ၵူၼ်းၼုမ်ႇတႆး ဝဵင်းသီႇပေႃႉ ၽူႈတူင်ႉၼိုင်ၵၢၼ်ပရႁိတ ၵေႃႉၼိုင်ႈ လႆႈၶတ်းၸႂ်ၶဝ်ႈၶေႉၶဵင်ႇ ပဵၼ်မႃးၸၢႆးငၢမ်းသေ လႆႈတၢင်တူဝ်မိူင်းႁူမ်ႈတုမ်ၵႂႃႇ ၶဝ်ႈၶေႉၶဵင်ႇပၢင်ပွႆးၸၢႆးငၢမ်းလုမ်ႈ ၾႃႉ Mr. world တီႈမိူင်းဝႅတ်ႉၼၢမ်းသေ မၼ်းၸၢႆးလႆႈႁပ်ႉသူး Beauty with A Purpose မႃး။ ဢိင်ၼိူဝ်လွင်ႈၼႆႉ မၼ်းၸၢႆး လႆႈၶတ်းၸႂ်မႃးၸိူင်ႉႁိုဝ် မီးလွင်ႈၶဵင်ႇတႃႉၸိူင်ႉႁိုဝ်မႃး ဢၼ်ဝႃႈၼၼ်ႉ ယူႇတီႈ ၼၢင်းငိုၼ်းႁွမ် ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၸၢႆးတွင်ႉလေႃး (ၸၢႆးငၢမ်းတႆး) ဝႆႉၼင်ႇၼႆ။

ထၢမ် – ၵပ်းသိုပ်ႇၼႄႉၼမ်းတူဝ်ပၼ်ဢိတ်ႉၼိုင်ႈၶႃႈ ပဵၼ်ၵူၼ်းမိူင်းလႂ်၊ မီးပီႈၼွင်ႉလၢႆၵေႃႉၶႃႈ?

တွပ်ႇ – မႂ်ႇသုင်ၵူႈၵေႃႉၶႃႈ … ၸိုဝ်ႈၶႃႈႁဝ်းႁွင်ႉၸၢႆးတွင်ႉလေႃး။ ၸိုဝ်ႈတႄႉႁွင်ႉ ၸၢႆးဢူးၶမ်း။ ၶႃႈႁဝ်းပဵၼ် ၵူၼ်းၸႃႇတိ ဝၢၼ်ႈတိုဝ်ႉမွၼ်း၊ ဝဵင်းသီႇပေႃႉ၊ မိူင်းတႆးပွတ်းႁွင်ႇၶႃႈ။ ယၢမ်းလဵဝ် ယူႇဝႆႉတီႈဝဵင်းတႃႈၵုင်ႈ၊ တီႈဝဵင်းသီႇပေႃႉၵေႃႈ ယူႇဝႆႉယူႇၶႃႈ။ မီးပီႈၼွင်ႉ 2 ၵေႃႉ၊ ၶႃႈႁဝ်းပဵၼ် ၼွင်ႉလိုၼ်းသုတ်း ၊ မီးပီႈၼၢင်းဝႆႉ ၵေႃႉၼိုင်ႈၶႃႈ။

ထၢမ် – ပေႃႈမႄႈၸၢႆးတွင်ႉလေႃး ၸွင်ႇယၢမ်ႈတူင်ႉၼိုင်ၼႂ်း တူင်ႇဝူင်းၸၢႆးငၢမ်း/ ၼၢင်းငၢမ်း ၸိူဝ်းၼႆႉၶႃႈ ႁႃႉ?

တွပ်ႇ – ဢမ်ႇယၢမ်ႈၶႃႈ။ ယူႇတီႈ တူဝ်ၶႃႈႁဝ်းသေ ဢၼ်ယၢမ်ႈၶေႉၶဵင်ႇ ၸၢႆးငၢမ်း/ ၼၢင်းငၢမ်း တီႈဝၢၼ်ႈ တိုဝ်ႉမွၼ်း၊ တီႈဝဵင်းသီႇပေႃႉ ၸိူဝ်းၼႆႉၵေႃႈ ဢမ်ႇပႆႇယၢမ်ႈႁၼ်မႅၼ်ႈသေပွၵ်ႈၶႃႈ။ ၼႂ်းဢူၺ်းၵေႃႉၵေႃႈ ဢမ်ႇမီး၊ ၼႂ်းတူင်ႇဝူင်း ဢၼ်ၶႃႈႁဝ်းယူႇၵေႃႈဢမ်ႇယၢမ်ႈမီးသေပွၵ်ႈၶႃႈ။ ၵူၺ်းၼႃႇ ၶႃႈၵေႃႈပႃးၸႂ်တႄႉတႄႉသေလႄႈ ၸင်ႇလႆႈၶေႉၶဵင်ႇမႃးၶႃႈဢေႃႈ။

ထၢမ် – လႆႈငိၼ်းၶၢဝ်ႇဝႃႈ ဢၼ်ၸၢႆးတွင်ႉလေႃးၵႂႃႇၶေႉၶဵင်ႇတီႈမိူင်းဝႅတ်ႉၼၢမ်း မိူဝ်ႈၽွင်းလိူၼ်တီႊသႅမ်ႊပိူဝ်ႊ ပီၵၢႆ 2024 ၼၼ်ႉ လႆႈႁပ်ႉသူးမႃး ဢၼ်ၼိုင်ႈၼႆၶႃႈၼေႃ … သူးဢၼ်လႆႈႁပ်ႉမႃးၼႆႉ ပဵၼ်သူးၸိူင်ႉႁိုဝ်ၶႃႈ?

တွပ်ႇ – ၶႃႈႁဝ်း လႆႈတၢင်တူဝ်မိူင်းမၢၼ်ႈသေ ၵႂႃႇၶေႉၶဵင်ႇတီႈမိူင်းဝႅတ်ႉၼၢမ်း (Vietnam) မႃးၶႃႈဢေႃႈ။ Mr. World ၼႆႉ ၼႂ်းလုမ်ႈၾႃႉၼႆႉ ပဵၼ်ပၢင်ပွႆးၸၢႆးငၢမ်းဢၼ်ယႂ်ႇလိူဝ်သေပိူၼ်ႈၶႃႈ။ ၼႂ်း Mr. World ၼႆႉ ယိူင်းဢၢၼ်းၶဝ်မီးဝႆႉဝႃႈ ၾၢႆႇဢင်းၵိတ်းႁွင်ႉဝႃႈ Beauty with A Purpose ၼႆ ပဵၼ်ဢၼ်ၸွႆႈထႅမ် တူင်ႇဝူင်းၵူၼ်း ၾၢႆႇပရႁိတၶႃႈ။ သူးဢၼ်လွင်ႈယႂ်ႇသေပိူၼ်ႈ တီႈၼႂ်းပၢင်ပွႆးၼႆႉၵေႃႈ ပဵၼ် Beauty with A Purpose ၼႆႉယဝ်ႉၶႃႈ။ ၶႃႈႁဝ်းလႆႈဢဝ်မႃးပၼ် တွၼ်ႈတႃႇပီႈၼွင်ႉတႆးႁဝ်းလႄႈ တွၼ်ႈတႃႇမိူင်းမၢၼ်ႈၶႃႈဢေႃႈ။  Mr. World တင်း Mrs. World ၼႆႉ ဢၼ်တၢင်တူဝ်မိူင်းမၢၼ်ႈသေၵႂႃႇၶေႉၶဵင်ႇၼၼ်ႉ တႄႇၸဵမ်မိူဝ်ႈပီ 2014 လႄႈ မီးမႃး 10 ပီယဝ်ႉၶႃႈ။ ၸၢႆးငၢမ်းၼၢင်းငၢမ်းၵူႈၵေႃႉ ဢၼ်တၢင်တူဝ်မိူင်းမၢၼ်ႈသေ ၵႂႃႇၶေႉၶဵင်ႇၼႆႉ ဢမ်ႇပႆႇလႆႈသူး ဢၼ်ၼႆႉမႃးသေပွၵ်ႈၶႃႈ၊ ၼႂ်း Top ၵေႃႈ ဢမ်ႇယၢမ်ႈၶဝ်ႈမႃးၶႃႈ၊ ၶႃႈႁဝ်းပဵၼ်ၵေႃႉဢွၼ် တၢင်းသုတ်း ဢၼ်လႆႈႁပ်ႉသူး Beauty With A Purpose သူးသုင်သုတ်းယိူင်းမၢႆတီႈၼႂ်းပၢင်ပွႆးၼႆႉ ၶႃႈဢေႃႈ။

