တႄႇၵၢင်လိူၼ်ဢေႊပရိူဝ်ႊ ဝၢႆးလင်ပီမႂ်ႇသွၼ်းၼမ်ႉယဝ်ႉ သိုၵ်းမၢၼ်ႈႁႅၼ်းသိုၵ်း ၶဝ်ႈပၵ်းတပ်ႉၶိုၼ်း ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉသေ သိုၵ်းၵဝ်ႈၵၢင်ႉလႆႈထွႆဢွၵ်ႇၵႂႃႇပၵ်းတပ်ႉပၢင်သဝ်းၶိုၼ်း ၼွၵ်ႈဝဵင်းလႄႈ ၸွမ်းသၢပ်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ယၢမ်းၼၼ်ႉ သိုၵ်းၵဝ်ႈၵၢင်ႉ တေႃႉဢဝ်ၶူဝ်းၶွင်မီးၵႃႈၶၼ်ယႂ်ႇ ဢွၵ်ႇၵႂႃႇၸွမ်းတင်းသဵင်ႈသေ ပၢင်တေႃႇလွင်းလႄႈ ႁူင်းပျေႃႇမူၼ်ႈ ဢၼ်သိုၵ်းၵဝ်ႈၵၢင်ႉ ပၼ်ၶႂၢင်ႉပိုတ်ႇဝႆႉပဵၼ်တၢင်း ၵၢၼ် ၸိူဝ်းၼၼ်ႉၵေႃႈ ၵူၼ်းမိူင်းၼႂ်းပိုၼ်ႉတီႈထၢင်ႇဝႃႈ တေလႆႈဢိုတ်းၶိုၼ်းတင်းသဵင်ႈ ဢမ်ႇၼၼ် သိုၵ်းမၢၼ်ႈ တေမႃးႁၢမ်ႈဢွၵ်ႇၶေႃႈၸီႉသင်ႇႁႂ်ႈဢိုတ်းၼႆသေတႃႉ ႁၢၼ်ႉတေႃႇထိုင်ယၢမ်းလဵဝ် ယႃႈမဝ်းၵမ်ၵေႃႈ တိုၵ်ႉသိုဝ်ႉငၢႆႈၶၢႆလီ ၸွမ်းႁူင်းပျေႃႇမူၼ်ႈယူႇ မိူၼ်ၵဝ်ႇၼႆ – ၵူၼ်းမိူင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄၼင်ႇၼႆ။

“ပၢင်တေႃႇလွင်း၊ ႁူင်းပျေႃႇမူၼ်ႈ (KTV) ၊ ယႃႈမဝ်းၵမ်ၸိူဝ်းၼႆႉ မၼ်းဢမ်ႇပႆႇႁၢႆ။ ၼႂ်းႁူင်းပျေႃႇမူၼ်ႈၼႆႉ ၶႂ်ႈလႆႈယႃႈသႅၼ်းလႂ် မီးၵူႈမဵဝ်း။ သိုဝ်ႉလႆႈၵူႈသႅၼ်းယဝ်ႉ။ မိူဝ်ႈလဵဝ်သမ်ႉ သိုၵ်းမၢၼ်ႈၶဝ် ဢမ်ႇပၼ်ပိုတ်ႇ ႁႂ်ႈဢွၵ်ႇၼႃႈဢွၵ်ႇတႃ မွၵ်ႈၼၼ်ႉၵူၺ်း။ မၢင်တီႈၵေႃႈ သိုၵ်းမၢၼ်ႈၶဝ် ႁဵတ်းၵဵင်ႈၺွပ်းၼႄယူႇဢိူဝ်ႈ။ ပၢင်လွင်း မဵဝ်းပိူၼ်ႈယိုဝ်းပႃ (ငါးမန်းဂိမ်း) ၸိူဝ်းၼႆႉ ၵေႃႈ တိုၵ်ႉမီးၼမ်ယူႇ”။

ၼႂ်းဝဵင်းလႃႈသဵဝ်ႈၼႆႉ ၽွင်းသိုၵ်းၵဝ်ႈၵၢင်ႉၵုမ်းၵမ် ၸႂ်ႉၶေႃႈဢၢင်ႈပၢင်ပွႆးၾိင်ႈထုင်းႁဵတ်းၼႃႈတိူဝ်ႈသေ ပၼ်သုၼ်ႇလႆႈ ၸဝ်ႈၵၢၼ်ပၢႆးမၢၵ်ႈမီးၶဝ် ပိုတ်ႇပၢင်တေႃႇလွင်း ႁၢၼ်ႉမၢၵ်ႇၵိင်ႈလွႆ၊ ပၢင်ၽၢႆႉၵူႈသႅၼ်းသႅၼ်း၊ ပၢင်တေႃႇၵႆႇ ၸဵမ်ၸိူဝ်းၼႆႉ ပဵၼ်တၢင်းၵၢၼ် တေႃႇၼႃႈၵူၼ်းမိူင်း ၸတ်းပၢင်သမ်ႉပေႃးၵိုၼ်းဢိုၵ်ႉဢိုၵ်ႉ ဝၼ်းဝၼ်းၶိုၼ်းၶိုၼ်း ၼႆယဝ်ႉ။

လႆႈႁူႉဝႃႈ ဝၢႆးလင်သိုၵ်းမၢၼ်ႈ ၶဝ်ႈမႃးၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈၼႆႉ ဢမ်ႇမီးပွႆးပၢင်တေႃႇလွင်းၵိုၼ်းဢိုၵ်ႉဢိုၵ်ႉ ၸိူင်ႉၼင်ႇ မိူဝ်ႈပၢၼ်သိုၵ်းၵဝ်ႈၵၢင်ႉၵုမ်းၵမ်သေတႃႉ ၸွမ်းၼႂ်းပွၵ်ႉၼႂ်းယွမ်ႇ ၼႂ်းဝဵင်းလႃႈသဵဝ်ႈ ယင်းတိုၵ်ႉပိုတ်ႇဝႆႉ ပၢင်တေႃႇလွင်းၵူႈသႅၼ်းသႅၼ်းသေ သိုၵ်းမၢၼ်ႈၵေႃႈ ဢမ်ႇၸတ်းၵၢၼ် ဢမ်ႇႁႄႉႁၢမ်ႈတီႉၺွပ်းတႄႉတႄႉလႄႈ ႁဵတ်းႁႂ်ႈၵူၼ်းမိူင်း မီးလွင်ႈမႆႈၸႂ် ၵူဝ်ၽူႈလၵ်ႉၸၵ်ႉၶုတ်ႈ လိူင်ႇၼမ်မႃးထႅင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