သိုၵ်းမၢၼ်ႈဢဝ်တရူၼ်ႊ ပွႆႇမၢၵ်ႇသႂ်ႇႁူင်းႁဵၼ်းဝၢၼ်ႈလီဝူဝ်း (လီဝိုး) ဝဵင်းၼမ်ႉမႄႈၶုၼ် (နန်းမယ်ခုံ) ၸႄႈဝဵင်းၻီးမေႃးသူဝ်ႇ မိူင်းယၢင်းလႅင် တိူဝ်ႉလုၵ်ႈဢွၼ်ႇ  တၢႆ  2 ၵေႃႉ ။

မိူဝ်ႈဝႃး ဝၼ်းတီႈ 24/6/2026 ယၢမ်းၵၢင်ဝၼ်း 1 မူင်း သိုၵ်းမၢၼ်ႈဢဝ်တရူၼ်ႊ ပၼ်ႇလဵပ်ႈတီႈႁူင်းႁဵၼ်း ဢၼ်မီးတီႈဝၢၼ်ႈလီဝူဝ်း ဝဵင်းၼမ်ႉမႄႈၶုၼ် (နန်းမယ်ခုံ) ပွႆႇမၢၵ်ႇ ႁဵတ်းႁႂ်ႈၸၢၵ်ႇမၢၵ်ႇတိူဝ်ႉ လုၵ်ႈႁဵၼ်းတၢႆသွင်ၵေႃႉ ။ ပဵၼ်ဢွၼ်ႇယိင်း ဢႃယု 10 ၶူပ်ႇၵေႃႉ 1 ၊ ဢွၼ်ႇၸၢႆး 6 ၶူပ်ႇ ၵေႃႉၼိုင်ႈ   ။

ၵူၼ်းၸွႆႈထႅမ် ၵူၼ်းပၢႆႈၽေးသိုၵ်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ မိူဝ်ႈဝႃးၼႆႉ သိုၵ်းမၢၼ်ႈ ဢဝ်တရူၼ်ႊ မႃးပွႆႇမၢၵ်ႇတီႈႁူင်းႁဵၼ်း ။ ၸၢၵ်ႇမၢၵ်ႇတူၵ်းတိူဝ်ႉ လုၵ်ႈဢွၼ်ႇႁဵၼ်း သွင်ၵေႃႉ မၢတ်ႇၸဵပ်း လူႉတၢႆ  ၊ ဝၢႆးၼၼ်ႉမွၵ်ႈၵၢင်ၶမ်ႈၼႆႉၵေႃႈ သိုၵ်းမၢၼ်ႈဢဝ်ႁိူဝ်းမိၼ်မႃးပၼ်ႇလဵပ်ႈပွႆႇထႅင်ႈ ၊ တူၵ်းတင်းလႂ်တႄႉဢမ်ႇလႆႈႁူႉၸွမ်း “- ဝႃႈၼႆ ။

ၶမ်ႈဝၼ်းတီႈ 23/06/2026 ယၢမ်းၵၢင်ၶမ်ႈ 10 မူင်း ၼၼ်ႉသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇတီႈၼႂ်း ၸႄႈဝဵင်း လွႆၼၢင်းၾႃႉ (လွိုင်နန်းဖ) ။ လွင်ႈတုမ်ႉတိူဝ်ႉမၢတ်ႇၸဵပ်းတႄႉ ဢမ်ႇမီးသေတႃႉ ႁဵတ်းႁႂ်ႈ ၵူၼ်းပိုၼ်ႉတီႈ တိုၼ်ႇသၢၼ်ႈတူၵ်းၸႂ် ၵူဝ်ပဵၼ်ပၢင်တိုၵ်းၵၼ်ၶိုၼ်း ဝႃႈၼႆ ။  