ထၢမ် – လွင်ႈတၢင်းၸိူင်ႉႁိုဝ် ဢၼ်ပဵၼ်ႁႅင်းဢီး ႁဵတ်းႁႂ်ႈၶဝ်ႈမႃးတီႈၼႂ်းတူင်ႇဝူင်း Mr. World Myanmar ၼႆႉၶႃႈ?

တွပ်ႇ – ၶႃႈႁဝ်းတႄႉ မိူဝ်ႈဝၼ်းၼၼ်ႉၵေႃႈ ပဵၼ်ၽူႈပၼ်ႁႅင်းၼိုင်ႈၵေႃႉၵူၺ်းၶႃႈ။ ၸဵမ်မိူဝ်ႈၵေႃႉလဵၵ်ႉ၊ ၸဵမ်မိူဝ်ႈ 2009 ၸိူဝ်းၼႆႉ လႆႈတူၺ်းပၢင်ပွႆးၸၢႆးငၢမ်းၼၢင်းငၢမ်းမႃး။ ယွၼ်ႉပဵၼ်ၵူၼ်းယူႇတီႈဝၢၼ်ႈလဵၵ်ႉလဵၵ်ႉဢွၼ်ႇၵူၺ်းလႄႈ လႆႈသိုဝ်ႉၶႅပ်း(ၶူၺ်ႇ) မၼ်းသေ တူၺ်းဢဝ်ၶႃႈဢေႃႈ။ မၢင်ပွၵ်ႈၵေႃႈ လႆႈလူၼႂ်းပပ်ႉၼႂ်းမႅၵ်ႉၵသိၼ်း ၸိူဝ်းၼႆႉၶႃႈ။ ပဵၼ်ၽူႈပၼ် ႁႅင်းၵူၼ်းၼႂ်းမိူင်းႁဝ်း ၸိူဝ်းၵႂႃႇၶေႉၶဵင်ႇ တီႈၼွၵ်ႈမိူင်း ၸိူဝ်းၼႆႉဢေႃႈ။ ယွၼ်ႉသင်လႄႈ ပႃးၸႂ်တႃႇတေၶေႉၶဵင်ႇတီႈ Mr. World ၼႆႉၼႆ Mr. World ၼႆႉ ၵွပ်ႈပိူဝ်ႈ မၼ်းပဵၼ်ပၢင်ပွႆး ဢၼ်ယႂ်ႇလိူဝ်ပိူၼ်ႈၼႂ်းလုမ်ႈၾႃႉၼႆႉၶႃႈဢေႃႈ။

လိူဝ်ၼၼ်ႉ Mr. World ၼႆႉ ပဵၼ်ပၢင်ပွႆးဢၼ်လိူၵ်ႈၸၢႆးငၢမ်း ဢၼ်ဢမ်ႇတူၺ်း တၢင်းႁၢင်ႈလီၾၢႆႇၼွၵ်ႈ မဵဝ်းလဵဝ်ၵူၺ်း ၶဝ်တေတူၺ်းပႃး ဢၼ်တၢင်တူဝ်တူင်ႇဝူင်းၵူၼ်း၊ ဢၼ်မေႃၸွႆႈထႅမ်တူင်ႇဝူင်းၵူၼ်း၊ မေႃလၢတ်ႈမေႃၸႃ ၸိူဝ်းၼႆႉ ၶဝ်တူၺ်းၵူႈမဵဝ်းဢေႃႈ။ ပၢင်ပွႆးၼႆႉၵေႃႈ ၶႃႈဝူၼ်ႉဝႃႈ မၼ်းလႅပ်ႈၵၼ်တင်းၶႃႈႁဝ်း ယွၼ်ႉၶႃႈႁဝ်းၵေႃႈ ပဵၼ်မေႃသွၼ်လိၵ်ႈဢင်းၵိတ်း ၵေႃႉၼိုင်ႈ။ တႄႇၸဵမ်မိူဝ်ႈ 2019 ၼၼ်ႉ ၶႃႈႁဵတ်းမေႃသွၼ် သွၼ်လိၵ်ႈဢင်းၵိတ်ႉလူၺ်ႈပဵၼ်ပရႁိတ ဢမ်ႇဢဝ်ငိုၼ်းလိူၼ်သေသွၼ်ပၼ်။

တီႈၼႂ်းပၢင်ပွႆးၼႆႉၵေႃႈ ဢမ်ႇၸႂ်ႈဝႃႈယူႇတီႈသုၼ်ႇတူဝ်ၵေႃႉလဵဝ်ၵူၺ်း။ ၶႃႈႁဝ်း လႆႈတၢင်ႇတူဝ်မိူင်းတႆး ပီႈၼွင်ႉတႆးႁဝ်းၶဝ်ၵူႈၵေႃႉသေ ၶႂ်ႈၼႄတၢင်းလုမ်ႈၾႃႉဝႃႈ ၾိင်ႈထုင်းႁဝ်းမီးၸိူင်ႉႁိုဝ် ၸိူဝ်းၼႆႉ တိုၼ်းမီးဝႆႉ ၼႂ်းၸႂ်ယူႇၶႃႈ ဝႃႈၶႂ်ႈတၢင်တူဝ်မိူင်းႁဝ်း။ ၵူၺ်းၼႃႇ ၼႂ်းဢူၺ်းၵေႃႉ၊ ပေႃႈမႄႈ၊ တူင်ႇဝူင်း ဢၼ်ယၢမ်ႈႁူႉၸၵ်း ၸဵမ်မိူဝ်ႈၵေႃႉလဵၵ်ႉ တေႃႇပေႃးထိုင်ၵေႃႉယႂ်ႇၼႆႉ ၵူၼ်းဢၼ်ယၢမ်ႈၶေႉၶဵင်ႇ ၸိူင်ႉၼႆၵေႃႈ ဢမ်ႇမီးလႄႈ တႃႇတေပဵၼ်မႃးလႆႈၼၼ်ႉ မိူၼ်ပဵၼ်ၾၼ်လဵၵ်ႉလဵၵ်ႉဢွၼ်ႇၵူၺ်း။ ဢမ်ႇယၢမ်ႈဝူၼ်ႉဝႃႈ တေပဵၼ်ဢၼ်တႄႉမႃး။ ဢၼ်လႆႈတၢင်တူဝ်မိူင်းႁဝ်းသေ ၵႂႃႇၶေႉၶဵင်ႇမႃးၼႆႉၵေႃႈ ႁၢၼ်ႉၸႂ်ၸွမ်းဢၼ်ၸဝ်ႈၵဝ်ႇ ႁဵတ်းလႆႈမႃးၼႆႉယူႇၶႃႈ။

ထၢမ် – ယူႇတီႈ ပဵၼ်ၸၢႆးတႆး ၵေႃႉၼိုင်ႈသေ တႃႇတေၶဝ်ႈမႃးလႆႈ ၼႂ်းတူင်ႇဝူင်း Mr. World Myanmar ၼႆႉ လႆႈၶတ်းၸႂ်ၸိူင်ႉႁိုဝ်? မီးလွင်ႈယၢပ်ႇၽိုတ်ႇၸိူင်ႉႁိုဝ်?

