ၶၢဝ်းတၢင်း ၼႂ်းဝႃႇ 3 လိူၼ် ပီ 2025 ၼႆႉ သိလ်ထမ်းၸဝ်ႈၶူးဝႃးဝုၼ်းၸုမ်ႉ ၺႃၼသံဝရ တေၶဝ်ႈတိုဝ်းၵမ်တြႃး ၼႂ်းထမ်ႈၽၿၢတ်ႇ ၸႄႈဝဵင်းမိူင်းလႃး။ ၼႂ်းႁူဝ်ပီ 2025 ၼႆႉ ၶူးဝႃးၸဝ်ႈ ၵႆႉယေႃးမုၼ်ႁွတ်ႈထိုင် ယူႇသဝ်းတၢင်းမိူင်းလႃး။ ပႆႇထိုင်ဝၼ်းၶဝ်ႈဝႃႇသေတႃႉၵေႃႈ မၼ်းၸဝ်ႈသမ်ႉပေႃး ၶဝ်ႈထမ်ႈဢတိၵ်ႉထၢၼ်ႇ ယူႇဝႆႉၼႂ်းထမ်ႈလူင်ႈၼႃႈ ၸဵမ်မိူဝ်ႈဝၼ်းတီႈ 04/07/2025 ယဝ်ႉ။

ၵွၼ်ႇၼႃႈ ပႆႇၶဝ်ႈဝႃႇၼႆႉ သိလ်ထမ်း ၸဝ်ႈၶူးဝႃးဝုၼ်းၸုမ်ႉ သင်ႇဝႆႉဝႃႈ – ၵၢၼ်ပိူၼ်ႈလီဢမ်ႇလီ ၶႅမ်ႉ ဢမ်ႇၶႅမ်ႉၼၼ်ႉ ဝႆႉသေၵွၼ်ႇ ႁႂ်ႈတူၺ်းလွင်ႈႁဵတ်းသၢင်ႈၸဝ်ႈၵဝ်ႇ၊ ႁႂ်ႈထတ်းၵၢၼ်ၸဝ်ႈၵဝ်ႇ လီသေ ပိူၼ်ႈ။ သင်ဝႃႈ ၵၢၼ်ႁဝ်းယဝ်ႉတူဝ်ႈလီငၢမ်း တူဝ်ၸႂ်ႁဝ်းၸင်ႇတေသိူဝ်းတေၵတ်းယဵၼ် ၊ တေဢမ်ႇမီး တၢင်းမႆႈတၢင်းလိူတ်ႇ။ ႁဵတ်းၵၢၼ်သင်ၵေႃႈ ႁႂ်ႈယဝ်ႉၵၢၼ်ၼၼ်ႉ ပေႃးဢမ်ႇယဝ်ႉၵၢၼ်ၼၼ်ႉ လုၵ်ႈ လၢၼ်တေတုၵ်ႉၶၸွမ်း – ဝႃႈၼႆဝႆႉ။

လိူဝ်ၼၼ်ႉ သင်ႇဝႆႉပႃးဝႃႈ ၼႃႈၵၢၼ်ပေႃႈၵေႃႈ ပေႃႈလူဝ်ႇဢဝ်ပုၼ်ႈၽွၼ်း ၼႃႈၵၢၼ်မႄႈၵေႃႈ မႄႈ လူဝ်ႇဢဝ်ပုၼ်ႈၽွၼ်း ၼႃႈၵၢၼ်လုၵ်ႈၵေႃႈ လုၵ်ႈလူဝ်ႇမေႃႁူႉပုၼ်ႈၽွၼ်း ဢမ်ႇဝႃႈ ၵေႃႉလဵၵ်ႉၵေႃႉ ယႂ်ႇ တၵ်းလူဝ်ႇႁူႉပုၼ်ႈၽွၼ်းၼႃႈၵၢၼ်ၸဝ်ႈၵဝ်ႇသေ ႁဵတ်းသၢင်ႈၵႂႃႇ ၸင်ႇထိုင်ယိူင်းဢၢၼ်း၊ ႁဵတ်း သင်ႁဵတ်းတႄႉတႄႉ ႁဵတ်းၸေႃႉၸႄႉတႄႉ တေႁၢမ်းၵိၼ်ႁၢမ်းလူႇ – ပွၼ်ႈသွၼ်ၵႂၢမ်းလီ ဝႆႉၼင်ႇၼႆ။

