ဝၢႆးလင် သိုၵ်းၵဝ်ႈၵၢင်ႉ လႆႈထွႆဢွၵ်ႇဝဵင်းလႃႈသဵဝ်ႈ ပၼ်သိုၵ်းမၢၼ်ႈၵုမ်းၵမ်ၶိုၼ်းယဝ်ႉ ႁၢႆးသိုၵ်းမၢၼ်ႈ ၸိူဝ်းၺႃးတီႉၺွပ်းၵုမ်းၶင်ဝႆႉတီႈၼႂ်းၶွၵ်ႈလူင် ဝဵင်းလႃႈသဵဝ်ႈၼၼ်ႉ သိုၵ်းၵဝ်ႈၵၢင်ႉ ၶၢႆႉဢဝ်ၵႂႃႇဝႆႉ ၼႂ်းၸႄႈဝဵင်းၵုၼ်လူင် ၸိုင်ႈတႆးပွတ်းႁွင်ႇ။

မိူဝ်ႈလိူၼ်ဢေႊပရိူဝ်ႊ ပူၼ်ႉမႃးၼႆႉ သိုၵ်းၵဝ်ႈၵၢင်ႉ တေႃႉဢဝ်ၵူၼ်းၸၢႆးဢႃယု 50 ပၢႆ ၸိူဝ်းပဵၼ် သိုၵ်းမၢၼ်ႈ ၺႃးတီႉၺွပ်းတူၵ်းၶွၵ်ႈၸိူဝ်းၼၼ်ႉ သူင်ႇၵႂႃႇ။ ၼႂ်းၼၼ်ႉ ပႃးၵူၼ်းမိူင်းလႄႈ မေႃယႃၸိူဝ်းႁဵတ်း CDM ဝႆႉတင်းၼမ်ၼႆ ၵူၼ်းပိုၼ်ႉတီႈ ၼႂ်းၸႄႈဝဵင်းၵုၼ်လူင် လၢတ်ႈၼႄၼင်ႇၼႆ။

“ၵူၼ်းၸိူဝ်းၺႃးသူင်ႇၵႂႃႇယူႇၶိုၼ်း ၼႂ်းၶွၵ်ႈၶင် တီႈၼႂ်းတပ်ႉၵုၼ်လူင်ၼၼ်ႉ ပႃးၵူႈၸၢဝ်းၶိူဝ်းယဝ်ႉ၊ ၶၢင် ၵေႃႈပႃး၊ တႆးၵေႃႈပႃး၊ မၢၼ်ႈၵေႃႈပႃး။ ၸိူဝ်းပဵၼ်ၵူၼ်းဢႃယုယႂ်ႇၼႆႉ ၶဝ်ဢဝ်ဝႆႉတီႈၵုၼ်လူင် ၸိူဝ်းပဵၼ် သႅၼ်းၵူၼ်းႁၢတ်ႈၵူၼ်းၼုမ်ႇသမ်ႉ တေႃႉၵႂႃႇဝႆႉတၢင်းဝဵင်းလၢဝ်ႇၵၢႆးလႄႈ ဝဵင်းၼမ်ႉၽႃႈ (ၶျိၼ်ႊသူၺ်ႊႁေႃႊ)”။

ႁၢႆးသိုၵ်း ၸိူဝ်းၺႃးသိုၵ်းၵဝ်ႈၵၢင်ႉတေႃႉၵႂႃႇဝႆႉ ၼႂ်းတပ်ႉသိုၵ်းၵဝ်ႈၵၢင်ႉ တီႈဝဵင်းၵုၼ်လူင်လႄႈ ဝဵင်းလၢဝ်ႇၵၢႆးၼႆႉ ၵူၼ်းၸိူဝ်းတႅပ်းတတ်းသဵၼ်ႈၸႂ်ၶဝ်ႈႁၢပ်ႇထၢမ်းၵၢၼ်သိုၵ်းၼၼ်ႉ လႆႈလွတ်ႈဢွၵ်ႇၶွၵ်ႈသေ ၸိူဝ်းဢမ်ႇယွမ်းၶဝ်ႈႁဵတ်းသိုၵ်းၵဝ်ႈၵၢင်ႉၼၼ်ႉတႄႉ ယင်းတိုၵ်ႉလႆႈယူႇၼႂ်းၶွၵ်ႈၶင်ယူႇ ဝႃႈၼႆ။

လႆႈႁူႉဝႃႈ ႁၢႆးသိုၵ်းၸိူဝ်းၵႂႃႇၶဝ်ႈႁၢပ်ႇထၢမ်းၵၢၼ် ၼႂ်းသိုၵ်းၵဝ်ႈၵၢင်ႉၼႆႉ မိူဝ်ႈလိူၼ်မေႊပူၼ်ႉမႃး မီးၵူၼ်း လၵ်ႉပၢႆႈဢွၵ်ႇတပ်ႉ 10 ပၢႆ။ ၾၢႆႇသိုၵ်းၵဝ်ႈၵၢင်ႉ ၶိုၼ်းလမ်းတီႉၺွပ်း ဢဝ်တူဝ်တူင်ႉမၼ်းလႆႈ တႃႇ 3 ၵေႃႉၵူၺ်း ၼႆယဝ်ႉ။

တႅမ်ႈ – ၽူၺ်းၼုမ်ႇ