တွပ်ႇ – ဢွၼ်တၢင်းသုတ်းတႄႉ မိူဝ်ႈပႆႇၶေႉၶဵင်ႇ Mr. World Myanmar ၼၼ်ႉ ယွၼ်ႉၶႃႈႁဝ်းပဵၼ် မေႃသွၼ်ၼိုင်ႈၵေႃႉလႄႈ ၶႃႈႁဝ်းလႆႈပိုတ်ႇဝႆႉ ႁူင်းႁဵၼ်းတီႈဝဵင်းသီႇပေႃႉၶႃႈဢေႃႈ။ ယွၼ်ႉလႆႈသွၼ်လိၵ်ႈပၼ်လုၵ်ႈႁဵၼ်းၶဝ် တင်းဝၼ်းတင်းဝၼ်းလႄႈ ၶႃႈႁဝ်း ဢမ်ႇပေႃးမီးၶၢဝ်းယၢမ်းတၼ်း။ ၵူၺ်းၵႃႈ ၵွပ်ႈလွင်ႈတၢင်း ၵူႈလွင်ႈလွင်ႈသေ လႆႈၽႅဝ်ၵႂႃႇတီႈတႃႈၵုင်ႈလႄႈ မီးသုၼ်ႇလႆႈၵႂႃႇၶဝ်ႈၶေႉၶဵင်ႇဢေႃႈ။ တၢင်းယၢပ်ႇၽိုတ်ႇတႄႉ ၵွၼ်ႇၼႃႈ ၶႃႈပႆႇၵႂႃႇတီႈဝႅတ်ႉၼၢမ်းၼၼ်ႉ ဝႂ်ၶၢမ်ႈမိူင်း(Passport) ၶႃႈမီးဝႆႉယူႇသေတႃႉ ဢႃယုမၼ်းမူတ်းဝႆႉ၊ တေလႆႈၶိုၼ်းႁဵတ်းဢၼ်မႂ်ႇ။ ၶႃႈႁဝ်းလႆႈၵႂႃႇတီႈ မျႃႉဝတီႇႁိုင်မွၵ်ႈ 20 ဝၼ်းပၢႆလႄႈ လႆႈသဵင်ႈၶၢဝ်းယၢမ်း ၼမ်၊ တႃႇတေၵႂႃႇၶေႉၶဵင်ႇၼႆႉ ဢမ်ႇပေႃးမီးၶၢဝ်းယၢမ်း လႆႈၶၢဝ်းယၢမ်း 1 လိူၼ် ၵူၺ်း။ ၽိူဝ်ႇလႆႈဝႂ်ၶၢမ်ႈမိူင်း (Passport) မႃးၵေႃႈ ၶၢဝ်းယၢမ်းတႃႇတေႁၢင်ႈႁႅၼ်းၼႆႉ မီး(1) ဝူင်ႈၵူၺ်း။ မၢင်မိူင်းၼႆႉ တႃႇတေတၢင်တူဝ် ၸိုင်ႈမိူင်းသေ ၵႂႃႇၶေႉၶဵင်ႇၼၼ်ႉ ပိူၼ်ႈမီးၶၢဝ်းယၢမ်းႁၢင်ႈႁႅၼ်းမွၵ်ႈ 1 ပီ/2 ပီ ၸိူဝ်းၼႆႉ။ ၶႃႈႁဝ်းသမ်ႉ တႃႇတေႁၢင်ႈႁႅၼ်း ၶူဝ်းၼုင်ႈတၢင်းဝႆ၊ ဝီႊတီႊယူဝ်ႊဢၼ်ၶဝ်ယွၼ်းမႃး၊ ၶႅပ်းႁၢင်ႈ ၸိူဝ်းၼႆႉသမ်ႉ မီးၶၢဝ်းယၢမ်းဢေႇ၊ ဢၼ် ၼႆႉပဵၼ်လွင်ႈယၢပ်ႇၽိုတ်ႇ မိူဝ်ႈပႆႇၵႂႃႇ။

မိူဝ်ႈတေတၢင်တူဝ် မိူင်းမၢၼ်ႈသေၵႂႃႇၶေႉၶဵင်ႇတီႈဝႅတ်ႉၼမ်းသမ်ႉ ၵူၼ်းတီႈမိူင်းမၢၼ်ႈၼႆႉ ဢမ်ႇပေႃးလႆႈၸႂ် ၊ ဢမ်ႇပေႃးပၼ်ႁႅင်းၶႃႈ ယွၼ်ႉၶႃႈတူဝ်လဵၵ်ႇ၊ တႅမ်ႇ ၵူဝ်ဢမ်ႇၵႂႃႇၶေႉၶဵင်ႇ ၵူၼ်းၼွၵ်ႈမိူင်းလႆႈ။ ၵူၼ်းၼွၵ်ႈမိူင်း ဢၼ်တေမႃးၶေႉၶဵင်ႇၵမ်ႈၼမ်သမ်ႉ ပဵၼ်ၵူၼ်းမီးၸိုဝ်ႈသဵင်ဝႆႉ၊ မီးၵူၼ်းပၼ်ႁႅင်းၼမ်။ ၶႃႈသမ်ႉပဵၼ်မေႃသွၼ် လိၵ်ႈဢင်းၵိတ်ႉ ၵေႃႉၼိုင်ႈ၊ ဢမ်ႇၸႂ်ႈၵူၼ်းၸိုဝ်ႈသဵင်လိုဝ်းလင်ဝႆႉ ၼႂ်းမိူင်းမၢၼ်ႈ၊ ပဵၼ်ၵူၼ်းဢၼ် လုၵ်ႉတီႈဝဵင်းလဵၵ်ႉလဵၵ်ႉဢွၼ်ႇၵႂႃႇၵူၺ်းလႄႈ မိူဝ်ႈတႄႇၶေႉၶဵင်ႇၼၼ်ႉ ဢမ်ႇပေႃးမီးၵူၼ်းပၼ်ႁႅင်း ၼႆႉၵေႃႈ ပဵၼ်လွင်ႈယၢပ်ႇၽိုတ်ႇဢၼ်ၼိုင်ႈ။ တႄႇၸဵမ်မိူဝ်ႈ ၵေႃႉလဵဝ် တေႃႇထိုင်တေႃႈလဵဝ် လႆႈႁူပ်ႉလွင်ႈယၢပ်ႇၽိုတ်ႇမႃးယူႇလၢႆလွင်ႈ။ ၵူၺ်းၵႃႈ ႁူပ်ႉလွင်ႈယၢပ်ႇၽိုတ်ႇသင်ၵေႃႈ သင်ဝႃႈႁဝ်းၶတ်းၸႂ်ၵႂႃႇၸိုင် ၵူၼ်းၸိူဝ်းဢမ်ႇပၼ်ႁႅင်းၼၼ်ႉၵေႃႈ ၶဝ်တေႁၼ်ထိုင် ၼမ်ႉၵတ်ႉႁဝ်းမႃးယူႇၶႃႈ။

ထၢမ် – ပဵၼ်မေႃသွၼ်ၼႆႉ သွၼ်ဝႆႉပၢႆးလႂ်ၶႃႈ?

