သိုၵ်းမၢၼ်ႈ ယိုတ်းမိူင်း ၸႂ်ႉႁိူဝ်းမိၼ် ထႅမ်ႁႅင်းမၢၵ်ႇမိုဝ်ႈၸိုၼ်းယၢမ်း ၼႂ်းၸႄႈဝဵင်းၽရူသူဝ်ႇ မိူင်း ယၢင်းလႅင် ၼႂ်းဝၼ်းတီႈ 20 ပူၼ်ႉမႃးၼႆႉသေ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ပိုၼ်ၽၢဝ်ႇပၼ်ၾၢင်ႉ ႁႂ်ႈၵူၼ်းမိူင်းၾၢင်ႉယူႇသဝ်း ဝႃႈၼႆ။

ပူၼ်ႉမႃး ဝၼ်းတီႈ 19 ယၢမ်းႁူဝ်ၶမ်ႈ မွၵ်ႈ 6 မူင်းၼၼ်ႉၵေႃႈ တပ်ႉသိုၵ်းမၢၼ်ႈ ဢဝ်ႁိူဝ်းမိၼ်သိုၵ်း မႃးဝၢင်းပၼ်တၢင်းၵိၼ်ယႅမ်ႉလႄႈ မၢၵ်ႇမိုဝ်ႈၸိုၼ်းယၢမ်း ၼႂ်းႁူင်းႁဵၼ်းသွၼ်ၵၢၼ်သိုၵ်း မၢႆ 14 ၼႂ်းၸႄႈဝဵင်းၽရူသူဝ်ႇ မိူင်းယၢင်းလႅင်။

မိူဝ်ႈႁၢင်လိူၼ်ၵျုၼ်ႊ ပူၼ်ႉမႃးၼၼ်ႉၵေႃႈ ႁိူဝ်းမိၼ်သိုၵ်းမၢၼ်ႈ ယၢမ်ႈထႅမ်ႁႅင်းမၢၵ်ႈမိုဝ်ႈၸိုၼ်းယၢမ်း ၶွင်ၵိၼ်ယႅမ်ႉမႃးသူင်ႇ ၼႂ်းဝၢင်းႁူင်းႁဵၼ်းသွၼ်ၵၢၼ်သိုၵ်းၼႆႉ။

ဢိင်ၼိူဝ်လွင်ႈၼႆႉသေ ၾၢႆႇတပ်ႉသိုၵ်းမၢၼ်ႈ ၸၢင်ႈမီးၽႅၼ်ၵၢၼ်သိုၵ်း လၢမ်းယိုဝ်းၶိူင်ႈၵွင်ႈလူင် ၵႂၢတ်ႇလၢင်ႉၼႂ်းပိုၼ်ႉတီႈ။ ယွၼ်ႉၼၼ် ၵူၼ်းမိူင်း ႁႂ်ႈၾၢင်ႉၵၼ်ၵႂႃႇမႃးယူႇသဝ်းၼႆ ၸုမ်းသိုၵ်း KNDF ပိုၼ်ၽၢဝ်ႇဝႆႉၼင်ႇၼႆ။

ၼႂ်းၸႄႈဝဵင်းၽရူသူဝ်ႇၼႆႉ မီးဝႆႉႁူင်းႁဵၼ်းသွၼ်ၵၢၼ်သိုၵ်း မၢႆ 14 ၊ တပ်ႉၵွင် 428  (ခမရ – ၄၂၈) လႄႈ 531 (ခမရ – ၅၃၁) ၸိူဝ်းၼႆႉသေ ပၵ်းတပ်ႉဝႆႉ ၼိူဝ်သဵၼ်ႈတၢင်းလူင် ၽရူသူဝ်ႇ – ဝေႃးလၶႄႉ ၼႆယဝ်ႉ။