ဝဵင်းလႃႈသဵဝ်ႈၼႆႉ ပဵၼ်ငဝ်ႈဝဵင်းလူင် မိူင်းတႆးပွတ်းႁွင်ႇသေ ၵူၼ်းမိူင်းႁဵတ်းၵၢၼ်ၵႃႉငၢႆႈၶၢႆလီမႃး။ တင်ႈတႄႇသိုၵ်းမၢၼ်ႈယိုတ်းဢႃႇၼႃႇ ဝၢၼ်ႈမိူင်း ၸုမ်းသိုၵ်းၸၢဝ်းၶိူဝ်း ၽႅၼ်ယၼ်ႇသိုၵ်းသေ ပိုတ်ႇပၢင်တိုၵ်းယိုဝ်းသိုၵ်းမၢၼ်ႈ လိုပ်ႈဢွၵ်ႇဝဵင်းလၢႆလၢႆတီႈ ယဝ်ႉ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၸႄႈဝဵင်းမိူင်းတႆးပွတ်းႁွင်ႇၵမ်ႈၼမ်ၵေႃႈ သုမ်းတိုဝ်ႉတၢင်းသုၼ်ႇလႆႈၵၢၼ်ၵႃႉၶၢႆ၊ သုမ်းသုၼ်ႇ လႆႈၵူၼ်းမႃးၼမ်ႁႅင်းတေႉတေႉ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ မီးၶၢဝ်ႇႁူင်လိုဝ်းဝႃႈ သိုၵ်းမၢၼ်ႈၽိူမ်ႉႁႅင်းသိုၵ်း လႄႈ ၶိူင်ႈၵွင်ႈလူင် ဢိၵ်ႇပႃး ၵႃးတႅင်ႉ၊ ၵႃးၵၢပ်ႇလဵၵ်း ၸိူဝ်းၼႆႉ ထႅမ်ၶဝ်ႈၼႂ်းဝဵင်းလႃႈသဵဝ်ႈ။ ဝၢႆးလင်ၼၼ်ႉ မိူင်းၶႄႇ ယူႇၵႄႈၵၢင်သေ ၸတ်းပၢင်ဢုပ်ႇဢူဝ်း ႁႂ်ႈသိုၵ်းမၢၼ်ႈ တင်း သိုၵ်းၵဝ်ႈ ၵၢင်ႉ ငူပ်ႉငီႉၵၼ်တီႈႁူင်းႁႅမ်းၸၢင်ႉသွင်တူဝ်ထႅင်ႈ တီႈသုၼ်ၵၢင်ၼႂ်းဝဵင်းလႃႈသဵဝ်ႈ ၼႂ်းႁူဝ်လိူၼ်ၵျူႇလၢႆႇၼႆႉ ဝႃႈၼႆ။

ၵဵဝ်ႇလူၺ်ႈပၢင်ဢုပ်ႇဢူဝ်းငူပ်ႉငီႉ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ၼႂ်းဝဵင်းလႃႈသဵဝ်ႈသေ တင်းသွင်ၸုမ်း ဢိၵ်ႇပႃး ၾၢႆႇလူင်ပွင်ၸိုင်ႈ မိူင်းၶႄႇ ဢမ်ႇမီးၸုမ်းလႂ်ၾၢႆႇလႂ်ယိုၼ်ယၼ်ဢွၵ်ႇလိၵ်ႈဢွၵ်ႇမႃး ပဵၼ်တၢင်းၵၢၼ် ႁႂ်ႈၵူၼ်းမိူင်းပေႃးလႆႈႁပ်ႉႁူႉၸွမ်းငဝ်းလၢႆး ၶၵ်ႉၵၢၼ် မၢၼ်ႈမိူင်းလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဢမ်ႇယူႇငၢႆႈလူမ်ၸႂ်မႃးသေပွၵ်ႈ မႆႈၸႂ်ၵူဝ်သိုၵ်းတင်းသွင်ၸုမ်း ယိုဝ်းၵၼ် ၶိုၼ်းယူႇဢမ်ႇထၢတ်ႇဢမ်ႇဝၢႆးမႃး။