တွပ်ႇ – ၶႃႈတႄႇသွၼ် လိၵ်ႈဢင်းၵိတ်ႉမႃး မိူဝ်ႈပီ 2019 တေႃႇထိုင် ပီ 2021 ၸိူဝ်းၼႆႉ။ ၶႃႈႁဝ်းဢဝ်ၼမ်ႉၸႂ် ပရႁိတ၊ ဢမ်ႇဢဝ်ငိုၼ်းလိူၼ်သေ သွၼ်မႃးမွၵ်ႈၶၢဝ်းတၢင်း 2 ပီ။ ၶႃႈလႆႈသွၼ်ပၼ် လုၵ်ႈႁဵၼ်းတီႈဝဵင်းသီႇပေႃႉ 150 – 200 ၵေႃႉၸိူဝ်းၼႆႉ။ ဢမ်ႇၸႂ်ႈဝႃႈ သွၼ်ပၼ်လုၵ်ႈႁဵၼ်းၶဝ် လိၵ်ႈဢင်းၵိတ်ႉမဵဝ်းလဵဝ်၊ ၶႃႈသွၼ်ပၼ်ပႃး ႁႂ်ႈမီးလွင်ႈႁတ်းႁၢၼ်၊ လွင်ႈယုမ်ႇယမ်တူဝ်ၸဝ်ႈၵဝ်ႇ၊ Public Speaking လွင်ႈလၢတ်ႈၵႂၢမ်း ၾၢႆႇၼႃႈၵူၼ်းတင်းၼမ်၊ Group Discussion ၊ Presentation ၼမ်ႉၵတ်ႉ ဢၼ်ၵူၼ်းၼုမ်ႇၶဝ် ထုၵ်ႇလီ မီး Soft Skill ၸိူဝ်းၼႆႉၶႃႈဢေႃႈ။ တႄႇဢဝ်ပီ 2021 မႃးၼႆႉ လုၵ်ႈႁဵၼ်းၸိူဝ်းယဝ်ႉပၢင်သွၼ်ၵႂႃႇၵေႃႈ ႁႂ်ႈၼွင်ႉယိင်းၼွင်ႉၸၢႆးၶဝ် မႃးၶိုၼ်ႈ။ ပေႃႈမႄႈမၢင်ၵေႃႉ ၵေႃႈတုၵ်းယွၼ်း ႁႂ်ႈႁပ်ႉပႃးလုၵ်ႈဢွၼ်ႇ ၵေႃႉလဵၵ်ႉလႄႈ တႄႇပီ 2021 ၼႆႉ ၶႃႈၵေႃႈလႆႈပိုတ်ႇပၢင်သွၼ်လိၵ်ႈဢင်းၵိတ်ႉ (EEC) ႁပ်ႉသွၼ်ပၼ် လုၵ်ႈဢွၼ်ႇၵေႃႉလဵၵ်ႉ တေႃႇထိုင်ၵေႃႉယႂ်ႇ။ တေႃႇထိုင်ပီ 2024 ၼႆႉ မီးလုၵ်ႈႁဵၼ်း 1 ႁဵင်ပၢႆယဝ်ႉၶႃႈ။

ထၢမ် – ဢၼ်လႆႈတၢင်တူဝ်မိူင်းမၢၼ်ႈသေ ၵႂႃႇၶေႉၶဵင်ႇတီႈမိူင်းဝႅတ်ႉၼၢမ်းၼႆႉ ၼႂ်းၸႂ်ပဵၼ်ၸိူင်ႉႁိုဝ်ၽွင်ႈ?

တွပ်ႇ – လႆႈဝႃႈ ၾၼ်ႁဝ်းဢမ်ႇယၢမ်ႈဝူၼ်ႉမႃး၊ ဢၼ်ၶႂ်ႈလႆႈၶႂ်ႈပဵၼ်ၼၼ်ႉ မၼ်းပဵၼ်မႃးတၢင်းၼွၵ်ႈၶႃႈဢေႃႈ။ မိူၼ်ႁဝ်းတူၺ်းၸိူင်း၊ ႁဝ်းၼွၼ်းၾၼ်သေ ပဵၼ်မႃးတၢင်းၼွၵ်ႈ ၸိူင်ႉၼၼ်ႉဢေႃႈ။ ဢၼ်လႆႈ တၢင်တူဝ်မိူင်းႁဝ်းသေ ၵႂႃႇၶေႉၶဵင်ႇတီႈပၢင်ပွႆႈ ဢၼ်ယႂ်ႇလိူဝ်ပိူၼ်ႈၼႂ်းလုမ်ႈၾႃႉၼႆႉ ပဵၼ်ဢၼ်ယိၼ်းၸူမ်းတႄႉၶႃႈ။ သုၼ်ႇဢၼ်တေလႆႈတၢင်တူဝ်မိူင်းႁဝ်းသေ ၵႂႃႇၶေႉၶဵင်ႇၼၼ်ႉၵေႃႈ တေလႆႈၼိုင်ႈပွၵ်ႈၵူၺ်း။

ထၢမ် – မိူင်းၶေႉၶဵင်ႇၼႂ်းမိူင်းလႄႈ ၵႂႃႇၶေႉၶဵင်ႇၼွၵ်ႈမိူင်းၼၼ်ႉ တူဝ်ထူပ်းလွင်ႈပႅၵ်ႇပိူင်ႈ မီးၸိူင်ႉႁိုဝ်ၶႃႈ?

