မိူဝ်ႈၼႆႉ ဝၼ်းတီႈ 07/07/2025 သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈယဝ်ႉ ဢၼ်တပ်ႉသိုၵ်းယၢင်းလႅင် ၵုမ်းၵမ်ဝႆႉၼၼ်ႉ ဝႃႈၼႆ။
တႃႇတေယိုတ်းၵုမ်းလႆႈၶိုၼ်း ဝဵင်းမိူင်းပၢႆး ဢွင်ႈတီႈလႅၼ်လိၼ်တႆး – ယၢင်းလႅင်ၼၼ်ႉ သိုၵ်းမၢၼ်ႈလႆႈၸႂ်ႉၶၢဝ်းယၢမ်း 6 လိူၼ်သေ ၸႂ်ႉလၢႆးတၢင်းတိုၵ်းၵူႈသႅၼ်းသႅၼ်း ပႃးၸဵမ်ၶိူင်ႈမိၼ်တိုၵ်းၸိူဝ်းၼႆႉ ၶဝ်ႈလေႃႇတိုၵ်းတပ်ႉသိုၵ်းယၢင်းလႅင် ၼႆယဝ်ႉ။
ဝဵင်းမိူင်းပၢႆး လႅၼ်လိၼ်တႆး – ယၢင်းလႅင်ၼႆႉ သိုၵ်းယၢင်းလႅင်ၶဝ် တႄႇယိုတ်းၵုမ်းဢဝ်လႆႈ မိူဝ်ႈလိူၼ်ၼူဝ်ႊဝႅမ်ႊပိူဝ်ႊ ပီ 2023 ၼၼ်ႉသေ တႄႇႁူဝ်ပီ 2025 မႃး သိုၵ်းမၢၼ်ႈ ၶိုၼ်း ၸႂ်ႉႁူဝ်ၶေႃႈဝႃႈ ၽႅၼ်ယၼ်ႇသိုၵ်း တိုၵ်းၶိုၼ်းၸုမ်းၵေႃႇၵၢၼ်ႁၢႆႉ (Counter- Terrorism Operation) ၼႆသေ ၶဝ်ႈလေႃႇတိုၵ်း သိုၵ်းယၢင်းလႅင်မႃး ယိုတ်းၵုမ်းၶိုၼ်း မိူဝ်ႈဝႃး ဝၼ်းတီႈ 06/07/2025 ၼႆႉ ဝႃႈၼႆ။
လႆႈႁူႉဝႃႈ သိုၵ်းမၢၼ်ႈ ၸတ်းငႃးသိုၵ်း ၵႂႃႇတၢင်းဝဵင်းၾၢႆၶုၼ်၊ ၾၢႆႇတူၵ်းလႄႈ ၾၢႆႇဢွၵ်ႇဝဵင်းမိူင်းပၢႆး ၸိူဝ်းၼၼ်ႉသေ ၶဝ်ႈလေႃႇတိုၵ်း သိုၵ်းယၢင်းလႅင်ၵူၺ်းဢမ်ႇၵႃး ၸႂ်ႉတိုဝ်းပႃးၶိူင်ႈမိၼ်တိုၵ်းလႄႈ ၶိူင်ႈၵွင်ႈလူင် ပွႆႇမၢၵ်ႇသႂ်ႇ ၼႂ်းပွၵ်ႉတိတ်ႉယႃႇၵူင်း (သစ်ရာကုန်း) လႄႈ ပွၵ်ႉ 2 (စည်ကား) ၸိူဝ်းၼႆႉထႅင်ႈ ၼႆယဝ်ႉ။
ဝဵင်းမိူင်းပၢႆးၼႆႉ တင်းသဵင်ႈမီးယူႇ 14 ပွၵ်ႉ။ ၽွင်းသိုၵ်းမၢၼ်ႈတင်း သိုၵ်းယၢင်းလႅင် ယိုဝ်းၵၼ်ႁၢဝ်ႈႁႅင်း ၼႂ်းၶၢဝ်းတၢင်း 6 လိူၼ်မႃးၼႆႉ ပဵၼ်ပၢင်တိုၵ်းလူင်ၵႂႃႇတႃႇ 215 ပွၵ်ႈ၊ ပၢင်တိုၵ်းဢွၼ်ႇ 400 ပွၵ်ႈၼႆ – ၾၢႆႇသိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ၵဵဝ်ႇလူၺ်ႈလွင်ႈ သိုၵ်းမၢၼ်ႈယိုတ်းၵုမ်းလႆႈၶိုၼ်း တီႈဝဵင်းမိူင်းပၢႆးတင်းသဵင်ႈၼႆႉသေ ၽူႈႁပ်ႉပုၼ်ႈၽွၼ်း ၾၢႆႇႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းယၢင်းလႅင် (KNDF) လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈလဵဝ် သိုၵ်းမၢၼ်ႈ ၶဝ်ႈပၵ်းတပ်ႉ ဢဝ်တီႈယူႇဝႆႉၶိုၼ်း ၸွမ်းၼႂ်းပွၵ်ႉၼႂ်းယွမ်ႇ ၼႂ်းဝဵင်းမိူင်းပၢႆးၶိုၼ်းယဝ်ႉ။ သိုၵ်းမၢၼ်ႈ ၽဝ်ႁိူၼ်းၵူၼ်းမိူင်း ဢၼ်မီးဝႆႉၼႂ်းဝဵင်းၼၼ်ႉ တႃႇ 20 လင်ပႃးထႅင်ႈ”- ဝႃႈၼႆ။
လိူဝ်ၼၼ်ႉ သိုၵ်းမၢၼ်ႈတင်း ၸုမ်းသိုၵ်းလုၵ်ႉၽိုၼ်ႉမိူင်းယၢင်းလႅင်ၶဝ် တိုၵ်ႉသိုပ်ႇပဵၼ်ပၢင်တိုၵ်းၵၼ် ၼိူဝ်သဵၼ်ႈတၢင်းလူင် မိူင်းပၢႆး – လွႆၶေႃ ႁိမ်းဝဵင်းမိူင်းပၢႆးၼၼ်ႉထႅင်ႈ ၾၢႆႇၸုမ်းသိုၵ်းလုၵ်ႉၽိုၼ်ႉ မိူင်းယၢင်းလႅင်ၼႆႉ မီးၸုမ်းၵႅတ်ႇၶႄၸိူဝ်ႉၸၢတ်ႈယၢင်းလႅင် (KNDF)၊ တပ်ႉၸုမ်းၵႅတ်ႇၶႄၵူၼ်းမိူင်း ဝဵင်းမိူင်းပၢႆး (Mobye PDF)၊ တပ်ႉၸုမ်းၵႅတ်ႇၶႄၵူၼ်းမိူင်းတီႇမေႃးသူဝ်ႉ (တီႈမူၵ်းသိူဝ်) DMO-PDF၊ တပ်ႉၸုမ်းလုၵ်ႉၽိုၼ်ႉၼႂ်းဝဵင်း (URF) ၸိူဝ်းၼႆႉ ႁူမ်ႈၵၼ်တိုၵ်းၶိုၼ်းသိုၵ်းမၢၼ်ႈယူႇ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