ၵူၼ်းဢမ်ႇႁူႉၾၢႆႇၶဝ်ႈၸူၼ်  ႁၢၼ်ႉၶၢႆၶူဝ်းၵုၼ်ႇ တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း လႆႈၵႂႃႇၶမ်း 3 ၵျၢပ်ႈဢၼ် ၵိုင်ႇငိုၼ်း 240 သႅၼ်ပျႃး ဝႃႈၼႆ ။

ဝၼ်းတီႈ 15/7/2025 ယၢမ်းဝၢႆးဝၼ်း 3 မူင်းပၢႆ မီးၵူၼ်းဢမ်ႇႁူႉၾၢႆႇ 4 ၵေႃႉ ပူၵ်ႉၼႃႈပူၵ်ႉတႃႇ  ၶီႇရူတ်ႉၵႃး ဝီႊၵူဝ်ႊ သီလမ်မႃးၵိုတ်းၼႃႈႁၢၼ်ႉၶၢႆၶူဝ်းၵုၼ်ႇဢၼ်ၼိုင်ႈ ဢၼ်မီးၼႂ်းပွၵ်ႉ2 ႁိမ်းၸမ် ႁူင်းၸၢၵ်ႈ ၼမ်ႉၶမ်းလီ ၼၼ်ႉသေ ၶဝ်ႈမႃးသိုဝ်ႉၼမ်ႉၵိၼ် 4 ၽႅၵ်ႉယဝ်ႉ ၸူၼ်ဢဝ်  သၢႆၶေႃးၶမ်း လႄႈဝႅၼ်ၶမ်း ဢၼ်ၸဝ်ႈႁၢၼ်ႉတိုဝ်းဝႆႉၼၼ်ႉၵႂႃႇ။  

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ၶဝ်ဝႃႈတေသိုဝ်ႉၼမ်ႉၼႆသေ ၽိူဝ်ႇႁၼ်ၸဝ်ႈႁၢၼ်ႉ ယဝ်ႉ ဢဝ်မိတ်ႈၸမ်ႈၸဝ်ႈႁၢၼ်ႉသေ ၸူၼ်ဢဝ်သၢႆၶေႃးၶမ်းလႄႈ ဝႅၼ်ၶမ်းပိူၼ်ႈဢၼ်တိုဝ်းဝႆႉ ၼၼ်ႉဢေႃႈ။ ၼမ်ႉၼၵ်းၶမ်းမွၵ်ႈ 3 ၵျၢပ်ႈၼႆတႄႉ တေမႅၼ်ႈငိုၼ်းယူႇမွၵ်ႈ 240 သႅၼ်ပျႃးၼႆႉ”- ဝႃႈၼႆ ။

ၵူၼ်းၸူၼ် 4 ၵေႃႉၼၼ်ႉ ဢႃယုတေမီးမွၵ်ႈ 30 ၸိူဝ်းၼႆႉ။ ၽွင်းၶဝ်မႃးၸူၼ်ၼၼ်ႉ ၸဝ်ႈႁၢၼ်ႉၶိုၼ်းလၢတ်ႈဝႃႈ   မိုင်မိူၼ်ႇၵႂႃႇၵမ်းၼိုင်ႈ ဢမ်ႇတၼ်းႁူႉတူဝ် ၾၢင်ႁၢင်ႈမိူၼ်ၺႃး   ယႃႈဢမ် (တူဝ်ႉသေး)  ဝႆႉၼႆ ၵူၼ်းၸၢႆး ၽူႈယူႇႁိမ်းၵိၼ်ၸမ်ၵေႃႉၼိုင်ႈ လၢတ်ႈၼေၽူႈတွႆႇႁွၵ်ႈၼင်ႇၼႆ ။

