သိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း ႁႅင်းၵွင်ႈၵၢင်ႇသေ ထူဝ်းသိုၵ်းလေႃႇတိုၵ်းၶိုၼ်း ၸုမ်းလုၵ်ႉၽိုၼ်ႉလၢႆလၢႆတီႈယူႇၼၼ်ႉ တီႈထုင်ႉမေႃႇၶျီး ၼႂ်းမိူင်းယၢင်းလႅင်ၵေႃႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ 3 ဝၼ်းထပ်းၵၼ် ၵူၼ်းမိူင်းလူႉတၢႆ 30 ပၢႆ မၢတ်ႇၸဵပ်းထႅင်ႈမွၵ်ႈ 20 ၵေႃႉ ဝႃႈၼႆ။

ၼႂ်းဝၼ်းတီႈ 20/08/2025 ယၢမ်းၵၢင်ၼႂ် 6 မူင်းၶိုင်ႈ ႁိူဝ်းမိၼ်သိုၵ်းမၢၼ်ႈ Y-12 မႃးပွႆႇမၢၵ်ႇသႂ်ႇ 5 လုၵ်ႈ တီႈဝၢၼ်ႈလူဝ်ႇၶႃးလူဝ်ႇ ထုင်ႉမေႃႇၶျီး ၸႄႈဝဵင်းၽႃသွင်ႇ မိူင်းယၢင်းလႅင် ၵူၼ်းမိူင်းလူႉတၢႆၵေႃႉၼိုင်ႈ မၢတ်ႇၸဵပ်းထႅင်ႈ 4 ၵေႃႉ ႁိူၼ်းယေးလူႉၵွႆၸွမ်း။

ၶၢဝ်းတၢင်း 3 ဝၼ်းမႃးၼႆႉ ယွၼ်ႉသိုၵ်းမၢၼ်ႈ ၸႂ်ႉႁိူဝ်းမိၼ်ပွႆႇမၢၵ်ႇသႂ်ႇ တီႈထုင်ႉမေႃႇၶျီး မိူင်းယၢင်းလႅင်ၼႆႉသေ ၵူၼ်းမိူင်း၊ လုၵ်ႈဢွၼ်ႇ၊ ၼၢင်းယိင်း၊ ၵူၼ်းထဝ်ႈၵူၼ်းၼုမ်ႇ ၺႃး ၸၢၵ်ႇမၢၵ်ႇလူႉတၢႆ ဢမ်ႇယွမ်း 33 ၵေႃႉ မၢတ်ႇၸဵပ်းထႅင်ႈ 13 ၵေႃႉ။ လိူဝ်ၼၼ်ႉ ႁိူဝ်းမိၼ်သိုၵ်းမၢၼ်ႈ ၵႆႉမႃးပၼ်ႇလဵပ်ႈၼႂ်းပိုၼ်ႉတီႈ ႁဵတ်းႁႂ်ႈၵူၼ်းမိူင်းဢမ်ႇႁတ်းယူႇသဝ်း လႆႈၵူဝ်ႁႄဝႆႉၵူႈၶၢဝ်း။

ဢိင်ၼိူဝ်လွင်ႈၼႆႉသေ ၼင်ႇႁိုဝ် တေဢဝ်လိူင်ႈလႆႈ ၼိူဝ်သိုၵ်းမၢၼ်ႈယိုတ်းမိူင်ၼၼ်ႉ လူင်ပွင်ၸိုင်ႈၸူဝ်ႈၵၢင်ယၢင်းလႅင် IEC တုၵ်းယွၼ်းဝႆႉ တီႈလူင်ပွင်ၸိုင်ႈၵူႈမိူင်းမိူင်းလႄႈ ဢိၵ်ႇပႃး ဢႃႊသီႊယၼ်ႊတင်း ၸုမ်းၸၢတ်ႈၸိုင်ႈဝႆႉ – သိုဝ်ႇၶၢဝ်ႇ Kantarawaddy Times ဢွၵ်ႇဝႆႉၼင်ႇၼႆ။