တႄႇႁူဝ်ပီ 2025 မႃးၼႆႉ ၼႂ်းၸႄႈဝဵင်းလၢႆးၶႃႈ၊ ၸႄႈဝဵင်းမိူင်းၵိုင်လႄႈ ၸႄႈဝဵင်းၵေးသီး ၵူၼ်းၸၢဝ်းၶႄႇ မႃးတင်ႈပဵၼ်ၸုမ်းၵျႃးၽႅၼ်ႉသေ ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ၊ ပိုတ်ႇႁူင်းလဵၼ်ႈၵဵမ်း၊ ပၢင်တေႃႇလွင်းၼိူဝ်ဢွၼ်ႊလၢႆႊၸိူဝ်းၼႆႉ ၼမ်ႁႅင်းမႃးလိူဝ်ၵဝ်ႇသေ မီးၸုမ်းယိပ်းၵွင်ႈၵၢင်ႇၶဝ် ပႂ်ႉဢဝ်ႁူမ်ႇလူမ်ႈပၼ်ပႃး ဝႃႈၼႆ။  

ၼႂ်းပိုၼ်ႉတီႈၸွမ်းသၢႆၼမ်ႉတဵင်း ၸိူဝ်းထႅဝ်ၸႄႈဝဵင်းလၢႆးၶႃႈ၊ ၸႄႈဝဵင်းမိူင်းၵိုင်လႄႈ ၸႄႈဝဵင်းၵေးသီးၼႆႉ မီးၸုမ်းသိုၵ်းတႆးလႄႈ ၸုမ်းပျီႇတူႉၸိတ်ႉ ဢၼ်ယူႇတႂ်ႈဢႃႇၼႃႇသိုၵ်းမၢၼ်ႈၶဝ် တူင်ႉၼိုင်ၵႂႃႇမႃးဝႆႉၼႆ ၵူၼ်းမိူင်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ။

“လုၵ်ႉတီႈၵေးသီး တေႃႇပေႃးထိုင် လၢႆးၶႃႈၼႆႉ ၶႄႇၸိူဝ်းမႃးႁဵတ်းၵၢၼ်ၵျႃးၽႅၼ်ႉၼႆႉ မီးယူႇမွၵ်ႈ 2,000 ၵေႃႉၸိူဝ်းၼႆႉ။ ၸုမ်းၶဝ်ၼႆႉ ယႂ်ႇတႄႉတႄႉလူင်။ သိုၵ်းတႆးႁႄ သိုၵ်းပျီႇတူႉ ၸိတ်ႉၼႃႇ ဢၼ်ဢဝ်ႁူမ်ႇ လူမ်ႈပၼ် ၸုမ်းၵျႃးၽႅၼ်ႉၸိူဝ်းၼႆႉ။ ပေႃးဝႃႈ သိုၵ်းမၢၼ်ႈတေၺွပ်းၼႆ ၶဝ်ၸိူဝ်းၼၼ်ႉ ပေႃးႁႂ်ႈၶၢႆႉၵႂႃႇ ပႅပ်ႉယူႇတီႈၼႂ်းၼႃႈတီႈၶဝ်ယဝ်ႉ။ ၶဝ်ၵုမ်ႇဢဝ် ၶၢႆႉၵႂႃႇတီႈၼိုင်ႈယဝ်ႉတီႈၼိုင်ႈႁႄ ပၼ်ႇၵႂႃႇပၼ်ႇမႃးၸိူင်ႉၼႆၵူၺ်း”။

ၼႂ်းၸႄႈဝဵင်းၵေးသီးၼႆႉ မီးပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တူင်ႉၼိုင်ၵႂႃႇမႃး၊ ၼႂ်းၸႄႈဝဵင်းလၢႆးၶႃႈတႄႉ မီးၸုမ်းပျီႇတူႉၸိတ်ႉဝၢၼ်ႈပၢင်ႇ တူင်ႉၼိုင်ၵႂႃႇမႃးဝႆႉယူႇ။

မိူဝ်ႈလိူၼ်မၢတ်ႊၶျ် ၼႂ်းဝူင်ႈထီႉသၢမ်ၼၼ်ႉ သိုၵ်းမၢၼ်ႈ တီႉၺွပ်းဢဝ် ၵူၼ်းႁဵတ်းၵၢၼ်ၵျႃးၽႅၼ်ႉ ၼႂ်း ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၵႂႃႇ 700 ၵေႃႉပၢႆ။ ဝၢႆးလင်ၼၼ်ႉ ၸုမ်းႁဵတ်းၵၢၼ်ၵျႃးၽႅၼ်ႉ ၶိုၼ်းၶၢႆႉၵႂႃႇႁဵတ်း ၼႂ်းပိုၼ်ႉတီႈ ၼႂ်းၸုမ်းၼပျီႇတူႉၸိတ်ႉမၢၵ်ႇၵႅင်းၶဝ် ၵုမ်းၵမ် တၢင်းထုင်ႉပၢင်ႇလႅင်းသႂ် ၵႄႈၵၢင်ဝဵင်းၼမ်ႉၸၢင်လႄႈ ဝဵင်းမိူင်းၼၢႆး ၸိုင်ႈတႆးပွတ်းၸၢၼ်း။

ၵူၼ်းမိူင်းပိုၼ်ႉတီႈ ၵေႃႉၼိုင်ႈ လၢတ်ႈၼႄဝႃႈ -“တၢင်းမိူင်းၼၢႆးၵေႃႈ မီးၸုမ်းၵျႃးၽႅၼ်ႉယူႇၸုမ်းၼိုင်ႈ။ ၼၼ်ႉတႄႉ ၵူၼ်းၶဝ်တေမီးယူႇမွၵ်ႈ 700 ၵေႃႉၼႆႉ။ ဝၢႆးလင် သိုၵ်းမၢၼ်ႈၶဝ်ၺွပ်းတၢင်း ၼမ်ႉၸၢင်ၼႆႉ ယဝ်ႉ ၶဝ်ၶိုၼ်းၶၢႆႉၵႂႃႇ ႁဵတ်းၼႂ်းထုင်ႉပၢင်လႅင်းသႂ်ၼႆႉၼမ်ၼႃႇ”- ဝႃႈၼႆ။

မိူဝ်ႈဝၼ်းတီႈ 10/06/2025 ၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ပိုၼ် ၽၢဝ်ႇဢွၵ်ႇလိၵ်ႈပဵၼ်တၢင်းၵၢၼ်ဝႆႉဝႃႈ ၽူႈလႂ်ၽႂ်သေဢမ်ႇဝႃႈ တေဢမ်ႇလႆႈၵဵဝ်ႇၶွင်ႈၸွမ်း ၵၢၼ်ယႃႈမဝ်း ၵမ်၊ ၵၢၼ်ႁဵတ်းၵျႃးၽႅၼ်ႉလႄႈ ၵႃႉၶၢႆၶိူင်ႈၵွင်ႈၵၢင်ႇ ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