ဝၼ်းတီႈ 26/6/2025 ၼႆႉ မႅၼ်ႈဝၼ်းသၢၼ်ၶတ်းယႃႈမဝ်းၵမ် ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA)  ၸတ်းပၢင်ပၼ်တၢင်းႁူႉ ၵဵဝ်ႇလူၺ်ႈယႃႈမဝ်းၵမ် တီႈငဝ်ႈၸိုင်ႈ လွႆတႆးလႅင်းသေ ၽဝ်ပႅတ်ႈယႃႈမႃႉ လၢၼ်ႉမဵတ်ႉပၢႆ လႆႈႁူႉၼင်ႇၼႆ။

 ယႃႈမႃႉ ယႃႈမဝ်းၵမ် ဢၼ်ၸုတ်ႇၽဝ်ပႅတ်ႈၼႆႉပဵၼ် ယႃႈလမ် 12 ၵီႊလူဝ်ႊၵရမ်ႊ ၊ ယႃႈၾိၼ်ႇၽိူၵ်ႇ 266.5 ၵရမ်ႊ ၊ ယႃႈမႃႉ 1.8 လၢၼ်ႉမဵတ်ႉပဵၼ်ယႃႈမဝ်းၵမ်ဢၼ်တီႉလႆႈမႃး  ဢၼ်ယိုတ်းလႆႈမႃးၸိူဝ်းၼၼ်ႉလႆႈႁူႉၼင်ႇၼႆ။

ပၢင်ၽဝ်ယႃႈမဝ်းၵမ် တီႈလွႆတႆးလႅင်း ၼႂ်းဝၼ်းသၢၼ်ၶတ်းၽဵဝ်ႈမူၺ်ႉယႃႈမဝ်းၵမ်ၼႆႉ  မီးၽူႈၶဝ်ႈႁူမ်ႈ 365 ၵေႃႉ ၼႂ်းၼၼ်ႉ ပႃးၵူၼ်းမိူင်းတီႈၸမ်တီႈၵႆႈ လုၵ်ႈႁဵၼ်း လႄႈ ၵေႃႉသိုၵ်းၵေႃႉႁၢၼ်ၸိူဝ်းၼႆႉ။

ဢိင်ၼိူဝ်ပၢင်သၢၼ်ၶတ်းယႃႈမဝ်းၵမ်ၼႆႉသေ RCSS/SSA ဢွၵ်ႇလိၵ်ႈပိုၼ်ၽၢဝ်ႇ ဝႆႉဝႃႈ – “ ယွၼ်ႉမီးလွင်ႈၶွင်ႈၶမ်ၵၢၼ်မိူင်းလၢႆပိူင်လႄႈ ၸင်ႇမီးပၼ်ႁႃယႃႈမဝ်းၵမ်ၸိူဝ်းၼႆႉမႃး။ တႃႇၵႄႈလိတ်ႈလႆႈပၼ်ႁႃယႃႈမဝ်းၵမ်ၼမ်လိူင်ႇၼႆႉ လူဝ်ႇႁဵတ်းႁႂ်ႈဝၢၼ်ႈမိူင်းၼိမ်သဝ်းၵွၼ်ႇ ” – ဝႃႈၼႆဝႆႉ။

လိၵ်ႈပိုၼ်ၽၢဝ်ႇ ပႃးဝႆႉထႅင်ႈဝႃႈ – “ ၼႂ်းၶၢဝ်းတၢင်းသိုၵ်းမၢၼ်ႈယိုတ်းမိူင်းၼႆႉၵူၺ်း ယႃႈလမ် လႄႈ ယႃႈၶေႊမီႊ မိူၼ်ၼင်ႇ ယႃႈမႃႉ ယႃႈဢၢႆႉသ် လႄႈ ယႃႈမဝ်းၵမ်သႅၼ်းမႂ်ႇၸိူဝ်းၼႆႉၵေႃႈ ၽႄႈလၢမ်းမႃးၼမ်။လွင်ႈၼႆႉ ပဵၼ်လွင်ႈၶဵင်ႇတႃႉဢၼ်ၼိုင်ႈ ၊ လူဝ်ႇလႆႈမီးပေႃႊလသီႊဢၼ်ၸႅင်ႈလႅင်း လႄႈ လူဝ်ႇမီးယူင်ႉၶၢပ်ႈပိူင်မၢႆမီႈၵႅၼ်ႇၶႅင် ဢၼ်ၵိုင်ႇငၢမ်ႇၸွမ်းသုၼ်ႇလႆႈသုၼ်ႇပဵၼ်ၵူၼ်း ” – ဝႃႈၼႆ။

