ်ႉ တၢင်းဝၢၼ်ႈမေႃႇဝၼ်းလေး (မှော်ဝမ်းလေး)၊ မေႃႇဝၼ်းၵျီး (မှော်ဝမ်းကြီး)၊ ဝၢၼ်ႈမေႃႇမွင်း လႅင် (မော်မောင်းလျံ) ၸိူဝ်းၼႆႉ သဵင်ၵွင်ႈဢမ်ႇထၢတ်ႇ ဝႃႈၼႆ။

ၵူၼ်းမိူင်းၸိူဝ်းယူႇၸွမ်းဝၢၼ်ႈၼၼ်ႉ လႆႈငိူင်ႉပၢႆႈၽေးသိုၵ်းၵႂႃႇ တႄႇၸဵမ်မိူဝ်ႈလိူၼ်ၵျုၼ်ႊၼၼ်ႉယဝ်ႉသေ ၾၢႆႇသိုၵ်းမၢၼ်ႈ  ၶဝ်ႈယူႇ ၸွမ်း ၼႂ်းဝၢၼ်ႈဝႆႉ ။

လိူဝ်ႈၼၼ်ႉ ၾၢႆႇတပ်ႉသိုၵ်းမၢၼ်ႈယိုတ်းမိူင်း ယူႇတီႈၵွင်းတပ်ႉပိဝ်ႇႁႃႇ ဢၼ်မီးဝႆႉၼႂ်းဝဵင်းၽႃၵၢၼ်ႉၼၼ်ႉသေ ပွႆႇမၢၵ်ႇလူင်သႂ်ႇ ၸွမ်း ႁိူၼ်းၵူၼ်းမိူင်း ၼႂ်းဝၢၼ်ႈမေႃႇဝၼ်းၵျီး၊ မေႃႇဝၼ်းလေး လႄႈ မေႃႇမွင်းလႅင်၊ လွႆမေႃႇမွင်း  (မော်မောင်းဘွမ်) ၸဵမ်ၸိူဝ်းၼႆႉ ။ လွင်ႈၼႆႉၶၢဝ်ႇမိတ်ႉသိမ တႄႉပိုၼ်ၽၢဝ်ႇဝႆႉဝႃႈ – ႁိူဝ်းမိၼ်သိုၵ်းမၢၼ်ႈမႃးပွႆႇမၢၵ်ႇ- ပွႆႇၽိတ်းတီႈမၼ်း ၵႂႃႇတူၵ်းသႂ်ႇၶိုၼ်းတီႈၼႂ်းဝၢင်းဝတ်ႉ မေႃႇမွင်းလႅင် တီႈဢၼ်ၵူၼ်းသိုၵ်းမၢၼ်ႈၶဝ်မႃးလိုဝ်ႈသဝ်းဝႆႉၼၼ်ႉ – ဝႃႈၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈတင်း သိုၵ်းၽွမ်ႉႁူမ်ႈ ပျီႇတူႉၸိတ်ႉတႆးလႅင် ႁူမ်ႈၵၼ်သေ ဢဝ်သၢႆသိုၵ်းၶိုၼ်ႈမႃးၸွမ်း သဵၼ်ႈတၢင်း ၼွင်မႄႈမၢႆႈ- ၽႃၵၢၼ်ႉၼၼ်ႉလႄႈ လႆႈပဵၼ်ပၢင်တိုၵ်းၵၼ်တင်း သိုၵ်းၶၢင် ႁၢဝ်ႈႁႅင်း တေႃႇထိုင် ဝၼ်းတီႈ 15 ယၢမ်းၵၢင်ၼႂ် မိူဝ်ႈဝႃး  လႆႈႁူႉၼင်ႇၼႆ။

