ၼႂ်းပီ 2024 ပူၼ်ႉမႃးၼႆႉ လိူင်ႈလၵ်ႉၸူၼ်ၶႃႈႁႅမ်ၵၼ်တၢႆ ၼႂ်းမိူင်းႁူမ်ႈတုမ်မၢၼ်ႈ ပတ်းပိုၼ်ႉ မီးႁိမ်းၸမ် 1,000 ၵမ်း၊ ၵမ်ႈၼမ် ပဵၼ်ၼႂ်းတိူင်းဢေႇရႃႇဝတီႇ၊ တိူင်းတႃႈၵုင်ႈ၊ တိူင်းဝဵင်းလိူဝ်ႇလႄႈ တိူင်းပႃႇၵိူဝ်။

ၼႂ်းလိူင်ႈလၵ်ႉၸူၼ် ၶႃႈႁႅမ်ၵၼ်တၢႆ တင်းမူတ်းမီး 967 ၵမ်းၼၼ်ႉ ပဵၼ်တီႈၼႂ်း တိူင်းဢေႇရႃႇဝတီႇ 179 ၵမ်း၊ တိူင်းတႃႈၵုင်ႈ 151 ၵမ်း၊ တိူင်းဝဵင်းလိူဝ်ႇ 150 ၵမ်း၊ တိူင်းပႃႇၵိူဝ် 111 ၵမ်းသေ ဢၼ်ၵိုတ်းလိူဝ်ၸိူဝ်းၼၼ်ႉသမ်ႉ ပဵၼ်ၼႂ်းမိူင်းတႆး၊ တိူင်းၸႄႈၵႅင်း၊ တိူင်းမၵူၺ်းလႄႈ မိူင်းယၢင်းလႅင် ၸိူဝ်းၼႆႉ။

လိူင်ႈၶႃႈႁႅမ်ၵၼ်တၢႆ 967 ၵမ်းၼႆႉ ပဵၼ်ဢၼ်လၵ်ႉၸူၼ်သေ ၶႃႈႁႅမ်ၵၼ်တၢႆၵူၺ်း၊ ပႆႇၼပ်ႉပႃး လိူင်ႈၵၼ်ႉၸၼ်လူလၢႆ လုၵ်ႈဢွၼ်ႇဢႃယုပႆႇတဵမ်၊ လိူင်ႈယႃႈမဝ်းၵမ်၊ လိူင်ႈၵႃႉၶၢႆ ၵူၼ်းသေ ၶႃႈႁႅမ်ၵၼ်တၢႆ ၸိူဝ်းၼႆႉ။

ၸွမ်းၼင်ႇ ၶေႃႈမုလ်းတီႈ ႁွင်ႈၵၢၼ်ၾၢႆႇၼႂ်းမိူင်းသေ ၼႂ်းပီ 2024 ၼႆႉ တူဝ်ႈမိူင်းမၢၼ်ႈ ပတ်းပိုၼ်ႉ လိူင်ႈၵၼ်ႉၸၼ်လူလၢႆၵၼ် မီး 562 ၵမ်း၊ လိူင်ႈၵဵဝ်ႇလူၺ်ႈလုၵ်ႈဢွၼ်ႇ (ကလေး သူငယ်မှုခင်း) သမ်ႉမီး 1,953 ၵမ်း၊ လိူင်ႈယႃႈမဝ်းၵမ် မီး 4,897 ၵမ်း၊ ရူတ်ႉၵႃးပဵၼ်ၽေးၵိုင်ႉၵၢင်ႉသေ လူႉတၢႆမီး 1,013 ၵမ်ႈလႄႈ လိူင်ႈၵႃႉၶၢႆၵူၼ်း မီး 55 ၵမ်း – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။