ၶၢဝ်းၼႂ်းဝႃႇ ၵူပီပီတႄႉ ၵမ်ႈၼမ် ၸဝ်ႈသိလ်ထမ်း တေၵႆႉၶဝ်ႈတိုဝ်းၵမ်သိလ်ၼႂ်းထမ်ႈမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ။ ပီ 2025 ၼႆႉၵေႃႈ ၶဝ်ႈထမ်ႈၼႂ်းမိူင်းတႆးပွတ်းဢွၵ်ႇၵူၺ်းၼင်ႇ ၵဝ်ႇ ၵူၺ်းၵႃႈ မၼ်းၸဝ်ႈလိူၵ်ႈၶဝ်ႈထမ်ႈၽၿၢတ်ႇ ၸႄႈဝဵင်းမိူင်းလႃး။

မိူဝ်ႈ 2 ပီပူၼ်ႉမႃးၵေႃႈ မၼ်းၸဝ်ႈ ၶဝ်ႈထမ်ႈၽၿၢတ်ႇသေ ဢၢၼ်းတိုဝ်းၵမ်သိလ်ၼႂ်းဝႃႇ 3 လိူၼ်ယူႇ ၊ ပၢႆးယူႇလီၵိုင်ႉၵၢင်ႉဢမ်ႇၶႅမ်ႉသေ ၸင်ႇဢမ်ႇတၼ်းတဵမ် 3 လိူၼ်။ ပီၼႆႉ ပၢႆးယူႇလီၵေႃႈ တဵမ်ထူၼ်ႈ ၶိုၼ်းယဝ်ႉလႄႈ ၸင်ႇၶိုၼ်းၶဝ်ႈတိုဝ်းၵမ်သိလ်တီႈထမ်ႈၼႆႉ။

မၼ်းၸဝ်ႈ တေၶဝ်ႈဝႃႇ ၼႂ်းထမ်ႈၽၿၢတ်ႇ တႃႇၶၢဝ်းတၢင်း 3 လိူၼ်သေ တေၶိုၼ်းဢွၵ်ႇမႃးမႅတ်ႉတႃႇ တြႃးပၼ် ၽီသၢင်သတ်းၵူၼ်းထႅင်ႈ။ လၢတ်ႈလႆႈဝႃႈ ၶဝ်ႈထမ်ႈပွၵ်ႈၼႆႉ ပဵၼ်ၶၢဝ်းပွတ်းၵူၺ်း ဢမ်ႇပေႃးႁိုင်။

ဝၼ်းတီႈ 04/07/2025 ၼႆႉ ယူႇတီႈ ၸဝ်ႈတူၼ်ၶူး သုၶမိၼ်တ (ၸဝ်ႈသုၶမ်း) ၸဝ်ႈၽူႈပိုၼ်ၽႄႈသႃ သၼႃမိူင်းသၼ်လွႆလႄႈ ၸဝ်ႈၶူးလူင် ၺႃႇၼသီႇရိ ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆး ပွတ်းဢွၵ်ႇၶူင်း ဢိၵ်ႇပႃး လုၵ်ႈၼွင်ႉပွင်ႈပၢႆ တၵ်ႉၵႃႇသတ်ႈထႃး ၸွမ်းသူင်ႇၸဝ်ႈသိလ်ထမ်းၶူးဝႃးၸဝ်ႈ ဢတိၵ်ႉထၢၼ်ႇ ၶဝ်ႈထမ်ႈလူင်ႈၼႃႈၶဝ်ႈဝႃႇ။

ထမ်ႈၽၿၢတ်ႇၼႆႉ ယူႇၼႂ်းၵႄႈမိူင်းႁႄႉမိူင်းၶၼ် ၸႄႈဝဵင်းမိူင်းလႃး ၼႂ်းၼႃႈလိၼ်ၶိုၵ်ႉတွၼ်းမၢႆ 4 ။ ၽွင်းၶူးဝႃးၸဝ်ႈ ၶဝ်ႈတိုဝ်းၵမ်သိလ်ၼႆႉ 7 ဝၼ်းလႂ် 1 ပွၵ်ႈၸင်ႇတေႁပ်ႉသုင်းသွမ်းၶဝ်ႈၽၵ်း ၊ တႃႇ 6 ဝၼ်းတႄႉ တေႁပ်ႉသုင်း မၢၵ်ႇမႆႉမၢၵ်ႇတွၵ်ႇၵူၺ်းၼႆ ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇ တႃဢွၼ်ႇ) လၢတ်ႈၼင်ႇၼႆ-