ၵဵဝ်ႇလူၺ်ႈလွင်ႈၵႃႉၶၢႆ လွင်ၵိၼ်ယႃႈမဝ်းၵမ်ၼႆႉသေ ဢမ်ႇၸႂ်ႈဝႃႈ မီးၵၢၼ်ပၼ်တၢမ်ႇၵၼ်ၵူၺ်း လူဝ်ႇလႆႉဝၢင်းၽႅၼ်ၼႅၼ်ႈၼႃသေ မူၼ်ႉမႄးပူၵ်းပွင်ပၼ် – ၼႆ ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉၼင်ႇၼႆ။

လွင်ႈပၢင်ၸဝ်ယႃႈမဝ်းၵမ်တီႈလွႆတႆးလႅင်းၼႆႉ ယူႇတီႈၽူႈတွႆႇႁွၵ်ႈ လႆႈၵပ်းသိုပ်ႇၸူးၽူႈၶၢၼ်ပၢၵ်ႇRCSS တင်းသွင်ၸဝ်ႈယူႇၵေႃႈ ၵပ်းသိုပ်ႇတိတ်းတေႃႇဢမ်ႇလႆႈ။

ၼႂ်းဝၼ်းသၢၼ်ၶတ်းယႃႈမဝ်းၵမ်ၼႆႉ ၸွမ်သိုၵ်းလူင် ယွတ်ႈသိုၵ်း RCSS/SSA ၶိုၼ်ႈမွၵ်ႇလၢတ်ႈၶေႃႈၵႂၢမ်း – ၼႂ်းၼၼ်ႉ လၢတ်ႈပႃးဝႃႈ ၸဵမ်ဢဝ်ပေႃႈမႄႈ ၽူႈဢွၼ်ႁူဝ် ၶူးသွၼ်မေႃသွၼ်ၸိူဝ်းၼႆႉ ႁႂ်ႈပၼ်ၽႄတၢင်းႁူႉလွင်ႈယႃႈမဝ်းၵမ် ၊ ႁႂ်ႈလုၵ်ႈႁဵၼ်း ၵူၼ်းၼုမ်ႇ လုၵ်ႈဢွၼ်ႇ မေႃဝႄႈယႃႈမဝ်းၵမ် ။ သင်မီးတၢင်းၽိတ်းၵဵဝ်ႇလူၺ်ႈယႃႈမဝ်းၵမ် ၼႂ်းၼႃႈတီႈၵုမ်းၵမ်ၸိုင် တေၺႃးတၢမ်ႇႁၢဝ်ႈႁႅင်း ႁႂ်ႈပဵၼ်တူဝ်ယၢင်ႇၼႄၵူၼ်းၼမ် ။ ၵမ်းလိုမ်း လၢတ်ႈပႃးဝႃႈ ၵူၼ်းမိူင်း ဢႃယု 18 – 45 လူဝ်ႇလႆႈမေႃၵၢၼ်သိုၵ်း တႃႇၵႅတ်ႇၶႄဝၢၼ်ႈမိူင်း ” – ဝႃႈၼႆ။

ၼွၵ်ႈလိူဝ်တီႈလွႆတႆးလႅင်းယဝ်ႉ တပ်ႉၵွင် 996 တီႈဝၢၼ်ႈပၢင်ႁူၵ်း ဢိူင်ႇဝၢၼ်ႈလဝ်း ဝဵင်းၵုၼ်ႁဵင် ၊ တီႈလွႆသၢမ်သိပ်း လႄႈ ၼႃႈလိၼ်သိုၵ်းမၢႆ 1 တီႈလွႆၵေႃႇဝၼ်း ၵေႃႈ ၸတ်း ႁဵတ်းပၢင်ၽဝ်ယႃႈမဝ်းၵမ်မိူၼ်ၵၼ်။