သိုၵ်းမၢၼ်ႈပွႆႇမၢၵ်ႇ တူၵ်းသႂ်ႇတီႈပၢင်သဝ်း ၵူၼ်းပၢႆႈၽေးသိုၵ်းတီႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း၊  ၵူၼ်းမိူင်းတၢႆ 3 ၵေႃႉ  မိူင်းမၢတ်ႇၸဵပ်း 2 ၵေႃႉ။

မိူဝ်ႈဝႃး ဝၼ်းတီႈ 7/7/2025 ယၢမ်းၵၢင်ၶမ်ႈ 11 မူင်း သိုၵ်းမၢၼ်ႈ ဢဝ်ႁိူဝ်းမိၼ်သိုၵ်း ပွႆႇမၢၵ်ႇတူၵ်းသႂ်ႇတီႈ ဝၢၼ်ႈသွင်းၽူၺ်း ၾၢႆႇတူၵ်းဝဵင်းမိူင်းပၢႆး၊ ၵူၼ်းပၢႆႈၽေးသိုၵ်း သၢမ်ၵေႃႉပေႃႈမႄႈလုၵ်ႈတၢႆထင်တီႈ၊ မၢတ်ႇ ၸဵပ်းထႅင်ႈ 2 ၵေႃႉ။  

ၸုမ်းၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ – “ ၶမ်ႈဝႃး သိုၵ်းမၢၼ်ႈ ယိုဝ်းမၢၵ်ႇသႂ်ႇတီႈ ဝၢၼ်ႈသွင်းၽူၺ်း တီႈဢၼ်ၵူၼ်းပၢႆႈၽေးသိုၵ်းၶဝ်ယူႇဝႆႉ ၊ တူၵ်းတိူဝ်ႉ သၢမ်ၵေႃႉ ပေႃႈမႄႈလုၵ်ႈတၢႆ  ၊ ၵူၼ်းမၢၼ်းၵေႃႉၼိုင်ႈလႄႈ ၵူၼ်းၸၢႆးၵေႃႉၼိုင်ႈၵေႃႈမၢတ်ႇၸဵပ်း ”- ဝႃႈၼႆ ။

ၵူၼ်းတၢႆၼၼ်ႉပဵၼ် ၵူၼ်းၸၢႆး ဢႃယု 28 ၵေႃႉၼိုင်ႈ ၊ ၼၢင်းယိင်းဢႃယု 26 ပီၵေႃႉၼိုင်ႈလႄႈ လုၵ်ႈယိင်း ဢွၼ်ႇၶဝ် ဢႃယု 4 ၶူပ်ႇတၢႆထင်တီႈ ။ လိူဝ်ၼၼ်ႉ မႄႈမၢၼ်းပုမ်လူင် ဢႃယု 30 ပီ ၵေႃႉၼိုင်ႈလႄႈ ၵူၼ်းၸၢႆး ဢႃယု 40 ပီ ၵေႃႉၼိုင်ႈ မၢတ်ႇၸဵပ်း ႁၢဝ်ႈႁႅင်းဝႃႈၼႆ  ။

မိူဝ်ႈဝႃး ဢွင်ႈတီႈ သိုၵ်းမၢၼ်ႈမႃးပွႆႇမၢၵ်ႇ တင်းမူတ်းမီး 4 လုၵ်ႈ ၊ ဢွင်ႈတီႈ ၵူၼ်းပၢႆႈၽေးသိုၵ်းၼၼ်ႉ တူၵ်းတႅၵ်ႇ 2 လုၵ်ႈ ၊ တူၵ်းတႅၵ်ႇၼႂ်းဝၢၼ်ႈ သွင်းၽူၺ်း လုၵ်ႈၼိုင်ႈဢၼ်ပႆႇတႅၵ်ႈၵိုတ်းၼိုင်ႈလုၵ်ႈ ဝႃႈၼႆ ။

ပၢင်သဝ်းၵူၼ်းပၢႆႈၽေးသိုၵ်း ဢၼ်သိုၵ်းမၢၼ်ႈမႃးပွႆႇမၢၵ်ႇၼၼ်ႉ ယၢၼ်ၵႆၵၼ်တင်း ဝဵင်းမိူင်းပၢႆးမွၵ်ႈ  1 ၸူဝ်ႈမူင်း ။ ၵူၼ်းပၢႆႈၽေးဢၼ်မႃးယူႇဝႆႉတီႈ ပၢင်သဝ်းၵူၼ်းပၢႆႈၽေးသိုၵ်းၼၼ်ႉ ပဵၼ်ၵူၼ်းဝၢၼ်ႈ ၵုင်းသႃႇ (ကုန်းသာ) ၊ ၼမ်ႉပႃလူင် (နန့်ပလုံ) ၸိူဝ်းၼႆႉ ။  တေႃႇထိုင်မိူဝ်ႈၼႆႉ တၢင်းဝၢၼ်ႈၽႃသွင်ႇ ၾၢႆႇဢွၵ်ႇဝဵင်းမိူင်းပၢႆးၼၼ်ႉ ပၢင်တိုၵ်းပဵၼ်ဝႆႉႁၢဝ်ႈႁႅင်း ။

