မိူဝ်ႈဝၼ်းတီႈ 16/06/2025 ယၢမ်းၵၢင်ၼႂ်မွၵ်ႈ 9 မူင်း ၽွင်းၵူၼ်းပၢႆႈၽေးသိုၵ်း ဢၼ်ယူႇတီႈဝၢၼ်ႈဢုမ်တီး တိုၵ်ႉႁၢင်ႈႁႅၼ်းၶူဝ်းလဵင်း တႃႇၶၢႆႉဢွင်ႈတီႈပၢႆႈပၢင်တိုၵ်းယူႇၼၼ်ႉ ၺႃးၸုမ်းယိပ်းၵွင်ႈၵၢင်ႇ ၸိူဝ်းယူႇႁိမ်း ၵျွင်းၶဵဝ်ၶမ်း ယိုဝ်းသႂ်ႇလႄႈ လႆႈမၢတ်ႇၸဵပ်းၵႂႃႇ ၵေႃႉၼိုင်ႈ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ၵူၼ်းၵေႃႉၺႃးယိုဝ်းၼႆႉ ပဵၼ်ၸၢဝ်းတႆး ၵူၼ်းၸၢႆးဢႃယု 38 ပီ မၢၵ်ႇၵွင်ႈတိူဝ်ႉၺႃးႁိမ်းပဵမ်ႉလႄႈ ၶႅၼ်မၼ်းၸၢႆးသေ လႆႈသူင်ႇၵႂႃႇယူတ်းယႃတူဝ်ဝႆႉတီႈ ႁူင်းယႃလူင်ဝဵင်းပၢင်ႇဢူႈလူင်ၼႆ ၵူၼ်းမိူင်းပိုၼ်ႉတီႈ ၼႂ်းၸႄႈ ဝဵင်းၼွင်ၶဵဝ် ၵေႃႉၸွႆႈႁွင်ႉၵႂႃႇႁူင်းယႃၼၼ်ႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မၢၵ်ႇၵွင်ႈၼႆႉ လုၵ်ႉတၢင်းၼႂ်းပႃႇသူၼ်ၶဝ်ႈၵၢပ်ႇ ႁိမ်းၸမ်ၵျွင်းၼၼ်ႉဢွၵ်ႇမႃး။ ၸွမ်းၸိူဝ်းၼၼ်ႉ ပဵၼ် သိုၵ်းလွႆၶဝ်ၵူၺ်းယူႇ။ ပဵၼ်ၸုမ်းလႂ်ၵေႃႈယဝ်ႉၼေႃႈ ပေႃးပဵၼ်ၵူၼ်းမိူင်းၼႆ ၶႂ်ႈႁႂ်ႈၸုမ်းယိပ်းၵွင်ႈ ၵၢင်ႇ ၸိူဝ်းၼႆႉဝႄႈပၼ်။ ပေႃးတိူဝ်ႉၺႃးၵူၼ်းမိူင်းၸိူင်ႉၼႆ ၸုမ်းလႂ်ၵေႃႈဢမ်ႇၶႂ်ႈႁပ်ႉပုၼ်ႈၽွၼ်း။ ယၢမ်းလဵဝ် ၵေႃႉၺႃးယိုဝ်းၼႆႉသမ်ႉ ပဵၼ်ဝႆႉငဝ်ႈႁိူၼ်းလႄႈ ယၢပ်ႇၽိုတ်ႇ တႃႇၵႃႈယူတ်းယႃတူဝ်လႄႈ ၵၢၼ်ႁႃၵိၼ် လဵင်ႉတွင်ႉယူႇ”။

တႄႇႁူဝ်လိူၼ်ၵျုၼ်ႊ ဝူင်ႈတီႈသွင်မႃး ၼႂ်းၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈတင်း သိုၵ်းတဢၢင်း ပဵၼ် ပၢင်တိုၵ်းၵၼ်ႁၢဝ်ႈႁႅင်းမႃးၶိုၼ်းလႄႈ ႁဵတ်းႁႂ်ႈၵူၼ်းမိူင်းၸိူဝ်းပၢႆႈသွၼ်ႈယူႇဝႆႉ ၸွမ်းသူၼ်ၸွမ်းႁႆႈ  ထဵင် ၼႃး ၸိူဝ်းၼႆႉ လႆႈၶၢႆႉပၢႆႈဢွၵ်ႇၵႂႃႇယူႇထႅင်ႈတၢင်ႇတီႈ ဝႃႈၼႆ။