တွပ်ႇ – မီးလွင်ႈပႅၵ်ႇပိူင်ႈႁႅင်းၼႃႇၶႃႈ။ မိူဝ်ႈၶေႉၶဵင်ႇ ၼႂ်းမိူင်းမၢၼ်ႈၼႆႉ ဢမ်ႇမီးၽူႈၶဝ်ႈႁူမ်ႈၶေႉၶဵင်ႇၼမ်၊ ၶၢဝ်းယၢမ်းၶေႉၶဵင်ႇၵေႃႈ ဢမ်ႇႁိုင်။ ၵူၺ်းၵႃႈ မိူဝ်ႈၵႂႃႇၶေႉၶဵင်ႇတီႈ မိူင်းဝႅတ်ႉ ၼၢမ်းတႄႉ ၶၢဝ်းယၢမ်းႁိုင် 20 ဝၼ်းပၢႆ။ တႄႇဢဝ်ၵၢင်ၼႂ်ၸဝ်ႉတေႃႇထိုင်ၵၢင်ၶမ်ႈ လႆႈႁဵတ်းလွင်ႈတူင်ႉၼိုင် (Activity) ၼမ်၊ ဢၼ်လႆႈၶေႉၶဵင်ႇၵေႃႈၼမ်။ ပေႃးၵႂႃႇၶေႉၶဵင်ႇၼွၵ်ႈမိူင်းတႄႉ ႁိူဝ်ႉႁႅင်းၶႃႈဢေႃႈ ၊ ႁိူဝ်ႉတူဝ်ႁိူဝ်ႉၸႂ်ၶႃႈ။ ယဝ်ႉၵေႃႈ လႆႈဝူၼ်ႉၼမ်ဢေႃႈ ယွၼ်ႉလႆႈတၢင်တူဝ်မိူင်းႁဝ်းသေ ၵႂႃႇၶေႉၶဵင်ႇလႄႈ သင်ဢမ်ႇလႆႈသူးမႃး၊ သင်ဢမ်ႇလႆႈႁဵတ်းမႃးလီထီႉသုတ်းၼႆၸိူဝ်းၼႆႉၶႃႈ။ ၵူၼ်းၸိူဝ်းမီးၽူႈပၼ်ႁႅင်းၼမ်သေ မႃးၶေႉၶဵင်ႇၵမ်ႈၽွင်ႈၵေႃႈ မၢင်ၵေႃႉမၢင်မိူင်းၼႆ ၶဝ်ၶႂ်ႈလဵၼ်ႈၵေႃႉၵၼ်တင်း ၵူၼ်းဢၼ်မီးၸိုဝ်ႈသဵင် ဢၼ်မီးၽူႈပၼ်ႁႅင်းၼမ်ၵူၺ်း ၸိူင်ႉၼၼ်ၵေႃႈမီးဢေႃႈ။ လိူဝ်ၼၼ်ႉၵေႃႈ ၾိင်ႈထုင်း၊ လွင်ႈယူႇသဝ်းၵိၼ်ယႅမ်ႉၵူႈမိူင်းမိူင်း ၸိူဝ်းၼႆႉၵေႃႈ လႆႈလဵပ်ႈႁဵၼ်းၶႃႈဢေႃႈ။ ၸိုင်ႈမိူင်းၸိူဝ်းမႃးၶဝ်ႈၶေႉၶဵင်ႇသမ်ႉမီး 60 မိူင်းပၢႆဢေႃႈ ၵွပ်ႈၼၼ် လႆႈလဵပ်ႈႁဵၼ်းၼမ်၊ ဢူၺ်းၵေႃႉၵေႃႈၼမ်လႄႈ လႆႈဝႃႈပဵၼ်လွင်ႈလီယူႇၶႃႈ။

ထၢမ် – တီႈၼႂ်းပၢင်ၶေႉၶဵင်ႇ မီးလွင်ႈတူင်ႉၼိုင်ၸိူင်ႉႁိုဝ်လၢႆလၢႆ? လႆႈၶေႉၶဵင်ႇတွၼ်ႈလႂ်ၽွင်ႈ?

တွပ်ႇ – ပၢင်ၶေႉၶဵင်ႇၸၢႆးငၢမ်း ၼႂ်းလုမ်ႈၾႃႉၼႆႉ မီးလၢႆသႅၼ်းၼမ်ၼႃႇၶႃႈ။ ၵူၺ်းၵႃႈ ဢၼ်ၶႃႈလႆႈၵႂႃႇ ၶေႉၶဵင်ႇ Mr. World ၼႆႉ သင်တႅၵ်ႈၼိူင်းၵၼ်တင်း ပၢင်ၶေႉၶဵင်ႇၸၢႆးငၢမ်း ၼႂ်းလုမ်ႈၾႃႉၸိုင် ပဵၼ်ပၢင်ပွႆးဢၼ်ယႂ်ႇလိူဝ်သေပိူၼ်ႈဢေႃႈ။ ဢၼ်လႆႈၶေႉၶဵင်ႇၵေႃႈၼမ်ၶႃႈ မိူၼ်ၼင်ႇၾၢႆႇၶေႉၶဵင်ႇလၢတ်ႈၵႂၢမ်း (Head to Head challenge) ဢၼ်ၼႆႉလႆႈၶၢဝ်းယၢမ်း 2 မိၼိတ်ႉသေ လႆႈၵႂႃႇလၢတ်ႈၵႂၢမ်းၼိူဝ်းၶဵင်ႇ ၵမ်းၵေႃႉၵေႃႉ။ လိူဝ်ၼၼ်ႉ လႆႈၶေႉၶဵင်ႇတွၼ်ႈ Beauty With A Purpose ၵဵဝ်ႇလူၺ်ႈၵၢၼ်ဢၼ် ႁဝ်းလႆႈၸွႆႈထႅမ်တူင်ႇ ဝူင်းၵူၼ်းမႃး။ ၶႃႈသမ်ႉပဵၼ် မေႃသွၼ်ၵေႃႉၼိုင်ႈလႄႈ ၶႃႈလႆႈၼႄၵႂႃႇၵၢၼ်ပရႁိတ ဢၼ်ၶႃႈလႆႈႁဵတ်းမႃး တႄႇၸဵမ်မိူဝ်ႈပီ 2019 ၵဵဝ်ႇလူၺ်ႈၵၢၼ်ပၢႆးပၺ်ႇၺႃႇၶႃႈ။ ဢၼ်ၼႆႉလႆႈထၢႆႇပဵၼ်ၶလိပ်ႉဝီႊတီႊယူဝ်ႊသေ သူင်ႇပၼ်ၶဝ် ၵွၼ်ႇပႆႇၵႂႃႇတီႈ မိူင်းဝႅတ်ႉၼၢမ်း။ ထႅင်ႈတွၼ်ႈၼိုင်ႈသမ်ႉ လႆႈၶေႉၶဵင်ႇ Top Model  တေလႆႈပႆၸိူင်ႉႁိုဝ် ၸိူဝ်းၼႆႉ၊ သိူဝ်ႈၶူဝ်းတႃႇပႆ Model တႄႉၶဝ်ႁၢင်ႈ ႁႅၼ်းပၼ် 1 ၸုမ်ႇ၊ ႁဝ်းလႆႈပႃးၵႂႃႇႁင်းၵူၺ်း 1 ၸုမ်ႇ။ ဢၼ်ၼၼ်ႉတႄႉ ၶဝ်တူၺ်းလၢႆးႁဝ်းပႆ တီႈၼိူဝ်ၶဵင်ႇသုင် (State) သေလိူၵ်ႈ။ လႆႈၶေႉၶဵင်ႇ ၾၢႆႇဢွၵ်ႇဢဵၼ်ႁႅင်း (Sports) မိူၼ် ၼင်ႇ လုၺ်ႈၼမ်ႉ၊ လဵၼ်ႈၶေႉၵၼ် (Marathon)  5 ၵီႊလူဝ်ႊမီႊတိူဝ်ႊၸိူဝ်းၼႆႉ။ တေမီးပႃးထႅင်ႈၾၢႆႇ Talent လွင်ႈပၢႆးႁဝ်းၶႅၼ်ႇၾၢႆႇလႂ် မိူၼ်ၼင်ႇႁွင်ႉၵႂၢမ်း၊ ၵႃႈဝႅၼ် ၸိူဝ်းၼႆႉ။ ၾၢႆႇ လၢတ်ႈၸႃၼႆႉ တေမီးပႃးထႅင်ႈ Close Door Interview  လႆႈၵႂႃႇတီႈၼႂ်းႁွင်ႈဢၼ်ၼိုင်ႈသေ တေမီးၵူၼ်းပႂ်ႉထၢမ် ၶေႃႈထၢမ်သေ ႁဝ်းတေလႆႈတွပ်ႇ။ တွၼ်ႈဢၼ်လႆႈၶေႉၶဵင်ႇတႄႉ တေလႆႈဝႃႈၼမ်ႁႅင်းၶႃႈဢေႃႈ တေႃႇထိုင်ဝၼ်းလိုၼ်းသုတ်းယဝ်ႉၶႃႈ။

ထၢမ် – ၼႂ်းတွၼ်ႈဢၼ်လႆႈၶေႉၶဵင်ႇမႃးၸိူဝ်းၼၼ်ႉ ဢၼ်လႂ်ပဵၼ် လွင်ႈၶဵင်ႇတႃႉ တႃႇၸၢႆးတွင့်လေႃးၶႃႈ?

