သိုၵ်းမၢၼ်ႈ တင်း သိုၵ်းတဢၢင်း တိုၵ်ႉသိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၼွင်ၶဵဝ်  ၾၢႆႇသိုၵ်းမၢၼ်ႈထႅမ်ႁႅင်းသိုၵ်းၶဝ်ႈယူႇတင်းၼမ် ၵူၺ်းၵႃႈသိုၵ်းတဢၢင်းတိုၵ်ႉၵုမ်းဝႆႉပႆႇထွႆပၼ်။

ယၢမ်းလဵဝ် သိုၵ်းမၢၼ်ႈ လုၵ်ႉတၢင်းဝၢၼ်ႈတွင်းၶမ်း ၸႂ်ႉႁိူဝ်းမိၼ်၊ ၶိူင်ႈတရူၼ်ႊ၊ ၶိူင်ႈၵွင်ႈလူင် ပႃးၸဵမ်ႁႅင်း သိုၵ်းတပ်ႉပႆလိၼ် ၼပ်ႉႁူဝ်ႁဵင် ႁႅၼ်းသိုၵ်းၽိုတ်ႉၶဝ်ႈမႃးႁိမ်းတၢင်းၶဝ်ႈဝဵင်းၼွင်ၶဵဝ်  ပဵၼ်ပၢင်တိုၵ်းၵၼ် တင်း သိုၵ်းတဢၢင်း TNLA ႁၢဝ်ႈႁႅင်းၼႆ  လူၺ်းယေႇဢူး ၽူႈၶၢၼ်ပၢၵ်ႇ သိုၵ်းတဢၢင်း တွပ်ႇလၢတ်ႈဝႆႉၼင်ႇၼႆ။

“ပၢင်တိုၵ်းၼႂ်းဝဵင်းၼွင်ၶဵဝ်တႄႉ လႆႈဝႃႈ ထိုင်ၸၼ်ႉဢၼ်ႁၢဝ်ႈႁႅင်းသုတ်းၼၼ်ႉယဝ်ႉ။ ၵူၺ်းတေႃႇထိုင်ယၢမ်းလဵဝ်တႄႉ ၾၢႆႇသိုၵ်းတဢၢင်းတိုၵ်ႉၵုမ်း ဝဵင်းၼွင်ၶဵဝ်ဝႆႉယူႇ။ ပႆႇလႆႈထွႆဢွၵ်ႇ။”

မၼ်းၼၢင်းယိုၼ်ယၼ်လၢတ်ႈဝႃႈ ၶူဝ်လူင်ၼႂ်းႁူၺ်ႈၵိုတ်ႈ ဢၼ်ထုၵ်ႇ ယႃႉလႅဝ်ၼၼ်ႉၵေႃႈ ပဵၼ်ၾၢႆႇသိုၵ်းမၢၼ်ႈ ပွႆႇမၢၵ်ႇယႃႉလဵဝ် ဝႃႈၼႆ။

ဝဵင်းၼွင်ၶဵဝ်ၼႆႉ တင်းသဵင်ႈမီးယူႇ 6 ပွၵ်ႉ။ ႁူဝ်ၼပ်ႉၵူၼ်းမိူင်းၸိူဝ်းယူႇသဝ်း မီးယူႇမွၵ်ႈ ၼိုင်ႈသႅၼ်သီႇမိုၼ်ႇၵေႃႉ။ မိူဝ်ႈပီ 2024 လိူၼ်ၵျူႊလၢႆႊ ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ႁွပ်ႈသွင်ၼၼ်ႉ ၸုမ်းဢူၺ်းလီလႄႈတပ်ႉၽွမ်ႉႁူမ်ႈ တိုၵ်းပေႉဢဝ်ၼႂ်းမိုဝ်းသိုၵ်းမၢၼ်ႈသေ ပၼ်သိုၵ်းတဢၢင်း TNLA ၵုမ်းၵမ်မႃးတေႃႇထိုင်ယၢမ်းလဵဝ်။ တင်ႈတႄႇၼၼ်ႉမႃး ပၢင်တိုၵ်းၵေႃႈပဵၼ်မႃးဢမ်ႇထၢတ်ႇ။

