ၵူၼ်းၵေႃႉဢၼ်ၺႃးတူတ်ႈတၢမ်ႇယူႇၼႂ်းၶွၵ်ႈ တင်းၸူဝ်ႈပၢၼ်ဝႆႉ ၼႂ်းၼႃႈတီႈသိုၵ်းဝႃႉ UWSA ၵုမ်းၵမ်ၼၼ်ႉ လၵ်ႉယႃႉၶွၵ်ႈသေ ဢၢၼ်းလႅၼ်ႈပၢႆႈလႄႈ ၶွမ်ႊမတီႊ ၾၢႆႇလုမ်းတြႃး (ၾၢႆႇတတ်းသိၼ်ၾိင်ႈမိူင်း) သိုၵ်းဝႃႉ UWSA ၸင်ႇဢွၵ်ႇၶေႃႈၸီႉသင်ႇ ပၼ်တၢမ်ႇတၢႆၵႂႃႇၵမ်းသိုဝ်ႈ ဝႃႈၼႆ။

ၵူၼ်းၵေႃႉၺႃး ပၼ်တၢမ်ႇတၢႆၼႆႉ ပဵၼ်ၵူၼ်းမိူင်းၶႄႇ ၸိုဝ်ႈႁွင်ႉ ဝႂၢင်ႊ (Wang) ၺႃးသိုၵ်းဝႃႉ ဢဝ်တၢင်းၽိတ်း လူၺ်ႈလိူင်ႈၵၼ်ႉၸၼ်ၼၢင်းယိင်း၊ ယႃႈမဝ်းၵမ်လႄႈ တီႉၺွပ်းၵူၼ်းသေ ယွၼ်းၵႃႈထုတ်ႇၶိုၼ်း ၸဵမ်ၸိူဝ်းၼႆႉၵူၺ်းဢမ်ႇၵႃး ထိုင်ၼႂ်းၶွၵ်ႈၶင်ယဝ်ႉၵေႃႈ ဝႂၢင်ႊၼႆႉ ပဵၼ်ၵူၼ်း ၵေႃႉသူၼ်းႁူၺ်း ႁႂ်ႈၵူၼ်း ၸိူဝ်းယူႇၼႂ်းၶွၵ်ႈၶင် လၵ်ႉဢွၵ်ႇပၢႆႈ ၼႆယဝ်ႉ။

သိုၵ်းဝႃႉ ၺွပ်းဢဝ်ၵႂႃႇတူၵ်းၶွၵ်ႈ မိူဝ်ႈဝၼ်းတီႈ 20/06/2023 ၼၼ်ႉသေ ပၼ်တၢမ်ႇႁႂ်ႈယူႇဝႆႉၼႂ်းၶွၵ်ႈ တင်းၸူဝ်ႈပၢၼ်။ ထိုင်မႃး ဝၼ်းတီႈ 04/05/2025 ၼၼ်ႉ မၼ်းၸၢႆး လၵ်ႉယႃႉၶွၵ်ႈသေ လႅၼ်ႈပၢႆႈထႅင်ႈလႄႈ ၾၢႆႇပလိၵ်ႈၸုမ်းသိုၵ်းဝႃႉၶဝ် လမ်းတီႉၺွပ်းလႆႈၶိုၼ်း။

လႆႈႁူႉဝႃႈ ၶွမ်ႊမတီႇ ၾၢႆႇတတ်းသိၼ်ၾိင်ႈမိူင်းသိုၵ်းဝႃႉၼႆႉ မိူဝ်ႈလိူၼ်မေႊပူၼ်ႉမႃးၼၼ်ႉၵေႃႈ ပၼ်တူတ်ႈတၢမ်တၢႆ ၵူၼ်းၸၢႆးသွင်ၵေႃႉ လူၺ်ႈလိူင်ႈၵၼ်ႉၸၼ်လူလၢႆၼၢင်းယိင်းဢွၼ်ႇ ဢႃယုပႆႇတဵမ် 18 ပီ။ ဢၼ်သိုၵ်းဝႃႉ ပၼ်တူတ်ႈတၢမ်ႇတၢႆၵူၼ်းမီးတၢင်းၽိတ်း ၾၢႆႇၼႃႈၵူၼ်းမိူင်းတင်းၼမ်ၸိူင်ႉၼႆၼႆႉ မီးၵႂႃႇဢမ်ႇယွမ်း 3 ပွၵ်ႈယဝ်ႉ ဝႃႈၼႆ။

တႅမ်ႈ – ၽူၺ်းၼုမ်ႇ