ယွၼ်ႉၼၼ်ႉ ငဝ်းလၢႆးလွင်ႈတူင်ႉၼိုင်သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ၼႂ်းဝဵင်း/ၼွၵ်ႈဝဵင်းလႃႈသဵဝ်ႈ လႄႈ ၵူၼ်းမိူင်းပိုၼ်ႉတီႈ ႁဵတ်း ႁိုဝ်ယူႇသဝ်း ႁႃၵိၼ်လဵင်ႉတွင်ႉၸိူင်ႉႁိုဝ်ယူႇၼႆ “မူၺ်ၶမ်း” ၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇတွင်ႈထၢမ်ဝႆႉ ၵူၼ်းမိူင်း  ဝဵင်းလႃႈသဵဝ်ႈၵေႃႉၼိုင်ႈဝႆႉၼင်ႇၼႆ။

ထၢမ်။        ။ လႆႈငိၼ်းဝႃႈ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ႁူပ်ႉဢုပ်ႇၵၼ်တီႈၼႂ်းဝဵင်းလႃႈသဵဝ်ႈၼႆ ၸွင်ႇလႆႈႁူႉၸွမ်းငဝ်းလၢႆး ပၢင်ဢုပ်ႇဢူဝ်းၶဝ်ၽွင်ႈၶႃႈ?

တွပ်ႇ။       ။  ႁဝ်းၵေႃႈလႆႈငိၼ်းၸိူင်ႉၼႆၵွႆး။ ၶဝ်ဢုပ်ႇၵၼ်ၵႂႃႇ ဝူင်ႈပူၼ်ႉၼၼ်ႉ။ ယၢမ်းလဵဝ်တႄႉ ၼႂ်းဝဵင်းလႃႈသဵဝ်ႈၼႆႉ ယဵၼ်ဝႆႉယူႇ။ ၶဝ်ဢုပ်ႇၵၼ်ၵေႃႈ ဢမ်ႇလႆႈၶေႃႈတူၵ်းလူင်းသင်ၵၼ်မႃးထႅင်ႈ။ ၶဝ်ဢုပ်ႇၵၼ်ၼိုင်ႈဝၼ်းၼိုင်ႈတီႈ တႃႇဝၼ်းဢွၼ်တၢင်းသုတ်းၼႆႉ ၶဝ်ၵႂႃႇဢုပ်ႇၵၼ်တီႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ (ထွေအုပ်) ၊ ဝၼ်းတီႈသွင်မႃးသမ်ႉၵႂႃႇဢုပ်ႇၵၼ်တီႈႁူင်းႁႅမ်း ၸၢင်ႉသွင် တူဝ်။ ငဝ်းလၢႆးတေပဵၼ်ႁိုဝ်မႃးတႄႉ ဢမ်ႇၸၢင်ႈလၢတ်ႈယဝ်ႉ။ လူဝ်ႇလႆႈဝႆႉသတိႁႄ ပႂ်ႉတူၺ်းၵႂႃႇၵွႆးယဝ်ႉ။

ထၢမ်။        ။ ၸွင်ႇမီးငဝ်းလၢႆး သိုၵ်းၵဝ်ႈၵၢင်ႉ တေထွႆပၼ်သိုၵ်းမၢၼ်ႈထႅင်ႈယူႇၶႃႈႁႃႉ?

