တႄႇဝၼ်းတီႈ 6/10/2025 မႃး သိုၵ်းမၢၼ်ႈ ၸႂ်ႉႁႅင်းသိုၵ်း5 သဵၼ်ႈသေ ပိုတ်ႇပၢင်တိုၵ်း ထူဝ်းသိုၵ်းၶိုၼ်ႈၸူး တပ်ႉသိုၵ်း ယၢင်းလႅင် (KNDF) ၾၢႆႇဝၼ်းဢွၵ်ႇၸႄႈဝဵင်းလွႆၶေႃ၊ ၸႄႈဝဵင်းတီႈမူၵ်းသိူဝ် (ဒီးမော့ဆို) ၊ ၸႄႈဝဵင်းၾရူႇသူဝ်ႊ (ဖရူဆို) ၊ ၸႄႈဝဵင်း ပေႃႇလၶႄး (ဘောလခဲ) လႄႈ ၸႄႈဝဵင်းၾၢႆၶုၼ် လႅၼ်လိၼ်မိူင်းယၢင်းလႅင် လႄႈ မိူင်းတႆးပွတ်းၸၢၼ်း ၶႅၼ်ႈၵၼ် ။
သိုၵ်းမၢၼ်ႈ တင်း သိုၵ်းယၢင်းလႅင် ပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်းၸွမ်းပိုၼ်ႉတီႈၼၼ်ႉသေ ၵူၼ်းသိုၵ်းမၢၼ်ႈလူႉတၢႆ ဢမ်ႇယွမ်း 10 ၵေႃႉ။ ယိုတ်းလႆႈ ၶိူင်ႈၵွင်ႈၵၢင်ႇ၊ မၢၵ်ႇမိုဝ်ႉၸိုၼ်းယၢမ်းတီႈၸုမ်းသိုၵ်းမၢၼ်ႈပႃးၼႆ ၸုမ်းသိုၵ်းယၢင်းလႅင် (KNDF) ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ် မိူဝ်ႈဝၼ်းတီႈ 13/10/2025 ၼႆႉၼင်ႇၼႆ။
ၼႂ်းလိူၼ်ဢွၵ်ႇထူဝ်ႊပိူဝ်ႊၼႆႉ သိုၵ်းမၢၼ်ႈ တင်း သိုၵ်းယၢင်းလႅင် ပဵၼ်ပၢင်တိုၵ်းၵၼ်ၵူႈဝၼ်း။ ၾၢႆႇသိုၵ်းမၢၼ်ႈၸႂ်ႉတိုဝ်း ၶိူင်ႈၵွင်ႈလူင်၊ ၶိူင်ႈၻရူၼ်ႊၵူႈသႅၼ်းသႅၼ်း တီႈပၢင်တိုၵ်း ၼႂ်းၸႄႈဝဵင်းတီႈမူၵ်းသိူဝ် (ဒီးမော့ဆို) ၼႆယဝ်ႉ။
လိူဝ်ၼၼ်ႉ မိူဝ်ႈဝၼ်းတီႈ 13 လိူၼ်ဢွၵ်ႊထူဝ်ႊပိူဝ်ႊ ယၢမ်းတၢမ်းၶမ်ႈ သၢႆသိုၵ်းမၢၼ်ႈ ၸိူဝ်းတူင်ႉၼိုင်ယူႇၼႂ်းၸႄႈဝဵင်းၵျွၵ်ႉမႄး ၸွမ်းသဵၼ်ႈတၢင်း ၵျွၵ်ႉမႄး-သီႇပေႃႉၼၼ်ႉ ၽိုတ်ႉၶဝ်ႈၵႂႃႇလႆႈထိုင် ဝၢၼ်ႈမေႃႇၵိူဝ် ဢၼ်မီးယၢၼ်ၵႆၵၼ်တင်း ဝဵင်းသီႇပေႃႉ မွၵ်ႈ 6 လၵ်းၼၼ်ႉသေ သိုပ်ႇပဵၼ်ပၢင်တိုၵ်းၵၼ်ဝႆႉတင်း တပ်ႉသိုၵ်းတဢၢင်း (TNLA) ယူႇ ၼႆယဝ်ႉ။