တွပ်ႇ –  ဢၼ်ယၢပ်ႇလိူဝ်ပိူၼ်ႈ တွၼ်ႈတႃႇၶႃႈတႄႉပဵၼ် Sports Challenge ဢၼ်လႆႈလုၺ်းၼမ်ႉ၊ လႅၼ်ႈၶေႉၵၼ်ၸိူဝ်းၼႆႉ။ ၶႃႈႁဝ်းသမ်ႉ ယူႇၼႂ်းမိူင်းမၢၼ်ႈ ၸဵမ်လဵၵ်ႉတေႃႇထိုင် ၵေႃႉယႂ်ႇ ဢမ်ႇယၢမ်ႈၶဝ်ႈၶေႉၶဵင်ႇ ၾၢႆႇလဵၼ်ႈဢဵၼ်ႁႅင်းၼႆႉသေပွၵ်ႈ။ မိူၼ်ၼင်ႇ Marathon ၵေႃႈ လႆႈလႅၼ်ႈၶေႉၵၼ် 5 ၵီႊလူဝ်ႊမီႊတိူဝ်ႊ ၸိူဝ်းၼႆႉ လႆႈဝႃႈပဵၼ်ပွၵ်ႈၵမ်းဢွၼ်တၢင်းသုတ်းတွၼ်ႈတႃႇၶႃႈလႄႈ ပဵၼ်ဢၼ်ႁိူဝ်ႉသေ ယၢပ်ႇဝႆႉဢေႃႈ။ ၵူၺ်းၵႃႈ Talent ဢၼ်လႂ်ၵေႃႈ မီးလွင်ႈယၢပ်ႇၽိုတ်ႇယူႇ ႁင်းၽႂ်မၼ်းယူႇၶႃႈ။

ထၢမ် – တီႈၼႂ်းပၢင်ၶေႉၶဵင်ႇၼၼ်ႉ လႆႈတၢင်းႁူႉ၊ လႆႈတွၼ်ႈသွၼ် ၸိူင်ႉႁိုဝ်မႃးၽွင်ႈၶႃႈ?

တွပ်ႇ – တွၼ်ႈသွၼ်တႄႉ လႆႈၼမ်ၶႃႈဢေႃႈ။ ပိူင်လူင်တႄႉ ႁဝ်းလူဝ်ႇယုမ်ႇယမ်တူဝ်ၸဝ်ႈၵဝ်ႇၶႃႈ။ ယွၼ်ႉသင်ၼႆ တၢင်းသုင်ၶႃႈမီး 5 ပေႇ 7 ၵူၺ်း ပေႃးပဵၼ်ၼႂ်းမိူင်းတႆး၊ မိူင်းမၢၼ်ႈ ၼႆႉ ပဵၼ်ၵူၼ်းပုင်ႇမၢၼ်ႇ ဢမ်ႇတႅမ်ႇ၊ ဢမ်ႇသုင်ၶႃႈ။ ၼႂ်းဢူၺ်းၵေႃႉၶႃႈ ၼႂ်းမိူင်းႁဝ်းတႄႉ ၶႃႈပဵၼ်ၵူၼ်းသုင်ဢေႃႈ။ ၵူၺ်းၼႃႇ ပေႃးၵႂႃႇ ၼိူင်းၵၼ်တင်း ၵူၼ်းၼွၵ်ႈမိူင်း ၸိူဝ်းမႃးၶဝ်ႈပၢင်ၶေႉၶဵင်ႇတႄႉ ၶဝ်သမ်ႉပဵၼ်ၵူၼ်းသုင် 6 ပေႇၶိုၼ်ႈၼိူဝ် လၢႆလၢႆၶႃႈ။ ၼႂ်းမိူင်းႁဝ်းတႄႉ တႃႇတေႁၼ်ၵူၼ်းသုင်မွၵ်ႈၼၼ်ႉ ဢမ်ႇသူႈမီး။ ၵွပ်ႈပိူဝ်ႈၶႃႈ ပဵၼ်ၵူၼ်းတူဝ်လဵၵ်ႉလိူဝ်ပိူၼ်ႈ၊ တႅမ်ႇလိူဝ်ပိူၼ်ႈလႄႈ မၢင်ၵေႃႉၵေႃႈ ဢမ်ႇၶႂ်ႈယုမ်ႇယမ်၊ ဝူၼ်ႉဝႃႈပိူၼ်ႈ တေဢမ်ႇၶႂ်ႈလိူၵ်ႈၶႃႈ၊ တေဢမ်ႇလႆႈႁပ်ႉသူးသင်မႃးၸိူဝ်းၼႆႉ။ ၵူၺ်းၵႃႈ ပေႃးႁဝ်းယုမ်ႇယမ် တူဝ်ၸဝ်ႈၵဝ်ႇသေ ႁဝ်းႁူႉပွင်ႇၸႂ် လွင်ႈယိူင်းဢၢၼ်း ဢၼ်ၵႂႃႇၶေႉၶဵင်ႇ၊ ပဵၵ်ႉသမ်ႉဝႃႈ ႁဝ်းပႅၵ်ႇပိူင်ႈပိူၼ်ႈ ဢမ်ႇမိူၼ်ပိူၼ်ႈၵေႃႈ ဢမ်ႇလူဝ်ႇၸႂ်တူၵ်း။ သင်ယုမ်ႇယမ်တူဝ်၊ ပွင်ႇၸႂ်ယိူင်းဢၢၼ်းသေ ၶတ်းၸႂ်ၵႂႃႇၸိုင် တေထိုင်တီႈယိူင်းမၢႆယူႇၶႃႈ။

ထၢမ် – လွင်ႈတူဝ်ထူပ်း ဢၼ်လႆႈမႃးၸိူဝ်းၼၼ်ႉ ဢၼ်တေၸၢင်ႈဢဝ်မႃး ၸႂ်ႉတိုဝ်းတီႈၼႂ်းတူင်ႇဝူင်းတႆး ႁဝ်းမီးသင်ၽွင်ႈၶႃႈ?