တွပ်ႇ။       ။ ဢမ်ႇလႅပ်ႈထွႆၵွႆး။ ယွၼ်ႉသင်လႃႇၼႆ ၾၢႆႇၼွၵ်ႈဝဵင်းလႃႈသဵဝ်ႈၼႆႉ ဢမ်ႇၸႂ်ႈဝႃႈ မီးၶဝ်ၸုမ်းလဵဝ်ၵွႆးလူး။ ၸုမ်းသိုၵ်း PDF ၶဝ်ၸိူဝ်းၼႆႉၵေႃႈ တိုၵ်ႉမီးပႃးယူႇလူး။ မိူၼ်ၼင်ႇ ၸွမ်းသဵၼ်ႈတၢင်း ၼမ်ႉလၢၼ်ႈ – မိူင်းယႆၼၼ်ႉၵေႃႈ ၸုမ်းသိုၵ်းၵဝ်ႈၵၢင်ႉၸိူဝ်းၼႆႉ တိုၵ်ႉမီးတင်းၼမ်။

ယၢမ်းလဵဝ်ၵဝ်ႈၵၢင်ႉၵေႃႈ တႃႇတေထွႆဢွၵ်ႇၵႂႃႇ ၼႂ်းၸႄႈဝဵင်းလႃႈသဵဝ်ႈၵေႃႈ ၶဝ်ပႆႇတူဝ်ႈတၼ်း။ ယွၼ်ႉဝႃႈ ပၢႆးမၢၵ်ႈမီးၶဝ်ၵေႃႈပႃး။ ၾၢႆႇၼိုင်ႈၵေႃႈ ၸွမ်းသၢပ်ႇဝဵင်းၼႆႉ ၶဝ်ပိုတ်ႇဝႆႉပႃးႁူင်းႁဵၼ်း ဢၼ်ၸႂ်ႉလၵ်းၼမ်း ၾၢႆႇတႂ်ႈ NUG  ၸိူဝ်းၼႆႉၵေႃႈမီး။ ယွၼ်ႉၼၼ်လႄႈ မၼ်းပႆႇတူဝ်ႈတၼ်းတႃႇတေထွႆ။ ၾၢႆႇသိုၵ်းမၢၼ်ႈၼႆၵေႃႈ သင်ဝႃႈၵဝ်ႈၵၢင်ႉထွႆဢွၵ်ႇၵႂႃႇပၼ်ၼႂ်းၸႄႈဝဵင်းလႃႈသဵဝ်ႈယဝ်ႉ ၸွင်ႇမၼ်း ႁမ်ႉတေဢဝ်ႁူမ်ႇလူမ်ႈဝဵင်းလႃႈသဵဝ်ႈလႆႈ ႁူဝ်ပၢၵ်ႇတဵမ်ႁိုဝ်ၼႆၼၼ်ႉၵေႃႈ ပႆႇႁၼ်ၶဝ်တူဝ်ႈတၼ်းသင်။  

ယွၼ်ႉပိူဝ်ႈသင်လႃႇၼႆ သိုၵ်းမၢၼ်ႈၼႆႉ မၼ်းမႃးယူႇဝႆႉ ၼႂ်းဝဵင်းလႃႈသဵဝ်ႈ ပွၵ်ႉ 1 တေႃႇ ပွၵ်ႉ 12 ၼႆႉၼႆၵေႃႈ လွင်ႈလူႉလႅဝ် ၼႂ်းဝဵင်းၼႆႉ တပ်ႉလႂ်ဢမ်ႇတပ်ႉၼၼ်ႉ ၵွႆႁႅင်းၼႃႇ။ ဢၼ်ၶဝ်ထၢင်ႇဝႃႈႁႄ ဢၼ်ပဵၼ်ယူႇႁႄၼၼ်ႉ မၼ်းဢမ်ႇငမ်ႇမႅၼ်ႈၵၼ်ၼၼ်ႉၼႃႇ။ မိူၼ်ၼင်ႇ တပ်ႉၵွင်ၶဝ်၊ တိူင်းၶဝ်ၸိူဝ်းၼႆႉ လူႉၵွႆႁႅင်းၼႃႇ။ မိူဝ်ႈလဵဝ်ၼႆႉ တိုၵ်ႉပဵၼ်ၽွင်းၶဝ်မႄးၵေႃႇသၢင်ႈၶိုၼ်း ၼႂ်းတပ်ႉၶဝ်ၵွႆး။ ပေႃး ၵဝ်ႈၵၢင်ႉဢွၵ်ႇၵႂႃႇယဝ်ႉၼႆ သိုၵ်းမၢၼ်ႈၵေႃႈ လႆႈၵူဝ်ၶိုၼ်းမိုဝ်းသၢမ် မိူၼ်ၼင်ႇ PDF ၶဝ်ႁိုဝ်ႉ ၶၢင်ၶဝ်ႁိုဝ်ႉၼႆၼၼ်ႉထႅင်ႈၼင်ႇၵဝ်ႇ။ 

