ပၢင်တိုၵ်း မိူင်းဢိတ်ႉသ်ရေႊ တင်း ဢီႊရၢၼ်ႊ ဢၼ်တႄႇမႃး မိူဝ်ႈဝၼ်းတီႈ 13/06/2025 ၼၼ်ႉ သွင်ၾၢႆႇ မီးလွင်ႈမၢတ်ႇၸဵပ်းလူႉတၢႆၼမ် ႁိူၼ်းယေးတိူၵ်ႈၵူၼ်ႇပင်းလူႉၵွႆ။

ၽွင်းပၢင်တိုၵ်း ႁိုင်မႃးၶၢဝ်းတၢင်း 5 ဝၼ်းၼႆႉ ႁူင်းၸၢၵ်ႈလူင်ဢၼ်ယႂ်ႇသုတ်းၼႂ်းမိူင်းဢီႊရၢၼ်ႊ ၺႃးမၢၵ်ႇ မိူင်းဢိတ်ႉသ်ရေႊသေ လူႉၵွႆၵႂႃႇႁၢဝ်ႈႁႅင်းၼႆ ၽူႈမီးၸၼ်ႉၾၢႆႇပႂ်ႉတူၺ်း ၼိဝ်ႊၶလီႊ ယိူဝ်ႊၸၢတ်ႈၸိုင်ႈ ပိုၼ်ၽၢဝ်ႇဢွၵ်ႇမႃး။ ဝၢႆးၼၼ်ႉဢမ်ႇႁိုင် မိူင်းဢီႊရၢၼ်ႊ ယွၼ်းၵိုတ်းတိုၵ်းၼႆ သိုဝ်ႇၶၢဝ်ႇရၢႆႊတိူဝ်ႊ ႁၢႆးငၢၼ်းဢွၵ်ႇမႃးၼင်ႇၼႆ။

ၸွမ်ၸိုင်ႈ ၻူဝ်ႊၼေႃႊ ထရမ်ႉ မိူင်းဢမေႊရိၵၼ်ႊၼႆႉ မီးဢေႃးၸႃႇ ႁူမ်ႇငမ်းလႆႈၼိူဝ် ၸွမ်ၽွင်း လူင် မိူင်းဢိတ်ႉသ်ရေႊဝႆႉ ဢိင်ၼိူဝ်လွင်ႈၼႆႉ ယူႇတီႈမိူင်း ဢူဝ်ႊမၼ်ႊ၊ ၵႃႊတႃႊလႄႈ သေႃႇတီႇ ဢႃႊရေႊပီႊယိူဝ်ႊၶဝ် ႁႂ်ႈပၼ်ႁႅင်းဢီး တႃႇၵိုတ်းတိုၵ်းၼႆသေ တုၵ်းယွၼ်းၵႂႃႇ ဝႃႈၼႆ။

ၼႂ်းဝၼ်းတီႈ 16 ပူၼ်ႉမႃးၼႆႉ မိူင်းဢိတ်ႉသ်ရေႊ ၸႂ်ႉမၢၵ်ႇၼူၾႆး ယိုဝ်းတိုၵ်းသႂ်ႇ ႁွင်ႈၵၢၼ်ၾၢႆႇပွႆႇ ငဝ်းႁၢင်ႈသဵင်ဢီႊရၢၼ်ႊ၊ ဝၢႆးၼၼ်ႉ ငဝ်းႁၢင်ႈသဵင်ၼၢင်းယိင်း ဢၼ်တိုၵ်ႉၸတ်းလၢႆးၵၢၼ်ၶၢဝ်ႇယူႇ လႆႈငိူင်ႉပၢႆႈဢွၵ်ႇၵႂႃႇၼၼ်ႉ ၽႄႈၸွတ်ႇမႃးၼိူဝ်သိုဝ်ႇတူင်ႇဝူင်း။

မိူင်းဢိတ်ႉသ်ရေႊတႄႉ လၢတ်ႈဝႃႈ – ႁွင်ႈၵၢၼ်ငဝ်းႁၢင်ႈသဵင်ၼၼ်ႉ ၾၢႆႇတပ်ႉသိုၵ်းမိူင်းဢီႊရၢၼ်ႊ ၸႂ်ႉတႃႇၵၢၼ်ၵပ်းသိုပ်ႇတပ်ႉသိုၵ်းဝႆႉ – ဝႃႈၼႆ။

ၽွင်းဢိတ်ႉသ်ရေႊတင်း ဢီႊရၢၼ်ႊ ပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇၼႆႉ လုမ်းၽွင်းတၢင်မိူင်းၶႄႇ ပိုၼ်ၽၢဝ်ႇတိုၵ်းသူၼ်း ႁႂ်ႈၵူၼ်းမိူင်းၶႄႇ ၸိူဝ်းၵႂႃႇမီးၼႂ်းမိူင်းဢိတ်ႉသ်ရေႊ ငိူင်ႉဢွၵ်ႇ၊ သင်ပဵၼ်လႆႈ ႁႂ်ႈငိူင်ႉဢွၵ်ႇၵႂႃႇတၢင်း မိူင်းၵျေႃႊတၢၼ်ႊ ဝႃႈၼႆ။