ၼႂ်းႁူဝ်လိူၼ်ၵျူႊလၢႆႊၼႆႉ တပ်ႉသိုၵ်းဝႃႉ (UWSA) တီႉၺွပ်းဢဝ်ၵူၼ်းမိူင်းၶႄႇ ၸိူဝ်းၶဝ်ႈမႃးႁဵတ်းၵၢၼ်ၵျႃးၽႅၼ်ႉ ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ သူင်ႇမွပ်ႈပၼ် ၶိုၼ်းတီႈလူင်ပွင်ၸိုင်ႈမိူင်းၶႄႇၵႂႃႇ တႃႇ 66 ၵေႃႉ ဝႃႈၼႆ။
ၾၢႆႇပလိၵ်ႈတပ်ႉသိုၵ်းဝႃႉ (UWSA) ၵူတ်ႇထတ်းၵူၼ်းႁဵတ်းၵၢၼ်ၵျႃးၽႅၼ်ႉ ၼႂ်းၸႄႈဝဵင်းတၢင်ႉယၢၼ်းသေ တီႉၺွပ်းလႆႈပႃးၾူၼ်း၊ ၶွမ်ႊပိဝ်ႊတိူဝ်ႊ (ၶွမ်း) လႄႈ ၶိူင်ႈၸၢၵ်ႈၸိူဝ်းၵွင်ႉၵၢႆႇၵၼ်တင်း ၵၢၼ်လွၵ်ႇလႅၼ်ၵိၼ်ငိုၼ်းတင်းသဵင်ႈ ၼႆယဝ်ႉ။
လွင်ႈၸုမ်းပလိၵ်ႈသိုၵ်းဝႃႉ တီႉၺွပ်းဢဝ် ၵူၼ်းႁဵတ်းၵၢၼ်ၵျႃးၽႅၼ်ႉ ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ ၶၢမ်ႈလႅၼ်လိၼ်မိူင်းတႆး – မိူင်းၶႄႇသေ မွပ်ႈပၼ်တီႈလူင်ပွင်ၸိုင်ႈမိူင်းၶႄႇၼႆႉ ပဵၼ်ၵၢၼ်ႁူမ်ႈမိုဝ်းၵၼ်တင်း လူင်ပွင်ၸိုင်ႈမိူင်းၶႄႇ ႁဵတ်းၵၢၼ်ၽဵဝ်ႈမူၺ်ႉၸုမ်းၵျႃးၽႅၼ်ႉ ဝႃႈၼႆ။
ၸႄႈဝဵင်းတၢင်ႉယၢၼ်းၼႆႉ ပဵၼ်ဝဵင်းဢၼ်မီးၸုမ်းသိုၵ်းမၢၼ်ႈလႄႈ ၸုမ်းသိုၵ်းတႆး SSPP တင်း သိုၵ်းဝႃႉ (UWSA) ႁူမ်ႈပႃး ၸုမ်းပျီႇတူႉၸိတ်ႉ ၵုမ်းၵမ်ဝႆႉသေ ဝၢႆးလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး ၼႂ်းဝဵင်းတၢင်ႉယၢၼ်း ၵိုင်ႉၵၢင်ႉၵူၼ်းၵိုၼ်းမႃးလိူဝ်ၵဝ်ႇတႄႉတႄႉ။ ၸုမ်းၵျႃးၽႅၼ်ႉ ၸိူဝ်းပၢႆႈဢွၵ်ႇမႃးတၢင်း ဝဵင်းၵၢတ်ႇၵဝ်ႇ (လၢဝ်ႇၵၢႆး) ၼၼ်ႉ ၵေႃႈ မႃးတင်ႈတူဝ်ယူႇသဝ်းဝႆႉၸွမ်း ၼႂ်းပွၵ်ႉၼႂ်းယွမ်ႇ တင်းၼမ်သေတႃႉ ဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ် ႁပ်ႉပုၼ်ႈၽွၼ်းၽဵဝ်ႈမူၺ်ႉတႄႉတႄႉဝႃႈဝႃႈ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