သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇ တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်းလူႉတၢႆ 2 ၵေႃႉ ၊ မၢတ်ၸဵပ်း 2 ၵေႃႉ ။
မိူဝ်ႈၼႆႉ ဝၼ်းတီႈ 14/7/2025 ယၢမ်းႁူဝ်ၶမ်ႈ 6 မူင်း သိုၵ်းမၢၼ်ႈ ဢဝ်ႁိူဝ်းမိၼ် Jet Fighter ပွႆႇမၢၵ်ႇတူၵ်းတႅၵ်ႇ တိူဝ်ႉၾၢႆႇၸၢၼ်း ၵျွင်းၽြႃးၶရိတ်ႉယၼ်ႇ Immanuel ( ဧမာနွေလ/ဧဝံ ဂေလိ) လႄႈ ဝၢင်း Tai House Resort ဝႃႈၼႆ ။
ၸၢၵ်ႇမၢၵ်ႇသိုၵ်းမၢၼ်ႈတိူဝ်ႉသႂ်ႇပႃး ႁၢၼ်ႉၶၢႆၾူၼ်ႊၼႂ်းဝဵင်းသီႇပေႃႉ လႄႈ ႁၢၼ်ႉတၢင်းၵိၼ် ၼၢင်းတေႇဝီႇ ၊ ႁူင်းလိုဝ်ႈသဝ်း Tai House လႄႈ ႁၢၼ်ႉ ၵႅတ်းၶူၼ်ႁူဝ် ဢၼ်မီးၼိူဝ်သဵၼ်ႈတၢင်းလူင် ဝဵင်းလိူဝ်ႇ- လႃႈသဵဝ်ႈ ၵူၼ်းမိူင်းတၢႆ 2 ၵေႃႉ ၊ မၢတ်ႇၸဵပ်း 2 ၵေႃႉ ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တူၵ်းတီႈၵျွင်းၽြႃး ဢေႊမႃႊၼူၺ်ႊလႃႉ လႄႈႁၢၼ်ႉတၢင်းၵိၼ် ၼၢင်းတေႇဝီႇ ၊ ႁၢၼ်ႉၵႅတ်းၶူၼ်ႁူဝ် ၼၼ်ႉတၢႆ ၵေႃႉၼိုင်ႈ ၊ ဢၼ်မၢတ်ႇၸဵပ်းႁၢဝ်ႈႁႅင်းၵေႃႈမီး ပႆႇလႆႈႁူႉႁူဝ်ယွႆႈမၼ်း ၊ တီႈႁူင်းလိုဝ်ႈသဝ်း Tai House ၼၼ်ႉၵေႃႈ တူၵ်းလုၵ်ႈၼိုင်ႈ”- ဝႃႈၼႆ ။
သိုၵ်းတဢၢင်း TNLA တႄႉပိုၼ်ၽၢဝ်ႇဝႆႉဝႃႈ- ၼႂ်းဝၼ်းတီႈ 4/7/2025 ၼၼ်ႉၵေႃႈ သိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႅၼ်း 250 ပွၼ်ႊ ပွႆႇသႂ်ႇလႄႈ ႁူင်းယႃၵူၼ်းမိူင်းလႄႈတင်း ႁွင်ႈၵၢၼ်ၾၢႆႇလိူမ်ႈလႆႇ ၵွႆလႅဝ်ၵႂႃႇ 5 လင်။ တိူဝ်ႉပႃးႁိူၼ်းယေးၵူၼ်းမိူင်းၵွႆ 8 လင် ဝႃႈၼႆ။
တႄႇဝၼ်းတီႈ 24/6/2025 ထိုင် 12/7/2025 ၼႂ်းၶၢဝ်းတၢင်း 3 ဝူင်ႈ သိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇတီႈဝဵင်းၵျွၵ်ႉမႄး 6 ပွၵ်ႈ ၊ ဝဵင်းသီႇပေႃႉ 2 ပွၵ်ႈ ။ ႁဵတ်းႁႂ်ႈ ၵူၼ်းပိုၼ်ႉတီႈလူႉတၢႆ ဢမ်ႇယွမ်း 10 ၵေႃႉ ၊ မၢတ်ႇၸဵပ်း 30 ပၢႆ ၼႆ ၵူၼ်းၸွႆႈထႅမ်ၼႂ်းပိုၼ်ႉတီႈလၢတ်ႈၼင်ႇၼႆ ။
ၼႂ်းဝၼ်းတီႈ 13/07/2025 ယၢမ်းၵၢင်ၶမ်ႈ 10 မူင်းၶိုင်ႈၼၼ်ႉသမ်ႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇၼႂ်းဝဵင်းမိူင်းၵုတ်ႈ တီႈသိုၵ်းတဢၢင်းတူင်ႉၼိုင်ၵုမ်းၵမ်ဝႆႉၼၼ်ႉ၊ လုၵ်ႈဢွၼ်ႇတၢႆ 2 ၵေႃႉ မီးၵူၼ်းမၢတ်ႇၸဵပ်း 6 ၵေႃႉ ။
ယၢမ်းလဵဝ် သိုၵ်းမၢၼ်ႈတင်း သိုၵ်းတဢၢင်း (TNLA) ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼိူဝ်သဵၼ်ႈတၢင်းလူင်ၵၢၼ်ၵႃႉၶၢႆ မိူင်းမၢၼ်ႈ – မိူင်းၶႄႇ သဵၼ်ႈတၢင်းဝဵင်းၼွင်ၶဵဝ် – ဝဵင်းၵျွၵ်ႉမႄးသေ ႁႅင်းတပ်ႉပႆလိၼ်သိုၵ်းမၢၼ်ႈ ၶဝ်ႈၽႅဝ်ထိုင်လႆႈတီႈပၢႆႉတၢင်းၶဝ်ႈဝဵင်းၼွင်ၶဵဝ် ယၢၼ်ၵႆၵၼ်တင်းဝဵင်းၼွင်ၶဵဝ်မွၵ်ႈ 3 လၵ်းယဝ်ႉ ဝႃႈၼႆ။
တႅမ်ႈ – ၸၢႆးၶႂၢၼ်မိူင်း ၊ ပိၼ်ႇ- ယိင်းသဵဝ်ႈၶၢဝ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