ဝၼ်းတီႈ 04/07/2025 ႁွင်ႈၵၢၼ် ၾၢႆႇၸွႆႈထႅမ်ပူၵ်းပွင် တူင်ႇဝူင်းၵူၼ်းၸိုင်ႈထႆး ၸႄႈတွၼ်ႈၵဵင်းႁၢႆး လႆႈလဵပ်ႈႁဵၼ်းငဝ်းလၢႆး ႁူဝ်ၼမ်ႉသၢႆ (တီႈတႄႇလႆၶဝ်ႈလႅၼ်လိၼ်) သေ ပိုၼ်ၽၢဝ်ႇဢွၵ်ႇမႃးဝႃႈ – ဢိင်ၼိူဝ် ၾူၼ်တူၵ်းႁႅင်းတၢင်းမိူင်းတႆးသေ ၼမ်ႉသၢႆၸၢင်ႈၼွင်းလူၼ်ႉၾင်ႇ။

ၵွပ်ႈၼႆလႄႈ ဢၼ်လီမႆႈၸႂ်ၼႆႉ ပဵၼ်ၾင်ႇၾၢႆႇထႆး ပဵၼ်ၼႂ်းပွၵ်ႉသၢႆလူမ်းၵျွႆး မူႇ 1 ဢိူင်ႇဝဵင်းၽၢင်းၶမ်း၊ ပွၵ်ႉၵေႃႇသၢႆး မူႇ 7 ဢိူင်ႇမႄႈသၢႆ၊ ပွၵ်ႉမႆႉလုင်းၶူၼ် ဢိူင်ႇမႄႈသၢႆ ၊ ပွၵ်ႉမိူင်လႅင် ဢိူင်ႇမႄႈသၢႆ ၸိူဝ်းၼႆႉ။

ၵူၼ်းယူႇၼႂ်းပိုၼ်ႉတီႈ ဢၼ်ဝႃႈမႃးၼႆႉ ႁႂ်ႈလႆႈၾၢင်ႉယူႇၾၢင်ႉၵိၼ် ႁႂ်ႈႁၢင်ႈႁႅၼ်းဢဝ်ၶူဝ်းၶွင်လမ်ႇလွင်ႈ ၶၢႆႉဝႆႉတၢင်ႇဝႆႉတီႈသုင် တီႈလွတ်ႈၽေးၼမ် ၊ ႁိူၼ်းဢၼ်မီးၵူၼ်းထဝ်ႈ၊ လုၵ်ႈဢွၼ်ႇလဵၵ်ႉ၊ ၵူၼ်းမီးတၢင်းပဵၼ်ၶၢဝ်းယၢဝ်း၊ ၸိူဝ်းၵႂႃႇယၢပ်ႇပႆယၢပ်ႇၵေႃႈ ႁႂ်ႈႁၢင်ႈႁႅၼ်းတူဝ်ႈတၼ်းသေ ႁႂ်ႈပႂ်ႉထွမ်ႇၶၢဝ်ႇငၢဝ်းၾူၼ်လူမ်းၾိင်ႈၾႃႉလႄႈ ၽေးသၽႃႇဝ ယူႇတႃႇသေႇသေၵမ်း ဝႃႈၼႆဝႆႉ။

ၼင်ႇႁိုဝ် ၵူၼ်းမိူင်းတေလွတ်ႈၽေးသၽႃႇဝၼၼ်ႉ လူင်ပွင်ၸိုင်ႈထႆး လႆႈႁူမ်ႈမိုဝ်းၵၼ်တင်း ၶွမ်ႊပၼီႊ လွင်ႈသိုဝ်ႇသၢၼ် မိူၼ်ၼင်ႇ AIS  – True – NT ၶဝ်ၸိူဝ်းၼႆႉသေ တေသိုဝ်ႇသၢၼ်ပိုၼ်ၽၢဝ်ႇငဝ်းလၢႆး ၶိုတ်းတၼ်းပၼ်ယူႇတႃႇသေႇလႄႈ ႁႂ်ႈလႆႈၾၢင်ႉထွမ်ႇၶၢဝ်ႇငၢဝ်းသေၵမ်း ပိုၼ်ၽၢဝ်ႇဝႆႉပႃးၼင်ႇၼႆ။

ၾင်ႇတၢင်းမိူင်းတႃႈၶီႈလဵၵ်းတႄႉ ဢၼ်ယူႇတိတ်းၸွမ်းသၢႆၼမ်ႉမႄႈသၢႆ ဢၼ်ၸၢင်ႈမီးၽေးၼမ်ႉထူမ်ႈ ပဵၼ်ပွၵ်ႉပုင်းထုၼ်၊ တႃႈလေႃႉ၊ မၢၵ်ႇၵႃႇႁူဝ်ၶမ်း၊ မႄႈၶၢဝ်၊ သၼ်သၢႆးတႆး၊ သၼ်သၢႆးလိုဝ်ႉ ၸိူဝ်းၼႆႉ။