ၸုမ်းၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ – “ ယၢမ်းလဵဝ်ၼႆႉ ပၢင်တိုၵ်းပဵၼ်ဝႆႉတၢင်း မိူင်းပၢႆး ၊ ၽႃသွင်ႇ လႄႈ ၾၢႆႇဢွၵ်ႇ ဝဵင်းမိူင်းပၢႆးၸိူဝ်းၼႆႉ၊  ဢွင်ႈတီႈပဵၼ်ပၢင်တိုၵ်းတင်း သိုၵ်းမၢၼ်ႈမႃးပွႆႇမၢၵ်ႇၼႆႉ ၵႆၵၼ်ယူႇ ၊ သိုၵ်းမၢၼ်ႈၼႆႉ ပေႃးၶဝ်ၵၢၼ်ႉသိုၵ်းၼႆ ၶဝ်ၵႆႉမႃးပွႆႇမၢၵ်ႇသႂ်ႇတီႈပၢင်သဝ်းၵူၼ်းပၢႆႈ ၽေးသိုၵ်းၼႆ ႁဵတ်းႁႂ်ႈၵူၼ်းမိူင်းတၢႆတိၵ်းတိၵ်းၵူၺ်း   ”- ဝႃႈၼႆ ။  

ယၢမ်းလဵဝ်ယွၼ်ႉပၢင်တိုၵ်းပဵၼ်ဝႆႉဢမ်ႇထၢတ်ႇဢမ်ႇၵိုတ်းလႄႈ ယူႇတီႈၸုမ်းၸွႆႈထႅမ် ၵူၼ်းပၢႆႈၽေးသိုၵ်းၶဝ်ၵေႃႈ လႆႈၸွႆႈဢဝ်ၵူၼ်းဝၢၼ်ႈၸိူဝ်းပၢႆႈၽေးသိုၵ်းမႃးၸိူဝ်းၼၼ်ႉ သိုပ်ႇၶၢႆႉပၢႆႈတီႈယူႇထႅင်ႈ။ ၵွပ်ႈၼႆလူဝ်ႇတၢင်းၸွႆႈထႅမ် တွၼ်ႈတႃႇတီႈယူႇတၼ်းသဝ်းလႄႈ တၢင်းၵိၼ်တၢင်းယမ်ႉဝႆႉ   ႁၢဝ်ႈႁႅင်း ဝႃႈၼႆ ။

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ သိုၵ်းမၢၼ်ႈလႄႈသိုၵ်းၵႅတ်ႇၶႄၵူၼ်းမိူင်း PDF ပိုတ်းယိုဝ်း တိုၵ်းတေႃး ၵၼ်ၼႂ်း ၸႄႈဝဵင်းမိူင်းပၢႆး၊ ၾၢႆၶုၼ်လႄႈ ၸွမ်းလႅၼ်လိၼ်တႆး – ယၢင်းလႅင် ပၢင်တိုၵ်းပဵၼ်ဢမ်ႇထၢတ်ႇ။ မိူဝ်ႈၼႆႉ ဝၼ်းတီႈ 07/07/2025   သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆး  ဢၼ်တပ်ႉသိုၵ်း ယၢင်းလႅင် ၵုမ်းၵမ်ဝႆႉၼၼ်ႉၶိုၼ်း  ၸဵမ်မိူဝ်ႈဝၼ်းတီႈ 3/7/2025 ယဝ်ႉဝႃႈၼႆ ။

ၸူဝ်ႈသိုၵ်းမၢၼ်ႈၶဝ်ႈယိုတ်းဝဵင်းမိူင်းပၢႆးမႃးၶိုၼ်းၶၢဝ်းတၢင်း 3 ဝၼ်းၼႆႉ    သိုၵ်းမၢၼ်ႈၽဝ်ႁိူၼ်းယေး ၵူၼ်းမိူင်း ၼႂ်းဝဵင်းမိူင်းပၢႆး ဢမ်ႇယွမ်း 20 လင်ယဝ်ႉၼႆ သိုၵ်းKNDF ပိုၼ်ၽၢဝ်ႇဝႆႉၼင်ႇၼႆ ။