“သဵၼ်ႈတၢင်းၼႆႉၵူၼ်းၵိုၼ်း ၵူၼ်းဢမ်ႇတွၼ်ႉၶၢတ်ႇ ပေႃးယဝ်ႉႁၢၼ်ႉၶၢႆၵုၼ်ႇၵေႃႈ မီးၼမ် ၊ ႁိမ်းၼၼ်ႉၵေႃႈမီးၶူင်ႇလဵၼ်ႈ သၼုၵ်ႊၵႃႊ (ပီႊလီႊယႅတ်ႊ)  ၵွပ်ႈၼႆမီးၵူၼ်းၵိုၼ်းယူႇတႃႇသေႇ ၊   ၶဝ်ယင်းႁတ်းမႃးၸူၼ်ၶႃႈၼႃ ၊ မိူဝ်ႈၽွင်းၶဝ်ႈၸူၼ်ၼၼ်ႉၵေႃႈ ၸဝ်ႈႁၢၼ်ႉဝႃႈ ဢမ်ႇႁူႉတေလႆႈတူၵ်းၸႂ်။ မိူၼ် ၺႃးယႃႈဢမ် (တူဝ်ႉသေး) ဝႆႉၼႆဝႃႇ။ ပိူင်ပဵၼ်ဝႆးၼႃႇ ၸူဝ်ႈၽႅပ်ႉတႃၵူၺ်း။  ၵူၼ်းၼႂ်းႁိူၼ်း တမ်ႉဢမ်ႇတၼ်းႁူႉ”- ဝႃႈၼႆ ။

မိူၼ်ၼႆၼင်ႇၵဝ် တီႈဝဵင်းလူင်တူၼ်ႈတီးၵေႃႈ ၼႂ်းဝၼ်းတီႈ 12/7/2025 ၽွင်းၼၢင်းယိင်းသွင်ၵေႃႉ ဢၢၼ်းတေၵႂႃႇယေးငိုၼ်း ၼၼ်ႉမီးၵူၼ်းမႃးယွၼ်းမၢႆၾၢင်၊ ပပ်ႉယေးငိုၼ်းဢၼ်မီးငိုၼ်းတႃႇ 70 သႅၼ်ပျႃး။ ၼၼ်ႉၵေႃႈၾၢင်ႁၢင်ႈမိူၼ်ၺႃးယႃမိုင်။ ဢမ်ႇႁူႉတူဝ်သေ ပၼ်ၵႂႃႇ လူၺ်ႈဢမ်ႇႁူႉၸၵ်း ၵေႃႉဢၼ်မႃးယွၼ်းၼၼ်ႉ- ဝႃႈၼႆ။

ဝၢႆးလင် သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ တီႈဝဵင်းၼမ်ႉၸၢင်ၼႆႉ ႁၢၼ်ႉမူၼ်ႈၵျေႃႇ KTV မီးၼမ်ၶိုၼ်ႈမႃးႁႅင်း ၊ ယႃႈမဝ်းၵမ် ႁႃသိုဝ်ႉၵိၼ်ငၢႆႈ  ၽူႈလၵ်ႉၵူၼ်းၸူၼ်ၵေႃႈၼမ်လိူင်ႇ။ မီးၸုမ်းယိပ်းၵွင်ႈၵၢင်ႇၵႆႉမႃးယွၼ်းၶွၼ်ႇတီႈၵူၼ်းမိူင်းယူႇသေတႃႉ ဢမ်ႇၵႅတ်ႇၶႄႁႄႉၵင်ႈပၼ်၊ ဢမ်ႇၽဵဝ်ႈမူၺ်ႉၸုမ်းၵေႃႇၵၢၼ်ႁၢႆႉပၼ်ၵူၼ်းမိူင်း ။     ဢမ်ႇမီးလွင်ႈႁူမ်ႇလူမ်ႈသင်ယဝ်ႉ ၼႆၵူၼ်းမိူင်းၼမ်ႉၸၢင်ၶၢင်းပွင်ႉတေႃႇၽူႈတွႆႇႁွၵ်ႈၼင်ႇၼႆ။