ပူၼ်ႉမႃး မိူဝ်ႈဝၼ်းတီႈ 13/06/2025 ယၢမ်းၵၢင်ၼႂ် မိူင်းဢိတ်ႉသ်ရေႊ တမ်းၽႅၼ်ၵၢၼ်သိုၵ်း Rising Lion သေ ယိုဝ်းၵွင်ႈလူင်သႂ်ႇ ၼႂ်းမိူင်းဢီႊရၢၼ်ႊ ႁၢဝ်ႈႁႅင်း၊ ၾၢႆႇတပ်ႉသိုၵ်းမိူင်း ဢီႊရၢၼ်ႊၵေႃႈ ၸႂ်ႉၶိူင်ႈတရူၼ်ႊ UAVs – 100 ပၢႆသေ ယိုဝ်းတိုၵ်းၶိုၼ်းမိူင်းဢိတ်ႉသ်ရေႊ ဝႃႈၼႆ။

ၽွင်းပၢင်တိုၵ်းၼႆႉ ၽူႈမီးၸၼ်ႉ ၾၢႆႇၵႅတ်ႇၶႄတပ်ႉပႂ်ႉႁူမ်ႇလူမ်ႈ ၾၢႆႇၵၢၼ်လုၵ်ႉၽိုၼ်ႉ ဢိတ်ႊသလၢမ်ႊမိတ်ႉ ဢၼ်ပဵၼ်ၸုမ်းႁႅင်းယႂ်ႇ ၼႂ်းတပ်ႉသိုၵ်းဢီႊရၢၼ်ႊ လူႉတၢႆ၊ လိူဝ်ၼၼ်ႉ ၸဝ်ႈႁူႉမေႃပၢႆးသၢႆႊၼိဝ်ႊၶလီႊယိူဝ်ႊ ဢီႊရၢၼ်ႊၵေႃႈ လူႉတၢႆၵႂႃႇ ဝႃႈၼႆ။

ယွၼ်ႉပၢင်တိုၵ်းၼႆႉသေ ၾၢႆႇမိူင်းဢိတ်ႉသ်ရေႊ လႆႈပိုၼ်ၽၢဝ်ႇဝႆႉ ပဵၼ်ငဝ်းလၢႆးၶိုၵ်ႉၶၵ်ႉ။

မိူင်းဢီႊရၢၼ်ႊ လၢတ်ႈဝႃႈ – ဢိတ်ႉသ်ရေႊၼႆႉ ဢဝ်ႁူင်းသဝ်းၵဵဝ်ႇၵပ်းၼမ်ႉမၼ်းမဵၼ်လႄႈ ၼိဝ်ႊၶလီႊယိူဝ်ႊ ႁဵတ်းပဝ်ႉမၢႆၵၢၼ်သိုၵ်းသေ ယိုဝ်းတိုၵ်း။ ၼႂ်းဝၼ်းတီႈ 15 လိူၼ် ၵျုၼ်ႊ ယၢမ်းၵၢင်ၼႂ်ၸဝ်ႉ ၾၢႆႇဢီႊရၢၼ်ႊ ၸႂ်ႉၶိူင်ႈတရူၼ်ႊ ယိုဝ်းတိုၵ်းၶိုၼ်းမိူင်းဢိတ်ႉသ်ရေႊႁၢဝ်ႈႁႅင်း။ လိူဝ်ၼၼ်ႉ သင်ဝႃႈ ဢိတ်ႉသ်ရေႊ တိုၵ်ႉသိုပ်ႇယိုဝ်းတိုၵ်းၼႆၸိုင် ၾၢႆႇမိူင်းဢီႊရၢၼ်ႊၵေႃႈ တေၽိူမ်ႉၵၢၼ်သိုၵ်းသေ တိုၵ်းတေႃးၵႂႃႇၶိုၼ်းၼႆ တပ်ႉပႂ်ႉႁူမ်ႈလူမ်ႇမိူင်းဢီႊရၢၼ်ႊ IRGC လၢတ်ႈဝႆႉၼင်ႇၼႆ။

လွင်ႈဢိတ်ႉသ်ရေႊ ယိုဝ်းတိုၵ်း မိူင်းဢီႊရၢၼ်ႊၼႆႉ ပဵၼ်လွင်ႈပူၼ်ႉပႅၼ် ၼႃႈတီႈလႄႈၾၢႆႇႁူမ်ႇလူမ်ႈ၊ ၾၢႆႇၽွင်းငမ်းမိူင်းဢီႊရၢၼ်ႊယဝ်ႉၼႆ ၽွင်းတၢင်မိူင်းၶႄႇ ၵဵဝ်ႇၵပ်းၸၢတ်ႈၸိုင်ႈလုမ်ႈၾႃႉ လၢတ်ႈၵႂႃႇတီႈပၢင် ၵုမ်ၶိုၵ်ႉၶၵ်ႉၼင်ႇၼႆ။

မိူင်းၶႄႇတင်း မိူင်းဢီႊရၢၼ်ႊၼႆႉ ပဵၼ်မိူင်းႁူမ်ႈၽၢၵ်ႈ ၵၢၼ်မၢၵ်ႈမီးၵၼ်ဝႆႉ။ မိူင်းဢဵၼ်ႁႅင်းယႂ်ႇလူင် ဢမေႊရိၵၼ်ႊတႄႉလၢတ်ႈဝႃႈ တီႈပၢင်တိုၵ်းၼၼ်ႉ မိူင်းဢမေႊရိၵၼ်ႊ ဢမ်ႇၶဝ်ႈပႃးသင်ၸွမ်း ဝႃႈၼႆ။

ပၢင်တိုၵ်း မိူင်းဢိတ်ႉသ်ရေႊတင်း ဢီႊရၢၼ်ႊၼႆႉ တေႃႇထိုင်မိူဝ်ႈၼႆႉ ဝၼ်းတီႈ 16 ယၢမ်းၵၢင်ၼႂ် တိုၵ်ႉသိုပ်ႇပဵၼ်ႁၢဝ်ႈႁႅင်း။ တီႈဝဵင်းလူင် ၵျေႊရုသလိမ်ႊ၊ တႄးလ်ဢပိတ်ႊ ဢိၵ်ႇထႅင်ႈလၢႆဝဵင်း ၼႂ်းမိူင်းဢိတ်ႉသ်ရေႊ လႆႈပိုၼ်ၽၢဝ်ႇပၼ်ၾၢင်ႉ ၽေးသၢႆၵၢင်ႁၢဝ်၊ ယွၼ်ႉပိူဝ်ႈ မိူင်းဢီႊရၢၼ်ႊ ၸႂ်ႉၶိူင်ႈမၢၵ်ႇၼူၾႆးတင်းၼမ် ယိုဝ်းတိုၵ်းမႃး – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။