MTA ၸုမ်းၶုၼ်သႃႇၶၢမ်ႇယွမ်းတူဝ် ဝၢင်းၶိူင်ႈၶဝ်ႈၸူးၸုမ်းသိုၵ်းမၢၼ်ႈ ၶႂၢၵ်ႈမိူင်းၵႂႃႇၸိူင်ႉၼၼ်ၼႆႉပႅၵ်ႉ သမ်ႉၽူႈႁၵ်ႉၸၢတ်ႈတင်းလၢႆ ဢွၼ်ၵၼ်ဝႃႈလီသေးလၢႆႁႅင်းဢၼ်ယႂ်ႇလူင်ၼမ်ၼႃၼၼ်ႉၼႆသေတႃႉၵေႃႈ ထႅင်ႈၽၢႆႇ ႞ တၢင်း ႞ ၼႆႉ ပဵၼ်ဢၼ်လီတႃႇၵၢၼ်မိူင်းတႆးပိူင် ႞ ၵေႃႈ ဝႃႈလႆႈယဝ်ႉ။

ၵႃႈပူၼ်ႉမႃးၶၢဝ်းတၢင်း 10 ပီပၢႆၼႆႉ ႁဵတ်းဢီႈသင်ၵေႃႈ ၵုမ်ႇဢဝ်သဵၼ်ႈတၢင်းမၼ်းတိူၵ်ႈတၼ်ပႅတ်ႈတိၵ်း တိၵ်းၼၼ်ႉ ပဵၼ်ဢၼ်မီးႁူးဢွၵ်ႇဢဝ်သဵၼ်ႈတၢင်းပိုတ်ႇပၢင်ႇၵႂႃႇၼႆၵေႃႈ ဝႃႈလႆႈၵမ်းလဵဝ်ယဝ်ႉ။

ၵႃႈပူၼ်ႉမႃးၼႆႉ ဢဝ်ၸိုဝ်ႈၼဝ်ႈယႃႈမဝ်းၵမ်သုမ်ႇတဵင်မုင်းငမ်းမႃး ၼိူဝ်ၵၢၼ်ၸိူဝ်ႉၸၢတ်ႈႁဝ်းသေ ဢဝ် ႁဝ်းႁူၼူၵ်ႇ၊ တႃမွတ်ႇ၊ ၶႅၼ်ႁၵ်း၊ တိၼ်ပုတ်း၊ သူပ်းဢႃႉမႃး။

(ပိူၼ်ႈလၢတ်ႈသင်ၵေႃႈ ႁဝ်းဢမ်ႇပွင်ႇ၊ ႁဝ်းဢမ်ႇထွမ်ႇ၊ လၢတ်ႈႁွင်ႈၶူးပွင်ႇႁူးၵူၼ်ႈ၊ လၢတ်ႈႁွင်ႈပႃလမ်ပွင်ႇ ႁမ်ပလွင်ႈ၊ ပိူၼ်ႈႁဵတ်းသင်ၵေႃႈ ႁဝ်းဢမ်ႇႁၼ်၊ ႁဝ်းဢမ်ႇတူၺ်း၊ ႁဵတ်းသင်ႁႂ်ႈမိူၼ်ၼၼ်ႉၼႆသေတႃႉ ႁဵတ်းလၢႆးလုၵ်ႉၽိုၼ်ႉၵၢၼ်ၸိူဝ်ႉၸၢတ်ႈ ဢမ်ႇၸႂ်ႈလၢႆးလုၵ်ႉၽိုၼ်ႉ ဢမ်ႇၸႂ်ႈၵၢၼ်ၸိူဝ်ႉၸၢတ်ႈ။