ပဵၼ်ႁိုဝ်ပဵၼ်လႃႈ သၢပ်ႇဝဵင်းလႃႈသဵဝ်ႈၼႆႉ ပေႃးဝႃႈ ယင်းတိုၵ်ႉမီးသိုၵ်းၵဝ်ႈၵၢင်ႉယူႇယူႇၼႆႉ မၼ်းတေႁူမ်ႇလူမ်ႈလီတႃႇၸုမ်းသိုၵ်း မၢၼ်ႈၶဝ်ၼႆၵေႃႈ ၶဝ်တေလွမ်ဝူၼ်ႉယူႇ။ ၵွပ်ႈဝႃႈ ပေႃးတင်းသိုၵ်းၸၢဝ်းၶိူဝ်းၼႆႉ သိုၵ်းၵဝ်ႈၵၢင်ႉၶဝ်ႈဢွၵ်ႇလႆႈငၢႆႈ။ ၵွပ်ႈၼၼ်လႄႈ ၶဝ်ၸင်ႇႁူပ်ႉဢုပ်ႇၵၼ်ႁႄ ဢဝ်ၶေႃႈတူၵ်းလူင်းၵၼ်တၢင်ႇလွင်ႈၵေႃႈ ၸၢင်ႈပဵၼ်လႆႈယူႇ။

ၼိူဝ်လႅင်း (သိုဝ်ႇတူင်ႇဝူင်းၵူၼ်း) တႄႉဝႃႈ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉဢမ်ႇဢုပ်ႇၵၼ်လႆႈဝႃႇ။ ၼၼ်ႉတႄႉ ပဵၼ်ၽိဝ်မၼ်းၵွႆး။ တႃႇၶဝ်တေဢမ်ႇဢုပ်ႇၵၼ်ဢမ်ႇလႆႈၼႆ မၼ်းဢမ်ႇမီးလေႃႇ။ မိူဝ်ႈဢွၼ်တၢင်းၵေႃႈၶဝ်ၵႂႃႇဢုပ်ႇၵၼ်ဢမ်ႇလႆႈဢမ်ႇလႆႈၼႆႁႄ ၵွႆပၢႆ ဝၢႆးမၼ်းမႃးၵေႃႈ ၼႄၸိူင်ႉလိင်ႉတႃ (မျက်လှည့်) တေႃႇၵူၼ်းမိူင်းႁႄၵႂႃႇၵွႆး။ မိူဝ်ႈလဵဝ်ၵေႃႈ တေမိူၼ်ၼၼ်ၵွႆးၼင်ႇၵဝ်ႇ။

ထၢမ်။        ။ ဝၢႆးလင်သိုၵ်းမၢၼ်ႈၶဝ်ႈမႃးယူႇၼႂ်းဝဵင်းၼႆႉ ငဝ်းလၢႆးၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းၼႂ်းပိုၼ်ႉတီႈ ပဵၼ်ဝႆႉၸိူင်ႉႁိုဝ်ၽွင်ႈ ၶႃႈ?