ယွၼ်ႉသိုၵ်းမၢၼ်ႈ ၶဝ်ႈဢိူမ်ႈၸမ်ဝဵင်းသီႇပေႃႉႁႅင်းလႄႈ ၵူၼ်းမိူင်းၼႂ်းပိုၼ်ႉတီႈၵမ်ႈၼမ် ဢွၼ်ၵၼ်ထတ်းသၢင်ဝႃႈ ဝၼ်းတီႈ 14 လိူၼ်ဢွၵ်ႇထူဝ်ႊပိူဝ်ႊၼႆႉ သိုၵ်းမၢၼ်ႈယင်းၸၢင်ႈယိုတ်းဢဝ်လႆႈၶိုၼ်း ဝဵင်းသီႇပေႃႉၵွၼ်ႇ ဝႃႈၼႆ။
ဝၼ်းတီႈ 19-20 ၼႆႉ ၾၢႆႇသိုၵ်းမၢၼ်ႈဢၢၼ်းပိုတ်ႇၶိုၼ်း သဵၼ်ႈတၢင်း ဝဵင်းလႃႈသဵဝ်ႈ-သီႇပေႃႉ- မၢၼ်းတလေး (ဝဵင်းလိူဝ်ႇ) ႁႂ်ႈၵူၼ်းမိူင်းၵႂႃႇမႃးလႆႈၼႆ ၵူၼ်းၸမ်ၸႂ်ၵၼ်တင်း သိုၵ်းမၢၼ်ႈ လၢမ်းၶၢတ်ႈဝႆႉၼင်ႇၼႆ။
ၾၢႆႇၼိုင်ႈၵေႃႈ သိုၵ်းမၢၼ်ႈတေၸတ်းပၢင်လိူၵ်ႈတင်ႈ ၼႂ်းဝၼ်းတီႈ 28/12/2025 ၼႆႉၶဝ်ပိုၼ်ၽၢဝ်ႇဝႆႉပႃးသဵၼ်ႈၸိုဝ်ႈ ဝဵင်းသီႇပေႃႉ လႄႈ ၵျွၵ်ႉမႄး ။
မိူဝ်ႈႁၢင်လိူၼ်ဢေႃႊၵတ်ႉသ်ၼၼ်ႉၵေႃႈသိုၵ်းမၢၼ်ႈပိုၼ်ၽၢဝ်ႇဝႆႉ ဝဵင်းဢၼ်ၼႂ်းငဝ်းလၢႆးၶိုၵ်ႉၶၵ်ႉ မီး 63 ဝဵင်း ၼႂ်းပတ်းပိုၼ်ႉ ၸိုင်ႈမိူင်းသေ လၢတ်ႈဝႆႉပႃးဝႃႈတေႁႅၼ်းသိုၵ်းလေႃႇတိုၵ်းၸုမ်းယိပ်းၵွင်ႈ လုၵ်ႉၽိုၼ်ႉၶဝ်ၵႂႃႇ ႁၢဝ်ႈႁၢဝ်ႈႁႅင်းႁႅင်းဝႃႈၼႆ။
ဝၢႆးလင် သိုၵ်းမၢၼ်ႈ ယိုတ်းၵုမ်းဢဝ်လႆႈၶိုၼ်း ဝဵင်းၵျွၵ်ႉမႄးယဝ်ႉ သိုၵ်းမၢၼ်ႈၶိုၼ်းသိုပ်ႇထူဝ်းသိုၵ်းၵႂႃႇတၢင်း ဝဵင်းသီႇပေႃႉၶိုၼ်း။ ဝဵင်းသီႇပေႃႉၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း တႄႇၵုမ်းၵမ်မႃး ၸဵမ်မိူဝ်ႈ ပီ 2024 လိူၼ်ဢွၵ်ႇထူဝ်ႊပိူဝ်ႊ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