ၼႂ်းၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ်မႃး ႁိုင်ၼၢၼ်းယဝ်ႉလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၸိူဝ်းပဵၼ်ၵူၼ်းပၢႆႈၽေး ၺႃးၸုမ်းယိပ်းၵွင်ႈၵၢင်ႇယိုဝ်းတၢႆမၢတ်ႇၸဵပ်းၵႂႃႇႁၢဝ်ႈႁႅင်းၼႆ – ၵူၼ်းၸၢႆး ဢႃယု 40 ပၢႆ ၵေႃႉတူင်ႉၼိုင်ၸွႆႈထႅမ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်း ၼွင်ၶဵဝ်ၵေႃႉၼိုင်ႈ တုၵ်းယွၼ်းၾၢၵ်ႇလၢတ်ႈထိုင်ဝႆႉ ၸုမ်းယိပ်းၵွင်ႈၵၢင်ႇတင်းသဵင်ႈၼင်ႇၼႆ။

“ၸုမ်းသိုၵ်းလႂ်သေဢမ်ႇဝႃႈ ပႃႇတီႇၵၢၼ်မိူင်းၵေႃႈယဝ်ႉ ၶႂ်ႈႁႂ်ႈတုမ်ႉတွပ်ႇၸွႆႈထႅမ်ပၼ် ႁဝ်းၶႃႈ ၵူၼ်းမိူင်း ၼွင်ၶဵဝ်ယူႇ။ ယၢမ်းလဵဝ်ၼႆႉ သဵင်ၵူၼ်းမိူင်းႁဝ်းၵူၺ်းဢမ်ႇလင်လႆႈယဝ်ႉ။ ၶႂ်ႈႁႂ်ႈၸုမ်းသိုၵ်းတႆး၊ ပႃႇတီႇၵၢၼ် မိူင်းတႆးႁဝ်း ၸွႆႈဢွၵ်ႇသဵင်ပၼ် တွၼ်ႈတႃႇၵူၼ်းဝၢၼ်ႈႁဝ်းၶႃႈ ၸိူဝ်းၺႃးၶၢမ်ႇတၢမ်ႇ သိုၵ်းပိူၼ်ႈပေႉၵိၼ်လူလၢႆ ၽဝ်ႁိူၼ်းယေးၵူၼ်းဝၢၼ်ႈ ၺႃးဢဝ်ၵွင်ႈယိုဝ်းၸိူဝ်းၼႆႉ”။

ၸွမ်းၼင်ႇပၵ်းပိူင် မၢႆမီႈသိုၵ်းလုမ်ႈၾႃႉမၵ်းမၼ်ႈဝႆႉ ၼႂ်းပၢင်ၵုမ်လူင် ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ၼၼ်ႉၶဵၼ်ႇတႅမ်ႈ မၵ်းမၼ်ႈဝႆႉဝႃႈ ၸုမ်းယိပ်းၵွင်ႈၵၢင်ႇၵူႈၸုမ်း တေဢမ်ႇလႆႈၶဝ်ႈၵႂႃႇယူႇၸွမ်း ဢွင်ႈတီႈ ၵူၼ်းမိူင်း၊ ၵူၼ်းပၢႆႈၽေးယူႇသဝ်းသေ ယိုဝ်းတိုၵ်းၵၼ်။ သင်ဢမ်ႇႁဵတ်းၸွမ်းမၢႆမီႈၸိုင် ပဵၼ်ၵၢၼ်ပူၼ်ႉပႅၼ်ပၵ်းပိူင်သိုၵ်း (War Crimes) ယဝ်ႉ ဝႃႈၼႆ။

တႅမ်ႈ – ၽူၺ်းၼုမ်ႇ