တွပ်ႇ – ဢၼ်ၶႃႈၶႂ်ႈပိုၼ်ၽႄႈပၼ်ၶိုၼ်း တီႈၼႂ်းတူင်ႇဝူင်းတႆးႁဝ်းၶႃႈတႄႉ ပဵၼ်လွင်ႈဢၼ်ႁဝ်းၵပ်းသိုပ်ႇ ပိူၼ်ႈဢေႃႈ။ ၵမ်ႈၼမ် တႃႇတေပဵၼ်ၸၢႆးတႆး/ယိင်းတႆးသေ တၢင်တူဝ်မိူင်းတႆး ႁဝ်းသေၵႂႃႇၶေႉၶဵင်ႇတီႈၼွၵ်ႈမိူင်းၼၼ်ႉ ၾၢႆႇၸၢႆးငၢမ်း/ၼၢင်းငၢမ်းၼႆႉ ဢမ်ႇပေႃးမီးၼမ်။ ၶႃႈၶႂ်ႈပိုၼ်ၽႄႈပၼ် ၵူၼ်းၼုမ်ႇတႆး ဢၼ်မီးတၢင်းယိူင်းဢၢၼ်း ၶႂ်ႈပဵၼ်ၸၢႆးငၢမ်း/ၼၢင်းငၢမ်း ဢမ်ႇၼၼ် ၶႂ်ႈပဵၼ်သေဢၼ်ဢၼ်လႄႈ မၢင်ပွၵ်ႈသမ်ႉ ဝူၼ်ႉဝႃႈ ယွၼ်ႉလုၵ်ႉမႃးတီႈမူႇဝၢၼ်ႈလဵၵ်ႉလဵၵ်ႉ၊ တီႈၼႂ်းတူင်ႇဝူင်းၵေႃႈ ဢမ်ႇမီးၵူၼ်းၸိူင်ႉ ၼၼ်သေ ဝူၼ်ႉဝႃႈ ဢမ်ႇပဵၼ်လႆႈၸိူဝ်းၼႆႉ။ ပေႃးၶႂ်ႈတၢင်တူဝ်မိူင်းႁဝ်းသေ ၵႂႃႇၶေႉၶဵင်ႇ တေလႆႈမီးၼမ်ႉၵတ်ႉၸိူင်ႉႁိုဝ်၊ တေလႆႈႁၢင်ႈႁႅၼ်းၸိူင်ႉႁိုဝ် ၸိူဝ်းၼႆႉ။ ၵွပ်ႈၼၼ် တေႃႈလဵဝ် ၶႃႈႁဵတ်းဝႆႉ EEC – Empower Education Campaign ၶႃႈတေပိုၼ်ၽႄႈပၼ် လွင်ႈတူဝ်ထူပ်း ဢၼ်ၶႃႈလႆႈမႃးတီႈၼႂ်းပၢင်ၶေႉၶဵင်ႇ ၸိူဝ်းၼၼ်ႉၶႃႈ။

ထၢမ် – ၽႅၼ်ၵၢၼ် ဢၼ်တေသိုပ်ႇႁဵတ်းၵႂႃႇ မိူဝ်းၼႃႈၸိူဝ်းၼႆႉ မီးၸိူင်ႉႁိုဝ်ၽွင်ႈၶႃႈ?

တွပ်ႇ – ၶႃႈပဵၼ် မေႃသွၼ်ၵေႃႉၼိုင်ႈလႄႈ တေၶိုၼ်းသိုပ်ႇသွၼ်လိၵ်ႈၵႂႃႇ မိူၼ်ၼင်ႇ ဢၼ်ယၢမ်ႈႁဵတ်းမိူဝ်ႈပူၼ်ႉမႃးၶႃႈ။ တေသွၼ်ပၼ်ၾၢႆႇဢင်းၵိတ်ႉ၊ Soft Skill ႁႂ်ႈၵူၼ်းၼုမ်ႇႁဝ်း ပေႃးၶိုၼ်ႈယႂ်ႇမႃး။ ဢမ်ႇၸႂ်ႈဝႃႈ သွၼ်ၽႃသႃ ဢင်းၵိတ်ႉဢၼ်လဵဝ်ၵူၺ်းၶႃႈ။

ထၢမ် – ၵဵဝ်ႇလူၺ်ႈ ၾၢႆႇပၢႆးမွၼ်းၸိူဝ်းၼႆႉၶႃႈလူး ၸွင်ႇမီးဝႆႉၽႅၼ်ၵၢၼ်ၸိူင်ႉႁိုဝ်ၶႃႈ?

တွပ်ႇ – ၾၢႆႇပၢႆးမွၼ်းၼႆႉ သူင်ၸႂ်တႄႉၶႃႈဢေႃႈ။ ၵူၺ်းၼႃႇ သင်လိူၵ်ႈပၢႆးပၺ်ႇၺႃႇသေ သိုပ်ႇသွၼ်လိၵ်ႈၵႂႃႇၸိုင် တေဢမ်ႇပေႃးမီး ၶၢဝ်းယၢမ်းတၼ်းၼမ်ယဝ်ႉၶႃႈ။ ၾၢႆႇပၢႆးမွၼ်းၼႆႉ သင်ဝႃႈ ပၢႆးမွၼ်းတႆးႁဝ်း မိူၼ်ၼင်ႇ ၼႂ်း MV ၸိူဝ်းၼႆႉ လူဝ်ႇၸၢႆးငၢမ်းသေ ၵပ်းသိုပ်ႇမႃးၸိုင် ၶႂ်ႈသိုပ်ႇႁဵတ်းယူႇၶႃႈ။ ၵူၺ်းၵႃႈ တေႃႈလဵဝ်တႄႉ ၶႂ်ႈႁဵတ်းယူႇတင်းသွင်ဢၼ်ၶႃႈ ၸဵမ်ပၢႆးပၺ်ႇၺႃႇတင်း ပၢႆးမွၼ်း။ တႃႇတေၶဝ်ႈတီႈၼႂ်းၵၢၼ်ပၢႆးမွၼ်းသမ်ႉ လႆႈဝႃႈယၢပ်ႇဝႆႉဢေႃႈ။ ယၢမ်းလဵဝ် ဢၼ်ယူႇတီႈပီးၼွင်ႉႁဝ်းၶဝ်သေ ပၼ်ႁႅင်းဝႆႉတႄႉၼမ်ၶႃႈဢေႃႈ။ တႃႇတေသိုပ်ႇႁဵတ်း ၼႂ်းပၢႆးမွၼ်း ၼႂ်းမိူင်းမၢၼ်ႈတႄႉ တႃႇႁႂ်ႈၽႅဝ်ယိူင်းမၢႆလႆႈၼၼ်ႉ ယၢပ်ႇဢေႃႈ ယွၼ်ႉတိုၵ်ႉပဵၼ်ၵူၼ်းမႂ်ႇလႄႈ ပေႃးဢမ်ႇမီးလွင်ႈၵပ်းသိုပ်ႇၸိူဝ်းၼႆႉၵေႃႈ ယၢပ်ႇဝႆႉၶႃႈ။

ထၢမ် – တီႈမိူင်းဝႅတ်ႉၼၢမ်းၼႆႉ လႆႈငိၼ်းဝႃႈ မီးၸၢဝ်းၶိူဝ်းတႆးႁဝ်း ယူႇသဝ်းၼႆလႄႈ ၸွင်ႇလႆႈပဵၼ်ၵႂႃႇလႄႇ လဵပ်ႈႁဵၼ်းတူၺ်းၶႃႈ?

တွပ်ႇ –  လွင်ႈၼႆႉ လႆႈႁၼ်ပီႈၼွင်ႉၽူႈပၼ်ႁႅင်းၶဝ်ၵေႃႈ တူင်ႉတၵ်ႉထၢမ်မႃးယူႇၶႃႈ။ ၵူၺ်းၵႃႈ ယွၼ်ႉဢမ်ႇမီးလွင်ႈၵပ်းသိုပ်ႇဝႆႉလႄႈ ဢမ်ႇလႆႈၵႂႃႇႁူပ်ႉထူပ်းၶႃႈ။

ထၢမ် – ဢၼ်ပဵၼ် တီႈမၢႆတွင်းလိူဝ်သေပိူၼ်ႈ ၼႂ်းပၢင်ၶေႉၶဵင်ႇ ၸွင်ႇမီးၶႃႈ?

