ၵူၼ်းပၢႆႈၽေးသိုၵ်း ဝၢၼ်ႈၵွင်ထူဝ်ႇ ဝၢၼ်ႈသလွင်းထွင်ႇ ဝၢၼ်ႈၼွင်ၵႅဝ်း ဢၼ်ပၢႆႈမႃးယူႇဝႆႉတီႈၵျွင်းမူၺ်ႇတေႃႇလႄႈ ဝၢၼ်ႈၽြႃးၽိူၵ်ႇ ၼႂ်းဝဵင်းသီႇသႅင်ႇ ၸိုင်ႈတႆးပွတ်းၸၢၼ်းၼႆႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း။
တႄႇႁူဝ်လိူၼ်ၵျႃၼ်ႊၼႆႉမႃး ၸုမ်းပျီႇတူႉၸိတ်ႉပဢူဝ်း PNO ႁႂ်ႈၵူၼ်းဝၢၼ်ႈတပူးထူဝ်း (တပူးထိုး)၊ ၵွင်ထူဝ်ႇ (ကောင်ထို) ၊ လွႆငွၼ်း (လွယ်ငွန်း) ၊ ၼွင်ဝူဝ် (နောင်ဘို) ၊ ပၢင်ႇၸၢၵ်ႈ (ပင်စက်) ဢၼ်မီးၼႂ်းဢိူင်ႇ ၼွင်ၵႅဝ်းလႄႈ ဝၢၼ်ႈၼွင်ထဝ် ၸိူဝ်းၼႆႉ ႁႂ်ႈၶၢႆႉပၢႆႈဝႆႉ။
ယၢမ်းလဵဝ် ပဵၼ်ၶၢဝ်းၽုၵ်ႇသွမ်ႈႁႃၵိၼ်လဵင်ႉတွင်ႉလႄႈ ၵူၼ်းဝၢၼ်ႈဢွၼ်ၵၼ်ၶၢႆႉပၢႆႈ ယူႇၸွမ်းသူၼ်ဝႆႉ ထိုင်မႃးႁၢင်လိူၼ်ၵျုၼ်ႊၼႆႉသမ်ႉ လႆႈဢွၼ်ၵၼ်ပၢႆႈဢွၵ်ႇဝၢၼ်ႈသူၼ်မႃးတင်းၼမ် ၼႆယဝ်ႉ။
ၵူၼ်းပၢႆႈၽေးသိုၵ်း ဝၢၼ်ႈသလွင်းထွင်ႇ လၢတ်ႈၽူႈတွႆႇႁွၵ်ႈဝႃႈ -“ဢမ်ႇပၢႆႈၵေႃႈ ဢမ်ႇႁတ်းယူႇၶႃႈ လႆႈငိၼ်း သဵင်ၵွင်ႈသဵင်မၢၵ်ႇ ၵူဝ်ၶႃႈဢေႃႈ၊ မိူဝ်ႈဝႃးၼႆႉ မၢၵ်ႇလူင်တူၵ်းသႂ်ႇၼႂ်းဝၢၼ်ႈၶႃႈဢေႃႈ”- ဝႃႈၼႆ။
ဢွင်ႈတီႈၵူၼ်းပၢႆႈၽေးသိုၵ်း တီႈဝၢၼ်ႈၽြႃးၽိူၵ်ႇၼၼ်ႉ ယွၼ်ႉၵူၼ်းပၢႆႈၽေးသိုၵ်း ၶၢႆႉမႃးတင်းၼမ်လႄႈ မိူၼ်ၼင်ႇ – သုမ်ႉ၊ သုတ်း (ၽႃႈၵၢင်ယုင်း) လႄႈ ၽႃႈယၢင် (မူဝ်းၵႃႇ) ၸိူဝ်းၼႆႉ ဢမ်ႇၵုမ်ႇထူၼ်ႈ ၵွပ်ႈၼႆ လူဝ်ႇတၢင်းၸွႆႈထႅမ်ဝႆႉတင်းၼမ် ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ်ၵူၼ်းပၢႆႈၽေးၶဝ် ပၢႆႈမႃးယူႇဝႆႉတီႈၼႂ်း ဝဵင်းသီႇသႅင်ႇၼႆႉတင်းၼမ်၊ မႃးယူႇၸွမ်းၵျွင်းမုၼ်ၸဝ်ႈ ၊ ၸလွပ်ႈ ၊ ၵျွင်းမူၺ်တေႃႇ ၸိူဝ်းၼႆႉ မၢင်ၸိူဝ်း ၵေႃႈ ယူႇၸွမ်းႁိူၼ်းယေးပီႈၼွင်ႉ၊ ၶၢတ်ႈႁိူၼ်းယူႇ ၸိူဝ်းၼႆႉ။ ဢၼ်မီးတီႈၵျွင်းမုၼ်ၸဝ်ႈ ၽြႃးၽိူၵ်ႇၼႆႉတႄႉ ႁူဝ်ၵူၼ်းတေမီးၸမ် 2 ႁဵင် ယၢမ်းလဵဝ် လူဝ်ႇတၢင်းၸွႆႈထႅမ် တၢင်းၵိၼ်တၢင်းယမ်ႉဝႆႉ”- ဝႃႈၼႆ။
ယၢမ်းလဵဝ် တၢင်းဝၢၼ်ႈၵွင်ထူဝ်ႇၼၼ်ႉသမ်ႉ သၢႆသဵၼ်ႈတၢင်းၵႂႃႇမႃးယၢပ်ႇၽိုတ်ႇ ယွၼ်ႉပဵၼ်ၶၢဝ်းၾူၼ် လႄႈ တႃႇတေၶီႇရူတ်ႉၵႃး ပၢႆႈဢွၵ်ႇမႃးၵေႃႈ ပဵၼ်ဢၼ်ယၢပ်ႇၽိုတ်ႇဝႆႉ ၵူၼ်းပိုၼ်ႉတီႈ ဢၼ်ဢမ်ႇၸၢင်ႈ ပၢႆႈဢွၵ်ႇမႃးၵေႃႈ တိုၵ်ႉမီးယူႇ ဝႃႈၼႆ။
“မၢင်ၸိူဝ်းသဵၼ်ႈတၢင်းဢမ်ႇလီလႄႈ ဢမ်ႇၸၢင်ႈပၢႆႈဢွၵ်ႇမႃးၵေႃႈမီး၊ ပဵၼ်ၶၢဝ်းၽုၵ်ႇသွမ်ႈလႄႈ မၢင်ၸိူဝ်း ၵေႃႈ ၵိုတ်းဝႆႉၼႂ်းသူၼ်ၼႂ်းႁႆႈ ပႆႇၸၢင်ႈပၢႆႈဢွၵ်ႇမႃးၵေႃႈမီး။ ၼၢင်းယိင်းလႄႈ လုၵ်ႈဢွၼ်တႄႉ ဢွၼ်ၵၼ် ပၢႆႈဢွၵ်ႇဝႆႉဢွၼ်တၢင်း။ တီႈဝၢၼ်ႈတႄႉ တေၵိုတ်းၵူၼ်းၸၢႆး တေပႂ်ႉဢဝ်မၢၵ်ႇၶဝ်ႈတဝ်ႈၼမ်ႉၼႂ်းသူၼ် ၵမ်ႈၽွင်ႈၼၼ်ႉၵူၺ်း”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ဝဵင်းသီႇသႅင်ႇၼႆႉ ယူႇတီႈ တပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်း တီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈပ ဢူဝ်း PNLA မိူဝ်ႈႁၢင်လိူၼ်မၢတ်ႊၶျ် ပီ 2024 ၼၼ်ႉသေ ထိုင်မႃးၸမ်ပီယဝ်ႉ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်း ပူၵ်းပွင်ပၼ်သင် တိုၵ်ႉထႅမ်ႁႅင်းသိုၵ်းသေ သိုပ်ႇပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉယူႇ ႁၢဝ်ႈႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