ႁိုင်မႃးၶၢဝ်းတၢင်း 1 ပီ သိုၵ်းမၢၼ်ႈႁႅၼ်းသိုၵ်းယႂ်ႇလူင်လေႃႇတိုၵ်းၶိုၼ်းႁၢဝ်ႈႁႅင်း။ မိူဝ်ႈဝၼ်းတီႈ 13 လိူၼ်ၵျူႊလၢႆႊ သိုၵ်း မၢၼ်ႈ ယိုတ်းၵုမ်း ၶဝ်ႈထိုင်လႆႈၶိုၼ်း ၼႂ်းပွၵ်ႉၸၢၼ်းဝဵင်းၼွင်ၶဵဝ် လႄႈ ပွၵ်ႉပႃႇႁၵ်ႉ။ ၾၢႆႇသိုၵ်းမၢၼ်ႈ တိုၵ်ႉသိုပ်ႇတိုၵ်းဢဝ် ၶိုၼ်း ၼႂ်း ဝဵင်းတႃႇ 4 ပွၵ်ႉ ၸိူဝ်းပဵၼ် ပွၵ်ႉၵၢတ်ႇ၊ ပွၵ်ႉပူႇတႃႇ၊ ပွၵ်ႉသပ်ႉပေႇလႄႈ ပွၵ်ႉၼႃးသဵဝ်ႈ ၸိူဝ်းၼႆႉ။

သိုၵ်းမၢၼ်ႈ ႁႅၼ်းသိုၵ်းၶိုၼ်ႈမႃးတၢင်းဝဵင်း ၼွင်ၶဵဝ် မုင်ႈၼႃႈၵႂႃႇ သဵၼ်ႈတၢင်းဢွၵ်ႇဝဵင်းၵျွၵ်ႉမႄး ၸိူဝ်းသိုၵ်းတဢၢင်း ႁဵတ်းၵဵၵ်ႉလၢၼ်ႇ ပႂ်ႉၵဵပ်းၵႃႈသဵၼ်ႈတၢင်း၊ ၵဵၵ်ႉလၢၼ်ႇၵူတ်ႇ ထတ်းယႃႈမဝ်းၵမ် ၸိူဝ်းၼၼ်ႉယူႇ ၼႆယဝ်ႉ။

ၵဵဝ်ႇလူၺ်ႈ ပၢင်တိုၵ်းၼႂ်းၸႄႈဝဵင်းၼွင်ၶဵဝ်ၼႆႉသေ ၵူၼ်းၸိူဝ်းပၼ်ႁႅင်းၵမ်ႉထႅမ်သိုၵ်းမၢၼ်ႈ ၼႂ်း ထႄႊလီႊၵရမ်ႊတႄႉ ဢွၼ်ၵၼ်ပိုၼ်ၽႄႈဝႃႈ “ယၢမ်းလဵဝ် သိုၵ်းမၢၼ်ႈ ယိုတ်းၵုမ်းလႆႈၶိုၼ်း ဝဵင်းၼွင်ၶဵဝ် တႃႇ 2 ပုၼ်ႈယဝ်ႉ  တႃႇသိုပ်ႇၵုမ်းလႆႈထႅင်ႈၼႆႉ ၵိုတ်း 1 ပုၼ်ႈၵွႆး။ ၶူဝ်လူင်ၼႂ်းႁူၺ်ႈၵိုတ်ႈ ဢၼ်ၺႃး ယႃႉလူႉၵွႆၼၼ်ႉၵေႃႈ ပဵၼ်ႁွႆးမိုဝ်း သိုၵ်းတဢၢင်းၶဝ်” ဝႃႈၼႆ။

သိုၵ်းမၢၼ်ႈႁႅၼ်းသိုၵ်းႁိပ်ႇတိုၵ်းႁၢဝ်ႈႁႅင်းလႄႈ တႄႇလိူၼ်မၢတ်ႉၶျ်  ပီ 2025 ၼႆႉမႃး သိုၵ်းတဢၢင်း TNLA လႄႈ ၸုမ်းဢူၺ်းလီ လႆႈ ထွႆဢွၵ်ႇၶိုၼ်းတွင်းၶမ်း။  ယၢမ်းလဵဝ် သိုၵ်းမၢၼ်ႈယိုတ်းၵုမ်းဢဝ်လႆႈထိုင်ၶိုၼ်း ႁိမ်းၼႂ်းဝဵင်းၼွင်ၶဵဝ်။ ပၢင်တိုၵ်းၼႂ်းၸႄႈဝဵင်းၼွင်ၶဵဝ်ၼႆႉ ၾၢႆႇသိုၵ်းတဢၢင်း မီးၸုမ်းဢူၺ်းလီ သိုၵ်းထၼူႉ DPLA လႄႈ ၸုမ်းသိုၵ်းၵူၼ်းၼုမ်ႇမၢၼ်ႈ MDY-PDF ၶဝ် ၶဝ်ႈၸွႆႈတိုၵ်းသိုၵ်းမၢၼ်ႈ ၼႆယဝ်ႉ။

တႅမ်ႈ- ၽူၺ်းၼုမ်ႇ