ဝၢႆးလင် သိုၵ်းမၢၼ်ႈ ပိုၼ်ၽၢဝ်ႇ  ယိုတ်းဢဝ်လႆႈၶိုၼ်း မိူင်းပၢႆးယဝ်ႉသိုၵ်းမၢၼ်ႈ ထႅမ်ႁႅင်းထူဝ်းသိုၵ်းၶဝ်မႃးထႅင်ႈ ၾၢႆႇဢွၵ်ႇဝဵင်းၾၢႆၶုၼ်ႇလႄႈ ႁဵတ်းႁႂ်ႈ သိုၵ်းမၢၼ်ႈတင်း ၸုမ်းသိုၵ်းလုၵ်ႉၽိုၼ်ႉမိူင်းယၢင်းလႅင် သိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်း ၼိူဝ်သဵၼ်ႈတၢင်းလူင် မိူင်းပၢႆး – လွႆၶေႃ လႅၼ်လိၼ်တႆး-ယၢင်းလႅင်   ။

တပ်ႉသိုၵ်းၸိူဝ်ႉၸၢတ်ႈၵယၢၼ်း (KNA)  တႄႉပိုၼ်ၽၢဝ်ႇလၢတ်ႈဝႆႉဝႃႈ ယၢမ်းလဵဝ် ပၢင်တိုၵ်းသိုပ်ႇပဵၼ်ႁၢဝ်ႈႁႅင်းဝႆႉတီႈ ၼိူဝ်သဵၼ်ႈတၢင်းလူင် လွႆၶေႃ – မိူင်းပၢႆးလႄႈ ႁၢမ်ႈၵူၼ်းမိူင်းၵႂႃႇမႃး လတ်းၽၢၼ်ႇ ၼိူဝ်သဵၼ်ႈတၢင်းၼၼ်ႉဝႆႉ ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တင်းၾၢႆၶုၼ်-မိူင်းပၢႆးၼႆႉတႄႉ ငဝ်းလၢႆး ဢမ်ႇလီ ။ ၾၢႆႇတၢင်းသိုၵ်းမၢၼ်ႈယိုဝ်းၵွင်ႈလူင်ဢမ်ႇထၢတ်ႇ ၊ သိုၵ်းမၢၼ်ႈတင်း ပျီႇတူႉၸိတ်ႉ ထူဝ်းသိုၵ်း ၶဝ်ႈမႃးတင်းၼမ်”- ဝႃႈၼႆ ။

တႄႇ လိူၼ်ၵျူႊလၢႆႊ ဝၼ်းတီႈ 8 ၼႆႉမႃး သိုၵ်းမၢၼ်ႈထူဝ်းသိုၵ်းၶဝ်ႈၼိူဝ်သဵၼ်ႈတၢင်းလူင် တၢင်းဝၢၼ်ႈ သွင်ၵၢၼ်း ၊ ၵုင်းသႃႇ ၊ ဝႃႇရီႇၵေႃးၶူႇ သေလတ်းၶဝ်ႈမႃးတၢင်းဝၢၼ်ႈ ၼမ်ႉဢုၼ်ႇ ၊ ထီႇရီး ၊ လွႆပဝ်း ၊ ၸၢင်ႉၽိူၵ်ႇ ၊ လွႆထွႆး ဢၼ်မီးၼႂ်းၸႄႈဝဵင်းယွင်ႁူၺ်ႈ – ဝႃႈၼႆ ။

ၼႂ်းဝၼ်းတီႈ 2/7/2025 ၼၼ်ႉ ၾၢႆႇတၢင်းသိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း PNO ၸႂ်ႉဢဵၼ်ႁႅင်းႁဵင်ပၢႆ ထူဝ်းသိုၵ်းၶဝ်ၼႂ်းဝၢၼ်ႈ ၽြႃးလွႆ  လႄႈ ဝၢၼ်ႈၼမ်ႉဢုၼ်ႇ ယိုတ်းလႆႈ တပ်ႉ ၵႅတ်ႇၶႄၵူၼ်းမိူင်း ၼွင်ႁၢႆးယႃႈ (IPDF)  2 တပ်ႉ ဢၼ်မီးတီႈၼႂ်းၸႄႈဝဵင်းယွင်ႇႁူၺ်ႈ ဝႃႈၼႆ ။

