ဝၼ်းတီႈ 22/06/2025 ၶၢဝ်းယၢမ်းမိူင်းဢီႊရၢၼ်ႊ ၵၢင်ၼႂ် 2 မူင်းပၢႆ 10 မိၼိတ်ႉၼၼ်ႉ မိူင်းဢမေႊရိၵၼ်ႊ ၸႂ်ႉၶိူင်ႈမိၼ် B-2 သေ ပွႆႇမၢၵ်ႇသႂ်ႇ ၼႂ်းဢွင်ႈတီႈၶူၼ်ႉၶႂႃႉ ၵဵဝ်ႇၵပ်းပၢႆးသၢႆႊ ၼိဝ်ႊၶလီႊယိူဝ်ႊ ၼႂ်းမိူင်းဢီႊရၢၼ်ႊ။ ၶိူင်ႈမိၼ်ဢမေႊရိၵၼ်ႊၼၼ်ႉ ပွႆႇမၢၵ်ႇသႂ်ႇ 2 လုၵ်ႈ ဢၼ်မီးၼမ်ႉၼၵ်းပွၼ်ႊ 3 မိုၼ်ႇ။ မၢၵ်ႇလူင်ႈၼၼ်ႉ ပဵၼ်သႅၼ်း GBU – 57 ပဵၼ်မၢၵ်ႇ ဢၼ်မီးႁႅင်းယႃႉၵွႆလႆႈ ႁၢဝ်ႈႁႅင်းသုတ်း။
ဝၢႆးၼၼ်ႉထႅင်ႈ 25 မိၼိတ်ႉ ၶိူင်ႈမိၼ် ဢမေႊရိၵၼ်ႊ သႅၼ်း (B – 2) 7 လမ်း ပွႆႇမၢၵ်ႇသႂ်ႇထႅင်ႈ တီႈ တပ်ႉပၢင်သဝ်း ၽေႃႉတူဝ်ႊ၊ ၼထၼ်ႊသ်လႄႈ တပ်ႉပၢင်သဝ်း ဢိတ်ႊၽႃႊ ႁၢၼ်ႊ ၼႂ်းမိူင်းဢီႊရၢၼ်ႊသေ ပဵၼ်လွင်ႈတႅၵ်ႇၽူင်ႉၵႂႃႇႁၢဝ်ႈႁႅင်း။
ၶိူင်ႈမိၼ်တိုၵ်း မိူင်းဢမေႊရိၵၼ်ႊၼၼ်ႉ ဝႆႉပဝ်ႉမၢႆသိုၵ်း 3 တီႈသေ ယိုဝ်းတိုၵ်းႁၢဝ်ႈႁႅင်းသေတႃႉ တေႃႇထိုင်ၶိူင်ႈမိၼ်ဢမေႊရိၵၼ်ႊ ထွႆဢွၵ်ႇမႃးၶိုၼ်းၼႂ်းၼႃႈတီႈၼၼ်ႉ ၾၢႆႇမိူင်း ဢီႊရၢၼ်ႊၶဝ် ဢမ်ႇမီးလွင်ႈတုမ်ႉတွပ်ႇ ယိုဝ်းတိုၵ်းသင်ၶိုၼ်း။
ၽႅၼ်ၵၢၼ်ယိုဝ်းတိုၵ်း တပ်ႉပၢင်သဝ်း ၼႂ်းမိူင်းဢီႊရၢၼ်ႊၼၼ်ႉ ၾၢႆႇမိူင်းဢမေႊရိၼ်ၵၼ်ႊ ၸႂ်ႉ ၶိူင်ႈမိၼ် 125 လမ်း၊ ပဵၼ်ၶိူင်ႈမိၼ်တိုၵ်း ၶိူင်ႈမိၼ်ထႅမ်ၼမ်ႉမၼ်းလႄႈ ၶိူင်ႈမိၼ်လဵပ်ႈယၢမ်း၊ လိူဝ်ၼၼ်ႉ ၸႂ်ႉၶိူင်ႈယိုဝ်းသိုၵ်း ဢမ်ႇယွမ်း 75 ဢၼ် ယိုဝ်းတိုၵ်းသႂ်ႇၼႆ ၾၢႆႇမိူင်းဢမေႊရိၵၼ်ႊ ပိုၼ်ၽၢဝ်ႇပဵၼ်တၢင်းၵၢၼ်ဝႆႉၼင်ႇၼႆ။
လွင်ႈလူႉၵွႆတီႈတပ်ႉပၢင်သဝ်းဢီႊရၢၼ်ႊ မီးၸိူင်ႉႁိုဝ်ဢၼ်ဝႃႈၼၼ်ႉတႄႉ ဢမ်ႇႁၼ်ပိုၼ်ၽၢဝ်ႇပႃး။
ၵဵဝ်ႇၵပ်းလွင်ႈ မိူင်းဢမေႊရိၵၼ်ႊ ၶဝ်ႈပႃးၼႂ်းပၢင်တိုၵ်း ဢိတ်ႉသ်ရေႊတင်း ဢီႊရၢၼ်ႊၼႆႉသေ ႁူဝ်ၼႃႈၸိုင်ႈမိူင်းၼိူဝ်လုမ်ႈၾႃႉ လၢႆလၢႆမိူင်း လၢတ်ႈဝႃႈ ပဵၼ်လွင်ႈလီမႆႈၸႂ်ဝႆႉ။
ၽွင်းလူင်ၾၢႆႇၼွၵ်ႈမိူင်း ၸၢတ်ႈၸိုင်ႈယူႊရူပ်ႊတႄႉ တိုၵ်းသူၼ်းလၢတ်ႈဝႆႉဝႃႈ တင်းသွင်ၾၢႆႇ ႁႂ်ႈႁူပ်ႉဢုပ်ႇဢူဝ်းၵၼ် ၶၢၼ်ၶၢၼ်ဝႆးဝႆး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