မူၵ်းယူႇၼႂ်းထမ်ႈတူဝ်ၵဝ်ႇသေ လပ်းတႃၽႃႇတေႃမင်ယူႇမႅၵ်းမႅၵ်း။ ႁဝ်းတႅမ်ႈလိၵ်ႈၸူးပိူၼ်ႈဢမ်ႇတွပ်ႇ၊ ဢမ်ႇထိုင်မိုဝ်းပိူၼ်ႈ။ တႅမ်ႈဢွၵ်ႇလၵ်းၼမ်းမူႇပိူင်မၢႆမီႈသဵၼ်ႈတၢင်းၼႃႈၵၢၼ်လၢႆးၶွတ်ႇၽွတ်ႈ ဢၼ် ႞ ယဝ်ႉ ဢၼ် ႞ ၵေႃႈ ဢဝ်ယၢင်ႈၶႃႇမႃးတိၵ်းတိၵ်း၊ ဢမ်ႇလႆႈဢဝ်ၸႂ်ႉယိပ်းႁဵတ်းၸွမ်းသေပွၵ်ႈ။ ယိုၼ်းမိုဝ်း ႁွင်ႉပိူၼ်ႈၵေႃႈၽႂ်ဢမ်ႇမႃး၊ ႁဝ်းၶႂ်ႈၵႂႃႇတီႈလႂ်ၶဝ်ႈၸူးမိူင်းလႂ်ၼႂ်းလုမ်ႈၾႃႉၵေႃႈ ဢမ်ႇၵႂႃႇလႆႈ၊ ဢမ်ႇလႆႈၵႂႃႇ၊ လႆႈၵႂႃႇမႃးၵေႃႈ ဢဝ်ပဵၼ်ၼမ်ႉထွၵ်ႇသၢႆး၊ ႁဝ်းလၢတ်ႈသင်ပိူၼ်ႈဢမ်ႇထွမ်ႇဢမ်ႇႁပ်ႉ၊ ဢမ်ႇၶဝ်ႈႁူပိူၼ်ႈ၊ ဢၼ်လၢတ်ႈ၊ ဢၼ်တႅမ်ႈ၊ ဢၼ်ႁဵတ်း၊ ဢၼ်ပဵၼ်ယူႇမီးယူႇ 4 လွင်ႈ 4 ပိူင်ၼႆႉ ဢမ်ႇၶဝ်ႈဝွင်ႇမႅၼ်ႈႁွႆႈၵၼ် သေ ပိူင်ၵႂႃႇၵေႃႉႁူးၵေႃႉတၢင်း)။

ဢၼ်ပဵၼ်မႃးလွင်ႈၼူၵ်ႇ၊ မွတ်ႇ၊ ႁၵ်း၊ ပုတ်း၊ ဢႃႉ ၸိူဝ်းၼႆႉ ၵွပ်ႈပိူဝ်ႈၸိုဝ်ႈၼဝ်ႈမဵၼ်တူႇလႄႈ ဢဝ်သဵၼ်ႈ တၢင်းႁဝ်းပၼ်ႇတူင်ႇထူင်ႇထူၺ်ႈၼူင်ႇၼူၺ်ႈ တိူၵ်ႈတၼ်မႃးယဝ်ႉ။

ယၢမ်းလဵဝ် ဢၼ်မီးႁူးဢွၵ်ႇႁၼ်သဵၼ်ႈတၢင်းပိုတ်ႇပၢင်ႇၸိုၼ်ႈၸၢင်ႇမူတ်းသႂ်ၵႂႃႇၼၼ်ႉ – ၸွင်ႇႁဝ်းတေ မေႃသိုပ်ႇတႆႇပႆယၢင်ႈၸိုၼ်ႇၽၢင်ႈၶိုၼ်ႈၼႃႈသေ ဢွၵ်ႇပူၼ်ႉမူၼ်ႉလွတ်ႈၵႂႃႇလႆႈႁိုဝ်?

မီးတီႈၼမ်ႉလႂ်၊ ၼမ်ႉၵတ်ႉ၊ ၼမ်ႉၼၵ်း၊ ၼမ်ႉတွၼ်းႁဝ်းလႄႈ လွင်ႈၶၢမ်ႇယၢပ်ႇတၢင်းၶတ်းၸႂ်ဢၼ်ႁဝ်း ႁတ်းၸုၼ်ႉသုၼ်ႇတူဝ်ၼၼ်ႉၵူၺ်းယဝ်ႉ။

သႅင်လိူဝ်ၶိူဝ်း (တၢင်ႉယၢၼ်း) 01/04/1996

ၶေႃႈမုလ်း – ပပ်ႉၵွၼ်းၶေႃ မၢႆ 141 ပီ 1996