တွပ်ႇ။       ။  ဢီႈသင်ၵေႃႈ မၼ်းတိုၼ်းဢမ်ႇပႆႇမိူၼ်ၵဝ်ႇၶိုၼ်းလႆႈငၢႆႈငၢႆႈ။ ၵၢၼ်ႁႃၵိၼ်လဵင်ႉတွင်ႉၼႆႉ လႆႈႁူပ်ႉတၢင်းယၢပ်ႇႁင်းၽႂ်မၼ်း။ ယွၼ်ႉဝႃႈ ၸဝ်ႈၵၢၼ်ပၢႆးမၢၵ်ႈမီးလူင်ၶဝ်တေႉတေႉၵေႃႈ ပိူၼ်ႈပႆႇၶဝ်ႈမႃး။ မိူဝ်ႈလဵဝ်ၼႆႉ တီႈဝဵင်းလႃႈသဵဝ်ႈ မၼ်းပႆႇမီးယေးငိုၼ်း (ပၢၼ်ႇ) သုၼ်ႇလဵဝ်။ မဵဝ်းပၢႆးမၢၵ်ႈမီးဢၼ်ဝႃႈၼႆႉ တေလႆႈႁူမ်ႈၽၢၵ်ႈၵၼ်တင်း ယေးငိုၼ်းႁႄ ႁဵတ်းၵၢၼ်လူး။  ပေႃးမဵဝ်းၼိုင်ႈဢမ်ႇ ပဵၼ်ၵေႃႈ ထႅင်ႈမဵဝ်းၼိုင်ႈၵေႃႈယွမ်းၵႂႃႇၼၼ်ႉၼႃႇ။

ၵူၼ်းၸိူဝ်းယၢမ်ႈႁဵတ်းၵၢၼ်လူင်ၵၢၼ်လၢင်ၶဝ်ၸိူဝ်းၼႆႉ ပႆႇႁတ်းၶဝ်ႈမႃးႁဵတ်းၵၢၼ်ၶိုၼ်းမိူၼ်ၵဝ်ႇတေႉတေႉ။ ပေႃးၵူၼ်းမၢၵ်ႈမီးၶဝ် ဢမ်ႇၸၢႆႇငိုၼ်းၵေႃႈ တွၼ်ႈတႃႇၵူၼ်းပၢၼ်ၵၢင်ၼႆႉ ၵၢၼ်ငၢၼ်းဢေႇၵႂႃႇ။ ပေႃးလၢတ်ႈသိုဝ်ႈသိုဝ်ႈၵေႃႈ ၵူၼ်းၶၢႆတၢင်းၶၢႆမၼ်းၼမ်ႁႄ ၵူၼ်းသိုဝ်ႉၵိၼ်မၼ်းဢေႇ။ ၵူၼ်းၶၢႆၶူဝ်းၼုင်ႈတႄႉၼမ်ယူႇ ၵူၼ်းသိုဝ်ႉၼုင်ႈမၼ်းဢေႇ။ မိူဝ်ႈလဵဝ်ၼႆႉ ပဵၼ်ၼႆပႅတ်ႈမူတ်းယဝ်ႉ။  ၵၢၼ်တႃႇတေမူၼ်ႉမႄးပူၵ်းပွင်ၶိုၼ်းဝဵင်းၼႆႉ မၼ်းဢမ်ႇငၢႆႈမိူၼ်ၼင်ႇၶဝ်ထၢင်ႇဝႆႉၼၼ်ႉၼႃႇ။

ထၢမ်။        ။ ၽွင်းသိုၵ်းၵဝ်ႈၵၢင်ႉ ၵုမ်းၵမ် လႄႈ သိုၵ်းမၢၼ်ႈၵုမ်းၵမ်ၼႆႉ ၸွင်ႇမီးလွင်ႈပႅၵ်ႇပိူင်ႈသင်ၵၼ်ၸိူင်ႉႁိုဝ်ၽွင်ႈၶႃႈ?

