သိုၵ်းမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၽႃၵၢၼ်ႉ ၸႄႈမိူင်းၶၢင်လႄႈ ႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင်ၵေႃႉ လႆႈပၢႆႈဢွၵ်ႇဝၢၼ်ႈ ၶၢဝ်းတၢင်းၼၼ်ႉ သိုၵ်းတင်းသွင်ၾၢႆႇသမ်ႉ ပိၵ်ႉဢိုတ်းသဵၼ်ႈတၢင်းၵႂႃႇမႃးလႄႈ ၵူၼ်းပၢႆႈၽေးပၢင်တိုၵ်း မွၵ်ႈ 10 ဝၢၼ်ႈၼႆႉ ႁူပ်ႉတၢင်းယၢပ်ႇတႃႇၶဝ်ႈၼမ်ႉတၢင်းၵိၼ်လႄႈ သဵၼ်ႈတႃႈသၢႆတၢင်းတႃႇၵႂႃႇမႃး ၼႆယဝ်ႉ။

မိူဝ်ႈဝၼ်းတီႈ 04/07/2025 ၼၼ်ႉ သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် ယိုဝ်းၵၼ် ႁိမ်းၵုင်းတပ်ႉပိဝ်ႇႁႃႇ ဝဵင်းၽႃၵၢၼ်ႉ တီႈဝၢၼ်ႈၺွင်ႇပိၼ်ႇၵူင်း (ညောင်ပင်ကုန်း)၊ မေႃႇမေႃးလယၼ်း (မော်မောလယန်) လႄႈ ဝၢၼ်ႈသုတ်ႉပွမ်ႉ (ဆွတ်ဘွမ့်) ပဵၼ်ပၢင်တိုၵ်းၵၼ်ဝႆႉ သၢမ်ဢွင်ႈတီႈ။ ၵူၼ်းမိူင်းတႃႇမွၵ်ႈ 10 ဝၢၼ်ႈၼႆႉ လႆႈပၢႆႈဢွၵ်ႇဝၢၼ်ႈ ယၢၼ်ႁိူၼ်းယေးဝႆႉၼႆ ၵူၼ်းမိူင်းပိုၼ်ႉတီႈ ဝဵင်းၽႃၵၢၼ်ႉ လၢတ်ႈၼႄၼင်ႇၼႆ။

ယွၼ်ႉပၢင်တိုၵ်းသေ ၵူၼ်းမိူင်းၼႂ်းၸႄႈမိူင်းၶၢင် လႆႈပၢႆႈၵႂႃႇယူႇဝႆႉဢွင်ႈတီႈဢမ်ႇပဵၼ်ပၢင်တိုၵ်း ၸွမ်းၵျွင်းမုၼ်ၸဝ်ႈ၊ ၵျွင်းၽြႃးၶၢင် KBC လႄႈ RC တင်း ႁိူၼ်းယေးပီႈၼွင်ႉ။ ၼႂ်းဝၢင်းၵျွင်းမုၼ်ၸဝ်ႈလႄႈ ၵျွင်းၽြႃးၶၢင်ၼႆႉ ၵူၼ်းပၢႆႈၽေးတဵမ်လူၼ်ႉၵႂႃႇသဵင်ႈယဝ်ႉလႄႈ ယၢမ်းလဵဝ် ၵူၼ်းမိူင်းယၢပ်ႇၽိုတ်ႇဢွင်ႈတီႈ ယူႇတီႈၼွၼ်းဝႆႉ။ ၵူၼ်းပၢႆႈၽေးၵမ်ႈၽွင်ႈ လႆႈဢဝ်ၽႃႈယၢင်ၵင်ႈမုင်းၸွမ်း တူၼ်ႈမႆႉသေ ႁဵတ်းသုမ်ႉသွၼ်ႈယူႇဝႆႉၸူဝ်ႈၶၢဝ်း ၼႆယဝ်ႉ။

လႆႈႁူႉဝႃႈ သိုၵ်းမၢၼ်ႈတင်း သိုၵ်းၶၢင် KIA ပိၵ်ႉဢိုတ်းဝႆႉသဵၼ်ႈတၢင်းၵႃး ဝဵင်းၸေႊၼႃး (မြစ်ကြီးနား) – ၵႃးမၢႆး (ကားမိုင်း) ဢၼ်ၸၢင်ႈဢွၵ်ႇၶၢဝ်းတၢင်း ၵႂႃႇတၢင်းဝဵင်းၽႃၵၢၼ်ႉလႆႈၵမ်းသိုဝ်ႈၼၼ်ႉ။ ယၢမ်းလဵဝ် တွၼ်ႈတႃႇတေႃႉၶူဝ်းၵုၼ်ႇၵႃႉၶၢႆ ၶဝ်ႈၵႂႃႇၼႂ်းၸႄႈမိူင်းၶၢင်ၼႆႉ လႆႈၸႂ်ႉသဵၼ်ႈတၢင် ဢိၼ်းတေႃႇၵျီး – ၽႃၵၢၼ်ႉ – ၵူၺ်ႇၶႃႇ သဵၼ်ႈလဵဝ်ၵူၺ်းသေ ၾၢႆႇသိုၵ်းမၢၼ်ႈသမ်ႉ ဢွၵ်ႇၶေႃႈၸီႉသင်ႇ ႁၢမ်ႈဢမ်ႇပၼ် တေႃႉၶဝ်ႈသၢၼ်ဝႆႉ ႁိုင်မႃးၶၢဝ်းတၢင်း မွၵ်ႈၼိုင်ႈလိူၼ်ယဝ်ႉ ဝႃႈၼႆ။

တႅမ်ႈ – ၽူၺ်းၼုမ်ႇ