ၽူႈၶၢၼ်ပၢၵ်ႇၾၢႆႇတပ်ႉသိုၵ်းၶၢင် KIA ၸဝ်ႈသိုၵ်းလူင် ၼေႃႇပူႇ တွပ်ႇလၢတ်ႈယိုၼ်ယၼ်ဝႆႉတီႈသိုဝ်ႇၶၢဝ်ႇမၢၼ်ႈဝႃႈ “တၢင်းဢိၼ်းတေႃႇၵျီး ထုင်ႉၼွင်မႄႈမၢႆႈ ၼႆႉ ပဵၼ်ပၢင်တိုၵ်းၵၼ်ဝႆႉႁႅင်းတေႉတေႉ။ မိူဝ်ႈဝၼ်းတီႈ 14 ၼၼ်ႉ  ၶႅၼ်းႁႅင်းလိူဝ်။  ၵူၺ်းၵႃႈ ဢမ်ႇပႆႇထိုင်ၸၼ်ႉဢၼ်ၾၢႆႇလႂ် ၾၢႆႇၼိုင်ႈ ယိုတ်းလႆႈ တပ်ႉပၢင်သဝ်းၼင်ႇၵဝ်ႇ” ဝႃႈၼႆ။

သိုၵ်းမၢၼ်ႈ လႄႈ  ပျီႇတူႉၸိတ်ႉတႆးလႅင် ႁူမ်ႈၵၼ်ပိုတ်းယိုဝ်း သိုၵ်းၶၢင်  ၾၢႆႇၸၢၼ်းဝဵင်းၽႃၵၢၼ်ႉ ယၢၼ်ၵႆၵၼ်တင်း ထုင်ႉၼွင်မႄႈမၢႆႈ (ဢိၼ်းတေႃႇၵျီး) မွၵ်ႈ 50 လၵ်းၼၼ်ႉသေ ၾၢႆႇသိုၵ်းမၢၼ်ႈၸႂ်ႉႁႅင်းသိုၵ်းတပ်ႉပႆလိၼ် ထူဝ်းသိုၵ်းၶဝ်ႈႁႅင်းလႄႈ ၾၢႆႇသိုၵ်းၶၢင် KIA၊ KPDF လႆႈထွႆပၼ်ယူႇၵမ်းလွႆးလွႆး ၼႆယဝ်ႉ။

မိူဝ်ႈလိူၼ်မၢတ်ႉၶျ် ပီ 2024 ၼၼ်ႉ သိုၵ်းၶၢင် တိုၵ်းတေႃးၽဵဝ်ႈမူၺ်ႉပႅတ်ႈ သိုၵ်းမၢၼ်ႈယိုတ်းမိူင်းၸိူဝ်းမီးယူႇၼႂ်းမိူင်းၶၢင်ၼၼ်ႉသေ ယိုတ်းၵုမ်းလႆႈဝႆႉ ၸႄႈဝဵင်းၼႂ်းမိူင်းၶၢင် တႃႇ 14 ဝဵင်းၵူၺ်းဢမ်ႇၵႃး ၵုမ်းလႆႈပႃး ဝဵင်းမၢၼ်ႈပဵင်း (မဘိန်းမြို့) ၼႂ်းမိူင်းတႆးပွတ်းႁွင်ႇ ဝႆႉထႅင်ႈၵွၼ်ႇ။

ပိူဝ်ႈတႃႇၸုမ်းသိုၵ်းၸၢဝ်းၶိူဝ်း ၼႂ်းမိူင်းတႆးပွတ်းႁွင်ႇ တေၵိုတ်းတိုၵ်းၵၼ်တင်း သိုၵ်းမၢၼ်ႈသေ ထွႆဢွၵ်ႇပၼ်ၶိုၼ်း ၸွမ်းၼႃႈတီႈၵုမ်း ၵမ်လႆႈဝႆႉၸူဝ်ႈၶၢဝ်း ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼၼ်ႉ ၾၢႆႇလူင်ပွင်ၸိုင်ႈမိူင်းၶႄႇ ၶတ်းၸႂ် ၸႂ်ႉလၢႆးတၢင်း ၵူႈလွင်ႈလွင်ႈသေ ပၼ်ႁႅင်းဢီး မိပ်ႇငႅၼ်း တီႈၸုမ်းသိုၵ်းဢူၺ်းလီသၢမ်ၸုမ်းၵူၺ်းဢမ်ႇၵႃး သိုၵ်းၶၢင် KIA ၵေႃႈ ၺႃးမိူၼ်ၵၼ် ။

တႅမ်ႈ- ၽူၺ်းၼုမ်ႇ