တွပ်ႇ။       ။ မိူဝ်ႈသိုၵ်းၵဝ်ႈၵၢင်ႉၵုမ်းၼႆႉ ၵူၼ်းၶၢႆတၢင်းၶၢႆၶဝ် ၶႂ်ႈၶၢႆလီလိူဝ်မိူဝ်ႈလဵဝ်ဝႆႉ။ ယွၼ်ႉဝႃႈ ၽွင်းၼၼ်ႉ ၵူၼ်းသိုၵ်းၵူႈၸၢဝ်းၶိူဝ်း မႃးၸၢႆႇငိုၼ်း၊ မႃးသိုဝ်ႉၵိၼ်သိုဝ်ႉယႅမ်ႉၼႂ်းဝဵင်းလႃႈသဵဝ်ႈၼၼ်ႉၼႃႇ။ ၵႆႉၵႆႉငိၼ်းၵူၼ်းၶၢႆတၢင်းၶၢႆၶဝ်ဝႃႈ ဝၢႆးလင်သိုၵ်းၵဝ်ႈၵၢင်ႉဢွၵ်ႇၵႂႃႇ ၼႆႉဢမ်ႇပေႃးၶၢႆလီယဝ်ႉၼႆယူႇ။

ၵူၺ်းၵႃႈ လွင်ႈဝဵင်းၵိုၼ်းၼႆႉသမ်ႉ ယၢမ်းလဵဝ် ၵိုၼ်းႁႄမိူဝ်ႈသိုၵ်းၵဝ်ႈၵၢင်ႉယူႇၼၼ်ႉၼႃႇ။ မိူဝ်ႈလဵဝ်ၼႆႉ ၵူၼ်းၼမ်လၢႆလၢႆႁႄ ၵူၼ်းသိုဝ်ႉၵိၼ်မၼ်းဢေႇ။  မိူဝ်ႈၼၼ်ႉတႄႉ ၶၢႆလီယွၼ်ႉသိုၵ်းၸၢဝ်းၶိူဝ်း လႄႈ ပၢင်တေႃႇလွင်းၼၼ်ႉၼႃႇ။ မိူဝ်ႈလဵဝ်ၼႆႉ ၼႂ်းဝဵင်း လႃႈသဵဝ်ႈၼႆႉ ၵိုၼ်းႁႅင်းမႃးတေႉ ၶႂ်ႈမိူၼ်ၵဝ်ႇၶိုၼ်းယဝ်ႉ။

ၵူၺ်းၵႃႈ လွင်ႈပၢႆးမၢၵ်ႈမီးၼႆႉတႄႉ ပႆႇလီၶိုၼ်းမိူၼ်ၵဝ်ႇ။ ၸဝ်ႈၵၢၼ်မၢၵ်ႈမီးလူင်ၶဝ်ၸိူဝ်းၼႆႉ ပႆႇမႃးပိုတ်ႇလၢၼ်ႉလူး။ မိူၼ်ၼင်ႇ ၵျႃးၶွင်း(ကျားခေါင်း) ၶဝ်ၸိူဝ်းၼႆႉ တမ်ႉပႆႇၽုၺ်ႇၼႃႇ။

ထၢမ်။        ။ ပၢင်တေႃႇလွင်း လႄႈ ႁူင်းမိပ်ႇၼူတ်ႈ၊ ႁွင်ႈပျေႃႇမူၼ်ႈၸိူဝ်းၼႆႉၶႃႈလူး ၸွင်ႇပႃႈဢိုတ်းမူတ်းယဝ်ႉၶႃႈၼႄႇ?

တွပ်ႇ။       ။  ၸိူဝ်းၼႆႉ မၼ်းဢမ်ႇႁၢႆၵႂႃႇတေႉတေႉ။ ယၢမ်းလဵဝ်ၵေႃႈ ယင်းတိုၵ်ႉမီးယူႇ ၵူၺ်းၵႃႈမၼ်းဢေႇလိူဝ်ၵႂႃႇမိူဝ်ႈၽွင်း သိုၵ်းၵဝ်ႈၵၢင်ႉတိုၵ်ႉၵုမ်းၼၼ်ႉယဝ်ႉ။ မိူဝ်ႈလဵဝ်သိုၵ်းမၢၼ်ႈၶဝ်ၵေႃႈ ႁႃၺွပ်းၵူၼ်းၸိူဝ်းပိုတ်ႇပၢင်တေႃႇလွင်းယူႇ။ ၵူၺ်းၵႃႈ မၼ်းဢမ်ႇထိုင်တီႈထိုင်လႅၼ်တေႉတေႉၼင်ႇၵဝ်ႇ။ ၸွမ်းၼႂ်းပွၵ်ႉၼႂ်းယွမ်ႇတီႈၶဝ်ဢမ်ႇယိုၼ်းထိုင်လႆႈၸိူဝ်းၼၼ်ႉ ယင်း တိုၵ်ႉပိုတ်ႇ ဝႆႉယူႇ။

