တႄႇႁူဝ်လိူၼ်ၵျူႊလၢႆႊၼႆႉမႃး သိုၵ်းၵဝ်ႈၵၢင်ႉ (MNDAA) ၸိူဝ်းၵုမ်းၵမ်ယူႇဝႆႉၼႂ်းပိုၼ်ႉတီႈၸွမ်းသၢပ်ႇဝဵင်းလႄႈ ၼွၵ်ႈဝဵင်းလႃႈသဵဝ်ႈ ဢိၵ်ႇပႃးဝဵင်းသႅၼ်ဝီ၊ ၵုၼ်လူင်၊ ႁူဝ်ပၢင်ႇ တေႃႇပေႃးထိုင် ဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႇ) ၼႆႉ ဢမ်ႇမီးငဝ်းလၢႆးတႃႇထွႆဢွၵ်ႇပၼ်ၶိုၼ်းသိုၵ်းမၢၼ်ႈ ၸွမ်းၼင်ႇ ၶၢဝ်ႇႁူင်လိုဝ်းၵၼ်ၵူၺ်းဢမ်ႇၵႃး ယင်းပၢႆၵဵပ်းသိုၵ်းမႂ်ႇ ယွၼ်းၵူၼ်း ၼုမ်ႇ တႃႇၶဝ်ႈႁၢပ်ႇထၢမ်းၵၢၼ်သိုၵ်း တီႈၵူၼ်းမိူင်းထႅင်ႈၵွၼ်ႇ ၼႆယဝ်ႉ။
မိူဝ်ႈဝၼ်းတီႈ 02/07/2025 ပူၼ်ႉမႃးၼႆႉ သိုၵ်းၵဝ်ႈၵၢင်ႉ ႁွင်ႉဢဝ်ၽူႈၵွၼ်းပွၵ်ႉၵွၼ်းဢိူင်ႇၵၢင်ႉၵႄႇ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၵႂႃႇႁဵတ်းပၢင်ၵုမ်သေ လၢတ်ႈႁႂ်ႈႁႃပၼ်ၵူၼ်းၼုမ်ႇ ဢႃယု 18 တေႃႇ 40 ပီ ၼိုင်ႈႁိူၼ်းလႂ် ၼိုင်ႈၵေႃႉၼႆ – ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈၼႄၼင်ႇၼႆ။
“မိူဝ်ႈလိူၼ်ပူၼ်ႉမႃးၼႆႉ ၶဝ်ယွၼ်းၵူၼ်းတၢင်းသႅၼ်ဝီဢွၼ်တၢင်း။ ၵမ်းၼႆႉသမ်ႉ မႃးယွၼ်းတၢင်းလႃႈသဵဝ်ႈယဝ်ႉ။ ပေႃးမီးလုၵ်ႈဢွၼ်ႇ ၼုမ်ႇၸၢႆး ဢမ်ႇၼၼ် ယိင်းၵေႃႈယဝ်ႉ တေလႆႈၵႂႃႇႁဵတ်းသိုၵ်းၶဝ်ၼႆဝႃႇ။ ၶဝ်တေပၼ်ပၢင်သွၼ်ၵၢၼ်သိုၵ်း တႃႇၶၢဝ်းတၢင်းသၢမ်လိူၼ် ဢမ်ႇၼၼ် လိူၼ်ပၢႆၽၢၵ်ႇႁႄ ၸင်ႇပွႆႇမႃးယူႇတီႈႁိူၼ်းၶိုၼ်း ဢမ်ႇၼၼ် တေပွႆႇၵႂႃႇယူႇတၢင်ႇဝဵင်းၵေႃႈပဵၼ်လႆႈ ၶဝ်လၢတ်ႈၸိူင်ႉၼႆ”။
ႁူဝ်လိူၼ်ၵျူႊလၢႆႊၼႆႉ မိူင်းၶႄႇ ယူႇၵႄႈၵၢင်မၼ်းသေ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ မႃးႁူပ်ႉဢုပ်ႇၵၼ် တီႈလုမ်းၸတ်းၵၢၼ်ၵူႈလွင်ႈလွင်ႈ (ထွေအုပ်ရုံး) လႄႈ တီႈႁူင်းႁႅမ်းၸၢင်ႉသွင်တူဝ် (ဆင်နှစ်ကောင်) ၼၼ်ႉၵေႃႈ ဢမ်ႇလႆႈၶေႃႈတူၵ်းလူင်းသင်ၵၼ်သေ ပၢင်ၵုမ်ယၢႆႈၵႂႃႇၼႆ ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