တွပ်ႇ – မၢႆတွင်းတႄႉၼမ်ဢေႃႈ။ မိူဝ်ႈ Top Model ၼၼ်ႉလႆႈလၢႆႈၶူဝ်ႈ 2 ၸုမ်ႇ၊ ၸုမ်ႇၼိုင်ႈပဵၼ် Designer တီႈမိူင်းဝႅတ်ႉၼၢမ်းၶဝ် ႁၢင်ႈႁႅၼ်းပၼ် မိူဝ်ႈၸမ်တေလႆႈလၢႆႈၶူဝ်း ဢၼ် ၶႃႈႁၢင်ႈႁႅၼ်းၵႂႃႇႁင်းၵူၺ်းၼၼ်ႉသမ်ႉ လႆႈၶၢဝ်းယၢမ်းမွၵ်ႈ 5 မိၼိတ်ႉၼႆႉၵူၺ်း ဢမ်ႇပေႃးမီးၶၢဝ်းယၢမ်းၼမ်။ ၶူၼ်ႁူဝ်ၸိူဝ်းၼႆႉၵေႃႈ လႆႈၶိုၼ်း ႁဵတ်းဢဝ်ႁင်းၵူၺ်း လႆႈၼႅတ်ႈဢေႃႈ။ ၶူဝ်းဢၼ်ၶႃႈၼုင်ႈၵေႃႈ မီး 2/3 ၸၼ်ႉလႄႈ ယၢပ်ႇဝႆႉဢေႃႈ။ ၵူၺ်းၵႃႈ ပေႃးၶိုၼ်းဝူၼ်ႉၼႆ ႁဵတ်းယဝ်ႉၵႂႃႇလႆႈၼႂ်းၶၢဝ်းယၢမ်းပွတ်းပွတ်းလႄႈ ပဵၼ်မၢႆတွင်းဝႆႉယူႇၶႃႈ။ ထႅင်ႈလွင်ႈၼိုင်ႈသမ်ႉ မိူဝ်ႈၶေႉၶဵင်ႇလၢတ်ႈၵႂၢမ်း Head to Head Challenge မိူဝ်ႈယဝ်ႉ Presentation ၼၼ်ႉ ၶႃႈလႆႈႁွင်ႉၽဵင်းၵႂၢမ်း Mr. Word ပၼ်ဢေႃႈ။ ၼၼ်ႉၵေႃႈ ပဵၼ်တီႈမၢႆတွင်းၶႃႈ ယွၼ်ႉဝႃႈၽူႈၶဝ်ႈၶေႉၶဵင်ႇၶဝ် ဢမ်ႇမီးၽႂ်ႁွင်ႉသေၵေႃႉ။ ဢၼ်လႆႈထူပ်းဢူၺ်းၵေႃႉမႂ်ႇ ၵူႈတီႈၵူႈတၢင်းၸိူဝ်းၼႆႉ မၢင်ၵေႃႉၵေႃႈ တိုၵ်ႉမီးလွင်ႈၵပ်းသိုပ်ႇလၢတ်ႈတေႃႇၵၼ်ဝႆႉယူႇ ၼႆႉၵေႃႈပဵၼ်တီႈမၢႆတွင်းဢၼ်ၼိုင်ႈၶႃႈ။

ထၢမ် – ၸွင်ႇလႆႈမီးတိုဝ်ႉတၢင်း ဢဝ်လွင်ႈၾိင်ႈငႄႈၾိင်ႈထုင်းတႆးႁဝ်း ၵႂႃႇလၢတ်ႈၼႄ ၽူႈၶဝ်ႈႁူမ်ႈၶေႉၶဵင်ႇတၢင်ႇမိူင်းၶႃႈ?

တွပ်ႇ – ၶႃႈတႄႉ လႆႈႁၢင်ႈႁႅၼ်းၵႂႃႇ ၶူဝ်းတႆး၊ ၶူဝ်းၼုင်ႈတၢင်းဝႆႁဝ်းဢေႃႈ။ သင်ၶဝ်ႁၼ်မႅၼ်ႈၸိုင် ၶဝ်တေထၢမ်လႄႈ လႆႈသပ်းလႅင်းၼႄပၼ်ပႃးယူႇၶႃႈ။ မိူၼ်ၼင်ႇ ၵႂၢမ်းႁဝ်း “မႂ်ႇသုင်ၶႃႈ” ၸိူဝ်းၼႆႉၵေႃႈ လႆႈလၢတ်ႈပိုၼ်ၽႄႈပၼ်ပႃးယူႇၶႃႈ။

ထၢမ် – ၶႂ်ႈၾၢၵ်ႇၶေႃႈၵႂၢမ်းတွၼ်ႈထိုင် ၵူၼ်းၼုမ်ႇလႄႈ ၽူႈပၼ်ႁႅင်း ၸၢႆးတွင်ႉလေႃး ၸိူင်ႉႁိုဝ်ၽွင်ႈၶႃႈ?

တွပ်ႇ – ဢွၼ်တၢင်းသုတ်းတႄႉ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ပီႈၼွင်ႉတႆးႁဝ်းၶႃႈ ဢၼ်ယူႇၵူႈတီႈၵူႈ တၢင်းသေပၼ်ႁႅင်းဢေႃႈ။ သမ်ႉဝႃႈ ဢမ်ႇယၢမ်ႈႁၼ်ၵၼ်၊ မိုတ်ႈၵၼ်သေတႃႉ ဝူၼ်ႉဝႃႈတၢင်တူဝ်တႆးႁဝ်းသေ ၵႂႃႇၶေႉၶဵင်ႇၼႆလႄႈ ဢွၼ်ၵၼ်ပၼ်ႁႅင်းမႃးၵေႃႈ ယိၼ်းၸူမ်းတႄႉၶႃႈ။ ၶႃႈၵေႃႈ လႆႈၶတ်းၸႂ်သေ လႆႈမႃးသူးဢေႃႈ။ သင်ဢမ်ႇမီးပီႈၼွင်ႉႁဝ်းၶဝ် ပၼ်ႁႅင်းၸိုင် လႅပ်ႈတေဢမ်ႇလႆႈမႃးသူးၶႃႈ။ ထႅင်ႈလွင်ႈၼိုင်ႈသမ်ႉ တႃႇၵူၼ်းၼုမ်ႇၶဝ်တႄႉ ၶႂ်ႈသင်ႇလၢတ်ႈဝႃႈ ပဵၵ်ႉသမ်ႉဝႃႈ ႁဝ်းၵိူတ်ႇမႃးတီႈလႂ်၊ ယူႇတီႈလႂ်ၵေႃႈ ဢမ်ႇလွင်ႈယႂ်ႇ။ ပေႃးႁဝ်းမီး ယိူင်းဢၢၼ်းဢၼ်ယႂ်ႇယႂ်ႇ၊ မီးတၢင်းၶတ်းၸႂ်၊ မီးလွင်ႈၶႂ်ႈပဵၼ်သေ ၶတ်းၸႂ်ၵႂႃႇၸိုင် ဝၼ်းၼိုင်ႈ တေပဵၼ်မႃးလႆႈယူႇ ၶႂ်ႈတိုၵ်းသူၼ်းၼင်ႇၼႆၶႃႈ။