မိူဝ်ႈသိုၵ်းၵဝ်ႈၵၢင်ႉၵုမ်းၵမ်ၼႆႉ ႁႃလွင်ႈတၢင်းတႃႇတေႁဵတ်းပွႆးႁႄ ပိုတ်ႇပၢင်တေႃႇလွင်းၸွမ်းၼိုင်ႈပွၵ်ႈၼႆႉ ၼပ်ႉႁူဝ်ပၢၵ်ႇၽိူၼ် ၼၼ်ႉၼႃႇ။ မိူဝ်ႈလဵဝ်တႄႉ ႁႂ်ႈၶဝ်ႁဵတ်း ပိုတ်ႇပၢင်တေႃႇလွင်း လႄႈ ႁူင်းပျေႃႇမူၼ်ႈၸိူဝ်းၼႆႉ ဢွၵ်ႇၼႃႈဢွၵ်ႇတႃၵေႃႈဢမ်ႇပဵၼ် ၼင်ႇၵဝ်ႇ။

ထၢမ်။        ။ ယၢမ်းလဵဝ်ငဝ်းလၢႆးၵၢၼ်သိုၵ်းၼႂ်းဝဵင်းလႃႈသဵဝ် ယဵၼ်ဝႆႉၼႆသေတႃႉ ၵူၼ်းမိူင်းၼႂ်းပိုၼ်ႉတီႈၶႃႈလူး ၸွင်ႇတိုၵ်ႉမီးလွင်ႈမႆႈ ၸႂ် သင်ၽွင်ႈၶႃႈၼႄႇ?

တွပ်ႇ။       ။ မိူဝ်ႈလဵဝ်ၼႆႉ ၵူႈၵေႃႉၵေႃႈ လွမ်လွမ်ယွၼ်းသူးယူႇႁင်းၽႂ်မၼ်းဝႃႈ ယႃႇပေႁႂ်ႈမၼ်းပဵၼ်သင်ထႅင်ႈၼႆယူႇ။ မိူဝ်ႈလဵဝ်ၼႆႉ ယူႇတီႈႁိူၼ်းၸဝ်ႈၵဝ်ႇယူႇၵေႃႈ မိူၼ်ဢမ်ႇပႆႇဝႆႉဝၢင်းၸႂ်လႆႈလီလီႁႄ ႁဵတ်းႁႃၵိၼ်လဵင်ႉတွင်ႉ။ တိုၵ်ႉလႆႈသတိႁႄယူႇဝႆႉယူႇ။ တေပႅတ်ႈ ႁိူၼ်းႁႄပၢႆႈၵႂႃႇတိၵ်းတိၵ်းၵေႃႈ သမ်ႉပႆႇပဵၼ်လူးၼေႃ။ ၵႃႈလႆႈၾၢင်ႉၾၢင်ႉႁႄ ယူႇလွတ်ႈၵႂႃႇဝၼ်းလႂ်ဝၼ်းၼၼ်ႉၵွႆးယဝ်ႉ။

ယိၼ်းၸူမ်းၶွပ်ႈၸႂ်ယႂ်ႇၼမ်ၶႃႈ တီႈဝႆႉၸႂ်ယႂ်ႇယၢဝ်း ပၼ်ၶၢဝ်းယၢမ်းသေ တွပ်ႇလၢတ်ႈဢုပ်ႇၶႆႈၼႄပၼ် ငဝ်းလၢႆးပိူင်ပဵၼ် ၼႂ်းဝဵင်းလႃႈသဵဝ်ႈယၢမ်းလဵဝ်ၼၼ်ႉၶႃႈဢေႃႈ။