ဝၢႆးလင် သိုၵ်းမၢၼ်ႈယိုတ်းလႆႈၶိုၼ်း ဝဵင်းမိူင်းပၢႆး ၼႂ်းၶၢဝ်းတၢင်းၼိုင်ႈဝူင်ႈၵူၺ်း သိုၵ်းမၢၼ်ႈ  ၽဝ်ႁိူၼ်းယေးၵူၼ်းမိူင်း တင်းၼမ် ဝႃႈၼႆ ။

ၵဵဝ်ႇလွင်ႈပၢင်တိုၵ်းၼႆႉသေ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ ၽူႈၶၢၼ်ပၢၵ်ႇ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈ ယၢင်းလႅင် (KNDF)  ယူႇၵေႃႈ ၵပ်းသိုပ်ႇဢမ်ႇလႆႈ ။

ဝဵင်းမိူင်းပၢႆးလႄႈ လွႆၶေႃ ၼႆႉ ယၼ်ၵႆၵၼ် 15 လၵ်း ။ ပၢင်တိုၵ်းၼႂ်းၵႄႈ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ သိုပ်ႇပဵၼ်ႁၢဝ်ႈႁႅင်းသေ ႁဵတ်းႁႂ်ႈၵူၼ်းပိုၼ်ႉတီႈ  ဢၼ်ယူႇတင်း ၾၢႆႇဢွၵ်ႇၾၢႆၶုၼ် လႆႈပၢႆႈၽေးသိုၵ်း ထႅင်ႈ ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သဵင်ၵွင်ႈသဵင်မၢၵ်ႇယိၼ်းၵူႈဝၼ်း  ၊ ပၢင်တိုၵ်း ပဵၼ်ဝႆႉတၢင်းၾၢႆႇဢွၵ်ႇၾၢႆၶုၼ် ၊ တလဵဝ် ၵူၼ်းဝၢၼ်ႈၸိူဝ်းၸမ်ပၢင်တိုၵ်းၵေႃႈ လႆႈပၢႆႈၽေးသိုၵ်း”- ဝႃႈၼႆ ။  

ပၢင်တိုၵ်းဢၼ်ပဵၼ်ယူႇႁၢဝ်ႈႁႅင်းယၢမ်းလဵဝ်ၼႆႉပဵၼ်ပၢင်တိုၵ်းၼႂ်းၵႄႈ သိုၵ်းမၢၼ်ႈႁူမ်ႈပျီႇတူႉၸိတ်ႉ ပိုတ်းယိုဝ်းၵၼ်တင်း တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈ ယၢင်းလႅင် (KNDF) ၊ တပ်ႉသိုၵ်းၸိူဝ်ႉၸၢတ်ႈၵယၢၼ်း (KNA) ၊  တပ်ႉသိုၵ်းၵႅတ်ႇၶႄၵူၼ်းမိူင်းပၢႆး (Mobye PDF) လႄႈ တပ်ႉသိုၵ်းဢူၺ်းလီ ၶဝ် ၸိူဝ်းၼႆႉ   ။

ဝဵင်းမိူင်းပၢႆး လႅၼ်လိၼ်တႆး – ယၢင်းလႅင်ၼႆႉ သိုၵ်းယၢင်းလႅင်ၶဝ် တႄႇယိုတ်းၵုမ်းဢဝ်လႆႈ မိူဝ်ႈလိူၼ်ၼူဝ်ႊဝႅမ်ႊပိူဝ်ႊ ပီ 2023 ။  တႄႇႁူဝ်ပီ 2025 မႃး သိုၵ်းမၢၼ်ႈ ၶိုၼ်း ၸႂ်ႉႁူဝ်ၶေႃႈဝႃႈ ၽႅၼ်ယၼ်ႇသိုၵ်း တိုၵ်းၶိုၼ်းၸုမ်းၵေႃႇၵၢၼ်ႁၢႆႉ (Counter- Terrorism Operation) ၼႆသေ ၶဝ်ႈလေႃႇတိုၵ်း သိုၵ်းယၢင်းလႅင်မႃး ၊ ထိုင်မႃး ဝၼ်းတီႈ 07/07/2025 သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈယဝ်ႉ ဝႃႈၼႆ။