သိုၵ်းမၢၼ်ႈလႄႈ သိုၵ်းတဢၢင်း TNLA ထၼူႉ DPLA  ပိုတ်းယိုဝ်းတိုၵ်းတေႃးၵၼ်ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ၽူႈမီးပုၼ်ႈၽွၼ်းၼႂ်းတပ်ႉသိုၵ်းထၼူႉ DPLA ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – ပၢင်တိုၵ်းၼႆႉတႄႇပဵၼ်ႁၢဝ်ႈႁႅင်းမႃးၼႂ်းဝၼ်းတီႈ 24/06/2025 ။ ပဵၼ်တီႈဝၢၼ်ႈသူၺ်ႇတုၼ်း။ ပၢင်တိုၵ်းၸၢင်ႈတေႁႅင်းလႄႈတေၵႂၢင်ႈထႅင်ႈ။ ပဵၼ်ၼိူဝ်သဵၼ်ႈတၢင်း ၼွင်ၶဵဝ် လွၵ်ႉၸွၵ်ႇ ပႃႉထူး။“- ဝႃႈၼႆ။

  သိုၵ်းမၢၼ်ႈၵေႃႈဢဝ်ၶိူင်ႈမိၼ်မႃးပွႆႇမၢၵ်ႇလူင်းသႂ်ႇဝၢၼ်ႈသူၺ်ႇတုၼ်းဢမ်ႇယွမ်း 80 လုၵ်ႈယဝ်ႉၼႆ DPLA ပိုၼ်ၽၢဝ်ႇမိူဝ်ႈဝၼ်းတီႈ 25/06/2025 ၼင်ႇၼႆ။

 “မိူဝ်ႈဝႃးၼႆႉ ၶဝ်ၸႂ်ႉၶိူင်ႈမိၼ်မႃးပွႆႇမၢၵ်ႇ။ ပေႃးၶဝ်သုမ်းသိုၵ်းၼႆၶဝ်ၸႂ်ႉၶိူင်ႈမိၼ်တိုၵ်းတိၵ်းတိၵ်းယဝ်ႉ။မိူဝ်ႈဝႃးၼႆႉၶဝ်ၸႂ်ႉ Jet Fighter 3 လမ်း၊   Y- 12  3 လမ်းမႃးပွႆႇတင်ႈတႄႇၵၢင်ၼႂ်ၸဝ်ႉတေႃႇထိုင်ၵၢင်ၶမ်ႈ။ ပွႆႇမၢၵ်ႇသႅၼ်း 500 ပွင်ႇ ၊ 300 ပွင်ႇ ၸိူဝ်းၼႆႉ ဢမ်ႇယွမ်း 80 လုၵ်ႈ ”- ၽူႈမီးပုၼ်ႈၽွၼ်းၼႂ်း DPLA လၢတ်ႈၼင်ႇၼႆ။

 ၾၢႆႇၼိုင်ႈ ၽွင်းဢမ်ႇမီးပၢင်တိုၵ်းၵေႃႈ သိုၵ်းမၢၼ်ႈယိုဝ်းၵွင်ႈလူင်၊ ဢဝ်တရူၼ်ႊပွႆႇမၢၵ်ႇ ၊ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇၸွမ်းႁိမ်းဝဵင်းၼွင်ၶဵဝ် ၶႂ်ႈဝႃႈၵူႈဝၼ်း – ၵူၼ်းပိုၼ်ႉတီႈလၢတ်ႈၼင်ႇၼႆ။

 သိုၵ်းမၢၼ်ႈၼႆႉ ဝၼ်းတီႈ 22/06/2025 ၼၼ်ႉ ပွႆႇမၢၵ်ႇသႂ်ႇတီႈဝၢၼ်ႈၵုင်းမၢၵ်ႇမူင်ႈ၊ ဝၼ်းတီႈ 21 သမ်ႉပွႆႇမၢၵ်ႇသႂ်ႇတီႈဝၢၼ်ႈတၢၼ်ႇၽူဝ်ႇ ဢမ်ႇယွမ်း 50 လုၵ်ႈၼႆ TNLA ဢွၵ်ႇလိၵ်ႈပိုၼ်ၽၢဝ်ႇဝႆႉၼင်ႇၼႆ။   

ၸၢႆးသႅင်ဢၢႆႈ တႅမ်ႈဝႆႉၾၢႆႇမၢၼ်ႈ