“မိူဝ်ႈမၼ်းၸဝ်ႈယူႇၼႂ်းထမ်ႈၼၼ်ႉ 6 ဝၼ်းၼႆႉ တေသုင်းမၢၵ်ႇမႆႉ၊ ၶဝ်ႈမုၼ်း ၊ ထူဝ်ႇၸိူဝ်းၼႆႉ ပေႃး ဝၼ်းထူၼ်ႈ 7 ၼၼ်ႉတႄႉ ဢၼ်ပႂ်ႉတီႈထမ်ႈၼၼ်ႉ တေမီးတၵ်ႉၵႃႇသတ်ႉထႃး 3 ၵေႃႉ ႁုင်တူမ်ႈသေ ၵႂႃႇၵၢပ်ႈ။ ပွင်ႇဝႃႈ 7 ဝၼ်းလႂ် ၼိုင်ႈပွၵ်ႈ တေသုင်းသွမ်းၼႆ မၼ်းၸဝ်ႈလၢတ်ႈဝႆႉ။ ၵဵဝ်ႇလူၺ်ႈ တၢင်း ၵိၼ်တၢင်းယမ်ႉ လၢတ်ႈဝႆႉၸိူင်ႉၼၼ်”။

ၶၢဝ်းတၢင်းၼႂ်းဝႃႇ 3 လိူၼ်ၼႆႉ ၶၢဝ်ႇသင်သေဢမ်ႇဝႃႈ လီလီၸႃႉၸႃႉ တိုၼ်းဝႃႈ ယႃႇပေသူင်ႇထိုင် ၸဝ်ႈလႃးလႃးၼႆ ၶူးဝႃးၸဝ်ႈသိလ်ထမ်းဝုၼ်းၸုမ်ႉ သင်ႇဝႆႉၼင်ႇၼႆ။

ၵူၺ်းၵႃႈ ပေႃးထိုင်မႃး ၶၢဝ်းဢွၵ်ႇဝႃႇ၊ ၼပ်ႉတႄႇဢဝ်ဝၼ်းဢွၵ်ႇဝႃႇသေ ပေႃးထိုင်ဝၼ်းထူၼ်ႈ 5 (မႅၼ်ႈလိူၼ် 11 လွင်ႈ 5 ၶမ်ႈ) ၼၼ်ႉ ယူႇတီႈ ၽူႈယႂ်ႇၵူၼ်းလူင်ၼႂ်းမိူင်းလႃးလႄႈ ၵူၼ်းဝၢၼ်ႈၵူၼ်းမိူင်း ၼႂ်း မိူင်းလႃး တေႁူမ်ႈၵၼ်ၸတ်း ပၢင်ႁူမ်ၸူမ်းႁပ်ႉတွၼ်ႈလႄႈ ပၢင်ယုၵ်ႉယွင်ႈပေႃႈသိလ်ထမ်း ၶူးဝႃး ဝုၼ်းၸုမ်ႉထႅင်ႈ။

ၼင်ႇႁိုဝ် တၵ်ႉၵႃႇသတ်းထႃးတီႈၸမ်တီႈၵႆ ပေႃးတေႁူႉသေ ႁၢင်ႈႁႅၼ်းတႃႇမႃးဝႆႈမႃးသႃၼၼ်ႉ ၸဝ်ႈ ၶူးလူင် ၺႃႇၼသီႇရိ ၾၢၵ်ႇၵႂၢမ်းလၢတ်ႈဝႆႉၼင်ႇၼႆ –

“ၶၢဝ်ႇငၢဝ်းဢၼ်ၼႆႉ ၶူးဝႃးပေႃႈၵေႃႈ လၢတ်ႈဝႆႉသေ ၽွင်းၼႂ်းဝႃႇၼႆႉ ၸိူဝ်းႁဝ်းပဵၼ်လုၵ်ႈၼွင်ႉတပႄး လႄႈႁူမ်ႈပႃး တၵ်ႉၵႃႇသတ်ႉထႃးတီႈမိူင်းလႃးၼႆၵေႃႈ တေသၢၼ်မိုဝ်းၵၼ်သေလႄႈ တေၶပ်းၶိုင်ၵၢၼ် ဢၼ်ၼႆႉ ဝႆႉလူင်ႈၼႃႈ။ ဢၼ်ၼႆႉ သင်ၶၼႂ်းမိူင်းတႆး ႁူမ်ႈပႃးတၵ်ႉၵႃႇပတ်းပိုၼ်ႉ ပေႃးလႆႈႁူႉဝႆႉၼၼ်ႉ ပွင်ႇၶၢဝ်ႇဝႆႉလူင်ႈၼႃႈၼင်ႇၼႆဢေႃႈ”။

သင်ဝႃႈ တၵ်ႉၵႃႇသတ်ႉထႃးပေႃႈဢွၵ်ႇမႄႈယေႃး တီႈၸမ်တီႈၵႆ ၶႂ်ႈမႃးဝႆႈသႃဢဝ်မုၼ်ၸွမ်းၸိုင် ဝၢႆး ဢွၵ်ႇဝႃႇ 2 – 3 ဝၼ်းၵေႃႈ ႁႂ်ႈႁွတ်ႈထိုင်ဝႆႉတီႈမိူင်းလႃး – ၸဝ်ႈတူၼ်ၶူး ၾၢၵ်ႇလၢတ်ႈၼင်ႇၼႆ။