“ပေႃးဢဝ်လွင်ႈဢုပ်ႇၵၼ် ၼႂ်းမိူင်းၶႄႇဝႃႈ ၵူဝ်းၵၢင်ႉၼႆႉ ၶဝ်တေလႆႈထွႆၼႃႇ။ ၵူၺ်းၵႃႈ ၶဝ်တေဢမ်ႇထွႆႇ။ ယွၼ်ႉသင်လႃႇၼႆ တႃႇတေထွႆၼႆႉ ၵူဝ်းၵၢင်ႉၼၼ်ႉ ပႆႇတူဝ်ႈတၼ်း။ ၵၢၼ်မၢႆးမၢၵ်ႈမီးၶဝ်ၵေႃႈ ပိူင်ၼိုင်ႈ၊ ၾၢႆႇၼိုင်ႈၵေႃႈ တၢင်းၼွၵ်ႈဝဵင်းလႃႈသဵဝ်ႈၼႆႉ မိူဝ်ႈလဵဝ် ၶဝ်ပိုတ်ႇဝႆႉၵျွင်း NUG ၶဝ်ထႅင်ႈၵွၼ်ႇ။ ယွၼ်ႉၼၼ် ႁဝ်းတူၺ်းလၢႆးတူင်ႉၼိုင် ၸိူဝ်းၶဝ်ယူႇဝႆႉ ၼႂ်းပိုၼ်ႉတီႈၼႆႉ တႃႇၶဝ်တေထွႆဢၼ်ဝႃႈၼၼ်ႉ ပႆႇတူဝ်ႈတၼ်း ၸွမ်းၼင်ႇၶၢဝ်ႇလိုဝ်းၵၼ်”။
လႆႈႁူႉဝႃႈ ၽွင်းမီးၶၢဝ်ႇႁူင်လိုဝ်းဢွၵ်ႇဝႃႈ သိုၵ်းၵဝ်ႈၵၢင်ႉၸိူဝ်းယူႇသၢပ်ႇဝဵင်း၊ ၼွၵ်ႈဝဵင်းလႃႈသဵဝ်ႈၼၼ်ႉ တေလႆႈထွႆဢွၵ်ႇၵႂႃႇၶိုၼ်း တင်းသဵင်ႈၼႆၼၼ်ႉ သိုၵ်းမၢၼ်ႈၵေႃႈ တေႃႉဢဝ်ၶိူင်ႈၵွင်ႈလူင်၊ ၵႃးတႅင်ႉလႄႈ မၢၵ်ႇမိုဝ်ႈၸိုၼ်းယၢမ်း ၶဝ်ႈၵႂႃႇၼႂ်းဝဵင်းလႃႈသဵဝ်ႈၶိုၼ်း ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈၵူဝ်မီးလွင်ႈမႆႈၸႂ် ၵူဝ်တင်းသွင်ၾၢႆႇပဵၼ်ပၢင်တိုၵ်းၵၼ်ၶိုၼ်း ၼႆယဝ်ႉ။
တီႈဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ တႄႇၶဝ်ႈတိုၵ်း သိုၵ်းမၢၼ်ႈမႃးႁၢဝ်ႈႁႅင်း လွပ်ႈတီႈသွင် ၼႂ်းၽႅၼ်ယၼ်ႇသိုၵ်း 1027 မိူဝ်ႈဝၼ်းတီႈ 02/07/2024 ယၢမ်းၵၢင်ၶိုၼ်း 11:45 မူင်းၼၼ်ႉသေ ထိုင်မႃးဝၼ်းတီႈ 03/10/2024 ၸင်ႇယိုတ်းၵုမ်းလႆႈ ဝဵင်းလႃႈသဵဝ်ႈမႃး။
ထိုင်မႃး ဝၼ်းတီႈ 21/06/2025 ၼၼ်ႉ သိုၵ်းၵဝ်ႈၵၢင်ႉ ထွႆဢွၵ်ႇၼႂ်းဝဵင်းလႃႈသဵဝ်ႈသေ သိုၵ်းမၢၼ်ႈ ယိုတ်းမိူင်းသမ်ႉ တေႃႉဢဝ်ႁႅင်းသိုၵ်းၸမ်ႁဵင်လႄႈတင်း ၶိူင်ႈၵွင်ႈလူင် လၢႆလၢႆသႅၼ်းသေ ၶဝ်ႈဢဝ်ဢွင်ႈတီႈၶိုၼ်း ၼႂ်းဝဵင်းမႃးႁၢၼ်ႉတေႃႇထိုင်ယၢမ်းလဵဝ်။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