မိူဝ်ႈၼႆႉ ဝၼ်းတီႈ 30/3/2021 ယၢမ်းၵၢင်ၶမ်ႈ 7:25 မူင်း (ၶၢဝ်းယၢမ်းမိူင်းထႆး) ၸၢႆးဢေးလဵၵ်ႉ ၽူႈႁွင်ႉၽဵင်းၵႂၢမ်းတႆး ၸိုဝ်ႈ သဵင်ယႂ်ႇ လႆႈလူႉသဵင်ႈ ၽွင်းဢႃယု 50 ပီ ။
ၸၢႆးဢေးလဵၵ်ႉလူႉသဵင်ႈ တီႈႁူင်းယႃ တီႈလွႆတႆးလႅင်း ငဝ်ႈငုၼ်းRCSS/SSA လူၺ်ႈတၢင်းပဵၼ်တပ်း ။
ဢူၺ်းၵေႃႉ ၸမ်ၸႂ် ၸၢႆးဢေးလဵၵ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၼ်းၸၢႆး လႆႈလူႉသဵင်ႈၵႂႃႇ တီႈ ႁူင်းယႃ ငဝ်ႈၸိုင်ႈလွႆတႆးလႅင်း။ မၼ်းၸၢႆး ပဵၼ်တၢင်းပဵၼ်တပ်း”- ဝႃႈၼႆ။
ယၢမ်းလဵဝ် ၶၢပ်ႈတူဝ်တၢႆ ၸၢႆးဢေးလဵၵ်ႉ လႆႈဢဝ်မႃးဝႆႉတီႈႁေႃသိၼ် ဝတ်ႉလႅင်းႁၢၼ်တႆး ငဝ်ႈၸိုင်ႈလွႆတႆးလႅင်း။
မၼ်းၸၢႆး ၵိူဝ်းယမ် သႃသၼႃဢိတ်ႉသလမ်းဝႆႉလႄႈ တေၸတ်းပၢင်ၸႃႇပၼၸွမ်းၼင်ႇ ၾိင်ႈႁိတ်ႈႁွႆးသႃသၼႃၵိူဝ်းယမ်မၼ်းၸၢႆးၵႂႃႇ ဝႃႈၼႆ။
ၸၢႆးဢေးလဵၵ်ႉၼႆႉ ၶဝ်ႈႁၢပ်ႇၵၢၼ်သိုၵ်း ၼႂ်းပၢၼ် MTA မိူဝ်ႈပီ 1988 – 1996 ။ မၼ်းၸၢႆးပဵၼ်ၽူႈတႅင်ႇတႅမ်ႈႁွင်ႉၽဵင်းၵႂၢမ်းၵၢၼ်ၸိူဝ်ႉၸၢတ်ႈ ၸိုဝ်ႈသဵင်ယႂ်ႇ ၵေႃႉၼိုင်ႈ။