မိူဝ်ႈၶူးဝႃးၸဝ်ႈ ပႆႇၶဝ်ႈထမ်ႈ ဝၼ်းတီႈ 02/07/2025 ၼႆႉ မၼ်းၸဝ်ႈ လုၵ်ႉဢဝ်တီႈမိူင်းၽူင်း ၸႄႈဝဵင်း တႃႈၶီႈလဵၵ်းသေ ယေႃးမုၼ်ထိုင် ၵွင်းမူးလေႃးၵသရ တီႈလွႆပၢင်ၵႂၢႆး ဝၢႆးၼၼ်ႉ ၸင်ႇယေႃးမုၼ်ထိုင် တီႈဝတ်ႉၵဵင်းယိုၼ်း ဢၼ်မီးၼႂ်းၸႄႈဝဵင်းၵဵင်းတုင်။ ထိုင်ၵၢင်ၶမ်ႈ ၸင်ႇႁွတ်ႈၽႅဝ် တီႈမိူင်းလႃး။

ဝၼ်းတီႈ 2 ၼၼ်ႉၵူၺ်းၼင်ႇၵဝ်ႇ ၸဝ်ႈတူၼ်ၶူး သုၶမိၼ်တ (ၸဝ်ႈသုၶမ်း) ၵေႃႈႁွတ်ႈထိုင်မိူင်း လႃးသေ မႅတ်ႉတႃႇ တြႃးပၼ်တၵ်ႉၵႃႇသတ်ႉထႃး ၸိူဝ်းမႃးပႂ်ႉဝႆသႃ တီႈဝတ်ႉထၢတ်ႈလူင်မိူင်းလႃး ၼၼ်ႉ။

ဝၼ်းတီႈ 03/07/2025 ၼၼ်ႉတႄႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉလႄႈ ၸဝ်ႈတူၼ်ၶူးသုၶမ်း ႁူမ်ႈ ၵၼ် မႅတ်ႉတႃႇတြႃးပၼ်တီႈ ၶုမ်ၵုတ်း ႁူဝ်ပဝ်ႈၵဝ်ႇ ၸဝ်ႈၸၢႆးလိုၼ်း ၼၼ်ႉထႅင်ႈ ဝႃႈၼႆ။ ၵၢင်ၶမ်ႈ ၸင်ႇမႅတ်ႉတႃႇတြႃးပၼ် တၵ်ႉၵႃႇသတ်ႉထႃး တီႈဝတ်ႉထၢတ်ႈလူင်မိူင်းလႃး ၼၼ်ႉၶိုၼ်း။

ဝၼ်းတီႈ 04/07/2025 ၼႆႉ ၸင်ႇၽၢတ်ႇဢွၵ်ႇဝဵင်းသေ လတ်းထိုင် မိူင်းႁႄႉမိူင်းၶၼ် ၽႅဝ်ထမ်ႈ ၽၿၢတ်ႇ ၽႃၸၢင်ႉ။ ဢွင်ႈတီႈၼႆႈ ၶူးဝႃးၸဝ်ႈသိလ်ထမ်း ယၢမ်ႈမႃးၶဝ်ႈဝႃႇ ပဵၼ်ပွၵ်ႈၵမ်း 5 လႆႈႁူႉၼင်ႇၼႆ။

ၵွၼ်ႇပႆႇၶဝ်ႈထမ်ႈၼၼ်ႉ မၼ်းၸဝ်ႈယင်းလၢတ်ႈသင်ႇပႃးဝႃႈ တၢင်းလီၵုသူလ်ႇၼႆႉ ဢမ်ႇၸႂ်ႈဝႃႈ ယူႇ ၸမ်ၸဝ်ႈၶူးဝႃးလႄႈ ၸင်ႇႁဵတ်း ၊ ယူႇတီႈလႂ်ၵေႃႈ ႁဵတ်းၵၢၼ်လီလႆႈမိူၼ်ၵၼ်။ ၼႂ်းငဝ်းလၢႆးဝၢၼ်ႈမိူင်း သုၵ်ႉယုင်ႈဢူၼ်ၵဝ်းၸိူင်ႉၼႆ ႁႂ်ႈမေႃႁၵ်ႉႁွမ်ၵၼ် ၸွႆႈထႅမ်ၵၼ်၊ ယႃႇပွႆႇၽႃႈၵၼ် ၼႆႉၵူၺ်းၵေႃႈ ပဵၼ် ၵၢၼ်လီယဝ်ႉၼႆ ၸဝ်ႈသိလ်ထမ်းၶူးဝႃးဝုၼ်ႉၸုမ်ႉ သင်ႇလၢတ်ႈပႃး ၼင်ႇၼႆ။