ယၢမ်းလဵဝ် သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်ဝႆႉ ၸွမ်းပိုၼ်ႉတီႈ ၼႂ်းၸႄႈ ဝဵင်းၾၢႆၶုၼ် ။ ၾၢႆႇသိုၵ်းမၢၼ်ႈ ပၵ်းတပ်ႉဝႆႉတီႈၵျွင်းမုၼ်ၸဝ်ႈ တင်းဝၢၼ်ႈ ၸလူင်ႈတႂ်ႈ ၊ ၸလူင်ႈၼိူဝ် ၼႂ်းၸႄႈ ဝဵင်းၾၢႆၶုၼ်သေ ၶဵင်ႈၶႅင် ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈဝႆႉ ။

ၽူႈတူင်ႉၼိုင်ၵၢၼ်သိုၵ်း ဢၼ်မီးယူႇတီႈၼႃႈသိုၵ်းလၢတ်ႈၽူႈတွႆႇႁွၵ်ႈဝႃႈ – “တၢင်းဝၢၼ်ႈၸလူင်ႈတႂ်ႈလႄႈ ၊ ၸလူင်ႈၼိူဝ်ၼႆႉ ၸမ်ၸမ်ၵၼ်တင်းတီႈႁဝ်းၶဝ်ယူႇၵူၺ်း ၊ သိုၵ်းမၢၼ်ႈၶဝ်တႄႉ ပၵ်းပၢင်သဝ်းဝႆႉ တၢင်းဝၢၼ်ႈၸလူင်ႈတႂ်ႈ ၊ ပေႃးၶဝ်ထူဝ်းသိုၵ်းၶဝ်ႈမႃးတႄႉ ၸၢင်ႈပဵၼ်ပၢင်တိုၵ်းလႆႈၶိုၼ်းၵူႈၶၢဝ်း”- ဝႃႈၼႆ ။

ၾၢႆႇၼိုင်ႈၵေႃႈ ၾၢႆႇၽွင်းငမ်း ဝဵင်းၾၢႆၶုၼ် လႅၼ်လိၼ် တႆး-ယၢင်းလႅင် ပိုၼ်ၽၢဝ်ႇ ဝႆႉၼႂ်းဝၼ်းတီႈ 20 လိူၼ်ၵျႃၼ်ႊဝႃႈ ယွၼ်ႉသိုၵ်းမၢၼ်ႈဢဝ်ႁိူဝ်းမိၼ် တရူၼ်ႊပၼ်ႇလဵပ်ႈ ပၢင်တိုၵ်း ၸၢင်ႈပဵၼ် ႁၢဝ်ႈႁႅင်းမႃး  ယူႇတီႈၵူၼ်းပိုၼ်ႉတီႈလႄႈ ၵူၼ်းပၢႆႈၽေးသိုၵ်းႁႂ်ႈၾၢင်ႉယူႇၾၢင်ႉၵိၼ်ၵၼ်ဝႆႉ ဝႃႈၼႆ ။   

မိူၼ်ၼင်ႇၼႆ ၼႂ်းဝၼ်းတီႈ 15 လိူၼ်ၵျႃၼ်ႊ ယၢမ်းၵၢင်ၼႂ်ၼၼ်ႉၵေႃႈ သိုၵ်းမၢၼ်ႈဢဝ်တရူၼ်ႊပွႆႇမၢၵ်ႇ ၼႂ်းဝဵင်းၼမ်ႉမႄႈၶုၼ်  ႁဵတ်းႁႂ်ႈၵူၼ်းပိုၼ်ႉတီႈမၢတ်ႇၸဵပ်း ႁၢဝ်ႈႁႅင်း ။ လိူဝ်ၼၼ်ႉ ၼႂ်းဝၼ်းတီႈ 3 လိူၼ်ၵျႃၼ်ႊၼၼ်ႉၵေႃႈ သိုၵ်းမၢၼ်ႈဢဝ် တရူၼ်ႊ ပွႆႇမၢၵ်ႇထႅင်ႈ ႁဵတ်းႁႂ်ႈ ၵူၼ်းပၢႆႈၽေးသိုၵ်း ၼၢင်းယိင်းၵေႃႉၼိုင်ႈ မၢတ်ႇၸဵပ်း   ။