ယႃႈမဝ်းၵမ် ဢၼ်တေႃႉဢဝ်တၢင်း ၸႄႈဝဵင်းၵေးသီး ဝဵင်းမႂ်ႇဝၢၼ်ႈႁႆးမႃး ဢၢၼ်းသူင်ႇၸူး မိူင်းရၶႅင်ႇၼၼ်ႉ ၺႃးၶႃႈႁၢပ်ႇၵၢၼ် တႂ်ႈသိုၵ်းမၢၼ်ႈ တီႉၺွပ်းလႆႈတီႈၼိူဝ်သဵၼ်ႈတၢင်းၵႂႃႇဝဵင်းပျီႇ – ဢွင်ႇလၢၼ်ႇ မိူင်းမၢၼ်ႈတူင်ႈပဵင်း ၵိုင်ႇငိုၼ်း 8 ပီႊလီႊယၼ်ႊပျႃး ၼႆယဝ်ႉ။
မိူဝ်ႈဝၼ်းတီႈ 04/06/2025 ယၢမ်းၵၢင်ဝၼ်း 12 မူင်းၶိုင်ႈ ၸဝ်ႈၼႃႈတီႈ ပလိၵ်ႈၾၢႆႇၵႂၢတ်ႇလၢင်ႉ ၽဵဝ်ႈမူၺ်ႉယႃႈမဝ်းၵမ်ၶဝ် လႆႈႁူႉၶၢဝ်ႇဝႃႈ မီးၵၢၼ်တေႃႉသူင်ႇယႃႈမဝ်းၵမ် လုၵ်ႉမိူင်းတႆး လူင်းမႃးတၢင်းထုင်ႉပဵင်းၼႆလႄႈ ၸင်ႇႁူမ်ႈၵၼ်တင်း သိုၵ်းမၢၼ်ႈ တီႉၺွပ်းလႆႈၵႃး TOYOTA PRADO လမ်းၼိုင်ႈ၊ မီးၵူၼ်း 4 ၵေႃႉ တေႃႉဢဝ်ယႃႈမႃး တႃႇ 5 သႅၼ်မဵတ်ႉ။
ယွၼ်ႉပလိၵ်ႈၶဝ် ၵူတ်ႇထတ်းၵူၼ်းၸိူဝ်းသီႇၵေႃႉၼၼ်ႉသေ ၶိုၼ်းၵႂႃႇသွၵ်ႈႁၼ် ယႃႈမဝ်းၵမ်ထႅင်ႈ တႃႇ 42.885 သႅၼ်မဵတ်ႉ တီႈႁိူၼ်းၶၢတ်ႈ လင်ၼိုင်ႈ ၼႂ်းသဵၼ်ႈတၢင်းၽြႃးလူင်၊ ပွၵ်ႉၵျွင်းၵျီးဢူဝ်းတၢၼ်း၊ ဝဵင်းပျီႇ။
ၵူၼ်းၸိူဝ်းတေႃႉဢဝ်ယႃႈမဝ်းၵမ်မႃးၼႆႉ ပဵၼ်ဢွင်ႇၸေႃႇဢူး၊ ပူဝ်ႇပူဝ်ႇဢွင်ႇ၊ သိၼ်ႇတူႇဢွင်ႇ၊ ဢွင်ႇပျေႉၽဵဝ်းသေ ပေႃႈလဵင်ႉဢၼ်ၵေႃႉၸၢင်ႈၶဝ်တေႃႉမႃးၼၼ်ႉ ၸိုဝ်ႈႁွင်ႉ တဵင်းထေးလႄႈ မေးၼၢင်း ၼၢင်းၶမ်းၽဵင်ႇ။ ၾၢႆႇပလိၵ်ႈၶဝ် တီႉၺွပ်းလႆႈၵူၼ်းၸိူဝ်းၵဵဝ်ႇၶွင်ႈတင်းၵၢၼ်တေႃႉသူင်ႇ ယႃႈမဝ်းၵမ်ဝႆႉ တင်းသဵင်ႈ။
လႆႈႁူႉဝႃႈ ယႃႈမဝ်းၵမ်ၼႆႉ သိုဝ်ႉဢဝ်မႃးတီႈ ၸၢႆးထုၼ်းၸီႇလႄႈ မေးၼၢင်း ၸိုဝ်ႈႁွင်ႉ ၼၢင်းသူၺ်ႇယဵၼ် (ႁိုဝ်) ၼၢင်းမိူင်းၶမ်း (ႁိုဝ်) ၼၢင်းၶမ်းၵျႃႇ ၵေႃႉယူႇတီႈဝဵင်းမႂ်ႇဝၢၼ်ႈႁႆး။ ယႃႈမဝ်းၵမ်ၼႆႉ သိုဝ်ႉဢဝ်မႃး တၢင်း ၼႂ်းၸႄႈဝဵင်ၵေးသီး ဝဵင်းမႂ်ႇဝၢၼ်ႈႁႆးသေ တေႃႉမႃးတၢင်း ဝဵင်းလိူဝ်ႇ (မၼ်းတလေး)၊ လုၵ်ႉဝဵင်းလိူဝ်ႇဢၢၼ်းသူင်ႇၸူး ဝဵင်းတႃႈၵုင်ႈသေ သိုပ်ႇတေႃႉသူင်ႇၵႂႃႇတၢင်း မိူင်းရၶႅင်ႇ ဝႃႈၼႆ။
လွင်ႈၼႆႉ ၸဝ်ႈၼႃႈတီႈပလိၵ်ႈ ၾၢႆႇၵႂၢတ်ႇလၢင်ႉၽဵဝ်ႈမူၺ်ႉ ယႃႈမဝ်းၵမ်ၶဝ် တေသိုပ်ႇၵူတ်ႇထတ်း ၵူၼ်းၸိူဝ်းၵဵဝ်ႇၶွင်ႈၸွမ်းသေ ဢဝ်လိူင်ႈၵႂႃႇ ႁႂ်ႈပေႃးထိုင်တီႈသုတ်း ၸွမ်းၼင်ႇပၵ်းပိူင်မၢႆ ဝၢၼ်ႈမိူင်းမီးဝႆႉၼၼ်ႉၼႆ ႁွင်ႈၵၢၼ် ၾၢႆႇၵူတ်ႇထတ်းယႃႈမဝ်းၵမ် မိူင်းမၢၼ်ႈ CCDAC လႄႈ ၸုမ်းပလိၵ်ႈမိူင်းမၢၼ်ႈၶဝ် ပိုၼ်ၽၢဝ်ႇဢွၵ်ႇဝႆႉ ၼင်ႇၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